وتار
هەڵەی كوشندە

هیوا نه‌جات





(ئەی مرۆڤ تۆ ئەوەی كە بیری لێدەكەیتەوە)، ئەمە ئەو دروشمەیە كە بە هەزاران كەسی گۆڕیوەو پێگەیاندوە، چونكە هەمیشە ژیان بۆ هەموان یەك ژیان و كات یەك كاتە، ئەوە شێوازی بیركردنەوەكانە لێك جیاوازن و هەر ئەوەشە میكانیزم و رێگەی جیاواز دروست دەكات.
ئەوە بیركردنەوەیە وادەكات مرۆڤ چۆن هەنگاو بنێت و بەكوێ بگات، بۆ نمونە گەلێكی سەركەوتو وەربگرین، دەبینین ئەو جیاوازییەی كە توانیویانە دروستی بكەن ئەوە جەوهەری جیاوازییەكە نییە، بەڵكو بە بیركردنەوەیان توانیویانە خۆیان و كۆمەڵگاو وڵاتیان بگۆڕن و بەرەوپێش ببەن.
لەگۆشەنیگای ئەوەی تەواوی زانستەكانی ژیان پەیوەندییان بەیەكەوە هەیەو هەندێكیان بەشێكن لەوانیتر و تەواوكەری یەكترن، هەر خوێندنەوەیەك ئەگەر باكگراوندێكی فیكری گشتگیری بۆنەكرێت ئەوە ناتەواو دەردەچێت، منیش هەمان تێڕوانین بۆ ژیانی تاك یان تێڕوانینی سیاسی بەكار دەهێنم، بۆیە كامڵتر دەبێت ئەگەر زانستە جیاوازەكان بۆ هەندێك خوێندنەوەو شیكارییەك بەكار بهێنین، چونكە دواجار هەموو زانستەكان بۆ خزمەتی مرۆڤ و مرۆڤایەتین.
سەركەوتن و گەشە سەندنی نەتەوەش بەستراوەتەوە بە بیركردنەوەی هاوڵاتی ئەو میللەتەوە، ئا لێرەدا جیاوازی نەتەوەكان پەرەدەسەنێت و هەندێكیان بە نیو سەدە بە ئەندازەی پێنج سەدەی مرۆڤایەتی پێش دەكەون و بەشێكیان هەر بەرەو دواوە دەگەڕێنەوە.
میللەتی هۆشیار چاوەڕوانی دەستی دەرەكی ناكات تا وڵاتی بۆ ئاوەدان بكاتەوە، بەڵكو بە تێڕوانین و باوەڕبەخۆ بوون ئەم كارە دەكات، چونكە ئازادییەك ئەوانیتر بیبەخشن هەر ئەوان لێت دەسەننەوە، وڵاتێك خۆت بنیادی نەنەیت تۆش خاوەنی نابیت.
بۆیە هەر كاتێك رووی قسەم لە دەسەڵات بێت هەمان كات بۆ میللەتی دەكەم و بەپێچەوانەوە، ناكرێت میللەت هۆشیاری لەلا نەبێت و چاوەڕوانی گۆڕانكاری بكات وەك چۆن ناگونجێ دەسەڵاتێك سەركەوتوبێت ئەگەر جەماوەرێك رۆشبیر پشتگیری نەكات، لێرەوە دەمەوێت ڕای بگەیەنم هەڵەی كوشندە ئەوەیە كە نە میللەت هۆشیار بێت و نەدەسەڵات.
لەوانەیە بە گشتی هەردولا خۆیان بە سەركەوتو و تێگەیشتو بزانن، بەڵام ئایا ئەنجام پێمان دەڵێت ئەمە ڕاستە؟
هەڵەی كوشندە ئەوەیە كە میللەت لە ماڵەوە دابنیشێت و چاوەڕوانی دەوڵەتی نمونەیی بێت تا بۆی دروست بكەن، یان چاوەڕوانی ژیانێكی شاهانە بێت، یا لە خەونی ژیانێكی ئارام و خۆشگوزەرانیدا بێت بێ ئەوەی هەنگاوی بۆ بنات. چۆن دەبێت كاتێك سەركردە هەڵە دەكات میللەت لەسەری بەردەوام بێت؟ لە كوێ ململانێی ژیان و سیاسەت بە لەماڵ دانیشتن بووە؟.
میللەتی كورد ناخۆشی و نەهامەتی زۆری بینوە بە ئومێدی ئەوەی رۆژێك لە رۆژان سەربەخۆبین، یان ژیانێك ئاسودەیان هەبێت وەك ئەوەی خەونی پێوە دەبینن و بە دەیان كەس لەو پێناوەدا ڕۆیشتن، ئەگەر سیاسەتی دەسەڵاتی كوردی فاشیلانەبوو نەیتوانی خزمەتی پڕۆژەی نیشتیمانی بكات و لە ئاست خزمەتی گەلەكەیدا نەبووە، چەند دەسەڵاتی كوردی تاوانبارە هێندەش گەل لێی بەرپرسیارە، چونكە دواجار ئەوە گەلە حیزبێك دەكات بە حوكمەت و كەسێك دەكات بە نوێنەرو سەركردە.
هەڵەی كوشندە ئەوەیە تۆ پێت وابێت بە دەنگ نەدان دەتوانیت سنورێك بۆ گەندەڵكاران دابنەیت، یان بەڕووی نەیارانی نەتەوەكەت بوەستیتەوە، یان ویژدانی خۆت ئاسودە بكەیت یان هەر هۆكارێكی تر، ئالێرەدا دەردەكەوێت سنوری بیركردنەوە چەن فروانە، وەك ئەوەی نەچیت بۆ دەنگدان و چاوەڕوانی گۆڕانكاری بكەیت، یان نوێنەری خۆت هەڵنەبژێری و چاوەڕوانی خزمەت بكەیت.
لەم كاتەدا ئەوە بە كاری خۆم نازانم بڵێم دەنگ بە كێ بدەن و دەنگ بە كێ مەدەن، بەڵام بڕۆن بۆ دەنگدان و دەنگ بدەن، لەبەرئەوەی نەچون بۆ دەنگدان واتا چارەسەركردن هەڵە بە هەڵەو خۆشحاڵ بیت بەوەی كێشەیەكت چارەسەركردووە!
لە خۆتان بپرسن دەنگ بە كێ بدەن؟ بۆ دەنگی پێ بدەن؟ چی كردوە بۆ خۆشگوزەرانی هاووڵاتی كوردو كوردستان تا دەنگی پێ بدەن؟ ئەگەر دەرچێت چی دەكات تا بتوانن دەنگی پێ بدەن؟ 
وەك چۆن بیركردنەوەت بگۆڕیت سەركەوتو دەبیت، پێویستە بیربكەیتەوە تا بتوانیت بیركردنەوەت بگۆڕیت.





‌ 670 جار بینراوه‌
08/05/2018
Print Friendly and PDF
بابەتەکانی تری نوسەر
Telerik
راپرسی
?? ?????????? ??????? ???? ?? ??? ???? ??????

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved