وتار
ئاینی ئیسلام لەسەردەمی مۆدێرندا

خالد كاوە


گەورەترین كێشەو قەیران كە ناوەندە رامیاری و رۆشنبیریەكانی  تێدا قەتیس ماون، وێناكردنی ئاینە بە بێ پاشخانێكی مەعریفی و خوێندنەوەیەكی سەردەمیانەی قوڵ، بەڵكو بەشێك لە مامۆستایانی ئاینی و داعش و سەرجەم ئەو رێكخراوانەی باكگراوەندی فیكریان ئاینیەو لەڕوانگەی كارە تیرۆستیەكانەوە ئاین دەنەخشێنن بۆ رای گشتی، ئەگەر موسوڵمانان و مامۆستایانی ئاینی  خاوەنی هۆشیاریەكی نوێ و هاوچەرخ بن ئەوا لەزۆر بگرە و بەردەو مشتومڕ لەسەر كۆی بابەتەكان رزگاریان دەبوو، دەیانتوانی مێژووی سەرەتای هاتنی ئیسلام بەشێوەیەكی بابەتیانە بخوێننەوە و بیانخەنەڕوو، نەك بەتەنها شەریعەتی ئیسلام لەڕوانگەی ئادابەكانی چوونە مزگەوت و ترساندن و تۆقاندنی موسوڵمانان بە دۆزەخ و ئاگر بڕوانن، ئێستا ئەبێت خوێندنەوەیەكی قوڵ و مەنهەجیانە بۆ ئاین بكرێت و ئاگاداری گۆڕانە سیاسی و ئابوری و جیهانیەكان بین، ئەگینا ئاینی ئیسلام لە كاروانی بەجیهانی بوون بەجێدەمێنێت، لەبنەڕەتدا ئیسلام بریتیە لە بەدەمەوەچوون و ئەنجامدانی كارێكی باشەو ریشەكێشكردنی خراپەكارییەكان، ئیسلامیزمی كورد دەبێت بزانن لەئێستادا ئێمە پێویستمان بە”علی شەریعەتی”ـیە، ئێمە پێویستمان بەهونەر هەیە، پێویستمان بە “ نالی و مەحوی و بێخودو وەفایی و پیرەمێرد و عەلادین سجادی هەیە”. پێویستمان بەم لێشاوە مامۆستا ئاینیانە نیە كلاسیكە نیە، ئێمە لەسەردەمی سۆشیال میدیاو تەكنەلۆجیای بەردەستدا دەژین، بۆێە ئەبێت بزانین بەشیكردنەوەی روداوەكان، هەموو رێساكانی ئاین بریتی نین لەهەوڵدان بۆ قیامەت و پشتكردن  لەدونیا، بریتی نین لەئیرهاب و خراپەكانی و زیندانیكردنی ئافرەتان،  هەرچۆنێك بێت پێویستە لەسەر تاكی موسوڵمان ئیدی هۆشیاریەكی نوێ بەرهەم بهێنێت، تاكوبزانن ئاین؛بەتەنها لەنێو مزگەوتەكان و دامەزراوە ئاینیەكاندا نیە، بەڵكو ئاین لەنێو هونەر و شیكردنەوە و فەلسەفەدا  ببینن، پێویستە فێر بن وێنا تۆقێنەرەكان بەگفتوگۆ زانستیەكان  دابمركێنینەوە، ئیدی پێویستە بێ ئاینەكانیش لە دەروازەی زانستی و تێفكرینی قوڵەوە بڕیار بدەن، لەچوارچێوەی هەست وسۆز و قینەوە مامەڵە نەكەن، پاشان ماوەی ناكۆكیە ئاینی و فكریەكان بە تێڕامانی وردی هۆشیارانە كەمتر دەبێتەوە،  لەم سۆنگەیەوە چاكترین چارەسەر بۆ مامۆستایانێ ئاینی و تاكی بڕوادار بەگشتی ئەوەیە ئاینی ئیسلام لەڕێساگەلێكی نوێی مەدەنیدا بەرجەستە بكەن، پێویستە ئیدی تاكی موسڵمان و مامۆستایەكی ئاینی بزانێت، گرنگ دادپەروەریە نەك ئایین، گرنگ جۆری مرۆڤایەتیەكەیە نەك جۆری خوداكەت، ئاین بۆ خۆت و ئاكارت بۆ ئەوانی تر، ئیدی ئەبێت بزانین ترساندن و تۆقاندن و توندڕەو بوون و زیندانیكردنی ئافرەتان و رێگریكردن لەكاركردن لێیان جگە لەدروستكردنی بیری توندڕەوی هیچی دیكەی لێ سەوز نابێت، ئەبێت ئیدی ئێمەی باوەڕدار بڵێین با   هێزمان  هەبێت هێز  هەڵگرتنی قورسایی یان  ئیرهاب كردن نییە وەك چۆن یاریزانانی بەرزكردنەوەی كێش یان بێ باوەڕ توندڕەوەكان حاڵیبوون، بەڵكو هەڵگرتنی ئازورو نارەحەتی ئەوانی ترە، كەواتە رستەیك، بیرۆكەیك، باوەڕێك بە تێڕامان و ژیرمەندانەوە
ڕێسایەكی نوێت پێشان دەدات، ئیدی ئەبێت مامۆستایانی ئاینی نەڵێن بێ باوەڕەكان ئێوە لەدۆزەخن خودا لەناوتان ببات، بەڵكو ئەبێت بڵێن ئەی بێ ئاینەكان  گرنگە بە كاركردن و پاراستنی پڕەنسیپی ئینسانی لەژیان بەرینەوە پێكەوە ئێوەش مرۆڤن و ئاینی ئێمەش ئاینی مرۆڤ دۆستیە و ئەڵێت مرۆڤ نابێت دوبەیانی لەیەك بچێت، چونكە ئەمڕۆ خۆرێكی نوێ هەڵدێت و جوڵەیەكی نوێ لەئێمە دەخوازێ دوا رستەی من بە شاكاڕێكی بێكەس كۆتایی پێدێنم كەدەڵێت :
 مامە سۆفی وای تەمایە هەر بەڕیشی پانەوە
جەنەتی بۆ دانرابێ پڕ بەحۆری جوانەوە
ئەو ئەڵی جەننەت بەریشە، نە بەهۆی عیرفانەوە
سەد سەڵاحەدینو دارا قیمەتی یەك عانەیە

‌ 489 جار بینراوه‌
10/08/2018
Print Friendly and PDF
بابەتەکانی تری نوسەر
هیچ داتایه‌ک به‌رده‌ست نیه‌ .
Telerik
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved