وتار
سەردەشت عوسمانەكان گیانبەختكردووانی قەڵەمن

مەهدی خالید خەمبار


ئەگەر قەرارە بەم دۆخە سیاسیە كۆمەڵایەتیە چەقبەستوەو لە سایەی ئەم حوكمڕانیە پڕلە گرێوگۆڵەدا بمانەوێت بەربە تیرۆری قەڵەم و خەڵتانیخوێنكردنی سەردەشتەكان بگرین و كۆتاخاڵ بۆ ئەنتی قەڵەمەكان دابنەین، ئەوا دەیان ڕۆژمێریتردەبێ پڕبكەینەوە و سەدان كاوە و سەردەشتیتر دەبێت ببنە قوربانی، جابۆ ڕێگری لە شێوازە جیاجیاكانی تیرۆر(عەقڵ، قەڵەم، ژن، مرۆڤ) و ناهەقیەكان پێویستمان بە شۆڕشێكی ڕۆشنبیری فیكری كەلتوری سپی سەرتاسەریە تا وەك ئەڵتەرناتیڤێكی بەهێز بتوانێ جێ بەم دۆخە لەق بكات، هەرچەندە ئەوەش بەبێ یەكخستنی ڕەنگە جیاوازەكانی قەڵەم و هیزر و تواناكان مەحاڵە سەركەوتن یاریبێت، چەندیش لەم دابەشبونە مەترسیدارەی كۆمەڵگە و ڕەنگە جیاجیاكانی قەڵەمەكان مێزەدەكەین ئەوا لوتمان بە شاخێكی گەەورەی نائومێدیدا دەتەقێت!
گومان لە بونی پێشینەیەكی مێژویی ئەم تیرۆری بیر و قەڵەمەدا نیە، كاتێ كە قسە لەم جۆرە تیرۆرە مەترسیدارە پەلهاویشتوەی ئەمڕۆ دەكرێت، پێویستە ئاماژە بەو سەدان قەڵەم وعەقڵ وهیزرە گەشانەش بدرێ كە لە سەردەمی ڕژێمە تۆتالیتارەكاندا لەنێوبراون
گیانبەختكردوانی قەڵەم عەبولستار تاهیر شەریف، سۆرانی مامەحەمە، سەردەشت عوسمان، كاوە گەرمیانی، ویداد حوسینیش خۆیان گەیاندە كاروانە پڕسەروەریەكەی عەبدولخالیق مەعروفەكان وقادركابان و دڵشاد مەریوانیەكان و هەزارانیتر، پێویستە ئێمەش وەك وەفایەك بۆ هاوپیشە گیانبەختكردوەكانمان درێژە بە ڕێبازە پیرۆزەكەیان بدەین.
مەبەست لە تیرۆركردنی ڕۆژنامە نوس و قەڵەمە بەبڕشتان تەنها لەناوبردنی كەسەكاننین بەڵكو هەوڵێكی نەزۆكانایە بۆ چاندنی تۆوی ترس و تۆقاندن لە نێو ناخی ڕۆژنامەنوسان و قەڵەمە بوێرەكان و خەڵكانی ئاسایشدا تا كەس زاتی بەزاندنی هێڵە سورەكانیان نەكات.
خۆشبەختانە و بەپێچەوانەی ئامانجەكانیانەوە دوای شكانی هەر قەڵەمێك هەزار قەڵەمیتر یاخیبونی خۆیانیان ڕاگەیاند، دوای خامۆشكردنی دەنگی هەر ڕۆژنامەنوس و میدیاكارێك هەزارانیتر لەنەعرەتەیاندا و دوای تاسانی هەر هیزرێك هەزارانیتر هەڵكشان.
لە شێواز و چۆنیەتی ئەم جۆرەی تیرۆر وردببینەوە، دەگەینە ئەو ڕاستیەی كەئەوە ئەوانن ترسنوكانە بەسودوەرگرتن لە پۆست و پلە و دەسەڵاتە باڵاكانیان و ئەودەزگا ئەمنیە تایبەتیە زۆروزەوەندەی بەردەستیان، سەرباری ئەوانە هەمو دێن و لە تاریكیدا پلانی نهێنی لەنێوبردنیان بۆدادەڕێژن، ئەوە ئەوانن جورئەتی ئەوە ناكەن ڕۆستەم ئاسا سینگ دەربپەڕێنن و بڵێن فەرمو ڕۆژنامە نوسە ترسنۆكەكە ئەوە عەز و ئەوە گەز؟
خۆزگە گوێیەكی كراوە و یژدانێكی زیندو لای حاكمێكی ئەم جەنگەڵستانەی ئیمە میوان دەبو تا لەكسپە و ئازاری كەسوكاری سەردەشتەكان هەمو ڕۆژنامە نوس و میدیاكاران تێدەگەیشت كە چەند بە ئازارەوە داوای بەسزاگەیاندنی بڕیاردەر و داڕێژەر و تیرۆركەری ڕۆڵەكانیان دەكەن.
ئەفسوس لەم مەملەكەتەی ئێمەدا كێ گوێ بۆ ناسۆریەكانیان هەڵدەخات ؟ لەم مەملەكەتەی ڕۆڵەكانتانا هەرچی شتە جوانەكان و بەها پیرۆزەكانە دەستدرێژیان دەكرێتەسەر و شكۆیان دەشكێنن، ئافرەتان بەوپەڕی دڵڕەقیەوە هەتكدەكرێن، ئەشكەنجەدەدرێن، تیرۆردەكرێن، دەكوژرێن، هەڵدەواسرێن، لەقوڵایی ئاودا دەخنكێنرێن، بلۆككوژدەكرێن و دواتر فڕێدەدرێن.
دڵنیابن ڕۆڵەكانتان پێش ماڵاواییان ئاسودەیی ویژدانیان بۆ ئێوەشوخۆشیان مسۆگەر كرد، ئاسودەن كە ئازاری ویژدان ئێدی لەبەرامبەرئەم هەمو ناهەقی وتاڵانكاری و هەڕاجكردنەی یشتیمان وئەم نوقمی قەیرانكردننانەی وڵات و سزادان و برسیكردن و سوكایەتی پێكردن و خەساندن و بەكویلەكردن و ژاراویكردنی ژیانی هاووڵاتیان ئازاریان نادات.
ئەگەر پێمان وابێت ویداد حوسێن دەبێتە دوا قوربانی كاروانی قەڵەم و دوا پەیامی هەڕەشەی دەستڕۆیشتوان بۆ ڕۆژنامەنوسان و ڕۆشنبیران و ئازادیخوازان و دوا فیشەكی دەستی تیرۆربێت بۆ سینگی ئەوانەی بەگژ نادادپەروەری و زوڵم و ستەم و كۆیلایەتی و پاوەنخوازیدا دەچنەوە ئەوا جگە لەخۆهەڵخەڵەتاندن بەولاوە هێچ پێناسەیترهەڵناگرێت. دەبێت لەبەرامبەردا خۆمان لە تۆڕەكانیان نزیك نەكەینەوە!
روحتان شاد، عەبدولستار تاهیر، سۆرانی مامە حەمە، سەردەشت عوسمان، كاوە گەرمیانی و ویداد حوسێنەكان و سەرجەم شەهیدانی رێگای ئازادی و دیمكراسی ڕوحتان شاد و كاروانەكەتان پڕ ئومێد.

‌ 106 جار بینراوه‌
13/05/2017
Print Friendly and PDF
بابەتەکانی تری نوسەر
Telerik
راپرسی
پێت وایە دۆخی ئێستای كوردستان بەچی چارەسەر ئەبێت؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved