وتار
پێشمەرگە لە نێوان رێكخراوەیی و میلیشیایی بووندا

لەتیف فاتیح فەرەج



سەرەتا :
پێشمەرگە و پێشمەرگایەتی و هێزی پێشمەرگە بریتین لە ناوی ئەو چەكدارو گیانبازانەی لە پێناوی كوردستاندا چەك دەكەنە شان و ڕووبەڕووی دوژمن دەبنەوە، هەڵبەت ماناكە بە فراوانی بۆ تاكی پێشمەرگەو هێزی پێشمەرگەوسوپاو سەربازی كوردستان بە كار دێت، لەبەرانبەر ئەمەدا كە كورد زۆر بەشانازیەوە باسی دەكات و بووەبە هۆی سەرنجراكێشانی خەڵكانی دیكەش، دوژمنانی كورد وشەگەلی چەتە، رێگر، تێكدەر، یاخی و شتی لەو جۆرەیان بە كار هێناوە، هەڵبەت ئەو ناو و ناتۆرانەی نەیارانی پێشمەرگەو كورد نەیتوانیوە، لە ئازایەتی و جەربەزەی ئەو هێزە كەمبكاتەوە، گەرچی لە هەندێك قۆناغی زۆر هەستیاردا لە ناوەندی شەستەكان، كۆتای هەفتاكان و سەرەتای هەشتاكان، هەروەها لە ساڵانی 1994-1998 پێشمەرگەی لایەنە كوردییە نەیارەكانی یەكتر لە دوژمن خراپتریان بە یەكتر كردووە، روداوەكانی هەكاری و كوشتنی مەفرەزەكانی برایم عەزۆو حوسێن بابە شێخ لە بادینان و كوشت و بڕە جیا جیاكانی یەكتر، ناشیرین ترینی ئەو كردەوانەن كە پێشمەرگەو چەكداری حزبە نەیارەكانی كوردستان دژی یەكتر نواندویانەولەو نێوانەدا سەدان خەڵكی ئازاو تێكۆشەرو قارەمان بوونەتەقوربانی، ئەم شێوازی كوشت و بڕە چەندین جاری تر دوو بارە بووەتەوە.
لەم نوسینە كورتەدا دەمانەوێ‌ وەڵامی ئەو پرسیارە بدەینەوە باشە ئەم ناوە سومبلیكە بۆ كەسانێك كە خەبات بۆ ئازادی ئەوانی تر دەكەن، كە دەیانەوێ‌ كوردستان ئازادو سەربەخۆ بێت، بۆنەتوانراوە ببێتەهێزێكی رێكخراوەیی نیشتمانی و دوور لە ململانێی ئایدۆلۆژی، بۆ ئەو ناوە پیرۆزە بە شەڕی ناوخۆو كوشتنی كوردەوە سەرقاڵ و خەریك كراوە، قسە لەسەر ئەوەیە ئایە ئێمە ئەو هێزەمان هەبووە كە شاعیرانی كورد سەدە زیاتر خەونیان پێوە بینیوە، یان میلیشیایەكی حزبی، كە زۆر جار هەموو جوانی و خەبات و قوربانیدانی پێشمەرگە بۆ كوردستان دەخاتە ژێر پرسیارەوە.
بەلای كەمەوە سەت ساڵ زیاترە كورد خەبات بۆ سەربەخۆیی دەكات، بۆ ئەم خەباتەش پشتی بە هێزی پێشمەرگە بەستووە، لە سەردەمی شەڕو شۆڕی شێخ مەحمودی مەلیكی كوردستانەوە، واتە لانی كەم لە شەڕی جیهانی یەكەمەوە، لە باشوری كوردستان خەبات بۆ خۆخاوەنی دەستی پێكردووە، سەیر لەوەدایە لەو كاتەشەوە تا ئەمڕۆ لە نێو خۆدا ململانێ و شەڕۆ شۆڕ هەبووەو هەمیشە چەكداری كورد چەند شەڕی بۆ ئازادی كردووە، ئەوەندەش شەڕی بۆ شكاندنی شكۆی یەكتر كردووە، ئێمە لێرەدا نامانەوێ‌ مێژوو بگێڕینەوە، هەڵبەت بەر لەو مێژوەش كورد خەونی خۆ خاوەنی هەبووە، شێخ رەزای تاڵەبانی لە شیعرە بەناوبانگەكەیدا “ لە بیرم دێ‌ سولەیمانی “ وێنەیەكی سوپای بابانمان نیشان دەدات :
لەبەر تابوری عەسكەر رێ‌ نەبوو بۆ مەجلیسی پاشا
سەدای مۆزیقەو نەقاڕە تا ئەیوانی كەیوان بوو

 پێشتریش نالی لە شوێنێكا وێنەی دەوروبەری پاشامان نیشاندەدات، بەڵام كەمتر لە سوپا دەچن هەرچەند باسی شەڕو ئازایەتی و دڕیان دەكات، شیعری ئەو تاقمە مومتازە “ ,دیارە ئەو كاتە هێشتا كەس باسی ناوی پێشمەرگەی نەكردووە، بۆیە بە سوپاو عەسكەرو ئەوانە ناویان دێت.
حاجی قادری كۆیەش یەكێكی ترە لەو شاعیرانەی خەونی بە سوپاو هێزی كوردیەوە بینیوە ئەو دەڵێ‌ :
بە شیرو خامە دەوڵەت پایە دارە
ئەمن خامەم هەیەو شیر نادیارە
یان دەڵێ‌ :
جۆشێك بدەن وەكو هەنگ تەگبیر بكەن بە بێ‌ دەنگ
ئەسبابی شەڕ پەیاكەن هاوان وتۆب وتفەنگ

قانعی شاعیری چەوساوەكانی كوردستانیش دەڵێ‌ :
وەتەنی ئێمە نان و خوانی هەیە – وەتەنی ئێمە لاوەكانی هەیە
چەند هەزار تفەنگچی موئەنگێو- چەن كوڕی سەف دڕی جیهانی هەیە؟!

بەڵام هەموو ئەم شیعرانەو هەموو ئەم خەونانە بۆئەوە بووە، كورد بتوانێ‌ دەوڵەت و چوار چێوە دروست بكات، وەك چۆن گەلانی تریش چوار چێوەوتاج و تەخت و بەختی خۆیان هەیە، ئەمەش بە هێزێكی نیشتمانی ناحزبی دەكرێت، هێزێك هێزی نەتەوەو نیشتمان بێت نەك حیزب و كەس.

دەربارەی ناوی پێشمەرگە
دەربارەی ناوی پێشمەرگەو چۆنێتی ناونانی گیانبازانی كورد بەو ناوە، چیرۆك و گێڕانەوەكەی كۆماری مهاباد هەیە كەچەندین جار باس كراوە لە لایەن زۆركەسەوە، گوایە ئەحمەد دەسماڵ ناوێكی چایچی لە كۆبونەوەیەكدا بۆ ئەوەی ناو بۆ سەربازانی كورد دابنرێ‌ گوتویەتی باو باپیری ئێمە بە پیاوی ئازاو خۆبەخشیان وتوە پێشمەرگە، لەو بارەیەوە رەحیمی قازی لە پێشەكی چیرۆكی پێشمەرگەدا كە ساڵی 1958 نوسیویەتی ئەمە دەگێڕێتەوە :
“دۆزرانەوەی وشەی (پێشمەرگە) بۆخۆی داستانێكە، كاتی دامەزرانی كۆماری خودموختاری كوردستان، پێشەوا قازی محەمەد كە گرنگیەكی زۆری دەدا بەبە زمان و ئەدەبی كوردی، ئەسپاردبووی لە جیاتی وشەی سەربازو عەسكەرو نیزامی و فیدایی، وشەیەكی جوانی كوردی بدۆزرێتەوە و بەكاربهێنرێت، جا ریزەیەك لە نووسەران و هۆنەران و پسۆڕانی كورد بەو ئامانجە كۆبوونەوەیەك پێكدەهێنن و چەند سەعاتێك وتو وێژی لەسەر دەكەن و بە ئەنجامێكیش ناگەن، كوردێكی پیرونەخوێنەوارو دنیا دیتوو كە لەو كۆبونەوەیە خزمەتدەكاو نان و چایان بۆ دەهێنێ‌، دەبینێ‌ كە هەموو شەكەت بوون و چونەتە بەحری خەیاڵاتەوە، لە ناكاو هەڵدەڵێ‌ و دەڵێ‌، ئەرێ‌ بۆچی خۆتان لە هیچ و خۆڕای ماندو دەكەن، باب و باپیرمان پیاوی ئازاو بە كاریان بە پێشمەرگە نێو بردووە، ئێوەش هەر ئەو نێوەی لێبنێن “ پێشمەرگە –رەحیمی قازی لاپەڕە 8
بە گوێرەی ئەم گێڕانەوەیە بێت وشەكە دەگەڕێتەوە بۆ پێش ئەو مێژوە، ئەوەی یەكەمجار ناوەكەشی هێناوە گوتویەتی باو باپیری ئێمە، ئەگەر ئەم چیرۆكە چیرۆكی 1946 بێت و ئەویش باسی باو باپیری خۆیانی كردبێت، كەواتە وشەكە زۆر بۆ پێشتر دەگەڕێتەوە، لە وتارێكی عەرەبیدا كە بی بی سی عەرەبی بڵاوی كردوەتەوە، بە ناونیشانی (من هم البیشمەركە) دەڵێ‌ پێشمەرگە بۆ كۆتای سەدەی 19و سەرەتای سەدەی 20 دەگەڕێتەوە، ڕەنگە لێرەدا مەبەست لە ناوەكە نەبێت، بەڵام ئەم قسەیەو قسەی بابای چایچی گرێدراوی ئەوەن كە مێژوەكە نزیكە لە یەكەوە، پێشمەرگە بۆ كورد ماناو ناوەڕۆكێكی قوڵی هەبووە، مەبەست لەو ناونانە بریتی بووە لە قوربانی دان بە گیانی خۆت بۆ ژیانی ئەوانی تر، واتە ئەم لە پێش مەرگەوەیە “ پێش + مەرگ “ عەبدولڕەحمانی قاسملو دەڵێ‌ “ كورد بە پیاوی لە خۆ بوردویان گوتوە پێشمەرگە “ سەردار عەزیز لە وتارێكدا كە لە بنەڕەتا بە ئینگلیزی نووسراوەو كراوەتە عەرەبی بە ناونیشانی “ البشمركە والعلاقە المدنیە –العسكریە فی الكوردستا ن العراق “ دەڵێت “ لە زۆر گۆرانی و سرودی كوردیدا پێشمەرگە بە پڵنگ و شێر ناو دەبرێت “ لاپەڕە 25، لە كوردستانی باشور لە ساڵی 1961ەوە ئەم ناوە جێگەی بە كۆمەڵەو ئەوانە گرتوەو كە سەرەتا بە و گروپانە دەوترا كە لە حكومەت یاخی دەبوون، لەو رۆژەوەتا ئێستا هەزاران شیعرو سرودو گۆرانی بە باڵای پێشمەرگەدا وتراوەو وەك سەردار عەزیز لە باسەكەیدا دەڵێ‌” زۆر كەس پێیان خۆش بووە، بە پێشمەرگە یان شاعیری پێشمەرگە وەك ئەوەی شێركۆ بێكەسی شاعیر دەیویست، یان سەرۆكی پێشمەرگە وەك ئەوەی مەسعود بارزانی وای نیشاندەدا “.
سەرچاوەی وشەكە وەك باسكرا لەوەوە هاتوە ئەوانەی مەرگیان دەخەنە پێش خۆیانەوەو لە مردن ناگەڕێنەوە، ئەمەش بۆ ئەوەی ئەوانی تر ئازادانە بژین.

ئایە ئێمە هێزی پێشمەرگەی رێكخراوی نیشتمانیمان هەیە ؟
لە كوردستان وەزارەتی پێشمەرگەو وەزیری پێشمەرگەو دام و دەزگاكانی سەر بە وەزارەتی پێشمەرگەو پلەو پۆستی جیا جیا هەیە لە وەزارەتی پێشمەرگەدا، بەڵام ئەم وەزارەتە هێشتا كێشەو گیرو گرفتی زۆری هەیە، هێشتا تەواوی هێزە چەكدارەكانی هەرێمی كوردستان سەر بەو وەزارەتە نین، نەك ئەوە لە ناو خودی وەزارەتەكەداهێزو پێكهاتەكان زۆربەیان حزبیانە كار دەكەن، من بۆ خۆم دەیان جار گللەو گازندەی پێشمەرگەم لەو بارەیەوە پێگەیشتوە، تەنانەت لە پلە بەرزكردنەوەی سەربازیشدا جیاوازی دەكرێت، هەڵبەت بەر لەوەی قسەیەك لە بارەی نەبوونی ئەو هێزە سەربازیە نیشتمانیە بكەین دەبێ‌ بڵێین لە ناونانی یەكەو هێزەكانیشدا حزبیانە بیركراوەتەوە، پارتی دیموكراتی كوردستان لە شەستەكاندا، “پەل و لق و بە تالیۆن و هێز” ی هەبووە، دەبێ‌ ئەو راستیەش بگوترێ‌ تا ئەو كاتەی بارزانی و مەكتەب سیاسی پەلاماری یەكیان نەدا پێشمەرگە لەو سەردەمەدا لە هەموو كات زیاتر پێكەوە بوونە، گەرچی گازندەی ئەوەش هەبووە كە بارزانی زۆر جار نزیكەكانی خۆی یان خەڵكی دەڤەری خۆی كرردوەتە بەرپرسی یەكەمی هێزەكان “ ئەم گازندەو گلەیانە زیاتر دەمی بووە “ كاتێ‌ كە یەكێتیش لە دوای هەرەس و ئاشبەتاڵی 1975 دروست دەبێت، ناوی هێزو یەكەكانی بەم جۆرەیە” مەفرەزە، كەرت، تیپ، مەڵبەند”لە دوای ڕاپەڕینیشەوە سەرەڕای هەوڵی زۆر نەتوانرا هێزی یەكگرتوو دروست بكرێت و لە ساڵی 1994 بە تەواوەتی ئەو پێكەوەییە فشەڵەی یەك دوو ساڵ بوو كاری بۆ دەكرا هەڵوەشایەوەو پارتی و یەكێتی هێزە چەكدارەكانیان بەردایە گیانی یەكتر، ئەو شەڕو شۆڵە تا ساڵی 1998ی خایاندو سێ‌ دەوڵەتی گەورە دەستیان وەردایە نێو كێشەكانی كوردستانەوەو پارتی عێراق و توركیای بۆ لێدانی یەكێتی بانگهێشت كرد، پێشتریش هەمان كاری لە گەڵ ئێراندا كردبوو، یەكێتیش بە شێوەیەكی تر لە گەڵ ئێراندا كارێكی لەو جۆرەی كرد، گەرچی كارەكەی یەكێتی ناچارانەو لە ژێر فشاری زۆردا بوو، بۆ ئەمە بیرەوەریەكانی تاڵەبانی و نەوشیروان مستەفا ورد تر قسەیان كردوە، لە بەرانبەردا پارتی هاوكاریەكانی توركیاو عێراق و ئێرانی نەشاردوەتەوە و تەنانەت لە دوای 31ی ئابی 1996 سوپاسی سەدامی كردو وتی: ئیتر ئێمە دۆستی یەكین، هەروەها لە دیدارێكدا گوتی ئێمە تا سنور یەكێتی راودەنەین، مەبەستی بە پاڵپشتی گاردەكانی بەعس.
پارتی لە مێژوی 27 ساڵی رابردودا دوو جار پارلەمانی پەكخستوە، جارێك بە هاوكاری بەعس لە مانگی 8ی 1996، جارێكیش دژی هەمواری یاسای سەرۆكایەتی هەرێم لە مانگی 10ی 2015.
لە دوای ساڵی 1998ەوە كە تارادەیەكی زۆر تارمای شەڕی ناوخۆ ڕەویەوە، وڵاتانی گەورە هاتنە نێوان پارتی و یەكێتیەوە، دەكرا كار بۆ دروستكردنی هێزێكی پێشمەرگەی نیشتمانی ناحزبی بكرێت، نەكرا، تا ئێستاش هیچ ئامادەكاریەك نیە بۆ ئەوەی وەزارەتی پێشمەرگە ببێتە وەزارەتی پێشمەرگەی كوردستان، هەموو پێشمەرگەی كوردستان، لە كاتێكا لە گەرمەی هەوڵی وەزیری پێشمەرگە” مستەفای سەید قادر “ كە بە نوێنەرایەتی گۆڕان ئەو پۆستەی وەرگرتبوو، بۆ یەكخستنەوەی هێزی پێشمەرگە، بە بڕیارێكی حزبی گۆڕان لە حكومەت دەركرا، ئەمەش پرۆسەی یەكخستنەوەكەی نەك پەكخست، تەنانەت وای كرد پارتی دەستی زۆر ئاوەڵاتر بێت بۆ بە حزبی كردنی ئەو وەزارەتە، لە كاتێكا لە ناو وەزارەتی پێشمەرگەو لە دەرەوەیدا كەسانی وەك شێخ جەعفەر شێخ مستەفا، جەبار یاوەر، مەحمود سەنگاوی و زۆری تری یەكێتی هەن كە ناتوانن هیچ هەنگاوێك بە ئاراستەی راستكردنەوەی ئەو بارەدا بنەن.
ئێستا لە دەرەوەی وەزارەتی پێشمەرگە، لای پارتی زێرە ڤانی و دژە تیرۆری پارتی و چەكداری سەر بە پاراستن و هێزی تایبەتی پاسەوانی بارزانی “ پێشمەرگە “ و هێز گەلی دیكە هەن كە بە هیچ جۆرێ‌ ناخرێنە سەر وەزارەتی پێشمەرگە، لای یەكێتیش بەرگری و فریاكەوتن و پاسەوانی بەرپرسەكان و دژە تیرۆرو هێز گەلی دیكە هەن، هەڵبەت هێزەكانی حەفتای یەكێتی و هەشتای پارتیش بە تەواوەتی نەخراونەتە سەر وەزارەتی پێشمەرگە، لە ناو هێزی پێشمەرگەدا پرش و بڵاویەكی زۆر هەیە، دژە تیرۆری هەردوولادەبوو دژە تیرۆری كوردستان بونایەو سەر بە وەزارەتی پێشمەرگە بونایە وەك كۆماندۆو یەكە تایبەتەكانی سوپای ئەمەریكا
دەبوو هەردوو دەزگای پاراستن و زانیاری، لە دوو دەزگای حزبیەوە بكرانایە بە دەزگایەكی نیشتمانی و وەزارەتی پێشمەرگە سەرپەرشتی كردبان، بە تایبەت ئەركی ئەم دوو دەزگایە دەبوو چاودێری دەرەوەی كوردستان باو راپۆرت و شیكاری وردی تەناهی لە سەر بارودۆخە دەرەكیەكان و هەڕەشەكان هەبا
زێرەڤانی و بەرگری و فریاكەوتن و حەفتاو هەشتا یەكخرابان و بۆ مەرامی حزبی بە كار نەهاتبان.
ئەو پارەو شەمەك و كەل و پەلەی چەندین ساڵە لە هێزی پێشمەرگەی كوردستاندا خەرج دەكرێت دەبوایە ئێستا هەم بە ژیان و گوزەرانی پێشمەرگەوە دیار بوایە هەم بە جەستەو شەڕو چالاكیەكانیانەوە، كەواتە ناهەقیەكی گەورەیە ئێمە بڵێین هێزی پێشمەرگەی نیشتمانی كوردستانمان هەیەو حزب ناتوانێ‌ دەست وەرداتە كارو بارو ژیانیان.ئەمە لە كاتێكا هەموو كورد ئومێدی زۆری بە پێشمەرگەیەو بە پشتیوان و هێزی بەرگری نیشتمانی دەزانێ‌، كەواتە بۆ یەك ناخرێت و ناكرێتە سوپایەكی نیشتمانی بە هێز ؟.
ئەمە ئەو پرسیارەیە كە دەبێت بەر لە هەر كەس مەسعود بارزانی وەڵامی بداتەوە لەبەر ئەم هۆیانە :
یەكەم : خۆی بە پێشمەرگەی كوردستان دەزانێت و دەڵێ‌ شانازی بە پێشمەرگە بوونمەوە دەكەم.
دووەم : لە ساڵی 2005ەوە بە ڕەواو ناڕەوا، بە یاساو لە دەرەوەی یاسا لە سەر كورسی سەرۆكایەتی هەرێم دانیشتوە.
سێیەم : بەرپرسی یەكەمی هێزی پێشمەرگەی كوردستانەو چەندین جار شێخ جەعفەریش بە ناوی هێزی پێشمەرگەی یەكێتیەوە پابەندبوونی بۆ بڕیارەكانی راگەیاندووە.
كەواتە ناكرێ‌ بەم شێوەیە و بەم هێزە بگوترێ‌ نیشتمانی چونكە رێی تێدەچێت لە هەر كاتێكا حزب، یان كەسێكی پلە بەرزی حزب بە ئارەزوی خۆی دژی نەیارەكانی بیانجوڵێنێ‌، وەك چۆن ئەوەمان لە 17ی شوبات بەرانبەر گۆڕان و كۆمەڵ بینی، لە كاتێكا ئەو دوو حزبە بە فەڕمی هیچ هێزێكی چەكداری حزبیان نیە، وەك ئەوەی حزبی دیكە هەیانە، ئەمە لە مانگی 10ی 2015ش بەرانبەر سەرۆكی پەرلەمان هەمان كار كرا، هەڵبەت تا پێشمەرگە بە بڕیاری حزب و سەرۆكی حزب و دەزگای هەواڵگری حزب بجوڵێتەوە ناكرێ‌ بڵێین هێزی پێشمەرگەی نیشتمانیمان هەیە.
پێشمەرگەو شەڕی داعش :
پێشمەرگەی كوردستان سەرەڕای هەموو تێبینیەك و بوونی ئەو كێماسیانەی باسمان كرد، بەڵام هێزێكە لانی كەم سێ‌ ساڵ زیاترە زۆر ماندوانە شەڕی داعش دەكات و لەو شەڕانەدا لەبەرانبەر ئەو هێزە توندڕەوە سەرەڕای ئەوەی وەك یەك هاوكاری هەموو بەرەكانی شەڕی پێشمەرگە نەكراوە لە لایەن هاوپەیمانی نێو دەوڵەتیەوە، بۆنمونە لە جەلەولاو سەعدیەو جەبارە هاوپەیمانان رۆڵی ئەو تۆیان نەبووە، لە گەڵ ئەوەشدا پێشمەرگە بەرگری جوامێرانەیان كردووە و لەشەڕی داعشدا زیاتر لە 1100 شەهیدو هەزاران بریندارو نزیكەی 100 ونبوو دیل هەیە، پێشمەرگەی كوردستان لەو شەڕانەدا سەركەوتن و چیرۆك و داستانی زۆر گەورەی تۆمار كردووە، هەڵبەت لە بەرانبەردا شكست و هەڵاتنی گەورەشی هەبووە، بۆنمونە راكردنی 3-8-2014ی شەنگال ئەو راكردنە لە ڕووی سەربازیەوە ئابڕوچونێكی گەورە بوو، چونكە هیچ بەرگریەكی ئەو تۆ نەكراو هەزاران كچ و ژن و مناڵ و پیرولاوی ئێزدی بە گورگان خوارد درا، بەڵام بەرگری و شەڕەكانی كەركوك، مەخمور، كۆبانی، پێشمەرگەیان كردە سومبلیكی مانەوەو بەرخودان.
ئێستا دوای ئەو هەموو قوربانی دانە، دوای ئەوەی كە پێشمەرگە ناوبانگێكی جیهانی هەیەو خەڵك لە تەواوی دنیاوە چاوی لە سەریانە، ئیدی كاتی ئەوە نیە ئەم هێزە لە و پرش و بڵاوی و لەت و پەتیەوە بكرێتە هێزێكی بە دیسپلینی رێكخراو، هێزێك بە هیچ جۆرێك و بۆ هیچ بیانویەك نەچێتە ژێر خواستی شەڕی ناوخۆو شەڕی كورد بە كوردەوە، هەروەها هێزێك كە بتوانێ‌ لە گەڵ گەریلاوهەپەگە و یەپەگەو هێزە كاریگەرەكانی كوردستانی گەورەدا پەیوەندیەكی ئاوەزی و پتەوی هەبێت.

بۆ نوسینی ئەم بابەتە سودم لەم سەرچاوانە بینیوە :
یەكەم : داستانی پێشمەرگە نوسینی رەحیمی قازی.
دووەم : وتارێكی دكتۆر سەردار عەزیز بە زمانی عەرەبی بە سوپاسەوە خۆی بۆی ناردم.
سێیەم : دیوانی شاعیرانی وەك حاجی قادری كۆیە، شێخ رەزای تاڵەبانی، قانع.
چوارەم : وتارێكی كورت لە بارەی پێشمەرگەوە لە بی بی سی عەرەبی.

‌ 1643 جار بینراوه‌
01/07/2017
Print Friendly and PDF
بابەتەکانی تری نوسەر
Telerik
راپرسی
پێت وایە دۆخی ئێستای كوردستان بەچی چارەسەر ئەبێت؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved