»  شۆک
دوو رووداوی نەژاد پەرستی و كاریگەرییەكانی بەسەر گەنجەوە
هاوار ستار

لەماوەی یەك هەفتەی رابردوودا دوو رووداوی گەورەی نەژادپەرستی كە یەكیان لە بەندینخانەیەكی دهۆكدا روویداو ئەوی تریش لە كەمپێكی ئاوارەكانی یۆنان ئەنجامدرا، هەواڵی هەردوو رووداوەكە لە زۆربەی ماڵپەڕە نێوخۆیی و جیهانییەكان بڵاوكرانەتەوەو ئەوەی جێی سەرنجە ئەو روداوانە ئاسایی نین و گەنج لەو نێوەندە كاریگەری بەرسەریەوە دەبێت.
ئەو دوو رووداوە یەكیان شەڕێكی گەورەبوو لە كەمپی پەنابەران لە یۆنان و تێیدا لەسەر ئەوەی گەنجی كورد بە رۆژوو نابێت و موسڵمان نین و غەیرە عەرەبن لەلایەن عەرەبەكان و بەتایبەتیش ئیسلامیەكانەوە، چونكە عەرەب و ئەفغانی و پاكستانی و سوری و ئێرانیش لە كوردەكانیان دابوو و شەڕێكی گەورە رویدابوو كە وەك هەندێك سەرچاوە دەڵێن:” حەوت گەنجی كورد بەسەختی بریندار كراون و هەندێك میدیاش دەڵێن بەبەڵگەوە چوار لە گەنجە كوردەكان كوژراون.
هەر دوای ئەم رووداوە و لە زیندانێكی پارێزگای دهۆك هەواڵێك بڵاو بووەوەو بووە هۆی سەرنج كە گوایە شەڕێكی گەورەی كوردو عەرەب لە لە زیندانەكە  روویداوە و حەوت كەس كوژراوە و نزیكەی پەنجا برینداریش هەیەو دواتر پارێزگاری ئەو شارە وتی شەڕ نەبووە بەڵكو پشێوی بەهۆی ئاگركردنەوەی یەكێك لە زیندانیەكان دروست بووە.
بەهەر حاڵ روداوەكان هەرچۆن بن و بەلاڕێدا ببرێن و بگێڕدرێنەوە ئەوا بابەتێك لەم نێوەندە هەیە كە ئەویش شەڕی كوردو عەرەب و كوردو ئیسلام و ئا ئەم رستانە لە ئارایەو دەكرێت بە مانشێتیش كە قوربانیشی تێدا كەوتوەتەوە، ئەمەش بە دڵنیاییەوە شەڕەكان هەرچۆن بن لە هەردوولا گەنج كردویەتی و گەنج یەكەم بەركەوتنی لەگەڵ ئەم روداوانەیەو كاردانەوەكانیشی لە تۆڕەكۆمەڵایەتییەكان دەركەوتوون و رۆژانە باس دەكرێت لە نێو گەنجی كوردو عەرەبەكاندا كە هەر لایەنە زوڵملێكراوی خۆی نیشان ئەداو باسی تۆڵە دەكەن.
ئا لێرەدا یەكەم بەركەوتەی ئەم شەڕە دەروونی و ئەلیكترۆنی و پاشانیش جەستەیی و نەتەوەییە لە شارێكی وەك كەركوكدا پڕیشكی ئاگر دەكات و گەر بەری پێنەگیرێ دەبێتە كارەسات.
گەنجەكانمان دەبێت زۆر لەوە هۆشیارتر بن بە عاتیفەی نەتەوەیی و كاریگەری شەرێكەوە دەیان شەڕی تر هەڵگیرسێنن و لە كاتێكدا ئێستا ئێمەی كورد بەسەدان دۆخی خراپدا  تێدەپەڕین، بۆیە دەبێت گەنج زۆر هۆشیارانە كار لەسەر عاتیفە بكات و نەكەوێتە ژێر كاریگەری ئەو رووداوانە، تۆ بەبیر خۆتی بهێنەوە كێ ناڵێت ئەو شەڕ فرۆشتنانە بە گەنجی كورد دەستی ئەنقەست نییەو نایانەوێ بەرەو كێشەو جەنگێكی تر كورد راكێشن كە ئەویش پیسترین شەڕە شەڕی نەتەوەیی و ئاینیشە.
گەنجەكانی ئێمە دەبێت مرۆڤانەو ژیرانەتر كار لەسەر ئەو رووداوانە بكەن و دواتریش بەرگری لە نەتەوەو زمانەكەت ئەوە ئەركەو فەرزە، بەڵام بە جۆرێك كە دۆخ نەشڵەژێنێ و نەگات بە جەنگ.
گەنج لەگەڵ سەرهەڵدانی هەر گرفت و رووداو و كێشەیەك كارلێك دەكات و دۆخەكەشی وا دەخوازێت بەشێك بێت لەو بابەتانە، چونكە گەنج پێكهاتەیەكی بەرچاوو كاریگەری كۆمەڵگەیەو توانا و هێزی بەلاوەیە، هەربۆیە لە سەرهەڵدانی ئەم شەڕە نەتەوەییەش كە بەكورد دەفرۆشترێت گەنج دەبێت تا عاقڵانەترین شوێن بە ئارامی هەڵكات و كە كاریش لە كار ترازا ئەوە قسەیەكی تری لەسەر دەكەینەوە.






‌ 611 جار بینراوه‌
6/2/2018 1:40:50 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved