وتار
هاواری ئێرانیەكان

لەتیف فاتیح فەرەج


بواری هەناسە دانی سیاسی لە ئێران تاڕادەی نەبوون تەنگە، جگە لەوەش بارو دۆخی ئابوری و گرانی لەو لاوە بووەستێت، نەبوونی و گرانیەك كە هەموو ئێرانیەكی ناچاری كاری لە ش پڕوكێن كردووە، جگە لەو گروپەی حوكمی ئێران دەكەن، گروپێك كە تەنانەت لە داكەندنی لەچكیش توڕە دەبن، ئەوان بە داكەندنی لەچكێك دنیا لێك دەنێن لێ‌ ناهێڵن خەڵك داوای نان و ئاسایش بكات، لۆمپەنەكانی خۆیان بەرداوەتە خەڵك و لە بری ئازادی پۆلیسی ئاكار رێ‌ لە دەربڕینی نامەیەكی ئاشقانەش دەگرێت، ئاخر ئێرانی شەمسی تەبرێزی و فیردەوسی و سەعدی شیرازی و شامیلۆ، ئێرانی هێمنی موكریانی و سوارەی ئێلخانی زادەو عەباسی كەمەندی، ئێرانی گوڵسورخی و دەروێشیان و دەوڵەتئابادی چۆن دەبێت لە توڕدانی لەچكێك بترسێ‌، لەچكێك كە لە ساڵی 1979ەوە بە زۆر كراوەتە سەر كچانی ئەو وڵاتە، ئێرانیەكان دەمێكە داوای گۆڕانكاری دەكەن، دەمێكە دەیانەوێ‌ ئازادی وەك ئەوەی ئەوان دەیانەوێت بگەڕێتەوە بۆ نیشتمان نەك وەك ئەوەی دەسەڵات دەیهەوێت .
فیلمی مارمۆلك زۆر لەمەوبەر رەخنەی لەو دۆخە ئاخوندیە گرت، بەرلە فیلمی مار مۆلك زۆرێك لە هونەرمەندان و رۆشنبیران وڵاتیان بە جێهێشت و رویان كردە شوێنێ‌ بواری هەناسە دانی سیاسی و ئازادی زیاتری تیا بێت، شوێنێك كە لە سەر بیر و رای جیاواز شیرینی عەلەمهولی نەكات بە دارا، شوێنێك فیلم و گۆرانی قەدەغە نەكات، ئێرانیەكان هاواری كرانەوەو ئازادی زیاتر دەكەن، ئەوان وەك نەتەوەو گەلانێكی هۆشیارو شارستانی  داوای وێرانكاری و روخان ناكەن، داوای گۆڕانكاری دەكەن، وەك چۆن لە سەردەمی شادا داوای گۆڕانكاریان كرد، ناكرێ‌ روحانی و دەست و پێوەندەكەی لە پەیامی ئەو خەڵكە نەگەن،رۆمانی خانوەكەی مزگەوتێ‌، نۆڤلێتی سوتانی  كتێبخانەی مناڵەكان، سەدان چیرۆك و شیعرو گۆرانی، قسە لە تاریكیەك دەكەن، تاریكیەك  كە پێویستی بە هەڵكردنی ملیۆنان مۆمە بۆ روناكبوونەوە، ئێرانیەكان وەگ گەلانێكی زندوو پرسیاری ئەوەدەكەن چۆن دەبێت  نزیكەی 40 سیاسەت لە یەك بەرگ و رەنگا بێت، ئەی جیاوازی، پرسیاری ئازادی زمان، ئازادی وتن، ئازادی نووسین دەكەن، ئەمانە نەكفرن، نەوڵات وێران دەكەن، ئاخر نەك ژەنینی هەزار دەف، ژەنینی هەموو دەفی دنیا لە ئەسفەهان ئازاری چۆلەكەیەك نادەن، لێ‌ دەرچوونی دوو گولە رەنگە قوربانیەكی لێبكەوێتەوە، بۆیە دەبێت دەسەڵاتدارانی ئێران لەو راستیە بگەن كە ئێرانیەكان لە چەقبەستنێكی قوڵدان، چەقبەستنێكی سیاسی ترسناك، كە ئەگەر سیستمەكە چاكسازی تیا نەكرێت هیچ لەوە ناگۆڕێ‌ ئەحمەدی نەژاد، روحانی یان خاتەمی سەرۆك بن، سیستمەكە پێویستی بە گۆڕانكاریە تا ئەو شوێنەی مناڵانی سنە بە كوردی بخوێنن، جگە لە حوكمڕانی ئاخوندەكان ئەحزابی دیكەش هەبن و فرەیی هەبێت، میدیای ئازاد هەبێت، تا ئەو رادەیەی كە بە ئەحمەدی نەژاد دەوترا " چەشمهای خود دەركوردستان بازكون "  .
 لە ئێراندا نادادی و ستەم و ناجۆری هەیە، هەموو دەسەڵاتدارانیش ئەوە زۆر باش دەزانن، من هەمیشە ئێرانم وەك وڵات،وەك ئەدەب و هونەر، وەك شەجەریان و بەنان و شەهرامی نازری و هتدەوە خۆش ویستوە، بەڵام نادادی و ستەمێكی بەرباد هەیە، جارێكیان دۆستێك لە تاران بردمی بۆ ماڵی شاو باسی ژیان و خۆشگوزەرانی و سەڵتەنەتی ئەوی بۆ كردم، دواتر بردمی بۆ شوێنەكەی كە ئیمام لە چەمەران تیای بووە، پێی وتم ئەوە جیاوازیەكەیە، وتم بمبە بۆ سەر مەزاری ئیمام خومەینی، لەوێ‌ پێم وت " دۆستی من ئەوەی شا بە زندوێتی داگیری كردووە و بۆ خۆی بووە، ئیمام بە مردویەتی، دەی جیاوازیەكە چیە ؟!.
ئێرانیەكان دەیانەوێت سبەینێ‌ لە ئەمڕۆ نەچێت، بۆ ئەوەش هەموو رێگەیەك دەگرنە بەر ناكرێ‌ بە گرتن و كوشتن وەڵام بدرێنەوە، كێ‌ لە كوشتنی قاسملوو شەرەفكەندی قازانجی كرد، برین چۆن بە كوشتن ساڕێژ دەبێت .

‌ 532 جار بینراوه‌
02/01/2018
Print Friendly and PDF
بابەتەکانی تری نوسەر
Telerik
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved