»  پەڕەموچ
سەنتەری سۆزو ئاواز.. جیهانێك لە موزیك



كە پێ دەخەیتە سەرەتای بازارە جوان و نەشمیلانەكەی بازاڕی رەحیماوا لە كەركوك و لە یەكێك لە قەیسەرییەكانی بازاڕەكەدا دوكانێكی رازاوە بە چەندین جۆری ئامێری موزیك ئێستێك دەكەیت و جیهانێكی پڕ لە جووڵەی گەنجان بەرەو ئەو شوێنە دەبینی كە ناوی سەنتەری “سۆزو ئاواز”ـە، لەچوار لاوە ئامێری موزیك بەدیوارەوە هەڵواسراون و هەندێكیان بە شێوەیەكی سەرنجراكێش دانراون، وەك (ساز و گیتارو عوود، كەمان و زەرب تارو سێتار، سەنتور قانون، ئۆكۆردیۆن، جەمبووش، دەف، تەبڵ، كلارنێت و فلووت و كەسایی و شمشاڵ لەگەڵ ئۆرگی فێركاری).. ئەم سەنتەرە لە لایەن هونەرمەند سالار حسین حەسەنەوە دامەزراوە كە یەكێكە لە ئارەزوومەندانی جیهانی موزیك و ئاواز، لەدوای پرۆسەی ئازادیی عێراقەوە یەكەم سەنتەری هونەری موزیكی و گۆڕانییە لەم گەڕەكە كوردنشینە دابمەزرێت و بەو گەرموگوڕییە گەنجان رووی تێبكەن. 
سالار لە گوندی كەڵوڕی باكووری شاری كەركوك لەدایكبووە، خوێندنی لەكەركوك تەواوكردووەو دەرچووی بەشی تەكنیكی پەیمانگەی تەكنیكییە لە كەركوك و ئێستا فەرمانبەرە لە فەرمانگەی تەندروستی كەركوك.
پەرەمووچی هەواڵ بۆ ئەو مەبەستە ئەم چاوپێكەوتنەی لەگەڵ سازداوە. 
پەڕەمووچ: بیرۆكەی دانانی ئەم سەنتەرە دەگەڕێتەوە بۆچی و ئامانجت لەم پرۆژە بچووكە چییە؟ 
سالار: ئەتوانم بڵێم ئەمە خەونی سەردەمی هەرزەكاریمە، ئەو دەمانەی عاشقی ئامێری موزیك بووم و هەمیشە بەدوای سیحری ئەو دەنگە زوڵالانەوەبووم، لە ساڵی 1983ـوە واتا بیست و پێنج ساڵە من ئامێری ساز دەژەنم، هاوكات هاورێ نزیك و دۆستەكانم هاندەری باش بوون بۆ كردنەوەی ئەم شوێنە. 
پەڕەمووچ: ئایا لە گەڕەكێكی میللی وەك رەحیماوە تا چەند گەنجان روودەكەنە ئەمجۆرە شوێنانە؟ 
سالار: گەنجانی كەركوك بەگشتی زۆربەیان هەست ناسكن و لەم بارودۆخەدا بۆ شوێنێك دەگەڕێن تواناكانی خۆیانی تێدا بدۆزنەوە، ئێستا رۆژانە بە دەیان گەنج دێن و سەردانیمان دەكەن، هاوكات مامۆستایەكی زۆری بواری موزیك لێرە كۆدەبنەوە، دەتوانم بڵێم وەك یانەیەكی لێ هاتووە بۆ كۆكردنەوەی مامۆستایان و ئارەزوومەندانی موزیك. 
پەڕەمووچ: كە مامۆستا لێرە هەبوو واتا خولی فێركاریش دەكەنەوە؟ 
سالار: بەڵی خولی فێركاریمان بۆ چەندین ئامێری ژێی كردۆتەوەو كارەكەمان تایبەت نەبووە بە پرۆگرامێكی دیاریكراو بەڵكو زیاتر هەرەوەزی بووە، مامۆستا هێمن و مامۆستا نزار ئەحمەد بۆ ساز و مامۆستا محمد سابیر بۆ عوودو مامۆستا هوشیاریش خولی بۆ كەمان و ئۆرگ كردۆتەوەو ئەنجامی كارەكانیشیان سەركەوتوو بووە چونكە ئێستا گەنجێكی زۆر هەن ئامێری موزیك بەجوانی دەژەنن كە سەرەتایان لەلای ئێمەوە دەستیپێكردووە. 
پەڕەمووچ: ئەم سەنتەرە جگە لە خولی فێركاری چ كارێكی تر دەكەن، ئایا بەرنامەتان بۆ دامەزراندنی تیپی موزیكی تایبەت بەخۆتان هەیە؟ 
سالار: جگە لە خولی فێركردن هاوكات ئامێریش دەفرۆشین و جاری وا هەیە ئامێریش دەگۆڕینەوە، من نموونەیەك دەهێنمەوە، لە دوكانێكی گەورە لەناوجەرگەی بازاڕی كەركوك ئەگەر مامەڵەی ئامێرێك بكەیت رێگە نادات تاقیبكەیتەوە، یان تەنانەت تا نەیكڕی بۆت نییە دەستیشی لێبدەی، بەڵام وەك دەبینی ئێمە لە ساڵی 2015ـەوە سەنتەرەكەمان كردۆتەوەو هەموو كەسیش بە جوانی مامەڵەمان لەگەڵ دەكات، دامەزراندنی تیپی موزیك سپۆنسەرو پاڵپشتی مادی دەوێت و هاوكات كاتی دەوێت، زۆربەمان فەرمانبەرو مامۆستاو خوێندكارین و بەتەنها ئێواران لێرە كۆدەبینەوە، دەتوانم بڵێم كارەكانمان بە زۆری ئارەزوومەندییە. هاوكات مامۆستا فەرهاد خالید وتی: وابزانم كەس هێندەی كاك سالار ئاسانكاری بۆ كڕیارەكانی ناكات چونكە ئامانجی ئەو زیاتر خزمەتكردنە نەك بازرگانیكردن. 
پەڕەمووچ: كەواتە تا ئێستا هیچ بەرهەمێكتان دانەبەزاندۆتە بازاڕی هونەری؟
سالار: وەك بازاڕ نەخێر، بەڵام زۆرجار هەر لێرەوە گۆرانییەك دەڵێین و بە مۆبایل گرتەی دەكەین و لە رێگەی فەیسبووكەوە نمایشی هاورێكانی دەكەین. 
پەڕەمووچ: ئەو گۆرانیانە بەخودی خۆتانە یان گۆرانیە باوەكانەو دووبارەی دەكەنەوە؟ 
سالار: هەموو ئەو گۆرانییانەی دامانگرتوون لاساییكردنەوەی كەڵە هونەرمەندانی موزیكی كوردین.. وەك حەسەن زیرەك، محمدی ماملێ، ناسری رەزازی، عەلی مەردان و حوسێن عەلی و سابیركوردستانی و خوالێخۆشبوو سەڵاح داودە. 
پەڕەمووچ: عەلی مەردان بێ یەك و دوو مەقاماتمان بیردێنێتەوە، لەبواری مەقاماتی كوردی چیتان كردووە؟ 
سالار: ئەوەی راستی بێت تا ئەم دوكانەم دانەنابوو شارەزاییەكی ئەوتۆم لە مەقامات نەبوو، بەڵام لە مامۆستا بەرێزەكانەوە كە چەندین خولیان بۆ ئەو مەبەستە كردۆتەوە زۆر شارەزای مەقام بوومە، جگە لە خولەكانیش هەر لە دانیشتنی رۆژانەی ئاسایی خۆمان زۆرجار گفتوگۆ دەكەین و هەندێك جار دەگاتە ئاستی مشتومڕ سەبارەت بە مەقامەكانی بەییات و حجاز و نەهاوەندو دەشت و چوارگاو هتد.. 
پەڕەمووچ: كاریگەری چ هونەرمەندێكتان بەزۆری بەسەرەوە هەیە؟ 
سالار: هونەرمەند زۆرن و لە ژمار نایەن.. بەتایبەت ئێمەی دانشتوانی كەركوك كاریگەری هەر سێ نەتەوەكانمان لەسەرە، لە كورددا جگە لەوانەی باسمان كردن ساڵی 1978 من زۆر ئارەزوومەندی بیستنی موزیكی گۆرانیەكانی شڤان پەروەربووم، دواتر شارەزاییم لەگەڵ ئەنوەر قەرەداغی و وریا ئەحمەد و خالد سەركارو هتد پەیداكرد، عێراقیەكان نازم غەزالی و یاس خزرو حەمید مەنصورو فوئاد سالم لە عەرەبیش فەرید و ئوم كەلسوم و فەیرووز، لە توركیش فاتح و سیلداو حەقی بوڵوت و میسلم و هتد. بەڵام كاریگەری ئەحمەد كایا لە هەمووی زۆرترە، چونكە ئەو هونەرمەندە ناسنامەی نەتەوەی كوردەو هاوكات گۆرانییەكانی زۆر لە رۆحی ئێمەوە نزیكە، ئەو گۆرانیە توركیانەی كە لە كولتووری كوردستانی باكوورەوە وەرگیراون زیاتر لە رۆحمانەوە نزیكن. 
پەڕەمووچ: موزیكژەنە جیهانیەكان؟ 
سالار: گوێ لە موزیكە جیهانییەكان دەگرم، بەڵام زۆر پەرۆشی سیمفۆنیاو موزیكی كلاسیكی جیهانی نیم. 
پەڕەمووچ: كاروانی گۆرانی كوردی لە ئێستادا چۆن دەبینی؟ 
سالار: هەر سەردەمەو زەوقی تایبەت بە خۆی هەیە، ئێستا وێرای ئەوەی كەسانێكی زۆر هەن نە دەنگیان هەیەو نەشارەزایی لە ئەدای گۆرانی كوردی، دێن و خۆیان دەكەنە بار بەسەر هونەری كوردیەوە، بەڵام گۆرانیبێژی زۆریش هەن لە گەنجان ئەدای جوان و كاری جوان و بەپێزیان هەیە.

‌ 675 جار بینراوه‌
6/30/2018 12:00:57 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved