وتار
نامە بۆ دۆناڵد ترەمپ و سەرانی ئەوروپاو دنیا

لەتیف فاتیح فەرەج


پرسیارەكە زۆر سادەیە ، باشە من چی بكەم كە كوردم ، چی بكەم كە كەركوكی یان شەنگالی و عەفرینیم ، یان خەڵكی كۆبانی و مهابادم ، ئاخر كورد بوون گوناهە ، لە وڵاتی خۆم ، لە زێدی خۆم بە ژیانێكی ئاسای رازیم ، ژیانێكی سادە ، لێ‌ تۆپ و تانكی ناتۆ و ئێوە لە عەفرین دەمكوژێت ، كە دێمە وڵاتانی ئێوە سەر ڕەشم و ئاوارەم و پەنابەرم و شایانی ژیانی شایستە نیم ، لە وڵاتی خۆمدا لە وڵاتێكا هەزاران ساڵە باو باپیرم نەوە نەوە لە سەری ژیاون دیسان شایستەی ژیان نیم ، بۆ ئازادی كچ و ژنەكانمان چەكیان هەڵگرت و بوونە قوربانی ، لە عێراق كیمیام بەسەردا دەكرێت و ئەنفال دەكرێم و مافی ریفراندۆمیشم پێ‌ نادرێ‌ ، لە ئێران دەكرێم بە دارا، لە سوریاشوناسنامەم نادەنێ‌ ، لە توركیا زمانم قەدەغە دەكەن ، لە دەرەوەی سنورەكانی توركیاش دەمكوژن، دەمەوێ‌ بە كۆڵبەری بژیم دەمكوژن ، دەمەوێ‌ بە جوتیاری بژیم دەمكوژن ، سەدان ساڵە ئەمانە ژن و منداڵی كورد دەكوژن و ئێوەش لە بری پشتگیری قوربانی بكەن ، دەڵێن لە بارودۆخی توركیا و ئەوانی تر تێدەگەن ، ئێوە چ مرۆڤگەلێكن لە بارو دۆخی داگیركارو ستەمكارو جەلاد تێدەگەن و لە بارو دۆخی قوربانی نا .
چەند شەرمە لە سەردەمی سەرۆكایەتی ئێوەدا و بە بەرچاوی ئێوەوە ژن و منداڵ ببنە قوربانی بە تۆپ و فڕۆكەی ئێوەو ئێوەش هەر بیرتان لای بەرژەوەندی و بازاڕ و فرۆشتنی چەك بێت ، چەند شەرمە بەرژەوەندی بخرێتە پێش مرۆڤەوە ، من هیچ گلەیەكم لە ئەردۆغان و عەبادی و ئەسەدو ئاخوندەكان نیە ، ئەوان بڕیاری خۆیان داوە جەلادو خوێنڕێژو ستەمكارن ، من گلەیم لە ئێوەیە بانگەشەی دیموكراسی دەكەن و راست ناكەن ، باسی مافی مناڵ دەكەن و راست ناكەن ، باسی ئازادی ژن دەكەن و راست ناكەن ، باسی لێبوردەیی دەكەن و راست ناكەن ، باسی ئاشتی دەكەن و درۆ دەكەن .
دارەكانی كوردستان گوناهیان چیە فڕۆكەكانی ناتۆ بیانسوتێنن ، كانیەكانی كوردستان گوناهیان چیە دەبابەكانی ناتۆ بنەبڕیان كەن ، پاساری و چۆلەكەو مەل و باڵدارەكانی كوردستان بۆ دەبێ‌ لە گڕی ستەمكاریدا بسوتێن ، قسەی زل و باق و بریقی ژینگەو مافی ئاژەڵ و پەلەوەرو پاراستنی سروشت و ئەوانە كێ‌ بە پوڵێكی قەڵب اێتان دەكڕێت .
شەرم بتانگرێ‌ كە كچێكی تەمەن 20 ساڵ لە بری تارای بوكێنی و خەونی لە ئامێزگرتنی منداڵ ناچاری ئەوە بێت لە پێناوی داكۆكی لە شارەكەیدا ببێتە قوربانی ، شەرم بتانگرێت كە وێنەی ئەو منداڵانە دەبینن، ئەردۆغانی جەلادو درۆزن دەیانكوژێت و ئێوەش لە بری سەرزەنشت  دەڵێن لە توركیاو ئەردۆغان تێدەگەین ، چەند شەرمە لە سەردەمی ئێوەدا مرۆڤایەتی لەو پەڕی ناشرینیدایە ، جیاوازی ئێوەو ئەردۆغان و ئەو فڕۆكەوانەی بۆردومانی عفرین دەكات  چیە .
كێ‌ رێگەی بە توركیا داوە لە هەر كوێی كوردستان خەڵك داوای ئازادی بكەن ئەو چەك و چۆڵی ناتۆیان لە سەر تاقیكاتەوە ، كوشتنی مناڵی ساوا لە باشوری كوردستان " عێراق" لە قەڵادزێ‌ بە فڕۆكەی توركی ، كوشتنی مناڵ لە رۆژئاوای كوردستان لە عفرین بە فڕۆكەی توركی ، ئاخر شەرم بتانگرێت ئەو فڕۆكانە تەنها فڕۆكەوانەكەی توركیەو ئەوی تر هی ئێوەیە ، هی ئەڵمانیای ئەنگێلا  مێركڵ و بەریتانیای تیریزا مەی و ئەمەریكای دۆناڵد  ترەمپ و روسیای پۆتن و فەڕەنسای  ئیمانێۆڵ ماكرۆن و ئیتالیای سێرجۆ مانارێلاو ئەوانی تر .
 لە راستیدا ئەگەر ئاكاری سیاسی و ئینسانیتان نەتاجوڵێنێ‌ ، ئێوەو ئەردۆغان لەم كوشت و بڕەدا هیچ جیاوازیەكتان نیە.
هەمان ئەو قسانەم بۆ مەلیك سەلمان و هەموو سەركردە موسوڵمانە درۆزنەكانی دنیاشە .

‌ 121 جار بینراوه‌
05/02/2018
Print Friendly and PDF
بابەتەکانی تری نوسەر
Telerik
راپرسی
پێت وایە دۆخی ئێستای كوردستان بەچی چارەسەر ئەبێت؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved