وتار
رێكخراوی EZLN چییە و (گەریلا ماركۆس) كێیە؟

ئا/ شیركۆ مەحوی


لەم لێكۆڵینەوەیەدا ئارمانج و خەباتی تەڤگەری زاپاتیستا، دەخەمە روو، ئارتەشی رزگاری نەتەوەیی زاپاتیستان EZLN، چی كاتێك؟ وە بۆچی دەستی بە شەڕی گەریلایی كرد؟
فەرمانداری گەریلاكان، (ماركۆس) كێیە و ئامانجی چیە؟ تێكۆشانی ئازادی گەریلاكان لە چیاكانی باكوری مەكسیك، لە چ ئاستێكەوە گەیشتووە بە چ ئاسنێك؟
ئەزلین، ئارتەشی رزگاری نەتەوەیی زاپاتیستان، ناوی كۆمەڵەیەكی شۆڕشگێڕە، دەربارەی ئەو ناوە، لە رێبەری شۆڕشی مەكسیك (ئەمیلیانۆ زاپاتا)ەوە هاتووە، كە خۆی وەكو میراتگری بیردۆزی زاپاتا دەبینێ، هەروەها بە دژە ئیمپریالیست دەناسرێت، ئەو خاكەی لەسەری دەژین، تا ئاستێك بە سیستەمێكی خۆبەرێوەبەری لەسەری دەژین، لە ژێر دروشمی (خاك و گەل، گەل فەرمان دەكات، حكومەت پێك دێنێت) خەبات دەكەن، گرنگترین دروشمیش لای ئەوان (ئیدی بەسە) یان (ئازادی و دیموكراسی)یە.
بۆ ئەوەی پشتیوانی و پشتگیری بۆخۆیان وەدەست بخەن، ئەنتەرنێت و تەكنەلۆژیا بەكاردەهێنن، زاپاتیستەكان لە دژی گڵۆبالیزم و لیبڕالیزمن، لەبەر ئەوەی پێیان وایە ئەو دوو رامانە بە شێوەیەكی نهێنی كاریگەری نەرێنی لە گوندنشینانی ناوچەكە دەكات، هەر لەبەر ئەو هۆیەش بوو لە ساڵی 1982 دا، گروپێكی گەریلاییان پێكهێنا و ناوی رێكخستنەكەیان بە EZLN جاڕدا.
لە ناو ئەو گروپەدا (سوپ كۆماندان ماركۆس) هەیە، وە زیاتر لە 10 ساڵ ئامادەكاری و خۆڕێكخستن كردن دەستیان بە شەڕی چەكداری كرد، لە ساڵی 1994 بە دواوە بە پراكتیك دەستیان بە خەبات كرد و لە هەرێمەكەی خۆیان گەلێك شارەوانیان ئازاد كرد و خستیانە ژێر كۆنتڕۆڵی خۆیانەوە، زۆرینەی گەریلاكانی ئەم رێكخستە لە خەڵكی هەرێمەكە پێك دێن و لە دەرەوەی هەرێمەكەش گەلێك پشتگیری و هاوكاری دەكرێن، هەروەها لە رێوەبەری و ریزە سەربازییەكان 30% ژنان جێی خۆیان دەگرن و خەبات دەكەن.
لە ناو ئەو گەریلایانەدا ئەوەی لە هەمووان زیاتر باس دەكرێت و لە مەیدانی نێودەوڵەتیدا ناسراوە (گەریلا ماركۆس)ە.
دەربارەی ژیانی ناوبراو، زانیاری زۆر زۆر كەمە، بەڵام ئەو شۆڕشگێڕێكی چیاكانی باكوری مەكسیكە و رێبەری ئارتەشی رزگاری نەتەوەیی زاپاتیستانە، خۆی دەلێت (ماركۆس) ناوی ئەو هاورێیەمە كە لە لایەن عەسكەرەكانەوە كوژرا، ئێستا ئەو ناوی دەلەگەی ژمارە سفر بەكار ئەهێنێت، بە پێی كۆمەلێك سەرچاوە، ناوی راستەقینەی ئەو كەسایەتیە (ڕەفایل سپاستیان گولیان) وە لە ساڵی 1957 لە دایك بووە، بەڵام ئەو خۆی بە ئیسرارەوە دەلێت كە من ئەو كەسە نیم، بەڵكو من لە خانەوادەیەكی كۆچبەری ئیسپانیام،، پێش ئەوەی دەست بە گەریلایەتی بكەم، لە زانكۆی مەترەپۆلیكی ئیسپانی لە بەشی پڕۆفیسۆری ئەدەبی و فەلسەفە خوێندوومە.
گەریلا ماركۆس، لە ساڵی 1984 هەتا ئێستا لەگەڵ هەڤاڵانی لە دارستانەكان دەژین و هەتا ئێستا رووپۆشەكەی لەسەر رووی لانەبردووە، لە 12 ساڵیەوە هەتا ئێستا كتێبی(دونكوشوت) كە نوسەرەكەی (سەرڤانتس)ە، لە لایەتی و هەمیشە لە نزیكی خۆی دایدەنات و لەگەڵ ئەو كتێبەدا دەژی.
گەریلا ماركۆس لە دوای ساڵانی 1992 بە سەدان نوسین و نامیلكە و 30 كتێبی نوسیوە، واتا نوسەری 30 كتێبە.
لە مێژوودا بۆ جاری یەكەم لە مانگی ئازاری 2001 دا وەكو شەرڤانێكی دژی رێوەبەری حكومەت چووە پەرلەمان و لەوێ قسەی كرد.
جل و بەرگی ماركۆس زۆر سەیر و سەمەرەیە و بە لای زۆر كەسەوە سەیرە، لە هەر دەستێكیدا كاتژمێرێك هەیە، هەمیشە رووی خۆی پۆشیوە و شەبقەیەكی لەسەرە، لایتێك و بێتەل(لاسلكی) پێیە.
گەریلا ماركۆس لە بارەی ئەو شتانەوە دەلێت: لەبەر ئەوەی ئێمە لە شوێنێكی بێ كارەبا دەژین، پێویستمان بە لایتە، لە رێگەی بێتەلەكانەوە لەگەڵ هەڤالانم قسە دەكەم و دەكەومە پەیوەندیەوە، هەركاتێك تووشی كێشەیەك دەبم، خەڵكی هەرێمەكە لە رێگەی ئەو بێتەلانەوە فریام دەكەون، هەر بە هۆی ئەو بێتەلانەشەوە زۆر جار دوژمن زانیاریمان لێ دەدزێت، لە بارەی شەبقەكەشەوە، من لە هەژدە ساڵیەوە بەكاری دەهێنم، زۆر جار دەپرسن كە بۆچی دوو كاتژمێر بەكار دەهێنم؟
كە هاتمە دارستان، سەعاتێكم خستە دەستێكم
كاتێكیش ئاگربەستمان كرد سەعاتەكەی ترم خستە دەستم
هەر كاتێك هەردوو كاتژمێرەكە یەك كات نیشان بدات، ئەوە بەو واتایە دێت كە تەڤگەری گەریلاكانی زاپاتیستان گۆتایی دێت.
لە چاوپێكەوتنێكدا دەڵێت: لە ساڵی 1983 خۆم و یازدە هاورێم هاتووین و لە پێناو ئازادیدا تێدەكۆشین.
كتێب و نوسینەكانی گەریلا ماركۆس، بەڵگەیەكە بۆ ئەوەی كە بزانین ئەو كەسێكی فەلسەفی و خاوەن دونیابینیەكی گەورەیە، هەروەها زۆر بیردەكاتەوە و لە گفتوگۆدا سەرنجی هەموان رادەكێشێت، لە نوسینكدا دەڵێت: من زۆر بەپەلە دەنوسم، چونكە هەر ساتێكی من لەوانەیە دوا سات بێت.
دەزگای هەواڵگری (سی ئای ئەی) (CIA) بۆ ناوزڕاندنی گەریلا ماركۆس، نوسراوێكیان بڵاو كردەوە و گوتیان ماركۆس (گەی)ە.
ماركۆس لە وەڵامدا گوتبووی:
بەلێ راستە
من لە سانفرانسیسكۆ گەیم
لە باشوری ئەفریقیا كەسێكی رەشم
لە ئەوروپا كەسێكی ئاسیاییم
لە ئیسپانیا ئەنارشیست
لە ئیسڕائیل فەڵەستینیم
لە ئەڵمانیا جولەكەم
من ئەو قوتابیەم كە خوێندنەكانم ناكەم
گەریلا ماركۆس هەمیشە بە خۆی دەلێت (هاوكاری فەرماندە)، كاتێك لێی دەپرسن بۆچی وا دەلێی؟ تۆ فەرمان لە كێ وەردەگریت لە كاتێكدا خۆت فەرماندەی؟
لە وەڵامدا دەلێت: ئەرنەستۆ چێ گیڤارا.

‌ 470 جار بینراوه‌
31/03/2018
Print Friendly and PDF
بابەتەکانی تری نوسەر
هیچ داتایه‌ک به‌رده‌ست نیه‌ .
Telerik
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved