وتار
كەركوك بۆ كەركوكییەكان

هیوا نه‌جات

‎ئەم دەستەواژەیە ئەگەر خوێندنەوەیەك قوڵی بۆبكرێت دەتوانێت ببێتە جێگای سەرنج، وەك چۆن لە ئێستادا بۆتە كارتی جۆكەری زۆربەی حیزب و كاندیدەكان بۆ بانگەشەی هەڵبژاردن.
‎یەكێك لەو خاڵانەی سەرنجی راكێشاوم ئەمەیە كە سیاسییەوانی تازەو كۆن، لەگەڵ كاربەدەستی پلە باڵای شارەكە ئەم قسەیە دەكەن، وەك ئەوەی ئەوان هیچ حوكمی شارەكەیان نەكردبێت و بڵێن ئێمە فریادڕەسی ئێوەین، ئێوە متمانەمان پێ بدەنەوە ئێمە ژیانتان وەك شەو و ڕۆژ دەگۆڕین، ئەگەر متمانە بە ئێمە ببەخشن ئەوا كەركوك بۆ كەركوكییەكانە.
ئۆپۆزسیۆن دەڵێت ئەگەر متمانە بە ئێمە بكەن ئەوا ئێمە بەرەو شەمەندەفەری بەختەوەری دەتان بەین و بە متمانە پێكردنمان ئێوە بڕیارتان داوە كە ئێوە بڕیاردەری ئایندەی شارەكەن و ئایندەیەكی گەش چاوەڕوانتانە.
‎لێرەدا جەخت لەوە دەكەمەوە كە ئەم وتارە چۆن كاری لەسەر بكرێت دروستەو ئایا كاری بۆ كراوە؟
‎هەر بانگەشەیەك كە دەكرێت واتا ئەمە شتێك تازەیە، كەواتە ئەگەر تا ئێستا كەركوك بۆ كەركوكییەكان نەبووە بۆ كێ بووە؟ بۆ بۆ ئەوان نەبووە؟ چیبكەن تا بە كرداری ببێتەوە بە هی ئەوان؟
‎كەركوك شارێكی گەورەو فرە پێكهاتەیەو خاوەنی دین و مەزهەبی جیاوازن. ‎كەركوكییەكان ئەو خەڵكانەن كە خاوەنی رەسەنی شارەكەن و ئەوانەن كە هەمیشە لێی ژیاون و دەژین.
‎بۆ ئەوەی كەركوك بۆ كەركوكییەكان بێت، دەبێت خۆیان بڕیار لە چارەنووسی شارەكەیان بدەن و خۆیان بڕیار لە داهاتوو بەڕێوە بردنی بدەن، پێویستە خۆیان خاوەنی خۆیان بن و بەئیرادەیەكی پۆڵاینەوە بەرگری لە بەرژەوەندییەكانی تاك بە تاك و ئایندەی شارەكە بكەن، ‎نەك دوای سیاسەتی كوێرانەو دروشمی ناسیۆنالیستانەو گوتاری بە شەوق و بێ ناوەڕۆك بكەون.
‎بۆیە راستگۆیانەترین هەنگاو بۆ ئەم گوتارە وای دەبینم لەم ماوەیەی كە ماوە بۆ هەڵبژاردن هەموو حیزبەكان داوا بكەن و هێزی خۆیان بۆ هاندان و هێنانی خەڵكی بۆ سەر سنوقەكانی دەنگدان چڕ بكەنەوە، لەبەرئەوەی لەئێستادا ناوچەی كێشە لەسەرەكان بەبارودۆخێكی تایبەتدا دەڕوات و دەكرێت یەك هەڵە ژیانی ئاشتیانە بگۆڕێت بۆ خراپترین بارودۆخ.
‎باوەڕم وایە كە هیچ پێكهاتەیەك ناتوانێت بەتەنها حوكمی شارەكە بكات و راستیش ئەوەیە هەموان مافی ژیان و بەژداریكردنیان لە بەڕێوەبردندا هەبێت، بەڵام ئەگەر بەشێكی زۆر لە دەنگدەرانی كوردی پارێزگاكە نەچن بۆ دەنگدان ئەوا هەر بەژداری نەكردنێك ئایندەی چوار ساڵ و بگرە زیاتری شارەكە بۆ هاوڵاتیانی كورد دەخاتە مەترسییەوە.
‎لەم گوتارەدا گرنگ نییە دەنگدەر دەنك بە كێ دەدات، گرنگ ئەوەیە وشیار بكرێتەوە بەوەی دەنگدان چ گرنگییەكی بۆ تاك و كۆمەڵ هەیە، چۆن دەتوانن بە دەنگەكانیان ئایندەیان دیاری بكەن.
لەبەرئەوەی كۆمەڵگای كوردی ئەوەندەی دەكەوێتە ژێر كاریگەری سۆزو زۆر بەخێرایی هەڵوێستیان لە بارێكەوە بۆ بارێكی تر دەگۆڕن، هێندە بیرو باوەڕی لۆژیكییان بۆ سیاسەت و خوێندنەوەی ڕوداوەكانی ساڵ بەكار ناهێنن، بەڵكو وتاری لایەنێك یان گوتەیەك دەتوانێت كەسێك لە دۆخەكەی خۆی ببات بۆ دۆخێكیتر،  بۆیە ئاسانە كار لەسەر هۆشیار كردنەوەی دەنگدەرو گرنگی پڕۆسەی دەنگدان بكرێت، بەتایبەت لە سنوری ناوچە كێشە لەسەرەكان، چونكە هەمیشە مرۆڤ مەیلی گۆڕانكاری و بەرەوپێشچونی هەیە ئەگەر دۆگمی نەبێت.


‌ 731 جار بینراوه‌
27/04/2018
Print Friendly and PDF
بابەتەکانی تری نوسەر
Telerik
راپرسی
کێ بەرپرسە لەم دۆخەی ئێستای کوردستان؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved