وتار
توركیا “ناوم كوردستانە” دەخاتە لیستی تیرۆرستانەوە

شیندا ئەكرەم / قامیشلۆ


چونكە لە رێگەی نووسینی كتێبێكەوە رووی راستی حكومەتی توركیا دەردەخات و گوزارشت لە پیادەكردنی جەورو زۆرداری و پێشێلكردنی مافی كورد دەكات لە باكوری كوردستان، لەلایەن حكومەتی توركیاوە ناوی دەچێتە لیستی رەشی تیرۆرستانەوە، كتێبی”ناوم كوردستانە”ئەو كتێبەی دوای سەردانی كردنی بەرەكانی جەنگ لە رۆژاڤا باسی شۆڕشی كورد دەكات لە هەرچوار پارچەكەی كوردستان و بەرخودانی كوڕان و كچانی شەڕڤانان دەكات لەپێناوی ئازادی كوردستان.
ڤیتۆڵد ریبیتۆفیچ نووسەرو رۆژنامە نووسی پۆڵۆنی وەك چەندین رۆژنامەنووسی تر كاریگەری دەنگدانەوەی شۆڕشی كوردی بەسەرەوە دیاربوو لە كوردستان، سەردانی كوردستان دەكات بۆ گواستنەوەی ئەو رووداوانەی لە رۆژهەڵاتی ناوەڕاست روودەدەن و لە نزیكەوە بە رای گشتی جیهانیان بناسێنێت، لەو ماوە كاتییەی كە لە كوردستاندا ماوەتەوە چەندین رووداوی كارەساتباری بینیوە هەر لە رووخاندنی گوندو شارە دێیەكانی باكور لەلایەن حكومەتی دادوگەشەێدانەوە تا شۆڕشی كوردانی رۆژاوا كە رۆژانە لە پێشڕەویدایەو گەلی كورد بە هۆیەوە لە ناوچەكە جۆرێك لە سەقامگیری بە خۆیەوە بینیوە.
فیتۆڵد دەیەوێت چۆنییەتی رووداوەكانی رۆژاوا بگوازێتەوەو باسی كارگێڕی خۆجێیی كورد بكات لەناوچەكە، جگە لەوەی كورد لەناوچە ژێردەستەكانی تر چەند تووشی گرفت و ئاڵۆزی هاتووەو بە زمانی خۆی زمانی پۆلۆنی دەیگوازێتەوە بۆ میللەتەكەی و لەژێر ناونیشانی “ناوم كوردستانە” دەینووسێتەوەو زۆرترین بەڵگەی لەسەر تاوانەكانی حیزبی دادو گەشەپێدانی دەسەڵاتدار لە توركیا دەرهەق بە كورد وەك دیكۆمێنتاری دەخاتە بەردەست خوێنەران، هەر بۆیە بە بڕیارێكی خودی ئەردۆگان حكومەتی توركیا دەیخاتە لیستی رەشی تیرۆرستان و كتێبەكەش وێرای ئەوەی بە زمانی پۆلۆنی نووسراوە، بەڵام لە توركیا قەدەغە دەكرێت.
بیرۆكەی نووسینی كتێبەكە
فیتۆڵد لە ماوەی ئەو شۆڕشەی كە بڵێسەكەی لە رۆژاڤا دەستیپێكرد وەك سێیەم پێگەی شۆڕشی كوردی لە رووی جوگرافییەوە، یەكەم گەشتی بۆ باكووری كوردستان دەستیپێكردووەو هەر لەوێش بیرۆكەی نووسینی كتێبەكەی لەلا گەڵالەی كردووە بە تایبەت دوای ئەوەی دەبینێت هێزەكانی توركیا زۆر بە فاشیزمانە هێرشدەكەنە سەر ناوچە مەدەنییەكان و تەڕ و وشك پێكەوە دەسوتێنن، ساڵی 2016 لەناو هێزەكانی پارتی كرێكارانی كوردستان و كە سەرەتای سەرگەرمبوونی شۆڕشەكە بووە، لە ناوچەی فارقینی شاری سیلوانی باكوری كوردستان دەبێنێت كچێك لە تەمەنی حەڤدەهەمین بەهاری تەمەنیدا چەكی داوەتە شان و چاپوكانە لە بەرەكانی جەنگ دژ بە پرسیاری لێ دەكات و پێی دەڵێت ناوت چیە؟ ئەویش پێی دەڵێ “ئەز ناوم كوردستانە”، ئەمەش دەبێتە یەكەم چەكەرەی دانانی ناونیشانی كتێبەكەی.
فیتۆڵد ریبیتۆفیچ دەیەوێت لەو كتێبەدا شۆڕشی كوردی لە رۆژاڤا و باشورو باكور وەك بزووتنەوەیەكی سیاسی و چەكداری بگوازێتەوە بۆ گەلی پۆلەندی كە زانیاری ئەوتۆیان لەسەر كوردو شۆڕشەكەیان نییە لە دژی تیرۆستانی حكومەتی توركیا.
نووسەر لە میانەی كتێبەكەیدا “جەنگی كورد لە دژی تیرۆرستان” جا چ رۆڤادژی داعش یان باكوور لە دژی توركیا بێت باسی گرفتەكانی میللەتی كورد دەكات كە چۆن سەركوت دەكرێن و شارو ئاوەدانیەكانیان دەروخێندرێن، (3000) دانەی لەو كتێبەی بە ناونیشانی “ناوم كوردستانە”ی لە چاپداوە بۆ ئەوەی پۆلەندییەكان لە نزیكەوە ئاشنای گەلی كورد بن لە هەر چوار پارچەكەی كوردستان. هەر لەبەر ئەو هۆیەی كە لەسەر كوردی نووسیوەو راستیەكانی ئاشكراكردووە حكومەتی توركیا ناوی دەخاتە ناو لیستی تیرۆرستانەوەو لە دەرەنجامدا باڵیۆزخانەی توركیا پەیوەندی بە وەزارەتی دەرەوەی پۆلەنداوە دەكات و ێی رادەگەیەنێت كە كتێب بۆ هاندانی تیرۆرستان دەنووسێت و ئێستا ناوی لە لیستی تیرۆرستانەو لە دادگای باڵای تاوانەكانی جەنگ لە توركیا داواكراوە.
فیتۆڵد ریبیۆ فیچ كێیە؟
 فیتۆڵد ریبیۆ فیچ لەدایكبووی (1975)ـی شاری زاپرێزی پۆلەندایە، رۆژنامەنووس و پەیامنێری جەنگی و پسپۆر لە كاروباری نێودەوڵەتی، دەرچووی زانكۆی جاگیجولیانە لە كراكاوی پۆلەندی، كۆلێژی ماف ساڵی 2000، جگە لە كارەكەی خۆی وەك رۆژنامەنووس لە نێوان سالانی 1998 ــ 2000 لە نووسینگەی كۆمۆسیۆنی ئەندامێتی لە یەكێتی ئەوروپا كاروباری لیژنەی كاروباری ئەوروپی پێ راسپێردراوە. فیتۆڵد خاوەنی چەندین كتێب و توێژینەوەو بابەتی رۆژنامەوانییە و یەكێك لە كتێبە ناودارەكانی كە وەرگێردراوەت سەر چەندین زمان بە ناونیشانی (پسپۆری تاوانە نێودەوڵەتییەكان ــ ئاواتی دێرینە لە ئەفریقا).
دواتر كاندید دەكرێت بۆ دكتۆرا لە توێژینەوەی جەنگی لە پۆلەندا، هاوینی ساڵی 2014 دەبێتە پسپۆری سیاسەتی رۆژهەڵاتی ناوەڕاست و باكووری ئەفریقیا.
وەك نووسەرێك لە بەراییەكانی مەسەلە یاساییەكان بە خوێندكارانی بەشی یاسای زانكۆی بانەفریكین دی لاپێكس لە ئۆڤیرا و كیڤۆسود لە كۆماری كۆنگۆی دیموكراتی وانەی وتۆتەوەو خەڵاتی رێزلێنانی پێدراوە لە پێخستنی شێوازەكانی كارگێڕی و سیاسی نوێ لەو وڵاتە.
ئێستا لە وڵاتەكەی خۆی ماڵپەڕی پۆلەندی لەسەر ئاسایش و جوگرافیا و سیاسەت و كیەیسی سەربازی لەناوچەكە بەرێوە دەبات و چەندین كتێبی توێژینەوەی لەسەر جەنگ دژی دەوڵەتی ئیسلامی و تیرۆرو بارودەخی عێراق و كوردستان و كۆی ناوچەكە نووسیوە.
ساڵی 2017 چەندین خەڵاتی وەرگرتووە لەوانە خەڵاتی بوێری لە كاری رۆژنامەوانی كە باڵیۆزخانەی عێراق لە پۆلەندا پێی بەخشیوە، هەر دوابەدوای ئەوە كتێبە جوانەكەی بەناوی “ناوم كوردستانە” بڵاوكراوەتەوەو دواتر لە رۆژاڤا خەلاتی میدیای كوردی بۆ باكۆكی زەحمەتكێشـی پێدەدرێت.

‌ 98 جار بینراوه‌
13/05/2017
Print Friendly and PDF
بابەتەکانی تری نوسەر
هیچ داتایه‌ک به‌رده‌ست نیه‌ .
Telerik
راپرسی
کێ بەرپرسە لەم دۆخەی ئێستای کوردستان؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved