وتار
كەركوك بێ رتوش

لەتیف فاتیح فەرەج

ئەوە جێی دڵخۆشی نیە ، كە لە خاڵی پشكنین سەگت تێبەردرێت ، داوای ئەوەت لێبكرێت عێراقی بیت و بە سەگیش بتپشكنن، لەوەش ناخۆش تر ئەوەیە شەوانە كەس نەتوانێ‌ بە ئاسودەیی بنوێت و هەمیشە ترسی ئەوەت هەبێت لە پڕدا بدرێت بە سەرتا، نیگەرانیەكی گەورە هەیە لە كەركوكا ، نیگەرانی شوناس و خۆخاوەنی ، تێگەیشتنی حەشدی شەعبی  و سوپای عێراقی بۆ ئەو دۆخەی ئێستا ، تێگەیشتنێكی لۆژیكیانە نیە ، وەك ئەوەی ئەوان دوژمنیان لەو شارە دەركردبێت ، ئەوەی دەركراوە لەو شارە سەرەڕای هەموو كێماسیەكانی رابردوو دوژمن نین خاوەنن، دەی باخاوەنێكی كەمتەرخەم و دڕدۆنگیش بووبێ‌ .
لە نێو سوپاو حەشدی شەعبی عێراقیدا تێگەیشتنێكی زۆر هەڵە بۆ عێراق هەیە ، ئەم تێگەیشتنە هەمان تێگەیشتنی داعشە بۆ ژیان ، بیركردنەوەی ئاوا كە لات وابێت عێراق و ئەو شارانەی دەچیتە ناوی لە سەربازگە زیاتر هیچی تر نین ، وێرانی دروست دەكات ، ئێستا ئەو سوپاو حەشدە پەروەردەی ژیان و ئاوەدانی نەكراون ، تا لانی كەم كە چوونە شوێنێك بەشداری لە پێكەوە ژیانی ئاشتیانەو ئاوەدانكردنەوەدا بكەن ، وەك چۆن سوپا مۆدێرنەكانی وڵاتە دیموكراتیەكان وا فێر دەكرێن ، دەمەوێت پێتان بڵێم ئێستا كەركوك سەربازگەیەكەو هیچی تر ، رەنگە هەریەكەو بە جۆرێ‌ بۆ مەبەستێك گەشبین بین ، بە وەی كە خراپیەك ، هەڵەیەك ، ناجۆریەك ، لادراوە ، بەڵام پرسیارەكە ئەوەیە چی هاتوەتە جێی ئەوانە .
ئەوانەی ڕون و ڕەوان ڕەخنەی دوێنێمان دەكرد ، لە گەڵ سیاسەتی ناجۆری حزبە دەسەڵاتدارە كوردیەكان نەبووین ، لە گەڵ ئەم میلیتاریزە كردنەش نین ، لە گەڵ ئەوە نین بەردەم دواناوەندی كیژانی كورد هەمەری سەربازی لێبێت ، لە گەڵ ئەوە نین بە سەگ بۆن بكرێت بە هاونیشتمانیەوە ، چ شەرمەزاریەكە هاونیشتمانیەكانی خۆت بە سەگ بپشكنیت و باسی دادگەری و وەك یەكیش بكەیت ، هەقیقەتەكە ئەوەیە كەركوك نەلە سەردەمی بەعسدا باش بوو ، نەلەسەردەمی دەسەڵاتی كوردیدا نەئێستا ، ئەمە راستیەكەیە ،كەركوكی ئێستا كەركوكی دەستی سوپاو حەشدی شەعبیە ، كە سەیری بارو دۆخەكەدەكەم دۆستێك بە پرسیارێك بە ئاگام دێنێتەوە ، ئەو دەپرسێت ئەمە دەبێت هەتا سەر وابێت ، من بە خێرای دەڵێم : نەخێر هاكا لە بەرانبەر ئەمەدا حەشدی كوردی دروست بوو ، ئەو كاتە كەس لە ماڵەكەی خۆیشیدا ناتوانێ‌ بە ئارامی دانیشێت ، ئاخۆ عەبادی و دارو دەستەكەی دەیانەوێت بگاتە ئەوكاتە ، یان بیر لە بە كارهێنانی ئاوەز دەكەنەوە .

‌ 209 جار بینراوه‌
30/12/2017
Print Friendly and PDF
بابەتەکانی تری نوسەر
Telerik
راپرسی
کێ بەرپرسە لەم دۆخەی ئێستای کوردستان؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved