»  باران
ژن لە ئاییندا
لانە شكور


چەوساندنەوەی ژنان لە سەردەمی كۆنەوە تاوەكو ئێستا هەبووە، ژنان لە ژێر ناونیشانی ئایین و شەرەف، هەزاران تاوانیان دەرهەق ئەنجامدراوە، هەر بە كوشتنی ژنان و كچان تا ئەوەی دەگاتە ئەوەی خۆیان خۆیان بكوژن.
ژنان لە ژێر فشاری ئایین و دابونەریتدا و بە ناوی پاكردنەوەی ناموس و سەیركردنیان وەكو كەرەستەی ماڵ لەلای پیاوان هەمیشە چەوساوەبوون، لە كۆنەوە واباوبووە كە ژن هیچ مافێكی سەربەستی نییەو ناتوانێ وەكو خۆی ئەوەی مافێكی سەرەتایی ژنە داوای بكات، ئەوەیشی بۆی دیاریكراوە تەنها خزمەتكردنەو ئەركی بەڕێوەبردنی كاری ماڵ و منداڵەو لەمانە زیاتر بۆی نییە داوای هیچ بكات، ئەوەی لە لایەن پیاوان و مەلاكانی ئەو سەردەمەوەو تاكو ئێستا دیاركراوە ئەرك بووە نەوەك ماف.
لە دوای پرۆسەی ئازادی عێراقەوەو بۆ ئێستا دەكرێت بڵێین بۆ دۆخەكە ژن گۆڕانكاریی بە خۆوەبینیوە و توانراوە لە رێگەی كردنەوەی چەندین رێكخراو و دەستەو كۆمەڵەیەكەوە پیاوان هۆشیارتر بكرێنەوە دەربارەی مافەكانی ژن، هەروەها كرانەوەی تاك بە ڕووی جیهاندا لە رێی تەكنەلۆژیاوە كاریگەریی بەرچاوی هەبووە لەوەی پیاوان تێبگەن هەردوو رەگەز وەكو یەك مرۆڤن و هەر یەكەیان تەواوكەری ئەویتریانە، ئەمانەش جگە لەتەكنەلۆژیا لەڕێگەی كردنەوەی چەندین ۆركشۆپ و خول و كۆڕ و سیمینیارەوە ئەنجامدراون و رەوشەكە بەرەو ئاقارێكی چاكتر هەنگاوی پێنراوەو توانراوە وەكو گەلانی دی هیچ نەبێت كۆمەڵێك ماف و ئەرك بۆ ژنان بگێڕێتەوە و تاك بەوە ئاشنا بكرێت كە ئایین بەو شێوەیە نەهاتووە كە پەیڕەو دەكرێ، بەڵكو ئەوە ئایین نییە تێكەڵاوی كۆمەڵێك كلتورو خوویی كۆمەڵایەتی كراوەو كراوە بە چەكێك بۆ دەمكوتكردنی هەموو شت.
ئێستا لەناو مەلاو ئایینپەیڕەوان كەسانی رۆشنبیرو شارستانی هەڵكەوتووەو هاوكاری رێكخراوەكانی ژنانبوون و راستی و دروستی ئایینی ئیسلامیان بۆ خەڵكی روونكردووەتەوە، هەروەها توانراویشە ئەو مەلایانەی لە ژێر ناوی ئاییندا فەتوای نابەجێ دەدەن و سوكایەتی بەژن دەكەن سزابدرێن و لەمینبەرو شاشەكان دووربخرێنەوە، چونكە لەڕاستیدا ئەوانە نوێنەری ئایین و خەڵكی نەبوون، بەڵكو كەسانی خۆبەزلزان و بیرتەسك و خێڵەكی بوون لە دوای ئەوانیش توانراوە مامۆستای زیرەك و بەتوانا بۆ هۆشیاری و تێگەیاندنی خەڵكی لەشوێنەكانیان دابنرێت، نمونەی ئەو كارانەی كە مامۆستایانی ئایینی بە ئەنجامیان گەیاندوەو كردوویانە، ئەوەیە كە بە كۆدەنگی لەگەڵ مەلاكانیتر و رێكخراو و كۆمەڵەكان و بەهاوكاری راگەیاندنەكان و خەڵكی، توانراوە ئەوە روونبكرێتەوە كە كۆیلەكردنی ژن تاوانەو كوشتن و بڕین پەسەند نییەو رێگەش بە فرە ژنی نەدراوە، هەروەها نابێت كچ و كوڕی خوار تەمەن هەژدە ساڵ مارە بكرێن لەیەكترو گەورە بە بچوك و ژن بە ژن و كچ لەبری خوێن هەموو كەمكراونەتەوەو لە هەوڵی بنبڕكردنیشیدان، خەتەنەكردنی مێینەش بە یاسا قەدەغە كراوە بە پێچەوانە سزای مادی لەسەرەو بەردەوام هەوڵدراوە بنبڕبكرێ، گەرچی ئەمانە وەكو پێویستیش ئەنجامنەدرابن، بەڵام هەوڵدانەكان بەردەوامن، وەكو كۆمەڵگەش پێویستە هەر كەسێك سەرپێچی و لادانی لەو خاڵ و بڕگانە كرد كە دیاریكراون و بە یاسا كراون ئەوا سزا بدرێت و هەڵوەستەی لەسەر بكرێت، چونكە هەر قسەیەكی نێو كۆمەڵ و سەر مینبەر بە هەڵە سەدان كەس توشی هەڵە دەكات، بۆیە پێویستە كلتورە كۆمەڵایەتییەكان لە ئایین و یاسا جیابكرێنەوە و راگەیاندن و كەسانی هوشیاری تۆڕە كۆمەڵایەتییەكانیش ئەركی خۆیان هەبێت لەوەی چیدی نابێت ئایین بكرێتە بیانوویەك بۆ بەستنەوەی ژن و كۆیلەكردنی، گەر هەر هەڵەیەكیش بینرا ئەركی راگەیاندن و كەسانی چالاكە بیكەن بە هەڵاو لایەنی پەیوەندیداری لێ ئاگادار بكەنەوە تا یاسا پێشێڵ نەكرێت.
بۆیە دەتوانرێت بوترێت مامۆستایانی ئاینی پێویستە لەگەڵ مافەكانی ژنان و هەموان بن و ئەوەشمان بیرنەچێت كە هەموو مامۆستایانی ئایینی بیركردنەوەیان وەكو یەك نییەو هەمان راوبۆچونیان نییە، ئەوانەی لەگەڵ مافەكانی مێینەن و پێیانوایە ژنان بە هەمانشێوەی پیاوان مرۆڤن و ئازادن پێویستە بكرێنە پێشەوای خەڵكی بێگومان ئازادیش بە مانا جوان و سنوردارەكەی خۆی و نەبێتە هۆی ئاژاوەو كێشەو ترازانی خێزانەكان، لادان لە بەها جوانە كۆمەڵایەتییەكان مانای ئازادی نییە، بەڵكو ئازادی ئەوەیە مافی هەموو تاكێك لە نێو كۆمەڵگەیەكی دروستدا پێشێڵ نەكرێت.

‌ 139 جار بینراوه‌
6/30/2018 12:14:20 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved