وتار
عفرین بۆچی كەوت ؟

نەوزادی موهەندیس

شاری عفرینی خۆڕاگر لە ئەنجامی پیلانێكی نێودەوڵەتی نامرۆڤانەوە كەوتە ژێر داگیركردنی سوپای توركیا و چەتە تیرۆریستەكانی لە سوپای بەناو ئازادی سوریاو بەرەی نوصرەو زیاد لە 25 میلیشیای چەكداری تونڕەوی تر كە هەموانیان لەژێر چەتر و باڵی دەوڵەتی توركیادا سەرپەرشتیدەكران و ڕێنوێنی و پاڵپشتی سیاسی و ئەمنی و چەكداری دەكران، توركیا بۆخۆی لەم پیلانەدا بەتەنها نەبوو،بەڵكو هەمئاهەنگی تەواوی لەگەڵ ڕوسیا و ئێران و تەنانەت ڕژێمی سوریاشدا هەبوە  وەك بەرەیەك دژ بە بەرەی ئەمریكا و ئەوروپیەكان.بۆیە بەخەم و كەسەرێكی گەورەوە شاری عفرین دوای 57 ڕۆژی تەواو لە مقاوەمەت و بەرگریكردن و بەرخۆدانێكی بێ وێنە لەم سەدە و ڕۆژگارەدا لە بێ‌ كەسی و بێ‌ پشتیوانیەكی ڕاستگۆ و ڕاستەقینە كەوتە بەر هێرش و پەلامار و داگیركردنەوە بەبەرچاوی هەموو دونیای  ڕۆژهەڵات و ڕۆژئاوای بەناو دیموكراسی و ئازادیخواوە تەنانەت نەتەوە یەكگرتوەكان و وڵاتانی ئیسلامی و عەرەبیش هەڵوێستێكی توند و جدیان نەنواند دژی ئەو داگیركردنەی توركیا بەرامبەر لانی كەم بەشێك لەوڵاتێكی عەرەب كە سوریایە.بۆخۆی كوردیش لەهیچ بەشێكەوە نە لەسەر ئاستی حیزب و سەركردە و تەنانەت جەماوەریش پشتیوانیەكی تۆكمە و پتەو هەست پێنەدەكرا.وعفرینیەكان بەتەنها هەر ئەوەندەیان لەتوانادا بوو كە بەرامبەر دووەم گەورەو پێشكەوتوی سوپای ناتۆ خۆڕابگرن.
لەئێستاشدا و دوای كەوتنی عفرین و جێبەجیكردنی پیلانە شەڕەنگێزیەكانی توركیا بۆ لەناوبردن و دەركردنی كوردان لە زێدی باوباپیرانیان و نیشتەجێكردنی ئاوارە سوریەكان لە نەتەوە و ئاین و مەزهەبەكانی تر لە جێگەیاندا گەرەكێتی كە جێ پێگەیەكی توندو پتەو بۆ ئایندە لەسنورەكانی باشوریدا دروستبكات و بیكاتە جێگەو مۆڵگەی سوپا و تیرۆریستانی سەر بەخۆی و بەتایبەتیش كورد لە سەر سنورەكانیدا نەهێڵێت و پیلانی دواتری ئەردۆگان و توركیاش بریتیە لە هێرش و فشاری زیاتر بۆ سەر كوردان لە منبەج و كوبانێ‌ و تەنانەت هەڕەشەش لە قامیشلۆ و حەسەكەش دەكات و بەئاشكراش هەڕەشەی پەلاماردانی پەكەكەش دەكات لە شەنگار لە عێراقدا و هەوڵیشدەدات بەرەو قەندیلیش هەنگاو بنێت.
هەموو ئەم هەڵوێست و پێداگیری و زیادەڕەویانەی توركیا و ئەردۆگان لەئەنجانی بێدەنگی كۆمەڵگەی نێودەوڵەتی بەگشتی و ئەمریكا و ڕوسیاش وەك دوو زلهێز و دووكاراكتەری سەرەكی كێشە و گرفتەكانی ناوچەكە توانیویەتی بەشێك لە ئامانجە پاوانخوازی و تاكڕەویەكانی بێنێتەدی. هەموو ئەم هەڵوێستە توندڕەوانەیەی توركیا جێگەی سەرسوڕمان نین بۆ كورد چونكە ئەو بە ئاشكرا و نهێنی دژایەتی خۆی نەشاردۆتەوە بۆ ئامانج و دروشم و نیاز و خواست و مافە ڕەواكانی كورد لەسەربەخۆبوون و ئازادبون و پێكەوەنانی دەوڵەتی سەربەخۆدا، بەڵام ئەوەی مایەی نیگەرانیە و شۆكبونی كوردانە بریتیە لەهەڵوێستی ڕوسیا كە هەمیشە واخۆی نیشانداوە كە دۆست و پشتیوانی جوڵانەوە ئازادیخواز و چەپ و سۆسیالیستەكان بێت و مافی گەلانی داگیركراو دەپارێزێت،بەڵام ئەوەی پۆتین و ڕوسیا كردویانە دەرهەق بەكورد وپەیەدە و پەكەكەش وەك دوو ڕێكخراوی چەپ و ماركسی ئەوپەڕی بێ‌ ڕەوشتی سیاسیە و ناچێتە چوارچێوەی هیچ بەهاو لۆجیك و مۆڕاڵێكی مرۆڤدۆستانە و ئازادیخوازانەوە،ئەم هەڵویستەی ڕوسیاش بۆ كوردانی هەرچوار پارچەكە نوێ‌ نیە بەڵكو هەر لەهاتنە سەر حوكمی  سۆسیالیستەكان لە ساڵی 1917وە هەمیشە ڕۆڵێكی نەرێنیان هەبوە بەرامبەر شۆڕشەكانی كورد لە باكور و باشوور و ڕۆژهەڵاتی كوردستان لەسەردەمەكانی شۆڕش و ڕاپەڕینەكانی شێخ سەعیدی پیران و شێخ مەمحمود و پێشەوا قازی موحەمەد و دواتریشدا و ئێستاش لە ڕۆژئاوای كوردستان لەسەر هەمان سیاسەتی كۆنی خۆی بەردەوامە و كوردانی پشتگوێ‌ خستوەو كردینیە پاداشتێكی گەورە و ئاسان بۆ توركیا و سوریا.
هەموو ئەم هەڵویستە نامرۆڤانەیەی هەموان دژ بە كورد،تەنها و تەنها لەبەر پاراستنی بەرژەوەندیە سیاسی و ئابوری و ئەمنیەكانی خۆیانە و هەموان گەرەكیانە كە لە دەسكەوتەكاندا بەشیان هەبێت لەسەر حسابی گەلانی ناوچەكە و بەتایبەتیش كورد. بەڵام پێناچێت تاسەر نە سیاسەتەكانی توركیا و نە ئێران و نەڕوسیاش لەناوچەكەدا سەركەوتن بەدەستبێنن و لە ئایندەدا هەوڵەكانی ئەمریكا و ئەوروپیەكان بەتوندی دژی ئەو بەرە نەگریس و شەڕەنگێزە دەوەستنەوە ،گەر بەهەڵایسانی جەنگێكی گەرمی گەورەش بێت،چونكە نە ئەمریكا و نە ئەوروپیەكان ناوچەی ڕۆژهەڵاتی ناوەڕاست بەو گەورە و گرنگیە ئابوری و ئەمنی و سیاسیەوە بەجێناهێڵن بۆ ڕوسیا و توركیا و ئێران ئازادانە تەراتێنی تیادا بكەن،بەڵكو لە ئێستاوە ئەمریكا و سعودیە و ئیمارات و میسرو ئیسڕائیل لەگەڵ ئەوروپیەكانیشدا كەوتونەتە خۆ بۆ پێكەوەنان و خۆئامادەكردن بۆ ئەو جەنگە چاوەڕوانكراوەی ئایندەو هەریەكەش ڕۆڵی خۆی بۆ دیاریكراوە.
بەدڵنیایش كورد لە ئەنجامی شكست و بچوكبونەوەی هەریەكە لە ئێران و توركیا قازانجی گەورە بەدەستدێنێت و ڕژێمەكانی توركیا و ئێران و سوریاش بەم شێوەیەی ئێستا نامێننەوە و كوردیش لە باكور و ڕۆژئاواو ڕۆژهەڵاتیش بە چەشنی باشوور جۆرە ئازادی و سەربەخۆیی و خۆبەڕێوەبردنێك بەدەستدێنن.
‌ 1013 جار بینراوه‌
28/03/2018
Print Friendly and PDF
بابەتەکانی تری نوسەر
Telerik
راپرسی
?? ?????????? ??????? ???? ?? ??? ???? ??????

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved