»  شۆک
كۆبانییەكەی كەركوك دوكانی ساردەمەنی و پێشانگەی فۆتۆیە
ئا / هاوار ستار



دوكانێكی ساردەمەنی بچووك لە گەڕەكی شۆرجەی شاری كەركوك بە ناوی كۆبانی بووەتە جێی سەرنجی ئەو كەسانەی بە لایدا تێدەپەڕن و بەتایبەتیش ئەو كەسانەی سەردانی دەكەن، ئەویش بەهۆی بوونی فۆتۆیەكی زۆری هەڵواسراو تێیدا كە خۆی لە پێشانگایەك و مۆزەیەكی فۆتۆگرافیدا دەبینێتەوە، ساردەمەنی كۆبانی لە كەركوك سەرەتا هەر تابلۆی ناوەكەی راتدەگرێ، پاشان تایبەتمەندیەك لەدەرەوەو ناوەی ئەم ساردەمەنییە هەیە كە ئەویش بوونی سەدان فۆتۆی كۆن و نوێیە لە دەرەوە و ناوەوە و تەنانەت سەقفی دوكانەكەشدا و سەرجەم فۆتۆكانیش فۆتۆی كاریگەری مێژویی یا كەسایەتی جیهانی و كەسایەتی كوردی و ناوچەكەو هەروەها وێنەی پێشمەرگەو گەریلا و شەڕڤان و دەیان بابەتی سەرنج راكێشن.

سۆران عەبدولوەهاب خاوەنی ساردەمەنی كۆبانێ-یەو لەبازاڕی میللی گەڕەكی شۆرجە دوكانێكی بچوكی بۆ كارەكەی هەیە ئەگەرچی دوكانەكەی ئەو بۆ فرۆشتنی ساردەمەنی و شیرینییە، بەڵام وەك خۆی دەڵێ وەك مۆزەخانەیەك وایە بەهۆی بوونی فۆتۆیەكی هەڵواسراوی زۆر تێیدا كەسەرجەم دووكانەكەی داپۆشیوە.
سۆران نزیكەی 10 ساڵە دوكانی ساردەمەنی و شیرینی هەیەو لەخۆشەویستی بۆ داستانی بەرگری كۆبانێ ناوی دووكانەكەی كردووە بە كۆبانێ، ئەو لە ساڵی 1995ەوە ئارەزووی كۆكردنەوەی فۆتۆی هەیەو لەهەرجێیەك فۆتۆیەك سەرنجی راكێشابێت هەڵیگرتوەتەوەو كڕیویەتی، دوای دانانی دوكانی ساردەمەنییەكەی ئارەزوی دانانی فۆتۆكانی دەكات لە نێویدا كە هیچیان فۆتۆی چركێنراوی دەستی خۆی نین، بەڵكو وێنەی كەسایەتی و روداوە گرنگەكان و ناودارانی كوردو مێژووین.
لەكاتی سەردانیمان بۆ دوكانەكەی سۆران عەبدولوەهاب بۆ (هەواڵ) وتی: "فۆتۆكان كاری خۆمی تێدانین، حەزمكردووە ببم بە وێنەگر بەڵام توانام نەبووە، بۆیە ئەم كارەی ئێستام دەكەم و بەمۆبایلیش وێنەو كاری خۆمم نەگرتووە، بەڵام ئەوەی سەرنجی راكێشاوم وێنە و فۆتۆی كەسانی ترە بەتایبەت هی كۆن و دەگمەن".
بەوتەی سۆران رۆژانە خەڵك روودەكاتە ساردەمەنی كۆبانێ و لەنێو دیوارەكان ورد دەبێتەوەو وێنە لەپاڵ دیوارەكان و دوكانەكەی دەگرن، ئەویش بەوەی راستەوخۆ مێشكیان دەچێتە نێو فۆتۆكان و لێی ورددەبنەوە.
رۆژانە ژن و منداڵ و بەتەمەن و دراوسێ دوكانەكانی سۆران سەردانی دەكەن و بۆ چەند ساتێك لە نێو فۆتۆ هەڵواسراوەكانی دوكانەكەی ورد دەبنەوە.
هەروەها خاوەنی ساردەمەنی كۆبانی دەڵێت: "كەسایەتی و رێكخراو هاتوون بۆ ئەوەی داوای فۆتۆم لێبكەن یان بەشداری بەهەندێكیان بكەم لە ،  بەڵام من دەرفەتم نەبووە ئەوە بكەم.
سۆران فۆتۆكانی نێو دوكانەكەی خۆی زۆر خۆشدەوێ و ئاماژە بەوەدەكات هەندێك جار لێیان كردوەتەوە ئازاری داوە، بەڵام نەیویستوە ئەو كەسە لە خۆی بڕەنجێنێ و باس لەوەشدەكات ئەگەر فۆتۆیەكی دەگمەنی لای ئەو نرخیشی پێبدەن ئامادەنییە بیفرۆشێت.
زاهیر رەحمان وەك یەكێك لە سەردانیكەرانی ساردەمەنی كۆبانێ وتی: "زۆربەی جار دێم و لێرە دادەنیشم و زۆر لەكڕیارەكانیشی رۆژانە دێن بۆ خواردنەوەی ساردەمەنی و خواردنی شیرینی و لەهەمانكاتیش بۆ وردبوونەوە لە فۆتۆكانی نێو دوكانەكەی و سۆران رۆژانە پارە پەیدادەكات بۆ بایەخدان بە دوكانەكەی و فۆتۆكانی نێو دوكانەكەی".
وتیشی: "وێنەكانی نێو دوكانەكەی دەمگەڕێنێتەوە بۆ مێژوی خۆم و ناسینی سەركردایەتی كوردو كلتور و كەلەپوری گەلەكەم و جیهانیش".

‌ 583 جار بینراوه‌
8/11/2018 12:10:47 AM
Print Friendly and PDF
بابەتی زیاتر ...
راپرسی
پێت وایە دۆخی ئێستای كوردستان بەچی چارەسەر ئەبێت؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved