وتار
نەوەكانی داعش و مەترسییەكانی بۆ سەر كۆمەڵگە

هاوار ستار


شەڕو وێرانكاری بەرۆكی هەر جێگەك بگرێت قوربانی لێدەكەوێتەوەو ئەوەشی زەرەرمەندی یەكەمە هاوڵاتیانی سڤیلن و لەو نێو ئەوانیشدا منداڵانن كە بێتاوان دەبنە قوربانی كاولكارییەكانی جەنگ جا چ بە بەكارهێنانیان بێت یان لە ناو بردنیان.
بەپێی زانیارییە رۆژنامەوانیەكان لەسەرەتای سەرهەڵدانی داعشەوە منداڵان وەكو چینێكی بەرگری لەنێو داعشدا بەكارهێنراون و لە ئێستاشدا پاش بچوككردنەوەی دەسەڵاتی ئەو رێكخراوە دیسانەوە ئاماژە بۆ بەكارهێنانی منداڵ و پەروەردەی توندڕەوی منداڵان لەلایەن پاشماوەكانی ئەو رێكخراوەوە دەكرێت.
ئاشكرایە لەنێو منداڵانی داعش_یش ژمارەیەك منداڵی كورد هەبوون و هەن كە لەگەڵ دایك و باوكە داعشییەكانیاندا هەڵاتوون لەناوچەكانی ژێرچنگی داعش جێگیر بوون و یاخود هەندێك لە منداڵی خوار هەژدە ساڵی لەلایەن داعش خۆیانەوە رفێنراون و گیراون یان هەڵخەڵەتێنراون و كراون بە چەكداری ئەوان و كە لە ئێستادا وەك مادەیەكی خاو لە دروستكردنی نەوەیەكی تازەی داعش پەروەردەیی فیكری و سەربازی لە قوتابخانەكانی داعشدا وەردەگرن و بۆ شەڕو كاری تێكدەرانە ئامادە دەكرێن.
كاریگەری جەنگ بە جۆرێك كاری كردۆتە سەر ئەو منداڵانە كە دەبنە دوو جۆر و ئەوانەی دەمێننەوە چارەنوسیان نادیارەو نازانرێت ئایندەیان چی دەبێت و ئاشكرایە منداڵ تەمەنێكی بێ خەوش و بێگەردی هەیە و ئەوەی بەسەریدێت خۆی بڕیاردەری نییە چونكە عەقڵی سەرەتایی لەتەمەنی بچوكیدا خاڵییەو ئەوەی كاری لەسەر دەكات چواردەورە، هەر بۆیە ئەو بارودۆخەی ئەم ساڵانەی ناوچەكە بە تایبەت عێراق و سوریا تێیكەوتووە بارودۆخێكی تەواو هەستیارە و زیانی بە گشت كایە و توێژەكان گەیاندوە بەتایبەت منداڵ و لە ئێستاشدا داعش دیسانەوە بە منداڵ لە هەوڵی خۆ نوێكردنەوەیە.
لە یاسای جەنگدا كوشتن و بەكوشتدانی سڤیل تاوانە چ جا منداڵێكی بێ خەوش و پاك، بەڵام ئەوەی لەم ناوچەیە دەگوزەرێ تەواو دوورە لە هەموو بەها مرۆیی و ئەخلاقییەكان و بەكارهێنانی منداڵ لە كاری تیرۆر و توندوتیژی و بۆمببارانكردنی شارەكان بەهەڕەمەكی هۆكاری كوژرانی هەزاران منداڵ بووە لە عێراق و سوریا.
نەتەوە یەكگرتوەكان و رێكخراوە مرۆییەكان و منداڵپارێزەكان دەبێت هەوڵی تەواوو جدی بدەن لە پاراستنی منداڵ و سنورێك بۆ كوژران و لە ناوبردنی منداڵ دابنێن بەهەر رێگەیەك بووبێت، ئەوانەشی لە دەستی داعشدا ماون وەكو قوربانی سەیر بكرێن و ئازادبكرێن تا بە شێوەیەكی دروست ریفۆرم بكرێنەوەو بخرێنەوە نێو كۆمەڵگە.
دەربارەی ئەو منداڵانەی لە باوكێكی داعشی لە دایك بوون و دەبن دەبێت كۆمەڵگە ئەو ئازارانە لە بیر نەكات كە بەسەریدا هاتووە، لە دوای كوژرانی و مردنی دایك و باوكیان ئەو مناڵانە قوربانی گروپێكی توندڕەوبوون و ئەگەر لەبەرئەوانیشدا سەیر بكرێن تەمەنیان هی ئەوە نییە بە تیرۆر لە قەڵەم بدرێن، چونكە یەكەمین شت ئەو منداڵانە قوربانییەكی تری جەنگن، چونكە خۆی ئەوەی نەویستوە لە كێ و چۆن بێتە دونیاوە و چۆن و چ بەرەیەك هەڵبژێرێت.
ئەو منداڵانەی دەستی داعش دوو جۆرن یان لە دایك و باوكێكی داعشی لە دایك بوون یان دایكێكی بەزۆر مارە كراو لە چەكدارانی داعش، منداڵانی دەستی داعش لە گەورەبووندا دەبنە دووبەش (نێچیر و دڕندە) واتا ئەوەی پەروەردەیەكی توندڕەوانە دەكرێت و وەریدەگرێت دەبێتەوە بە تیرۆریست و دڕندەو ئەوەشی زوڵم لێكراوی قبوڵ ناكات و بیری هەیە دەبێتە قوربانیی قسەی كۆمەڵگەو ئایندەیەكی پڕ تانە و تەشەر، لە كۆتاییدا لە هەردوو لا كەسانی باش و خراپیان لێدەردەچێ و هەردوو جۆرەكەش كۆمەڵگە بەرەو داڕمان دەبەن.
ئایندەی منداڵانی سەردەمی داعش و داعشیزم ئایندەیەكی پڕ كێشەیە و ئەمەش دەیسەلمێنێت كە ناوچەكە ئۆقرەبوون بە خۆیە نابینێت و بەهۆی نەوەكانی داعشەوە.

‌ 184 جار بینراوه‌
13/01/2018
Print Friendly and PDF
بابەتەکانی تری نوسەر
هیچ داتایه‌ک به‌رده‌ست نیه‌ .
Telerik
راپرسی
کێ بەرپرسە لەم دۆخەی ئێستای کوردستان؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved