»  راپۆرت
لە نێوان ئیدارەی كەركوك و یەكێتی جوتیاراندا كەلێن هەیە



لە وەرزی چاندنی بەرهەمی گەنم و جۆ نزیك دەبینەوەو كشتوكاڵی كەركوكیش دەڵێت:” بەپێی پلانی ساڵانەی جوتیاران گازو تۆو پەین بە جوتیاران دەدەین”، لقی كەركوكی یەكێتی جوتیارانی كوردستانیش دەڵێت “لایەنە پەیوەندارەكان گوێمان لێناگرن”. 
لەگەڵ نزیگبوونەوەی وەرزی چاندنی بەرهەمی گەنم و جۆ  كێشەكانی جوتیاران دێنەوە بەر باس،  ئەمساڵ كێشەی نێوان ئیدارەی پارێزگاو لقی كەركوكی یەكێتی جوتیارانی كوردستانیشی هاتۆتە سەر، چونكە وەكو خۆیان دەڵێن لە ئێستادا لە شارەكە وەك داوڵێك وایە. 
سەبارەت بە هاوكاری جوتیاران و پێدانی گازو پەین و تۆوی چاندن بۆ وەرزی ئەمساڵ، ئەحلام فەخرەدین فەتاح، بەڕێوەبەری بەشی بەرهەمهێنانی بەروبومە رووەكیەكان لە بەڕێوەبەرایەتی كشتوكاڵی كەركوك سەبارەت بە هاوكاریكردنی جوتیارانی كەركوك بۆ وەرزی ئەمساڵی چاندنی بەرهەمی گەنم و جۆ، بۆ (هەواڵ) وتی:” بۆ وەرزی ئەمساڵ وەك بەڕێوەبەرایەتی كشتوكاڵی كەركوك، گازو تۆو پەینی كیمیایی بۆ جوتیاران دابین دەكەین”.
ئەحلام فەتاح، ئاماژەی بەوەشكرد:” بۆ دابینكردنی ئەو پێداویستیانەی جوتیاران، ئێمە پشت بە پلان (خگە)ـی ساڵانەی جوتیاران دەبەستین”.
بەڕێوەبەری بەشی بەرهەمهێنانی بەروبومە رووەكیەكان لە بەڕێوەبەرایەتی كشتوكاڵی كەركوك، سەبارەت بە نرخی كیڵانی زەوی بۆ ئەمساڵ وتی:” بۆ نرخی هەر كاتژمێرێك كێڵانی زەوی بە ئامێری تراكتۆر بڕی (35) هەزار دینار دەستنیشانكراوە”.
ئەحلام فەخرەدین ئاشكراشیكرد:” بەپێی رێنماییەكان پێویستە ئەو جوتیارانەی كە خاوەنی بیری ئیرتیوازین مۆڵەتەكانیان نوێ بكەنەوە، هەروەها ئەوانەی گرێبەستیان هەیە پێویستە گرێبەستەكانیان نوێ بكەنەوە”.
سەبارەت بە كێشەی جوتیارانیش، ئەحلام فەخرەدین وتی:” ئەو جوتیارانەی كە پلانی ساڵانەیان لە لای كشتوكاڵی كەركوك هەیە، بەهۆی مردنی خاوەن زەوییەكەو وەرەسەوە كێشەیان بۆ دروست دەبێت لەو پلانەی كە هەیانە”. 
باسی لەوەشكرد:” وەك كشتوكاڵی كەركوك ساڵانە پلانی خۆمان هەیە بۆ چاندنی دانەوێڵەی گەنم و جۆ، دواتریش وەزارەت رەزامەندی موسادەقەی دەكات، تائێستا وەزارەت موسادەقەی لەسەری نەكردووە، چونكە كێشەی كەمئاوییمان هەیە”.
لقی كەركوكی یەكێتی جوتیارانی كوردستان گلەیی دەكات لەوەی لە لایەن لایەنە پەیوەندارەكانەوە گوێ لە قسەیان ناگیرێت. 
مەردان عەبدوڵڕەحمان، سەرۆكی لقی كەركوكی یەكێتی جوتیارانی كوردستان بۆ (هەواڵ) وتی:” لە ئێستادا یەكێتی جوتیارانی كوردستان لە كەركوك تەنها وەك داوڵێك لە شارەكەیە، ئەگینا بۆ هیچ شتێك لە لایەن ئیدارەی شارەكەو كشتوكاڵی كەركوكەوە هیچ پرسێكمان پێ ناكرێت، ئەمەش لە كاتێكدا لەگەڵ عەرەبەكان مامەڵە دەكەن و لەگەڵ ئێمە نایكەن”.
وتیشی:” بەهۆی وشكە ساڵییەوە لە ساڵی پاردا جوتیاران بەرهەمێكی وەهایان دەست نەكەوت، بەتایبەتی ئەو زەویانەی كە پشتیان بە ئاوی باران دەبەست، تەنها ئەو زەویانە بەرهەمیان هەبوو كە بەراوبوون، ئەمەش وا دەكات جوتیاران سارد بنەوە لە چاندنی رێژەیەكی زۆر لە گەنم و جۆ”.
سەرۆكی لقی كەركوكی یەكێتی جوتیارانی كوردستان، وتیشی:” بۆ پشتگیری و پاڵپشتی جوتیاران دەنگمان گەیاندووەتەوە هەموو لایەنە بەرپرسەكانی كەركوك بۆ ئەوەی پشتگیری تەواوی جوتیاران بكرێت، لە رووی پێداویستییەكانی گازو پەین و بنەتۆ”.
سەبارەت بە نرخی كێڵانی زەوی بە ئامێری تراكتۆر، سەرۆكی لقی كەركوكی یەكێتی جوتیارانی كوردستان، ئاشكرایكرد:” ئەو نرخە بە پێی جۆری ئامێری تراكتۆرو ئامێری كێڵانەكە دەگۆڕێت، بەڵام ئەوە من چەند ساڵە لە نێو جوتیارانی كەركوكم، هیچ ساڵێك نرخی كێڵانی زەوی و دروێنە كە حكومەت و لایەنە پەیوەندارەكان دەستنیشانیان كردووە، وەك خۆی جێبەجێ نەكراوەو هەر كەس بە ئارەزووی خۆی نرخێكی داناوەو لە دواجاریشدا تەنها جوتیاران زەرەرمەند بوونە لێی”. 


‌ 79 جار بینراوه‌
10/6/2018 9:06:14 AM
Print Friendly and PDF
بابەتی زیاتر ...
راپرسی
پێت وایە دۆخی ئێستای كوردستان بەچی چارەسەر ئەبێت؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved