وتار
حزبایەتی لەشێوەی نیكاحدا

كارۆخ عوسمان


لەپێشدا با بپرسین ئاخۆ كام حزبی كوردستان لەگشت قۆناغە جیاوازەكان حزبی پێش خۆی تێپەڕاندووە؟ هەر لەمەسەلەی دیسپلین، جێبەجێكردنی مەبادیئ و پەیڕەوی ناوخۆ، هەتا دەگاتە پڕۆتۆكۆڵە سیاسیەكانی ناو حزب.
لەمێژووی حزبایەتی كوردستاندا هیچ حزبێك نەبووە چەندینجار پێچەوانەی ئەجێندای ئەوەلی خۆی، خوار نەڕۆیشت بێت. تا ئەم ساتەش هیچ حزبێك نەبووە دەستورو پەیڕەوی ناوخۆیی پێشێل نەكردبێت. هەربۆیەش لەحكومڕانیدا راهاتوون كە پێشێلی دەستورو یاسا بكەن، بەم پێشێلكاریە بەردەوامانەش نە خەڵك ئاسودەكراوە نەخاكیش پارێزراو بووە.
ئەسڵی قسەكەمان تێنەپەڕاندنی ئەویترە، واتا حزبەكان نەیانتوانیوە یاخود بەئەنقەست نەیانویستووە بەتەواوی لەوانی پێش خۆیان جودابن، جودایی لەجەوهەری ئەجێنداو پێگەیاندنی نوخبەیەكی تێگەیشتووی مۆدێرن.
تەواوی ئەحزابی سیاسی كوردی مەكتەب یاخود ئۆفێسێكی رێكخستنیان هەیە بەڵام تاكی ئەندام بەسەلیمی رێكناخەن، رێكی ناخەن: بەو واتایەی كە ببێتە كاراكتەرێكی كاریگەری مەیدانەكە، بەڵكو بەجۆرێك تێیدەگەیەنن كە ئیتاعەی حزب كاری ئەوەلی و واجیبە، هەرشتێك یاخود كەسێكیش هاوڕانەبێت لەگەڵ حزب بەدوژمن دەبینرێت.
لەناو گشت حزبەكاندا، (بەنیسبەوە) لەمپەڕ لەبەردەم تێفكرینی خودی تاكی ئەندام دادەنرێت، ئەوكات ئەندامی حزبەكە جگە لەئاراستەكردنەكەی ناتوانێ بەهیچ لایەكیتردا بڕوانێت، ناوێرێت ئاستی بیركردنەوەی حزبەكەی تێبپەڕێنێت و ناشزانێ لەدەرەوەی حزبەكەیدا چیتر هەیە، بەهۆی جۆشدانە ناتەندروستیەكەشی تەنانەت لەچواردەوری خۆی زیاتر هیچ خولێكیتر نادات. بەجۆرێك توێنراوەتەوە مەعدەنێكی لێ بەرهەمهاتوە بەخواستی حزب، ئەم تێڕوانینە بۆ لە ٨٥٪‏ی ئەندامانی حزبەكان راستە.
چۆن نیكاح و زەواج گرێدەدرێت پابەندبوونی ئەندامی حزبەكانیش بۆ گشت بڕیارێك هەروایە، ئەندام وا تێگەیەنراوە كەبەرهەڵستیكردنی تەنها بڕیارێكی حزب كە لەئەسڵدا پێشێلێكی رەهای پەیڕەوە بەخیانەت دێتە هەژمار، یان جیابوونەوەی ئەندام لەحزب وەك جیابوونەوەی نێرو مێی نێو ئایینی مەسیحیە.
هەرچەندە جیابوونەوەی نێرو مێ لەشەریعەتی ئەدیانی سەماویدا رێی پێدراوە بەڵام بەچاوێكی كەمەوە سەیریش دەكرێت، لەناو حزبە كوردیەكانیشدا جگە لەسەیركردنە كەمەكە تەنانەت پەلاماریش دەدرێت و تەشهیر و سوكایەتیشی پێدەكرێت، بۆیە ئەندامێتی لەحزبدا بەگرێبەستێكی نیكاحی وەسف وەردەگرێت كەخودی ئەندامی حزبەكەش بەوجۆرە نیكاحە حزبایەتیە رەزامەندەو بەنیسبەی ئێجگار زۆری كۆمەڵگە رەوایەتی بەمجۆرە لەكاری حزبایەتی دەدەن، كەچی لەبنەڕەتدا ئەندام بوون لەحزب تا ئەو قۆناغەیە كە بڕیارو ئەجێندای حزب لەگەڵ قەناعەت و روئیای تاكەكە تەریب دەڕۆن، ئەگەر تاكی ئەندام متمانەی بەحزبەكەی نەما پێویستر لەمانەوە تەریك بوونیەتی.
ئەگەر ئەم رەهەندە جێی نەگرت ئەوكات حزبێكی تۆتالیتاری و تاكێكی عەبد دێتە وجود، ئەو تاكە خۆی وەك مارەبڕاوێكی نیكاحی لەناو حزبدا دەبینێتەوە كە ئاسان و بێ گرفت ناتوانێ لێی جوداببێتەوە. هەر بۆیە حزبی نوێ كە روئیای نوێی بۆ حوكمڕانی هەبووە نەیتوانیوە لەڕێی كێشكردنی ئەندامانی حزبە دەستەڵاتدارەكان نفوزی پتر بكات تا ئاستی ئەوەلی.
ئەم تێڕوانینە چەوتەی ئەندامی نیكاحكراو لەناو حزبی نوێشدا وجودێكی بەرچاوی هەیە، هەركەسێ ناوی ئەندامی لێنراوە یان بەكادری حزب ناسراوە توانای تێپەڕاندنی ئەدای بەدو ناحەزی حزبەكەی نیە، ئەمەش هەر بەنیسبەیە.
لێرەدا شتێكمان بۆ روون دەبێتەوە دەربارەی حزبی ركابەری حوكم، حزبە ركابەرەكانیش لەم قۆناغەدا هەمان بنەماكانی ئەندامێتی حزبە سوڵتە رەهاكان تەتبیق دەكەن، هەر ئەندامێك ناڕەزایەتی هەبێت یاخود بەهۆی لێك دووركردنەوەی ئاستی زانین و مەعریفی خۆی و دونیابینی و ئەجێندای حزبەكەی تەریك ببێت یا دەربچێت لەحزب، تەواوی مەنزومەی حزب دەكەوێتە دژایەتیكردنی و بەخائین و ناپاك و موڕتەد ناوی دەبەن بەقەسدی نابوتی كردنی كەسی ئەندامی دەرچوو، بەبێ حورمەت دانان بۆ رۆژانی پێكەوەیی، هەر بۆیە حزبی نوێی ركابەر نەیتوانیوە رێژەی زۆری ئەندام و كەوادری حزبی سوڵتە رابكێشێت، چونكە نیكاحكراوەو ناتوانێ لێی دەربچێت، ترسی ئەوەشی هەیە كە ئەگەر بڕوات بەرەو حزبی نوێی ركابەر لەوێش ناوی بزڕێنرێت كاتێ بڕواكانی ئاستی حزب دەبڕن.
لەئێستادا ئەوانەی لەبزوتنەوەی گۆڕان دەردەچن لەلایەن نیسبەیەكی زۆری ناڕێكخراوی ناپەروەردەیی سیاسی (ماوە) تەخوین دەكرێن بەخائین و سیخوڕو نەفەس كورت. كەچی بێ ئاگان لەوەی كەتەواوی سەركردایەتی گۆڕان لەیەكێتی جیابووەوە، بەشێكیش لەم سەركردایەتیە بۆ دامەزراندنی یەكێتی لەپارتی جیابوونەوە. كەواتە بەبڕینی سێ حزب ئێستا سەركردەی گۆڕانن.
٩٠٪‏ی ئەندام و لایەنگرو هەواداری گۆڕان لەیەكێتی جیابووەوە، ئەگەر تەخوین بەڕاست بزانن بۆ ئەوانەی ئێستا كە لەگۆڕان جیادەبنەوە دەبێ حەق بەو ئەندامە ناپەروەردەییانەی یەكێتیش بدەن كە تەخوینی جیابووەوەكانیان دەكرد. بۆ پارتیش ئەمە هەر راستەو بۆ ئیسلامیەكانیش كە حزبی دایكیان بزوتنەوەی ئیسلامیە هەر راستە.
لەئەسڵدا حزبی بوون نیكاح نیە تا پابەندبوون هێندە تۆخ بێت كە تاكی ئەندام زاتی لێ دەرچوون و جیابونەوە نەكات. تاكو ئەم فۆڕمەی حزبایەتیش لەكاری سیاسیدا تەڵاق نەدرێت نەحوكمڕانی رەشیدو نەدەوڵەتی هاوڵاتی و نەكۆمەڵگەیەكی وشیار دروست نابن.چونكە حكومەت و ئیدارەی وڵات حزب پێكی دەهێنێت، حزبەكانیش كەوادر بەبێ پەروەردەی تەندروست دەخزێننە ناو حكومەت.

‌ 214 جار بینراوه‌
09/03/2019
Print Friendly and PDF
بابەتەکانی تری نوسەر
Telerik
شوان داودی - گۆشەی لەژێر چاویلكەوە
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟
راپرسی
کێ بەرپرسە لەم دۆخەی ئێستای کوردستان؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved