وتار
لەنێوان سویدو كوردستاندا

لەتیف فاتیح فەرەج


دەروازە:
بە مەبەستی بەشداری لە كۆنفراسێكی تایبەت بە ئازادی رۆژنامەنووسی و یادی سەردەشت عوسمان و كاوە گەرمیانی و سۆرانی مامە حەمەو شەهیدانی بیروڕای ئازاد چووینە یۆتۆبۆری، ئەو شارەی ژمارەیەكی زۆر رەوەندی كوردی تێدایە، كوردەكانی ئەوێ‌ هەرە زۆریان، یان هەموو ئەوانەی ئێمە بینیانمانن، خەڵكانی دڵسۆزو خەمخۆری ئازادی و عەدالەت و یەكسانی و گەیشتن بە ئامانجی كۆتایی ئەو گەلەی هەمیشە چەوسێنراوەتەوە، لەوێ‌ قسەو باسی زۆر كرا، هەموو خەون بەوەوە دەبینن، بەیانیەكی باشتر ببینن، سبەینێیەك خۆری ئازادی و خۆخاوەنی تیا هەڵبێت، ئەوان هەرە زۆریان سەرەڕای ئەوەی لەوێن دڵیان لێرەیە، من لەم كورتە نوسینە رۆژنامەوانیەدا دیدو سەرنجی خۆم دەخەمەڕوو.
سوید وەك بەهەشتی خودا:
هەر كە لە فڕگەی ئەرلاند لە ستۆكهۆڵم دادەبەزی درك بە جیاوازییە زۆرەكە دەكەیت، راستی بۆمن ئازارەكە لەوێوە دەستپێدەكات، ئێ‌ خۆ ئەم وڵاتە نەوت و گازیشی نیە بیفرۆشێ‌، بەڵام ژیانی تیایە، جوڵەو بەردەوامی تیایە، لە فڕگەوە دەرچوین بەرەو ناوشار، ئەوێ‌ وەك بەهەشتی خوداوەند پڕە لە دارو درەخت و گوڵ و چەم و ئاووباخ، مرۆڤ سەرسام دەبێت لەو هەموو تونێڵ و جادەو بان و هێڵی شەمەندۆفێرو میترۆیە، شاخی گەورە گەورە هێنراوەتە خوارەوەو ژیانی تیا دروستكراوە، لەوێ‌ تەنانەت ئاژەڵ و پەلەوەرەكانیش هەست بە ئاسودەیی و ئارامی دەكەن، لەو بەهەشتی خودایەدا چووینەهەر ماڵێكی كورد دنیایەك رێزو خۆشەویستیان بەسەردا باراندین، من لەبەر ئەوەی رێم پێنەدراوە ناوەكانیان بێنم، هەر ئەوە بەسە كە بڵێم وەك جارانی گوندەكانی گەرمە سێر هیچ كوردێك بۆ میوان لەو سویدە دەرگاكەی دانەخراوەو هەمیشە دەرگاكان وازن، لە هەموو ئەو شارانەی چووم كورد هەر وابوون، هەموو شارەكانیش بەهەشت ئاسا بوون، من نزیكەی ئەمسەرو ئەو سەری سوید چووم، شارەكانی “ ستۆكهۆڵم، یۆتۆبۆری، مالمۆ، كریستینا هامن، ئۆپسالا، سوندس ڤاڵ “ گەڕام، كەس نەپرسیاری ناسنامە دەكات، نە لە خاڵێكی پشكنین راتدەگرێ‌، هەڵبەت من هەر لەوێوە چومە كۆپنهاگن و ڤاسا لە فنلەندا ئەوەش هیچی نەویست، نەك وەك ئەوەی جاری وایە لە خاڵی پشكنینی كەركوك – هەولێر سەعات زیاتر راتدەگرن و كەسیش پێت ناڵێ‌ ببورە، لە كاتێكدا وەزیری ناوخۆی هەرێمی كوردستان ناسنامەی سویدی هەیە .
لەو بەهەشتی خودایە نەكێشەی كارەبا هەیە نەكێشەی ئاو نەكێشەی تەندروستی، نەكێشەی هاتوچۆ، راستی من پرسیاری ئەوەشم كرد كێشەی نیشتەجێبونیش بەو رادەیە نییە كە مرۆڤ لێی بترسێ‌، كەس لەسەر جادە ناخەوێ‌، كەسیش برسێتی نایكوژێ‌، هەموو سەری مانگێكیش بڕی موچەكەت دەخرێتە سەر هەژمارە تایبەتەكەت و یەك سەعات دواناكەوێ‌، مرۆڤ لەوێ‌ هەست بە مرۆیی بوونی خۆی دەكات و دەپرسێ‌ ئەرێ‌ ئێمە لەكوێی ئەم سەر زەمینەداین .
خەونی كوردەكان:
ئەو ماوەیە زۆر دۆست و ئاشنای كۆن و نوێم دیتەوە، هاوڕێ‌ هەبوو دەیان ساڵ بوو نەمبینی بوو بینیم، هەموو كورد خەونێكی هەیە، هەموو ئەو كوردانەی ئەوێ‌، سەرەڕای ئەوەی كە لە ئارامیدا دەژین و ژیانیان پارێزراوە لێ‌ خەونێكیان هەیە، راستی من لە ساڵی 1991وە مەگەر ئەو جارانە بە ئاسودەیی و ئارامی نوستبم كە لە نیشتمانەكەی خۆم نەبوومە، لەوێ‌ مرۆڤ ئاسودەو بێترس دەنوێ‌، بەڵام هەموو خەونی ئەوەیان هەیە ئاخۆ كەی نیشتمانیش دەبێتە ئەو نیشتمانەی هی هەموان و بۆ هەموان بێت، ئەو نیشتمانەی منەت بەسەر خەڵكەكەیدا نەكرێ‌، خزمەتگوزاری هەبێ‌، ئاوی خواردنەوەو كارەبا هەبێ‌، جادەوبانی باشی هەبێت، ئازادی هەبێت و موچە هەبێت، ئاخر لەسوید حكومەت هەر حكومەتێك بێ‌ بەرپرسیارە لە ژیانی خەڵك و قوتی خەڵك لەگەڵ ئەوەش هەر رەخنە هەیە، هەر داوای باشتر دەكرێت، كەسیش لەسەر رەخنە ناكوژرێ‌، هەرچەند لەوێش جاروبار رووداوی كوشتن هەیە بۆ نمونە كوشتنەكەی ئۆڵف پاڵما كە هێشتا جێگەی گفتوگۆیە، كوردی سوید خەونیان هەیەو دەیانەوێ‌ مناڵەكانیان ناسنامەی نیشتمانی راستەقینەی خۆیشیان هەبێت، ئاخۆ ئەو خەونە دێتە دی؟
سویدو ئازادی:
لە سوید ئازادییەكی زۆر هەیە، ئازادییەك كە سنورەكانی كەمتر دەردەكەون، بەڵام ئەمەش جێگەی هەڵوەستەیە، 50 ساڵی تر سویدو وڵاتانی دەوروبەری چیان لێدێ‌، ناكرێ‌ ئەم وتنانە بچنە خانەی رەگەز پەرستییەوە، هەر كات وتنەكان بچنە خانەی رەگەزپەرستییەوە، لێپرسینەوە سەر هەڵدەدات، لەگەڵ ئەوەشدا من سەرنجی ئەوەمدا، ئەمە ئەگەر بە كاڵیش بێت بوونی هەیە، تەنانەت سەرڕەشە كۆنەكانی ئەوێش لە سیمایاندا ئەوە دەخوێنرێتەوە كە حەز بەسەر رەشی تازە ناكەن، ئەمە هەندێ‌ جار لە كورتە نوسینی فەیس بوكیشدا رەنگی داوەتەوە، من هەندێك سەرنجی سەیر دەبینم، خودی سویدیە رەسەنەكانیش لەو بارەیەوە بێكێشە نین، ئەوانیش هەندێ‌ جار دڕدۆنگ و توڕەن، سوید پێویستی بە هەڵوەستەكردنە لەسەر ئەوەی ئازادی تاكوێ‌ هەبێت، ئایە ئەوە ئازادیە كە ئازادی ئەوانی تر پێشێل كات، یان جۆرێك لە توندوتیژی لە ئاخاوتن و هەست و كەوتیدا هەبێت، ئەمە مەسەلەیەكی كەم نییە، جگە لەوەش سوید كێشەی نەبوونی پەیوەندیەكی دروستی كۆمەڵایەتی هەیە، من نازانم لەو بارەیەوە میدیاو حكومەت چی دەكەن، بەڵام كێشەیەكی گەورە هەیە ئەویش ئەوەیە مرۆڤ هەندێ‌ جار كەس نیە قسەی بۆ بكات یان گوێی لێبگرێ‌ .
لە نێوان سویدو كەركوكدا:
لە هەر شارێكی سوید دەیان نەتەوەو رەگەز هەن، لە شارە گەورەكان زیاتر لە هەفتا نەتەوەو رەگەزو ئاین هەن، ژیانیش بەردەوامە، كەس دەستوەردان بەو مانایە لە ژیانی ئەوی تر ناكات، كەس ئەوی تر بە زیاد نازانێ‌، لە گلەیی و گازندە گەڕێ‌ كە لە هەموو دنیا هەیە، لە كەركوك كەمۆكەیەك نەتەوەو ئاین و مەزهەبی جیاواز هەن، كوردو عەرەب لە گەڵ یەك شیعەو سوننە لە گەڵ یەك، توركمان و كورد لەگەڵ یەك و مەسیحی و ئیسلام كەمتر، لەگەڵ یەكتر كێشەیان هەیە، لە نێوان هەنێك لەوانەدا كێشەكە زۆر لەوە قوڵترە كە پێشبینی دەكەین، هەر بۆیە ئاگر خۆشكەرەكان ناویان ناوە “ بەرمیلە بارود” خۆش ئەوەیە لە كەركوك كوردو كوردیش بە هۆی ئایدۆلۆژیەوە یەكتریان خۆش ناوێ‌، وەك چۆن ئەمە بۆ توركمان و عەرەبیش هەر وایە، لە سوید بێ‌ ئەوەی باسی برایەتی بكرێ‌ هەموو دەتوانن، وەك برا لە نێو سیستمی سویدیدا بژین، لە كەركوك هەموو رۆژ لە مزگەوت و كەنیسەو دیوەخان و بارەگای حیزب و كەناڵی ئاسمانی و رۆژنامەو رادیۆدا باسی برایەتی و پێكەوە ژیانی ئاشتیانە دەكرێت و كاری پێناكرێ‌، لەوێ‌ باسەكە نیەو كاری پێدەكرێ‌، لێرە باسەكە هەیەو كاری پێناكرێ‌.
بەزەیی بە خۆداهاتنەوە:
لەوێ‌ باسی ئەوەیان بۆ كردم كە پێگەی میدیاكارو رۆژنامەنووس چەند گرنگە لەو وڵاتە، باسی بایەخی میدیاو میدیاو رای گشتیان بۆ كردم، بیرم لەوە كردەوە ئێمە لێرە لە چ دۆخێكداین و ئەوان لەوێ‌ لە چ بارێكدا، ئاخر لەوێ‌ تا رەخنەی باشتر هەبێ‌ رای گشتی باشتر دروست دەبێ‌، لەوێ‌ حكومەت و دەسەڵات بایەخ بە دیدی میدیاو نوسەران دەدەن، لای ئێمە بایەخ بەشەرتی ملدانە مرۆڤ ملبدات و سەركزكات و بە حەزی دەسەڵات بنووسێ‌ زۆر باشەو بە پێچەوانەوە كەسێكی ئاژاوەچی و تێكدەرە، بیرم لەوە كردەوە چۆن چەند رۆژ دوای راپەڕینێ‌ كە خۆم یەكێ‌ بووم لە ئەكتەرە لاوەكانی، كەچی لە ئاكامی رەخنەگرتنم لە سیاسەتی بەرەی كوردستانی هەر بەرپرس بوو پێیدەوتم تۆ تابوری پێنجەمی، راستی درەنگتر زانیم تابوری پێنجەم چییە، تومەز تابوری پێنجەم ئەوانەبون كە بە گیرفانی بە تاڵەوە هاتنەوەو نیشتمانیان رووتاندەوە، خوایە بیست و پێنج ساڵە نیشتمان دەڕوتێنرێتەوە، لە1991ەوە من لەم نیشتمانە دەژیم.

‌ 1971 جار بینراوه‌
28/05/2016
Print Friendly and PDF
بابەتەکانی تری نوسەر
Telerik
راپرسی
کێ بەرپرسە لەم دۆخەی ئێستای کوردستان؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved