وتار
بۆنی شەڕێكی نەگریس

لەتیف فاتیح فەرەج


لە شەنگال بۆنی شەڕ دێت، شەڕێك كە توركیا لە پشتیەوەیەتی و كاری بۆ دەكات، شەڕێك كە رەنگە بیانویەكی باش بێت بۆ واز هێنان لەو ریفراندۆمەی لە بنەڕەتا بۆ ئەوە خرایە بەر باس تا دزی و گەندەڵی و نادادی و تاڵانی و خیانەتەكان بشاردرێنەوە، بۆنی شەڕێك دێت، تێیدا كچ و كوڕی كورد دەبنە قوربانی و دەسكەوتەكەیشی بۆ دەوڵەتی فاشیستی توركە، توركیا و بە تایبەت ئاكەپە و ئەردۆغان دەیانەوێ هەرچۆنێكە ئەو پرۆسەی خۆسەریەی شەنگال شكست پێبێنن، لە كاتێكا پرۆسەی خۆسەری و خۆبەڕێوەبەری كاتێ لە شەنگال سەری هەڵدا كە بە هەزاران چەكداری سمێڵ بابڕی كورد شەنگالیان بۆ داعش بە جێهێشت.
شەنگالیەكان هەرگیز ئەو رۆژەیان بیر ناچێتەوە كە كەس نەبوو رزگاریان كات،ئێستا لەوێدیسان بۆنی شەڕ دێت، شەڕێك دەشێهاوزەمان بێت لە تەك پەلاماری داعشدا بۆ ناوچە دابڕێنراوەكانی كوردستان،تێكەڵكردنی ئەم دوو شەڕە گەرچی داعش هیچی ئەو تۆشی بۆ نەكرێت، بە هۆی بەرگری ئازایانەی پێشمەرگەو خەڵكی ئەو ناوچانەوە وەك لە رابردودا بینیمان، بەڵام گرێدارەوە بە پرسگەلی دیكەوە، كە دیسان رەنگە بۆ ئەوە بێت گەلی كردو دانیشتوانی باشوری كوردستان ئەو هەموو ستەم و نادادی و گەندەڵیەیان بیر بچێتەوە .
جموجۆڵەچەكداریەكانی سنوری شەنگال، پەلامارە شكستخواردوەكانی ماوەی رابردوی داعش لە سنوری خورماتوو، جارناجار پەیام و وتە شەڕەنگێزیەكانی كاربەدەستانی تورك لە یەپەگەو یەپەژەو شەڕوانانی كورد، هەروەها هێشتنەوەی تەلەعفەرو حەویجەو رزگار نەكردنیان، دەركەوتنەوەی چەكدارانی داعش لە سنوری دیالە،هەموو ئەمانە بە ئێمە دەڵێن، شەڕێكی دیكە لە دەرگایەو لەوە دەچێت سەرانی كوردیش ئەگەر بە ژمارەیەكی زۆر كەمیش بێت ئاگایان لەو كەین و بەینە بێت، بەڵام هیچ ناڵێن .
هێشتنەوەی تەلەعفەر كە زیاتر ئێستا لە سەربازگەیەكی داعش دەچێت و بە قسەی هادی عامری خەڵكی مەدەنی تیا نەماوە، هەروەها حەویجە كە ئەویش هەر لە سەرەتاوە روگەیەكی گەورەی داعشە، بێهۆ نییە تەنانەت هادی عامری گلەیی ئەوە لە عەبادی دەكات “ كە نایەڵێ حەشدی شەعبی تەلەعفەر ئازاد بكات، لە كاتێكدا رێیدا بەعاج ئازاد بكەن “ هێشتنەوەی حەویجەش پەیوەستە بە هەمان سیناریۆی تەلەعفەرەوە، كە ئەگەر تەلەعفەر بە هۆی توركمانی بونیەوە توركیا رێگری بكات لە چونی حەشد بۆ ناوی، ئەوا حەویجە ناوچەیەكی سونیەو ئەشێكاری تر لە پشت مانەوەی بێت بەم جۆرە، بەڵام سیناریۆكەبۆ هەردوولا هاوشێوەن .
شەڕێك لە دەرگایە كە پێدەچێت سەرلەبەری ئەم هاوینەتەواو نەبێت، یان راستتر وایە بڵێین جارێ دیار نییە كەی دەست پێدەكات، ئاخۆ لە دۆزەخی ئەو شەڕەدا چارەنوسی باشوری كوردستان و ناوچەكە چی دەبێت؟ ئەوەیان جارێ ڕون نییە.

‌ 1559 جار بینراوه‌
08/07/2017
Print Friendly and PDF
بابەتەکانی تری نوسەر
Telerik
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved