وتار
ئەردۆغان بە زلە كەی عوسمان هەڕەشە لە كێ دەكات ؟!

ئومێد مەحمود

 رەجەب تەیب ئەردۆغانی سەرۆكی توركیا، كە خۆی بە میراتگری سوڵتانە كەللەپوچ و خوێنمژو شمشێربەدەستە خوێناوییەكانی ئیمپراتۆریەتی عوسمانی دەزانێت و شانازی دەكات بەو مێژووە پڕ لە شەرمەزاریییە لە داگیركاریی و جینۆسایدكردنی گەلانی وەك كوردو ئەرمەن و گەندەڵیی و پیلانگێڕی دژ بە ئازادیخوازان و گەلانی ستەمدیدەو هاوپەیمانیكردن لەگەڵ نازییەكان و فاشیستەكانی ئەڵمانیاو ئیتاڵیا، وەك كەمال كلیچدار ئۆغڵو سەرۆكی پارتی گەلی كۆمار(جەهەپە)ی ئۆپۆزسیۆن دەڵێت: “ترسنۆكترین سەرۆك و سەركردەیە لە مێژووی توركیا”و... هەمیشە بۆ بەرگریی لە خۆیو حزب و بنەماڵەكەی و بەرەنگاربونەوەی نەیارانی، پشتی بە تاقمە تیرۆرست و هەرە رەگەزپەرسترین و دواكەتوترین رەوتە سیاسییەكان و توێژە كۆمەڵایەتییەكان بەستوە.
ئەردۆغان هەمیشە، لەسەر بنەمای ئەوەی كە خۆی ئامانجییەتی و خوازیارییەتی لێدوان دەدات، نەك وەك ئەوەی لە واقیعدا هەیەو روودەدات، ئەمەش لەلایەك رەنگدانەوەی دەروونی پڕلە نەخۆشییەكانی ئەوە، وەك خۆبەزلزانیی و نێرگسی و بڕوابەخۆنەبوون و لەلایەكی دیكەشەوە بۆ چەواشەكردنی رای گشتی و بارگاویكردنی ئەندام و لایەنگرە كاڵفام و بیركۆڵەكانی.
ئەگەر هەڕەشەو چاو سووركردنەوە كومێدییەكانی لە روسیا كاتی خستنەخوارەوەی فڕۆكەكەی ئەو وڵاتە لە بیرخۆمانی بەرینەوەو فەرامۆشی بكەین، خۆ هەمو جیهان ئەو وتەیەی سوڵتانی لە كاتی پەلامارەكانی داعش بۆسەر كۆبانێی بیر ماوە كە وتی: (كۆبانێ‌ دەكەوێت و كەوتوە)، وەك ئاماژەیەك و فرمانێك بۆ تیرۆرستان كە دەبێت كۆبانێ‌ بە هەر نرخێك بێت داگیر بكەن، بەڵام بەرخودان و بەرگریی قارەمانانەی شەڕڤانان، ئەردۆغانی بێ‌ ئومێد كرد.
لە ئێستاشداو لەو رۆژەوەی كە بڕیاری پەلاماردانی عەفرینی داو هەرچی لە توانایدا هەبوە لە توانست و هێزی سەربازیی و لۆجستی، سیاسی، راگەیاندن، دیبلۆماسی، هەواڵگریی...تاد، بۆ داگیركردنی ئەو شارۆچكەیە بەكاری هێناوە، بەڵام لە بەرامبەر ژیریی و ورەی پۆڵاین و قەڵای گیانفیدایی شەڕڤانان داڕوخاوە، لە كاتێكدا زۆر بە لووتبەرزییەوە باسی ئەوەی دەكرد كە بە سێ‌ و چوار رۆژێك عەفرین داگیر دەكات و بەرەو منبج دەچێت!
ئێستا (سوڵتان) هەست دەكات خەوەكانی راست دەرنەچوون، بۆیە هەست بە شكستێكی گەورەی سەربازیی و دەروونی قووڵ دەكات.
بەڵگەكانی هەستكردن بەو شكستەش لە رەفتارو گفتارەكانیدا بە سانایی هەست پێدەكرێت، بۆ شاردنەوەو پەردەپۆشكردنی ئەو شكستانەشی، ئەردۆغان پەنای بردووەتەبەر، چەندین رێگاو شێوازی جۆراوجۆر، كە دیارترین و كومێدی ترینیان هەڕشەو گوڕەشە بێ‌ بنەماكانیەتی بە شێوەیەك بووەتە گاڵتەجاڕی نەك هەر رۆژنامەنوسان و میدیاكان، بەڵكو وتەبێژی وەزارەتی دەرەوەی ئەمریكاش.
دوای لێدوانەكەی ریكس تیلەرسۆنی وەزیری دەرەوەی ئەمریكا كە تەئكیدی لە هاوپەیمانیی نێوان واشنتۆن و ئەنكەرە كردەوە، دوای كەمتر لە سەعاتێك، ئەردۆغان وەڵامی دایەوە كە دیار بو لەو لێدوانە زۆر توڕە بو و وتی: كام هاوپەیمانیی؟ وەك ئاماژەیەك بۆ هاوكارییەكانی ئەمریكا بۆ یەپەگەو یەپەژە.
دواتر بە لووتبەرزییەوە وتی: هێشتا زللەی عوسمانیان نەچێژتوە!!
لە كۆنگرەیەكی رۆژنامەوانیشدا وتەبێژی وەزارەتی دەرەوەی ئەمریكاش، بەگاڵتەجاڕی و زەردەخەیەكی پڕماناوە، ئەو وتەیەی ئەردۆغانی بە كۆمێدی وەسف كرد.
هەمو چاودێریك و هەر هاوڵاتییەكی توركیایی كەمێك خاوەن هزرو بیركردنەوە، باش ئەوە دەزانێت، كە ئەردۆغان ئەو جەسارەتەی نیە هەڕەشە لە ئەمریكا بكات، بەڵكو هەڕەشەكە روو لە كوردو شەڕڤانان بوو، هەر دوا بەدوای ئەو هەڕەشەیەش ئەردۆغان گازی كیمیاوی لە عەفرین بەكارهێنا، كە بەكارهێنانی ئەو چەكەش دژی هێزێك كە لە هەمو ئاستێك و بە هەمو پێوەرێك هاوسەنگ نیە لەگەڵ سوپای توركیا، بەهەموو لێكدانەویەك و شرۆڤەكردنێك تەنها یەك مانای هەیە كە ئەویش شكستی چەكدارانی تورك و تیرۆرستانە بەرامبەر بە هەپەگەو یەپەژە.
هەر بۆ شاردنەوەو پەردەپۆشكردن و پاساوی ئەو شكستە، میدیا رەشەكانی ئەردۆغان، كەوتونەتە پڕوپاگەندەكردن كە گوایە، ئەوە هێزەكانی مارێنزی ئەمریكایە بە جل و پۆشاكی شەڕڤانانەوە لە عەفرین شەڕ لەگەڵ(سوپای) وڵاتەكەیان دەكەن!
لە كاتێكشدا بە بەردەوامیی و شەو و رۆژ، سوپای داگیركەری توركیا، هاوڵاتیانی عەفرین تۆپباران و موشەكباران دەكات، كەچی ئەردۆغان و میدیا رەشەكەی پڕوپاگەندەی ئەوە دەكەن كە گوایە بۆ (پاراستنی گیانی هاوڵاتیان) پێشڕەوییەكانیان، سست و لەسەرخۆیە!
لە هەمو بارێكداو لەهەر چوارچێوەیەكی دڵڕەقی و كەللەڕەقیی فاشیستانەو میلیتارییانەی ئەردۆغان و ژەنەڕاڵەكانیدا بێت، ئەوە راستییەكی حاشاهەڵنەگرو روون و ئاشكرایە، بە بەرچاوی هەمو جیهانەوە، كە شەڕڤانان سەركەوتنێكی مێژووییان لە خەبات و بەرخودان دژی ستەم و داگیركاریی تۆماركردوەو شكستیان بە فاشیزمی تورك و هاوپەیمانەكانیان لە ناوچەكەو جیهان هێناوە كە وەرچەرخان و قۆناغێكی نوێ‌ و هەرە گەورەیە لە مێژووی خەبات و تێكۆشانی كوردو گەلانی ستەملێكراو و داگیركراوی جیهان و ناوچەكە، دان پێدانانیش بەم راستییە، نۆشكردنی ژەهری مەرگ و لەناوچوونی ئەردۆغان و (نیو عوسمانیزم)ەكەیەتی، بۆیە نابێت (لۆمە)ی بكرێت!


‌ 808 جار بینراوه‌
24/02/2018
Print Friendly and PDF
بابەتەکانی تری نوسەر
Telerik
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved