»  شۆک
شەماڵ ئەو پزیشكە گەنجەی بە 10 زمان گۆرانی دەچڕێ : گەر چاوەڕێی كەسی تر بكەین ناتوانین بەهرەكانمان پەرە پێ بدەین
ئا / هاوار ستار




هەمیشە لە كوردەواریدا وا باو بووە هونەرمەند و ئەهلی هونەر چینێكی مامناوەند و هەژار بن، بەڵام ئێمە گەنجێكی هونەرمەندی پزیشكتان پێدەناسێنین كە توانیویەتی لە دوو بواری جیای وەكو و هونەر و تەواوكردنی كۆلێژی پزیشكی سەركەوتن بەدەست بێنێ.
شەماڵ تەها گەنجێكی 24 ساڵەی شاری كەركوكە و كۆلێژی پزیشكی زانكۆی كەركوكی تەواو كردوە و لەگەڵ ئەوەشدا ماوەی شەش ساڵە وەكو هونەرمەندێك دەركەوتوە كەلە سەر ستەیجەكان بە تەنها گیتار یان پیانۆ دەژەنێ و گۆرانی بە زیاتر لە 10 زمان وەكو: (كوردی - عەرەبی - ئینگلیزی - توركی - ئازەری - هندی - ئیسپانی - ئاشوری – فارسی – ئیتاڵی) دەچڕێ. لەم چاوپێكەوتنەی هەواڵ-دا شەماڵ زیاتر بناسن.

كەی خولیای هونەریت لا دروست بوو؟
هەمیشە ئەیڵێمەوە من تەنها خولیای تەواو و خۆشەویستی میوزیكم و بە تەنهاش كاردەكەم و میوزیك ژیانی منە .. كارە هونەریەكانم زۆرن و نزیكەی شەش ساڵە دەستم بە كاری هونەری لە بواری میوزیك و گۆرانی كردوە و ئەوەش كاری نەكردوەتە سەر كاری پزیشكیم بەڵام بەردەوامیم تەنها لەبەر خوشەویستیم بووە بۆ موسیقا.

چۆن لە پاڵ پزیشكیدا هونەرت هەڵبژارد؟
لە منداڵیەوە خەونم پزیشكی بووە و سوپاس بۆ خوا توانیم بەدی بێنم، ساڵی پیشوو كولێژم بە سەركەوتووی تەواو كرد و ئێستاش بەردەوامم لە بە دیهینانی ئەو خەونە و لە بواری هونەریشدا هەر لە یەكەم رۆژەوە كە دەستم پێكرد بەر لەشەش ساڵ پێش ئێستا تاوەكو ئەمڕۆ بەردەوامم، لەم هەوڵانەشم من دوو ئامانجم هەیە:
یەكەمیان : دلخۆش ئەبم كە كەسانی دەور و پشتی خۆم دڵخۆش بكەم بە میوزیك. 
دووەمیان : حەزدەكەم مەسجیك بگەیەنم كە هەتا “دكتور”یش دەتوانێ میوزیسیانبێ، حەز بە میوزیك بكا، میوزیك بژەنێ و گۆرانی بڵێت.

لە هەردوو بوارەكەدا كارەكانت چی بوون و چۆن بوون ؟
زۆرترین كارەكانی من لە ماوەی ئەم شەش ساڵەدا كاری خێرخوازی بوون، بۆ نمونە كامپین بۆ سەنتەری نەخۆشیەكانی شێرپەنجە لە كەركوك، دڵخۆشكردنی منداڵان و بەساڵاچوان بە تایبەتی لە كامپەكان و چەندین كاری خۆبەخشی تر بە بەكارهێنانی میوزیكەكەم. 
بەشداری چەندین فیستیڤاڵ و ئاهەنگم كردوە لە زۆربەی شارەكانی عێراق وەكو كەركوك، هەولێر، سلێمانی، بەغداد.
ساڵێك لەمەوبەر لە لایەن دەزگای میدیایی دی دەبلیوی ئەڵمانی وەكو گەنجی بە هرەمەندی ساڵ دەستنیشان كرام لەسەر ئاستی شارەكانی كوردستان.
لە ئاستی نێودەوڵەتی تاوەكو ئێستا بەشدار نەبوومە لە چالاكی، بەڵام چەند جارێك هەل هاتوەتە پێش نەمتوانیوە بچم بە هۆی خوێندن و كۆلێژەوە.

گەنجی ئەمڕۆ بۆ پێشخستنی خۆی دەبێت چی بكات ؟
پەیامم ئەوەیە كە هەرگیز بێئومید نەبن لە بەدەستهێنانی ئەوەی كە ئارەزوویان بێت، لە هەرچی بوارێكدا بوون یاخود هەرچی پرۆفیشنێكتان هەبوو دەتوانن لە هەمان كات ئاواتەكانتان و خولیاكانتان بە دەستبێنن.
بێگومان بێ هەوڵ و كۆشش و هیلاكبوون هیچ لە ئامانجەكانمان بە دینایەن، پێویستە هەمیشە كار لە سەر خۆمان بكەین بۆ بەرەو پێش چوون، متمانەمان بە خۆمان هەبێ تاوەكو ئاواتەكانمان بە دی بێنین.
ئایا پێویستە گەنج پشت بە حكومەت و لایەنی پەیوەندیدار ببەستێت ؟
بەبۆچوونی من لەماوەی ئەم ساڵانە هەمیشە حەزم لێبووە خۆم كارەكانم بكەم و چاوەڕێی هیچ لایەنێك یاخود كەسێك نەبووم تا هیچ شتێكم بۆ بكات، چونكە گەر چاوەڕێی كەسی تر بكەین تا یارمەتیمان بدەن، ئەوا هیچ ناتوانین بەهرەكانمان پەرە پێ بدەین.

‌ 167 جار بینراوه‌
10/6/2018 9:22:37 AM
Print Friendly and PDF
بابەتی زیاتر ...
راپرسی
کێ بەرپرسە لەم دۆخەی ئێستای کوردستان؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved