نوێترین
لیژنه‌ هاوبه‌شه‌كانى سلێمانی هه‌شت كافتریا و خواردن و خواردنه‌وه‌ دادخەن   |    ئه‌ندامه‌ بندیواره‌كانی ئه‌نجومه‌نی پارێزگای كه‌ركوك ته‌واوی موچه‌و ئیمتیازاته‌كانیان وه‌رده‌گرن   |    به‌شی وێژه‌یی له‌ ئاماده‌ییه‌كانی كه‌ركوك له‌ مه‌ترسیدایه‌   |    هه‌ر به‌ڕێوه‌به‌رێك خانه‌نشین بكرێت پۆسته‌كه‌ی له‌ده‌ست كورد ده‌رده‌چێت   |    به‌رپرسێكی یه‌كێتی : ئاساییكردنه‌وه‌ی دۆخی كه‌ركوك ته‌نها له‌سه‌ر كات ماوه‌   |    پرسی سكاڵا له‌سه‌ر پۆستی قایمقامی داقوق بۆ مانگێك دواده‌خرێت   |    هه‌فته‌ هه‌واڵـی كه‌ركوك   |    له‌م هه‌فته‌یه‌دا بڕیار له‌سه‌ر موچه‌ دزراوه‌كانی مامۆستایانی خورماتوو ده‌درێت   |    دۆزینه‌وه‌ی زیاتر له‌ 200 گۆڕی به‌ كۆمه‌ڵی سه‌رده‌می داعش له‌ عێراق   |    له‌ماوه‌ی شه‌ش مانگدا عه‌بدولمه‌هدی چوار هه‌زار پۆستی به‌وه‌كاله‌ت یه‌كلایده‌كاته‌وه‌   |   
كوردی  |   عربي
»  شۆک
گەنجانی كەركوك لە دروستكردنی كتێبخانەیەك داهێنان دەكەن
ئا/ هاوار ستار



لەشاری كەركوك چەند گەنجێك كتێبخانەیەك لە كەرەستە و شتومەكی بەكارهاتوو و فڕێدراو دروستدەكەن و شێوازێكی جوانی پێدەدەن و هەر ئەو كۆمەڵە گەنجە چەندین چالاكی جۆراوجۆر لە كتێبخانەكەو دەرەوەی كتێبخانەكەشدا ئەنجامدەدەن.

گروپی وشیار پێكهاتوون لە كۆمەڵە گەنجێك لە گەڕەكی شۆریجەی شاری كەركوك لە نێو بینای سەنتەری لاوانی شۆریجە شوێنێك وەكو كتێبخانە چێ دەكەن و زۆربەی كەرەستە و رەفەكانی كتێبخانەكە و مێز و كورسی دانیشتنەكان لەكەرەستەی بەكارهاتوو دروست دەكەن لەوانە سنوقی شمەك و تەختەی ژێر شتومەك كە لەكاتی باردا دێت و هەروەها چەند كەرەستەیەك كەسوودی لێببیننەوە.
محەمەد ئازاد ئەندامی گروپی وشیار بۆ هەواڵ وتی: “گروپی وشیار بیرۆكەی گەنجێكمانە بەناوی دەریا و دواتر لەگەڵ چەند هاوڕێیەك تیمێكی پێنج كەسمان پێكهێناو دەستمان كرد بە كارەكانی ئەو كتێبخانەیە و لە كاتی كاریش لە كتێبخانەكە گروپەكە گەورە بووە بۆ 12 كەس و كارەكانیش لە تەختە و داری بەكارهاتوو و فرێدراوی بۆكسی شمەك دەستمانپێكردو پاكمان كردەوە و تەختە و رەفەو كورسی و مێز و شوێنی كتێبەكانمان هەمو لەوە دروستكرد”.
ئەو گەنجە ئاماژەی بەوەدا: “بیرۆكەی كارێكی وا هەستمان كرد بۆشاییەكی رۆشنبیری هەبێت لە كەركوكدا بەتایبەت لەم گەڕەكانە كوردیانە وەكو شۆریجە و رزگاری و دەوروبەری و پێویستی بە كتێبخانەیەك بوو كە بەئاسانترین شێوە كتێب بگەیەنێتە دەستی خوێنەر و ئێمەش بۆ سودگەیاندن لەوێ كتێبمان بەخۆرایی داناوە و بێ هیچ شتێك خوێنەر دەتوانێ بیبات و بیهێنێتەوە و هەركتێبێكیشمان نەبێت ئەوا ناوەكەیمان پێ دەڵێن و ئێمە بۆیان پەیدا دەكەین”.
محەمەد ئازاد رونیكردەوە كتێبخانەكە لەبەرواری 20/7/2017 دەستكرا بە دامەزراندنی كتێبخانەكە و لە بەرواری 16/9/2017 بەفەرمی كرایەوە و و پاشان لە 17/10/2017 كراوەتەوە و بەردەوامە.
سەبارەت بە ئامانجیان لەكردنەوەی ئەو كتێبخانەیە ئەو گەنجە وتی: “ئێمە ئامانجەكەمان ئەوەیە خەڵكی بگەڕێنینەوە و ئاشنایان بكەینەوە بە كتێب، چونكە خەڵكی زۆر دوركەوتونەتەوە لەخوێندنەوە و ئێمە هەر بە ناوی گروپەكەشەوە كە ناوی وشیارە مەبەستمان لە هۆشیاركردنەوەی گەنجانە”.
دەربارەی شێوازی كۆكردنەوەی كتێبەكانیش بۆ كتێبخانەكە محەمەد ئازاد وتی: “زۆربەی كتێبەكان پەیدامان كردون بەچەند رێگەیەك لەوانە كتێبی خۆمان هی پێشتر و ئەوانەشی كە دەیكڕین دوای خوێندنەوەی دەیهێنین لە كتێبخانە دایدەنێین و هەروەها ئەوانەشی سەردانمان دەكەن یارمەتیمان دەدەن و هەندێ كتێبخانەی سلێمانیش وەكو ئەندێشە و غەزەلنوس و حەفید ئەوانەش یارمەتیان داوین لەروی دابینكردنی كتێبەوە”.
محەمەد بەرزان ناسراو بە حەمەی شانۆ گەنجێكە و بەردەوام سەردانی كتێبخانەی وشیار دەكات بۆ هەواڵ وتی: “ئەو كارەی گروپی هوشیار كارێكە جێی دەستخۆشیە بەبێ ئەوەی كەس هاوكاریان بكات لە پاشماوەی دار كەرەستەكانی نێو كتێبخانەیان دروستكردوە كە جێگەی دڵخۆشی و شانازییە”.
ئەو گەنجە وتیشی: “گەر بۆ مێژوی ئەم شارە بگەڕێینەوە لەساڵانی پێشودا كتێبخانەی هندرێن و كتێبخانەی ئاسۆ هەزاران كتێبیان هەبووە و ئەهلی كتێب زۆر زۆربوون لە چاو ئێستا و بەڵام بەداخەوە لە ئێستا ئەو خەڵكە نەما بەهۆی مۆدێرنەوە كە تۆڕی كۆمەڵایەتی تیڤی و كەرەستەی تەنكەلۆژیا خەڵكەكەی لە كتێب و رۆشنبیری دابڕیوە”.
باسی لەوەشكرد: “ئەم كتێبخانەیە و ئەم كۆمەڵە گەنجە شۆڕشێكیان كردوە كە دووبارە خەڵكیان بە كتێب ئاشنا كردوەتەوە و خەڵكیان بە خوێندنەوە ئاشت كردەوە لە رێی كتێب و كۆڕ و كۆبوونەوە و چالاكیەكانیانەوە”.
گروپی وشیار كە دامەزرێنەری كتێبخانەی هوشیاریشن لە بەرواری 18/7/2017 دامەزرا و ئەم گروپە جگە لە كردنەوەی كتێبخانەی وشیار چەندین چالاكی تریان لە شاری كەركوكدا ئەنجامداوە لەوانە كردنەوە خولی هاوینە بۆ خوێندكارانی پۆلی 12 و بڵاوكردنەوەی نامیلكە و بۆیاخ كردنی پرد و دیوارەكانی شار بە وێنە و كاری هونەری و چەندینی تر.

‌ 301 جار بینراوه‌
9/8/2018 9:29:35 AM
Print Friendly and PDF
بابەتی زیاتر ...
راپرسی
کێ بەرپرسە لەم دۆخەی ئێستای کوردستان؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved