وتار
بیرەوەریەكانی فاروقی مەلا مستەفاو یەك دوو قسە

لەتیف فاتیح فەرەج


لەم رۆژانەدا زۆر بیرەوەری و یاداشت چاپدەكرێن و منیش زۆرم لە بەردەستی خۆم داناوە ئەگەر پێڕابگەم بیانخوێنمەوە ، بیرەوەریەكانی فاروقی مەلا مستەفا یەك لەو كتێبانە بوو كە خوێندمەوەو هەندێك هەڵوەستەی پێكردم ، لەو شوێنانەی كە هەڵوەستەی پێكردم ، بڕیارم دا ئەگەر بە كورتیش بێت ئاماژەیان پێبكەم ، سەرەتا دەبێت ئەوە بڵێم ئەم بیرەوەریانە هەموو ژیانی فاروقی مەلا مستەفا نین و رەنگە زۆر گۆشەو كەنار مابن باس نەكرابن ، ئیدی ئەوەش رەنگە بەشێكی بە هۆی لە بیر چونەوەو تەمەن و شتی واوە بێت ، من لام وایە زۆر بیرەوەری گرنگی تر هەن لەو بارەیەوە باس نەكراون ، بەتایبەت بۆ كەسێك كە لە بواری گەسەندنی ئابوری و پێشخستنی نیشتمانا رۆڵێكی دیاری هەبووە .
ئەوەی منی راگرت لە نێو بیرەوەریەكاندا هەندێ‌ دیدو سەرنجی فاروقی مەلا مستەفاو هەندێك قۆناغی ژیانێتی ، لە لاپەڕەكانی 78 و 79 باسی سەردانی شێخ مەحمود دەكات لە داری كەلی و لە بارەیەوە دەڵێت " خۆ بە زلزان نە بوو، زۆر سادە بوو ، جگە وەلەوەش شاعیرو قسە خۆش و ڕووخۆش بوو " لە دانیشتنەكاندا لە گەڵ مەلا مستەفای باوكیدا دەڵێت باسی شیعرو كوردو مێژوو زانستە ئاینیەكانیان دەكرد ، هەروەها دەڵێت زۆر جار پرسیاری لە منیش دەكرد ، بە باوكیشمی گوت مەلا  مستەفا ئەم كوڕەت زۆر ئاقڵەو قەت درۆ ناكات ، ئەو دەڵێت ئەوە بۆ من بووە ئامژگاریەكی چاك بۆ هەموو تەمەنم ، لەم قسەو باسانەدا سادەیی و بێفیزی شێخ مەحمود دەردەكەوێت ، بە تایبەت ئەگەر وا دابنەین شیوعیەكی دواتر بەو جۆرە باسی نەتەوەگەرێكی ئازادیخواز دەكات ، هەڵبەت ئەو دەڵێت جارێك هەواڵی عەزەدینی برامی پرسی و گوتی ئەوەبۆیە نەهاتوە بۆلام رەنگە وەك شیوعیەك من بە دەرەبەگ بزانێت ، لێرەدا روداوێكی بیر خستمەوە ،جەمال نەبەز دەگێڕێتەوە لە تەك رەفیق حیلمیدا سەردانی ماڵە بەگەكانی هەڵەبجە دەكەن ، مامۆستا جەمال دەڵێت كە ئەو خانەو لانەپۆشتەو پەرداخەم بینی تێگەیشتم شێخ مەحمود دەرەبەگ نیەو ناهەقی بەرانبەر دەكرێت ، لام وایە لە گێڕانەوەكەدا من كورت و پوختم كردوەتەوە .
بیرمان نەچێت هەر بە قسەی فاروقیش داریكەلی پەناگەو داڵدە دەری شیوعی و هەڵاتوەكانی دەستی رژێم بووە ،من داكۆكی لە شێخ مەحمود ناكەم ، لێ‌ ئەم گێڕانەوەیەی فاروقی مەلا مستەفا زۆر پێچەوانەی ئەو هەموو ستەمەی كە لە شێخ دەكرێت .
لە لاپەڕە 95 باسی ئازادكردنی سیاسیەكان دەكات دوای شۆڕشی 14ی تەموز ،دەڵێت لە سلێمانیەوە كەوتینە ڕێ‌ بۆ كەركوك تا پێشوازیان لێبكەین ، بۆنەو دیدارو بە یەك گەیشتنەكەش لە تەكیەی تاڵەبانی دەبێت لە كەركوك كە ئەو دەم موكەڕەم تاڵەبانی ئەوێ‌ دادەنێت ،ئازاد كراوەكان بریتین لە " بەهادین نوری ، عەبدوڵا گۆران ، نائیب عەبدوڵا و عومەری مامەشێخە " هەر لەوێش گۆرانی شاعیر شیعری بت بتەوان دەخوێنێتەوە ، لێرەدا زۆر گرنگ بوو باسی ئەوەی كردبا لە بۆنەكەدا جگە لە بەهادین نوری ، گۆران خەڵكی كەركوك كێ‌ وتاری دا ، كێی لێبوو ، پێشوازی خەڵكی كەركوك لەو ئازادیخوازانە چۆن بوو ، ئەمانە بۆ مێژوو گرنگی خۆیان هەیە ،بە كورتی باسی كاری رۆژنامەوانی خۆی و یارمەتیدانی ئازادی لە چەند شوێن و بۆنەیەكدا دەكات .
لە لاپەڕە 111رەخنە لە هەڵوێستی بەپەلەی پارتی دەگرێت دوای كودەتاكەی شوبات كە بە عسیەكان كردیان و پارتی بە تێكەڵ بوون و ئاوێتەبوونی شۆڕشی كوردو شۆڕشی عەرەبی ناو دەبات و ساڵح یوسفی بروسكەكە لێدەدات ، بە بڕوای من دەبوو لە سەر شوباتی 963 و ئەو هەموو نادادیە هەڵوەستەی زیاتری كردبا وەك شاهید حاڵێكی ئەو رۆژگارەو كەسێكی بە ئاگا .
لە لاپەڕە 123 باسی هەڵوێستی كاژیك و روداوەكەی كانی ماسی دەكات دیسان زۆر بە خێرای بە سەریدا دەڕوات و زانیاری ورد لە بارەی ئەو كارە ساتەو هۆكارەكان و بكەرەكانیەوە نادات بە خوێنەر.
لە لاپەڕەكانی 241 تا 250 و دواتر باسی خراپی پەروەردەی حیزب لە گەڕە زیل و ناكۆكیەكانی ناوحیزب و ئەوانە دەكات و دەست لە سەر زۆر برین دادەنێت ، هەروەها باسی ململانێكانی موسڵیح مستەفاو ئەوانی تر دەكات ، كێشە لەم بیرەوەریانە ئەوەیە كە ناوێك دێنێت لە پەراوێزدا نانووسێ‌ ئەو كەسە كێیە ، تەمەنی چەند بوو ، چی بەسەر هات ، خەڵكی كوێ‌ بوو هتد ، من ئەمە هەر لە بیرەوەریەكانی كاك فاروقدا تەنانەت لە بیرەوەریەكانی زۆری تردا دەبینم بۆ نمونە ئێستا بیرەوەری نەسیر چادرچیم لە بەردەستە هەمان كێشەی هەیە .
لە بیرەوەریەكانیدا باسی دیدارەكەی خۆی و بارزانی دەكات لە لاپەڕەی 254 هەڵبەت سەرە ڕای ئەوەی كە بارزانی لە پێشدا بە توڕەیی مامەڵەی لە تەكا دەكات، بەڵام ئەمێكی 29 ساڵ زۆر ئارامانە وەڵام دەداتەوە و زۆر بە رێزیشەوە باسی ئەو دیدارە دەكات ،لە لاپەڕە 354 و دواتردا باسی هەرەسی شۆڕشی ئەیلول دەكات ، راستی لە ڕووی ئاكاری نووسینەوە بە باوەڕی من هەرەس  ناونانێكی ماقوڵترو قوڵترە ، لە ئاشبەتاڵ كە نازانم بۆ بەو جۆرە ناوبرا ، هەڵبەت خۆیشم رەنگە چەندین جار ئاشبەتاڵم نووسیبێت و ناونانەكە ئەوەندەی لە رق بونەوە لە سەركدرەكانی كوردەوە و لە خەم بۆ كوردەوە سەرچاوەی گرتووە ، مانایەكی بریندار كەریشی هەیە .
لە هۆكارە ناوخۆییەكانی هەرەسی ئەیلول 7 خاڵ دیاری دەكات بەم جۆرە :
یەكەم : كزی و نزمی رادەی هۆشیاری سیاسی و رۆشنبیری پێشمەرگەو فەرماندەكان 
دووەم : گۆڕینی هێزی پێشمەرگە لە هێزێكی شۆڕشگێڕەوە بۆ لە شكێكی نیزانی بێ‌ راهێنان 
سێیەم : جیاوازی چینایەتی نێوان پێشمەرگەو بەرپرس و ئەوانی تر وەك ئێستا كە هەر رۆژێ‌ بێ‌ ئەو كۆشكی بلورینە دەشكێ‌ 
چوارەم : قورسایی پەنابەرەكانی ئێران لە سەر خەڵك و شۆڕش 
پێنجەم : پەیوەندی عەشایەری و گەشە نەكردنی كۆمەڵایەتی و هتد ، واتە پێنەگەیشتنی تەواو بە مەدەنی نەبون و بە شاری نەبوون ، هەڵبەت ئێستاش بە جۆرێك لە جۆرەكان هەمان دەرد بونی هەیە ، بۆنمونە كێشەی نێوان بارزانیەكان و زێبارریەكان و ئەوانی تر .
شەشەم : نەبوونی بەرنامەی هێڵی سیاسی .
هەموو ئەم خاڵانەو خاڵگەلی دیكە هۆكارە ناوخۆییەكانی ئەو هەرەسەن كە كورد لە ساڵی 1975 بە سەری هات و دواتریش ترازانی یەكجارەكی لە ریزەكانی كوردایەتیدا دروستكرد .
هەڵبەت باسی هۆكارە دەرەكیەكان و مەسەلەی ئێران و سوریاش دەكات ، كە من ئەوە بۆ خوێنەرەكانی كتێبەكە بە جێدەهێڵم ،  
بە گشتی بیرە وەریەكانی فاروقی مەلا مستەفا زانیاری وردو بایەخداریان لە سەر ئەو رۆژگارەی سلێمانی و بەغداو شاخ تێدایەو مایەی خوێندنەوەو هەڵوەستە لە سەر كردنن .
‌ 613 جار بینراوه‌
23/12/2018
Print Friendly and PDF
بابەتەکانی تری نوسەر
Telerik
شوان داودی - گۆشەی لەژێر چاویلكەوە
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved