»  پەڕەموچ
چەند پۆستەرە شیعرێك
هەڵمەت هۆشیار




1
چەند سەختە مرۆڤبوون
لەم مەملەكەتی هەڕاجی روحەدا
هەمیشە دەڵێی دوا ساتەكانی ماڵئاواییە...
**
چەند سەختە ژیان
لە ئاوێنەیەكی تەڵخ دەچێت
لە چاوەڕوانی ووردبوونا
**
چەند بە سوێیە ژانی شیعر
هەر ژانی مەرگ دەچێ
تا ئەو دێتە بوونەوە
گیانی خۆشم درەچێ..
**
تەمەن لە كایەی منداڵ ئەچێ
زوو چێ ئەبێ و
هەر زوو كۆتایی دێ
**
چەند ساویلكەیە
دڵی ئەویندار
بە نیگایەك باڵ ئەگرێت و
سواری ئەسپەشێی خەیاڵ دەبێ
نەگلانێك و نە دووان و نە سییان...
یان وەك دێوانە ئەداتە كێوا
یاخود لەگەڵ یارا
دەچێتە جێژوان...
2
نە نیشانەی هەڵچوونی تەمەن و
نە باعیسی دەردی رۆژگارە
تاڵی سپی سەرم..
خەم و كەسەرێكە دووریت پی بەخشیوم
كراسێكە خۆشەویستیت
كردوێتە بەرم ...
3
بەختەوەر و شەڵاڵە لە بۆی عەترەكەت و
ئارام ئارام لەسەر سینەت سەما دەكا
تەزبیحەكەی گەردنت...
4
ئیدی من چۆن مەست نەبم
كە شەماڵ شێت بكا و
ببێتە رەشەبا ...
بە بەرامەی زوڵف و پەرچەمت...
5
گەر درۆش بێ بابیبینم 
تەنها جارێ زەردەخەنە 
ئەوسا خوێنم حەڵاڵت بێ 
بۆ دەست و پێت بیكە خەنە
6
چەند بێ دەربەستە زەمەن...!!
بە دیار مردنی هەموومانەوە
سەما دەكا...
7
كچێ بەسە... 
بە تیلەی چاو تیرم تێمەگرە
بەس بە خەندەوە بۆم بێرە گۆ...
نەبا رۆژێ حاكمی شار دەستگیرت كاو 
خوێنی پیاوێكت بكاتە ئەستۆ
8
كە دەتبینم زۆر جار گومان دەكەم 
تۆ لە رەحمی مرۆڤیكەوە خوڵقابیت 
هێندەی نەماوە بگەمە یەقین ...
تۆ و رووناكی دوانەی سكێكن لە هەتاو
9
دوانەیەكی لێكدانەبڕاون لە جوانیدا مەمكوژن
كانیاوی شەراب و سەرچاوەكەی ئەوینن مەمكوژن
بۆ ئەوینە كوا پاكانەیە ئەگەر بپاڕێمەوە
نەیاران روحمێ تا دەگەم بە وەسڵی یار سا مەمكوژن
10
زستانی ئەوین چەن تەزیو بێت
پاڵتۆی شیعر تین ئەبەخشێتەوە گیان
ئەم سەهۆڵبەندانی هەستەت
لە كام جەمسەری ژیانەوە هێناوە؟؟
*
ئەم سوتانی ناخە
بە چ زریانێك دامركێنم
شیعر نەبێ..
ئەم تەنیایی روحە بەچی تیپەڕێنم
سیگار نەبێ...
*
ئای چەند ئەویندارانە بە دەروونما
دێت و دەچێ!!
دوكەڵی جگەرەكەم...
ئەم زەمەنی فیراقە
نەفخی ێوری چ قیامەتێكە
كە تۆ هەڵوەدەی خۆت و
منیش لە تاوانی خۆشویستندا
هێدی هێدی دەسوتێم و دەبم بە سوتوو
11
لە تۆ ناچێ 
شارێگەكەی شار زۆر راستگۆیە 
چەند دوور بڕوات، 
چەند درێژ بێتەوە... 
دواجار بەرەو خاڵی دەستپێك 
دێتەوە..

‌ 478 جار بینراوه‌
6/29/2018 11:53:55 PM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved