وتار
بەهاری عەرەبی و گوزەرێكی سەرپێیانە بەبەهاری هەڵەكانی جەزا چنگیانیدا

موعتەسەم شوانی


2-2
10. دكتۆر جەزا لەلاپەڕە 148و149دا دەلێت (ئینگلیزەكان جەلالیان كرد بەسیخوڕ بەسەر مەلا مستەفاوە، نەك لەبەر گۆڕینی ئاوزانی سیاسی مەلا بەڵكو بۆداتەپینی هەموو چالاكیەك و داتەپینی كۆمەڵگای كوردی (جەلال تاڵەبانی و عبدالسلام عارف)هەردوكیان سیخوڕی بەریتانی بوون. ئێستاشی لەسەر بێت و هەڵبژاردنیشی وەك سەرۆكی عێراق لەسەر هەمان سیناریۆی سیخوڕی كۆنە) هەروەها لەلاپەڕە84دا دەلێت(رۆژئاوا (جیهانی یەكەمی سەرمایەداران ) گەرەكیانە هەمیشە كۆمەڵگاكانی ڕۆژهەڵات لەزۆنگاوی گەوجایەتی وگرفتدا بژین دژی پرۆژە سیاسی و نەتەوەی ونیشتمانیەكانی ناصر بوون) . كەكەسێك تۆمەتێكی بێبەڵگە بۆكەسێكی دیكە هەڵبەستێت متمانەی خۆی لەدەست دەدات پێش هەموو شتێك، نازانم دكتۆر بەڵگەكەی چییە كەئەم دوانە (جەلال تاڵەبانی و عەبدولسەلام عارف) جاسوسی بەریتانی بوون؟ كە دەلێن مەلامستەفا پەیوەندی بەئیسرائیلەوە هەبووە كۆمەلێك وێنە و بەڵگە لەبەردەستە، كەدەلێی جەلال تاڵەبانی سیخوڕی بەریتانیایەبەڵگەت چییە؟ بێگومان بەڵگەت نییە ئەگەرنا باست دەكرد، باشە جەمال عەبدولناصر نیشتمانی ونەتەوەیی و عروبی بوو بەریتانیا و سەرمایەداری دژی بوون، ئەی خێرە عەبدولسەلام نەتەوەیی وعروبیە بەریتانیا پشتگیری دەكەن؟ خۆ عەبدولسەلام پەیوەندی توندی بەجەمال عەبدولناصرەوە بوو؟ هەر جەمال عەبدولناصریش هاوكاری عارف و بەعسیەكانی كرد بۆ كودەتا بەسەر عەبدولكەریمدا لەبەر ئەوەی ناوبراو بروای بەعروبە نەبوو، باشە كاكە دكتۆر كەجەلال تاڵەبانی بوبە سەرۆك كۆمار چۆن بوو؟ بەكودەتا بوو؟ یان بەهەڵبژاردن؟ دیارە هەموو حزبەكانی عێراق جاسوسی بەریتانیا بوون بۆیە سیخورێكی بەریتانیا دەكەن بەسەرۆك كۆمار؟ كورە كاكە بەشاهیدی هەموو كوردێكی دڵسۆز ئەوەی تاڵەبانی بۆ كوردایەتی كردووە هیچ سەركردەیەك نەیكردووە نازانم تۆبۆ چاوت نایبینێت؟ بەشاهیدی زۆرینەی هێزە سیاسیە شیعە و سونەكانی عێراق تاڵەبانی باشترین رۆڵی گێڕاوە بۆ ئارامی عێراق نازانم تۆ بۆئەمانە نابینی؟
11. دكتۆر لەلاپەڕە150دا دەلێت( صدام تەمەنی نەگەیشتبوە 30ساڵان رێكخراوێكی دروست كرد بەناوی (حنین) بۆ كوشتنی كۆمەنیست و نەتەوەییەكان. لەهەمان سەردەمدا بەریتانیا لەرێگەی تاڵەبانییەوە و هەمان بەرنامەی بەجلی كوردییەوە لەسلێمانی پیادە كرد. مێژووی شاری سلێمانی گەواهی ئەو راستییەن لەرێگەی گروپەكەی تاڵەبانییەوە چەند (نەتەوەی و كۆمونیستە كوردەكان) كوژران.) سەدام لەساڵی 1937لەدایك بووە كە 30ساڵی تەواو نەكردبێت واتا پێش ساڵی 1967 بووە، جانازانم لەساڵانی 64و65 دا كێ لەكۆمۆنیست و نەتەوەییەكان كوژراون؟ نازانم دكتۆر بۆ سلێمانی موعینی لەبیر نییە كەهەر لەو دەوروبەرانەدا لەلایەن كوردەوە دەستگیر كراو بەقوڵبەستراوی تەسلیم بەشاكرایەوە ولەسێدارە درا؟ بەتایبەتیش سلێمانی موعینی كەیەكێك بوو لەبەشدار بوانی شۆڕشەكەی موسەدەق؟ جگە لەسلێمانی موعینی مەلا مستەفاو پارتی چەند كەسیان كوشتوە لەسەرۆك عەشیرەت و كەسایەتی كوردپەروەر؟ بۆكەسیانی لەبیر نییە وباسیان ناكات؟ بۆ مەلا ئاوارە و قادری شەریفیتان لەبیر نییە؟ بۆسەعید ئاڵچی و دكتۆر شوانی كوردستانی باكورتان لەبیر نییە؟ بۆقسەیەكی بێ بنەما بۆ تاڵەبانی هەڵدەبەستیت لەكاتێكدا یەك بەڵگەت پێ نییە.
لەلاپەڕە150و151یشدا دەلێت( شەڕی نێوان كۆمەڵەی رەنجدەرانی رۆژهەڵاتی كوردستان و دیموكرات هتد گشتی بەپیلانی جەلال تاڵەبانی بووە. ئەوەی جێگای ئاماژەیە تاڵەبانی (كۆمەڵە)ی پوكانەوە بەڵام لەرێگەی كەسێكەوە پەیوەندی بەئێرانەوە كرد بۆ دروستبوونی یەكەم رێكخراوی ئیسلامی سیاسی) یەكەم كۆمەڵە ناوی كۆمەڵەی زەحمەتكێشان بوو، كۆمەڵەی رەنجدەران ئەوەی خۆمان بوو لەباشوور و لەو سەردەمەشدا یەكێتی لەئێران شان بەشانی كۆمەڵە و دیموكرات شەڕی ڕژێمی ئێرانی دەكرد و دۆستی هەردوو لا بوو، لەگەڵ شەهید قاسملۆ وەك هاوخەبات و دۆستی تاڵەبانی ولەگەڵ كۆمەڵەش وەك هاوبیری یەكێتی دۆست بوون جانازانم دكتۆر ئەم ڕووداوانەی چۆن لەخەیاڵدانی خۆیدا كۆكردۆتەوە؟ دووەم یەكێتی كەلە باشوری كوردستانەوە چۆتە رۆژهەڵات و شەڕ لەپێناوی كوردانی رۆژهەڵاتدا دەكات چۆن ئێران بەقسەی ئەو دوژمنە سەرسەختەی خۆی دەكات و رێكخراوی ئیسلامی بەقسەی تاڵەبانی دروست دەكات؟ من لەخۆت دەپرسم ئایا ئەوە راڤەیە لۆژیكییە؟ ئەی باشە بۆباسی ئەو لایەنە ناكەیت كەلەكوردستانەوە چووبووە ئێران و پێش سوپای پاسداران دەكەوتن بۆ لێدانی كۆمەڵە و دیموكرات؟ كێ بوو ببوو بەچاوساغی پاسداران و كێ بوو بەرگری لەشۆڕش و كوردایەتی دەكرد لەرۆژهەڵاتدا؟
12. دكتۆر لەلاپەڕە 154دا دەلێت( ئیسلام سیاسەتی حەرام كردووە، ئەوی ئیسلام وسیاسەت تێكەڵاو بكات كافرە)زەحمەت نەبێت دكتۆر بەپێی كام دەق ئیسلام سیاسەتی حەرام كردووە؟ ئەی بەپێی كام دەق ئەوەی ئیسلام و سیاسەت تێكەڵاو بكات كافرە؟ تەنانەت سەلەفیەكان كەدەلێن حزبایەتی ناكەین هەرگیز نالێن سیاسەت حەرامە و ئەوەی سیاسەت دەكات كافرە، ڕەنگە ئیسلام بەمنی علمانی بلێت كافر بەڵام هەرگیز بەموسوڵمانێكی ئیسلامی سیاسی نەوتوە كافر باشترین بەڵگەش ئەوەیە كەتا ئێستا مەلایەك نییە بەتایبەتی لەناو كورددا بەداعش بلێت كافر سەرەرای ئەوەی دەیان كەسی لەبەردەمی كامێرادا سەربڕی و سوتاند ولەئاودا خنكاند وهەزاران كەسی بەگولە كوشت و هەزاران كچ و ژنی كرد بەكۆیلە وكەنیزەك ئیتر چۆن بە سیاسەت دەلێن حەرام؟.
13. لەلاپەڕە 161دا دكتۆر دەلێت(بۆیاد هێنانەوە لێكچونی پلانەكانی ئەمریكا ..ئەم پرۆسێسە ولەسەر هەمان پرۆسێسی كوشتنی (قاسم). لەلایەن هاورێكەیەوە(عبدالسلام عارف) لەعێراقدا كوشتنی كاك ئارام لەلایەن تاڵەبانیەوە. قاسم وعبدالسلام هاورێ بوون(M16) بەریتانی 85 میلوین دۆلاری تەرخانكرد بۆلەناوبردنی قاسم. بۆی نەكرا تەنیا بەهۆی هاورێكەیەوە عبدالسلام عارفەوە كودەتایەكی خوێناوی بەسەر قاسمدا كرد) جا خوێنەری خۆشەویست ورد بەرەوە لەسەرەتاوە دكتۆر پلانی ئەمریكا ئاشكرا ئەكات و لەكۆتاییشدا پلانەكە ئەبێتە پلانی (M16)ی بەریتانی و پێشتریش وتی تاڵەبانی سیخوڕی بەریتانی بووە لێرەدا پلانی شەهید بوونی كاك ئارام بۆتە پلانی ئەمریكی، بالەوە گەرێین و بێینە سەر شەهید بوونی كاك ئارام، دیارە ئەم قسانە زۆر كۆن و سواون و لەرادیۆ كونە فیشاڵەكەی پارتی سەردەمی شەڕی ناوخۆ و زبڵخانەكەی كوردستان پۆست ئەوەندە وتراوەتەوە بێتام بووە، وكەسیش خۆی لێنادات لەبەر ئەوەی هەمووكەس ئەزانێت كەئەم جۆرە تۆمەتانە مەگەر هەرخاوەنەكانی خۆیان بروای پێبكەن، بەڵام من لێرەدا دوو سێ دێر لەسەر ئەو بابەتە ئەنوسم: دیارە كاك ئارام لەگوندی تەنگی سەر لەقەرەداخ شەهید بوو ئەوانەی كەشەهیدیان كرد جاشەكانی تەحسین شاوەیس و عاسی رەوف بوون و لەكەركوكەوە چوبوونە ئەو ناوچەیە و بەرێكەوتیش تووشی شەهید ئارام هاتبوون وشەهیدیان كردبوو بەوبەڵگەیەی كەلەدوای شەهید بوونەكەی تەنها چەكەكەیان بردبوو تەرمەكەیان بەجێ هێشتبوو ولەبەر ئەوەی هەرنەیان زانیبوو كەئەوە كاك ئارامە، واتا ئەگەر بەتایبەتی بەدوای كاك ئارامەوە بونایە هەڵبەتە تەرمەكەیان بەجێ نەدەهێشت و لەگەڵ خۆیان دەیانبرد.
پاشان تەحسین شاوەیس لەدوای ئاشبەتاڵەوە كەهاتەوە ئەم دەوروبەرەی كەركوك لەگەڵ قالە فەرەج وگروپەكەیاندا بەبەرنامە هاتبونەوە دەست لەیەكێتی نیشتمانی كوردستان بوەشێنن و ببنەوە بەجاش خێرە دوژمنێكی سەرسەختی یەكێتی بەپلانی یەكێتی ئەچێت سەركردەیەكی یەكێتی شەهید دەكات؟ یان تەنها كاری تۆ تۆمەت بەخشینەوەیە وتەواو.
14. لەلاپەڕە 164دا دكتۆر دەلێت (لە 1986- 1989 بەیارمەتی و بەئاگایی دەزگای نهێنی(CIA.ISI.M16) ئەمریكی و پاكستانی وبەریتانی. بن لادن 30000چەكداری دروست كرد) و لەلاپەڕە 193دا دەلێت( بۆچی لەسەردەمی جەنگی سارددا بن لادن وقاعدە دروست نەبوون؟ بۆچی دوای ڕمانی سۆڤێت بزوتنەوەی ئیسلامی سیاسی بوو بەدیاردەیەكی ترسناكی بەربڵاوی جیهان؟) پێشەكی بادكتۆر ئەوە بزانێت ئوسامە بن لادن قاعیدەی دروست نەكرد بەڵكو عەبدوڵا عەزام بوو قاعیدەی دروست كرد بەپاڵپشتی و هاوكاری سعودیە و ئەمریكا بۆكۆكردنەوەی موجاهیدان لەپاكستان و رێكخستنیان و پاشان ناردنیان بۆ ئەفغانستان وشەڕكردن لەگەڵ سوپای سۆڤێت لەسەر خاكی ئەفغانستان وتا كۆتایی جەنگەكە وكشانەوەی سۆڤێت لەئەفغانستان لە15/2/1989 و عەبدوڵا عەزام لە 24/2/1989 لەپاكستان لەگەڵ دوو كوڕیدا ئۆتۆمبێلەكەیان تەقیەوە وكوژران وناكۆكیەك لەنێوان عەبدوڵا عەزام وئوسامە بن لادن وئەیمەن زەواهری هەبوو لەسەر ئەوەی كەدوای ڕزگاركردنی ئەفغانستان لەكوێ جیهاد بكەن؟ دیارە عەبدوڵا عەزام رای وابوو دەبێت ڕوو بكەنە فەلەستین وبن لادن و زەواهریش دەیانوت دەبێ بچینەوە وڵاتەكانی خۆمان ولەوێ جیهاد بكەین بۆڕوخانی دەوڵەتەكانی خۆمان ودامەزراندنی دەوڵەتی ئیسلامی، سەبارەت بەسەردەمی یەكێتی سۆڤێت بۆئیسلامی سیاسی دیار نەبوون، دیارە دكتۆر باش لەبارو دۆخەكە ورد نەبۆتەوە ئەگەرنا قسەی وای ناكرد چونكە لەوەتەی شۆڕشی ئوكتۆبەری 1917بەرپابووە ئەمریكا و سعودیە وپیاوانی ئاینی ئیسلام بیریان لەپێشگرتن لەبیری كۆمۆنیستی كردۆتەوە و بۆئەومەبەستەش لەو رۆژەوە یەكێتی سۆڤێت لە 30/12/1922 دروست بوە هاندانی موسوڵمانانی ناو یەكێتی سۆڤێت وگەشە پێدانی بیری ئیسلامی لەناو یەكێتی سۆڤێت ولەسەر سنورەكانی یەكێتی سۆڤێتیش بەردەوام بووە وساڵانە بودجەی زۆر زەبەلاحیان بۆچاپكردنی قورئان وگەیاندنی پێویستیەكانی بیری ئیسلامی سیاسی تەرخان كردووە تاوەك بەربەستێك لەبەرامبەر كۆمۆنیزمدا بەكاری بهێنن وبەڵگەی ئەوەش ئەوەیە كەلەگەڵ راگەیاندنی جیهاددا سەدان و هەزاران كەس لەچیچان و قەوقازەوە پەیوەندییان بەقاعیدەوە كرد و بوون بەئەندامی گروپە موجاهیدەكان و بەپێچەوانەوە كەخەباتی ئیسلامی سیاسی لەبەرامبەر سۆڤێتدا كۆتایی هات ئەوسا ئیسلامی سیاسی كەوتە سەر ڕووپەڕی رۆژنامەكانی ئەوروپا چونكە بەربونە گیانی دۆستانی ئەمریكا و سیحرەكە هەڵگەڕایەوە بۆدژی ئەمریكا و هاوپەیمانە عەرەبەكانی .
15. لەلاپەڕە 230دا دكتۆر جەزا دەلێت(هەرچی ئەو بیانوانەی ئەمریكا و بەریتانیا بۆداگیركردنی عێراق بەكاریان هانی (چەكی كیمیاوی وكۆمەڵ كوژی) گشتی درۆ بوو) لەپرۆسەی گەڕان وپشكنین بەدوای چەكە كۆمەڵكوژەكانی عێراقدا ئەمریكا و بەریتانیا كۆگایەكیان نەدۆزییەوە كەچەكی كیمیاوی تێدا كۆكرابێتەوە بەڵام ئایا عێراق چەكی كیمیاوی نەبوو؟ بێگومان هەیبوو بەڵام لەپرۆسەی گەرانەكەدا بەزیرەكانە شوێنەوارەكەیان ونكرد و هیچ بەردەستی پشكنەران نەكەوت ئیتر بەپارە چارەسەریان كرد یان هەرچۆنێك بوو من نایزانم بەڵام منی كورد لەهەموو كەس باشتر دەزانم كەعێراق چەكی كۆمەڵكوژی هەبووە و ئەگەر هەموو عەرەب بلێت (چەكی كیمیاوی و كۆمەڵكوژی) عێراقی گشتی درۆبوو ئەبێت منی كورد نەیلێم چونكە من راستەوخۆ زیانی چەكی كیمیاویم بەركەوتووە ئیتر نازانم دكتۆر بەچ مەبەستێك ئەلێت (گشتی درۆ بوو)، تۆبۆت هەیە بلێی ئەمریكا وبەریتانیا بەڵگەی تەواویان دەست نەكەوت بەڵام كەئەلێی گشتی درۆبوو سبەینێ ئەم قسەیەی جەنابت دەبێت بەسەرچاوە بۆعەرەبێكی شۆڤینی وبەكاری دێنێت دژ بەكیمیاباران كردنی كوردستان.
16. لەلاپەڕە246دا دكتۆر دەلێت (ئیسلام وەك دین دەلێت (جیاوازی لەنێوان مرۆڤەكاندا تەنها لەخواپەرستیدایە) لەلای ئیسلامی سیاسی جیاوازی مرۆڤەكان لەریش پیاو و ڕووپۆشی ئافرەتاندایە) ئیسلام راستە وتویەتی (لافرق بین عربی وأعجمی إلا بالتقوی) بەڵام هەر ئیسلامیش وتویەتی (ۆمَن ێبْتَغِ غَیْرَ الْإِسْڵامِ دِینًا فَڵن یُقْبَڵ مِنْهُ) واتا هەركەس جگە لەئیسلام هەردینێكی دیكەی قبوڵ بێت لێی قبوڵ ناكرێت ودیارە ئەمەش هەرلەسەردەمی پەیامبەرەوە ولەدوای فەتحی مەككەوە پێرەو كراوە و هەركەس موسوڵمان نەبوبێت لەملی دراوە وئەوەی كەدەلێت جیاوازی لەنێوان عەرەبی عەجەمیدا نییە تەنها لەخودا پەرستیدا نەبێت مەبەستی ئەوەیە كەجیاوازی لەنێوان موسوڵمانی عەرەبی عەجەمیدا نییە تەنها لەخودا پەرستیدا نەبێت نەك مرۆڤەكان وەك بەرێزت دەیلێیت، هەروەها بابەتی ڕیش جیاواز لەبابەتی حیجاب خودی پەیامبەر چەندین جار بەموسوڵمانانی گوتووە (جُزُّوا الشوارب وأرخوا اللحی ، خالفوا المجوس) واتا سمێڵەكانتان كورت بكەنەوە وڕیشەكانتان بەردەنەوە بۆئەوەی لەگەڵ مەجوسەكاندا جیاوازبن، بەڵام مەسەلەی حیجاب سەرەتا تەنها بۆژنەكانی پەیامبەر بووە ودواتریش تەنها ژنانی ئازادی گرتۆتەوە ولەقۆناغی سێیەمدا سەرجەمی ژنانی گرتۆتەوە بۆتە خالێك بۆجیاوازی دروست كردن تەنانەت لەنێوان موسوڵمانانیشدا بەوەی ژنێك حجاب نەكات بەدیدێكی جیاواز تەماشا بكرێت و سوكایەتی پێ بكرێت، واتا ئەو جیاوازییە ئیسلامی سیاسی لەخۆیەوە دروستی نەكردووە ولەخودی ئیسلامەوە سەرچاوەی گرتووە.
ئەم رەخنانە سەرپێیانە بوون دەنا دەبوو كتێب بۆرەخنە گرتن لەدكتۆر جەزا بنوسرێتەوە . .. كۆتایی

‌ 220 جار بینراوه‌
17/03/2017
Print Friendly and PDF
بابەتەکانی تری نوسەر
Telerik
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved