»  پەڕەموچ
شارێك لەدەرەوەی دیرۆك
شیعری : عەبدوڵا سڵێمان(مەشخەڵ)




هەرچی ڕۆژە ڕادەمێنم لەم شارەی خۆم
گەرچی شەش هەزار ساڵ دیرۆكی لە پشتە
دەبینم كە بە دڵ گەنجە و پشتیشی كۆم
بۆ ئەم شارەم هەوری خەمێكی ڕەش و چڕ 
لێزمە بارانی فرمێسك ساڵ دوانزەی مانگ بۆتە تێشوو
هەندێجاریش دار مێوی كارەساتێكە
بۆڵە خەم و بۆڵە دەردی زەرد و ڕەشە وەكو هێشوو
جارنەجارێك كە دەیبینم مەمكەكانی پڕن لە شیر
تێی ئاڵاون گورگ و چەقەڵ، پیرە كەمتیار
هەندێجاریش وا دەنوێنێ كە سەرحاڵە و 
چەكێ گوڵی بەدەستەوە و دەڕوا بەرەو ژووانی یار
جار وا هەبووە من بینیومە گوڵەباخ و 
گوڵی شەوبۆ و لاولاوی عەشقی چاندووە
جاری واش هەبووە خۆی بێدەنگ نیشانداوە و 
سەد دووژمنی گەوجاندووە
هەر ئەم شارە بێ جیاوازی بۆتە كێڵگەی برسێتی و خەم لەبۆ خەڵك
ناز و نیعمەت بۆ چەند كەسی ناكەس بەچە
هەر لەم شارەدا ڕۆژگارێك كچان هەموو قژیان ڕووت بوو وەكو هەتاو
ڕۆژگارێ تر ڕێك وەك ئەمڕۆ پڕ لە عەبا و پڕ لە پەچە
جار وا هەبووە غەمبار بووم و نەیهێشتووە پێكەنینم لێ زویر ببێ
جاریش هەبووە ڕێی نەداوم دەستم لە دامێنی تەنها خەونێكی جوانی گیر ببێ
ئەم كەركووكە ڕەش و سپی و ڕەنگاوڕەنگە
دڵی سوورە وەك سووریی دەنكە هەنارێ
قەت نەمدیوە لەم گەرمایە و لەم هاڵاوەی نێو دەروونی
سكاڵایەك، گلەییەك بكا و بڵێ
خۆزگەم بە لێواری دەریا و چاوچاوێنەی دەم كەنارێ
ئاخ هەزار ئاخ ئەم شارەی من پڕ لە هەنگوینە بۆ دزان 
لێوانلێو خەم بۆ خەڵكەكەی
 بۆتە ئەفسانەی سەردەم و گرێیەكە و ناكرێتەوە
بەسەرهاتی خوێن چۆڕان و جەرگ سووتانیی 
هەتا دیرۆك بەم ئاراستەیە ڕێ بكا، نابڕێتەوە
وای دەبینم تا مەچەكی سووری بە گوڵ نەخشێنراوی گاورباغییەكی تازە و نوێ
لەنێو قەددی شار نەئاڵێ
هەتاوی گەشی ئومێد و خەونی بلوورینی ژیان
نە هەڵدێت و نە سەردەكا بەهیچ ماڵێ

24 ی ئەیلولی 2018

‌ 109 جار بینراوه‌
10/6/2018 9:19:46 AM
Print Friendly and PDF
بابەتی زیاتر ...
راپرسی
پێت وایە دۆخی ئێستای كوردستان بەچی چارەسەر ئەبێت؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved