»  هەمەڕەنگ
گروپی دەستی سەوز رێز لە هونەرمەندە دێرینەكانی كەركوك دەنێت


لە ئێوارە كۆنسێرتێكدا و لە كەشێكی پڕ میوزیك و گۆرانیدا لە شاری كەركوك، لەپای خزمەتی چەند ساڵەیان بە هونەر، ڕێز لە كۆمەڵێك هونەرمەندی دێرینی شارەكە نرا و خەڵاتی ڕێزلێنانیان پێ بەخشرا.
كاتژمێر 4,30ی سەر لەئێوارەی رۆژی  28 ئابی 2018 لە هۆڵی شەهید سیروان تاڵەبانی لە شاری كەركوك، گروپی دەستی سەوز بۆ چالاكی مرۆیی، كۆنسێرتێكی بە بەشداری هونەرمەندان (كەریم جاف) و (خەندە كەركوكی) ئەنجامدا بە مەبەستی ڕێزلێنان لە ژمارەیەك هونەرمەندی دێرینی شاری كەركوك.
سەرەتای كۆننسێرتەكە كە ژمارەیەكی زۆر لە هونەردۆست و كەسایەتی و بەرپرسی شاری كەركوك ئامادەبوون، بە دەقیقەیەك وەستان بۆ گیانی شەهیدانی كوردستان بە گشتی شەهیدانی هونەر بەتایبەتی و بەتایبەتتر شەهید ئازاد هەورامی دەستی پێكرد.
دواتر بورهان حاجی سلێمان رێكخەری گروپی دەستی سەوز بۆ چالاكی مرۆیی وتارێكی خوێندەوەو  تیایدا وتی “ لە روانگە بەرپرسیارێتیمانەوە، بە ئەركی سەرشانی خۆمان دەزانین لەم دۆخە تایبەتەی شارەكەمانی پێدا دەگوزەرێت و وەكو وەفاو پێزانینێك بۆ پێشەنگەكانی چین و توێژە جیاجیاكانی كەركوك، بە ئەنجامدانی چالاكی هەمەجۆر و رێزاێنان لە كۆششەكانیان، بزافی چالاكی مەدەنی و رۆشنبیری چەقبەستووی شارەكە نەختێك بجوڵێنین”، وتیشی “ جێی خۆیەتی لێرەدا دەستخۆشی لە بەڕێز لاهور شێخ جەنگی و نوسینگەی تایبەتی بەڕێزیان بكەین، كە دەستپێشخەر بوون لە بەدەنگەوەهاتنی پرۆژەكەو دابینكردنی  دیاری و رێزلێنانەكان، بەوەش بوونە بەشێكی كاریگەر لە وەگەڕخستنەوەی كاروانی رۆشنبیری كوردانی كەركوك، گروپی سەوزیش پێشوازی لە هەموو دەستپێشخەرییەك دەكات كە لە قازانجی كەركوك و كەركوكییەكان بێت”.
لە دەستپێكی یەكەمی كۆنسێرتەكەش چەند گۆرانییەك لە لایەن هونەرمەندانەوە پێشكەشكرا.
پاشان  خەڵاتی ڕێزلێنان و دیاری بە هەریەكە لە هونەرمەندانی بواری میوزك و شانۆ و شێوەكاری شارەكە نرا لەوانە (مەقامبێژ میقداد محەمەد، عومەر درێژ، هونەرمەندی میللی فایەق داودە، مامۆستا شكور ساڵەیی، هونەرمەندی شێوەكار سەڵاح حەمەئەمین).
هەر لەو بۆنەیەدا شوان داودی بڕیاردەری لیژنەی رۆشنبیری خولی سێی ئەنجومەنی نوێنەرانی عێراق دیاری خۆی بە پێنج هونەرمەندەكە بەخشی، دواتر سوپاس و پێزانینی گروپی دەستی سەوز بەخشرا بە دەزگاكانی راگەیاندن.
لەكۆتایی بۆنەكەشدا چەندین  گۆرانی كوردی لە لایەن هەردوو هونەرمەندی شاری كەركوك خەندە كەركوكی و كەریم جافەوە پێشكەشكرا.

‌ 44 جار بینراوه‌
9/8/2018 9:31:00 AM
Print Friendly and PDF
بابەتی زیاتر ...
راپرسی
کێ بەرپرسە لەم دۆخەی ئێستای کوردستان؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved