وتار
كورد و چەمكی خیانەت

یوسف تەها


لەمێژووی كورددا هەمیشە شكست و دۆڕانەكان و بێ ئاوەزی سەركردەكان پاساودراوە بە ئەنجامدانی خیانەتكردن لەلایەن هەندێك كەس و گروپ، ئەگەر باش سەرنج بدەین تا ئێستا هێڵی خیانەت و نیشتیمانپەروەری جیانەكراوەتەوەو كێشەكە بە ئاستێك گەیشتووە زۆر بە سانایی دەستەو گروپ و سەركردەكان تۆمەتی خیانەت بدەنە پاڵ یەكتر و دواتریش پێكەوە دابنیشن و لەسەر دابەشكردنی دەسەڵات و ئیمتیازات لەگەڵ یەكتر رێكبكەون و خۆیان بێبەری و پاك لەو كارو كردەوانەیان ببوێرن!
هەموو گەلانی دونیا كەسانێك و دەستەو گروپێكی بەرژەوەندیخوازیان تێدابووە كە دەستیان لەگەڵ وڵاتانی دوژمن و داگیرگەر تێكەڵكردووە لەكاتی شۆڕشەكان و هەوڵەكانیان بۆ ئازادی و سەربەخۆیی، بەڵام دواجار هەر بەرەی نیشتیمانی سەركەوتنی بەدەستهێناوەو خیانەتكارانیش سزا دراون نمونەی شۆڕشی فەرەنسی كە خیانەتكاران دوای ئاشكرابوونی دەستیان بە ناچاری وڵاتیان جێدەهێشت، تەنانەت ئێسك و پروسكی هەندێك لە خیانەتكارانیان لە گۆڕەكانیان دەرهێنا، دوای ماوەیەكی زۆر لەمردنیان كاتێك بەڵگەنامەی خیانەتەكانیان ئاشكرابوو بە ئێستاشیەوە لەگەڵبێت لەو تۆمەتانە پاك نەكراونەتەوەو لە مێژووی خۆیان وەك پەندی مێژوو بۆ نەوەكانیان دەگێڕنەوە.
جیاوازی ئێمە و گەلانی تر ئەوەیە، كە ئەوانەی ئێمە لە مێژوودا بە هۆكاری خیانەتكار ناومان بردوون نەك هەر سزا نەدراون، بەڵكو پاداشتكراون و بەشێكیشیان دوای ماوەیەك بە شۆڕشگێڕ و زاناو تەنانەت بوونەتە سەركردە و سەرمەشقی جوڵانەوەكانی دواترمان!
بۆ ئەوەش چەندین نمونەمان لە مێژووی كورددا بەرچاودەكەێت، لەوانە:
نمونەنەی هەرە دیاری بواری خیانەتكاری لەمێژووی شۆڕشە كوردیەكان یەزدان شێری ئامۆزای بەدرخان پاشای میری بۆتانە كە لەكاتی هێرشی عوسمانی بۆ سەر میرنیشینی بۆتان دژی جوڵانەوەی سەربەخۆیی میر بەدرخان پاشا كە لەساڵی 1842 دەستی پێكردو لە ساڵی 1847 كۆتایی بە جوڵانەوەكەی هێنرا، یەكێك لە هۆكارە سەرەكییەكانی شكستەكەشی دەگێڕدرێتەوە بۆ خیانەتی ئامۆزاكەی كە یەزدان شێر بوو، كە شاری جەزیرەی پایتەختی میرنیشینەكەی دایە دەست عوسمانیەكان و سەنگەری گواستەوە، بەڵام ئەوەی جێگای تێڕامانە هەمان یەزدان شێر لەساڵی 1854 شۆڕش دژی عوسمانیەكان بەرپا دەكات و خەڵكی میرنیشینەكە و تەنانەت كوڕانی بەدرخانیش پشتیوانی لێدەكەن و كوردستانی باكور تا نزیك موسڵ ئازاد دەكات، واتا یەزدان شێر هەم خیانەتكار و هەم شۆڕشگێڕە!
نمونەیەكی قێزەونی تر بۆ خیانەت مەلای خەتێیە، كە لەكاتی هەوڵەكانی میر محەمەد پاشای گەورەی سۆران بۆ سەربەخۆیی كوردستان كە جوڵانەوەكەی لە 1824 دەست پێدەكات و لە ساڵی 1836 لەلایەن عوسمانیەكانەوە كۆتایی پێدەهێنرێت، فتوای دەدات كە هەر سەربازێك شەڕی سوپای عوسمانی و سوڵتانەكەی بكات، كە دەوڵەتێكی ئیسلامی و سوڵتانەكەیشی خەلیفەی موسڵمانانە، كافر دەبێت و لە دین دەردەچێت! هەربۆیە زۆربەی سەركردەو سەربازەكانی سوپای میر محمد چەكیان داناوە و شەڕیان نەكردووە، ئەوەی جێگەی پرسیارە ئەوەیە ئەگەر مەلای خەتێ خیانەتكاربووە، بۆ كەسێك نەبوو بە سزای بگەیەنێت لە كاتێكدا بنەماڵەی میر محەمەد دەسەڵاتیان هەرمایەوە و نزیكەی 10 ساڵی تر دوای ئەم رووداوە هەر حوكمیان كردووە؟ جگە لەمە ئێستا مەلای خەتێ لەلایەن بەشێك لەمێژوونووسان بە یەكێك لەزانا و مەلا گەورەكانی كورد لەقەڵەم دەدرێت كە خزمەتی زۆری بە كورد گەیاندووە!
لای هەموومان روونە و بەڵگەنامەكان گەواهی بەشداری موستەشار و جاش و بەعسییەكان دەدەن لە شەڕی پێشمەرگەو ئەنفال و گرتن و كوشتی و ئەزیەتدانی خەڵكی كوردستان، بەڵام دوای راپەڕین هەموو ئەوانە پاداشت كراون بەرپرسیاریەتی گرنگیشیان لە حكومەت پێدرا!
حیزبەكانیش لە بازنەی خیانەت دەربازیان نەبووەو كە بەشێك لە كارو كردەوەكانیان پێش راپەڕین و دوای رابەڕین لەشەڕ و كوشتاری ناوخۆ و هێنانی هێزی بێگانە بۆ سەر یەكتر دەچنە خانەی خیانەتكارییەوە، بەڵام كام كەسایەتی سیاسی و كام حیزب سزای خۆی لەسەر ئەورەفتارانە وەرگرتووە؟!

‌ 923 جار بینراوه‌
20/01/2018
Print Friendly and PDF
بابەتەکانی تری نوسەر
Telerik
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved