»  شۆک
گه‌نجانی كه‌ركوك روو له‌ فێربوونی مه‌وجی چواره‌م ده‌كه‌ن
ئا/ هاوار ستار

  

له‌ رابردودا خه‌ڵكی كه‌ركوك به‌ سێ مه‌وج ناسرابوون ئه‌مه‌ش وه‌ك ئاماژه‌یه‌ك بۆ ئه‌وه‌ی نه‌ته‌وه‌كانی فێری كوردی و عه‌ره‌بی و توركمانیش ده‌بوون، له‌ ئێستاشدا ئه‌م شاره‌ له‌پاڵ زمانه‌كانی دایك هه‌وڵی فێربوونی زمانێكی هاوبه‌ش ده‌درێت كه‌ ئه‌ویش زمانی ئینگلیزییه‌ كه‌ زمانی پله‌ یه‌كه‌ له‌ جیهاندا.

ئه‌حمه‌د ستار خوێندكارێكی ئاماده‌ییه‌ و زمانی ئینگلیزی به‌باشی ده‌زانێ بۆ هه‌واڵ وتی: “له‌نێو گه‌نجه‌كاندا ده‌بینم زمانی ئینگلیزی هه‌وڵی بۆ ده‌درێت و من خۆم و به‌شێك له‌ هاوڕێیانم ئینگلیزی ده‌زانین”.

هه‌روه‌ها وتی: “پێمخۆشه‌ گه‌نجی ئه‌م شاره‌ و كورد ئینگلیزی به‌ باشی بزانێ چونكه‌ بۆ ئێستا و ئاینده‌ی گرنگه‌ و له‌ كار و سه‌فه‌ر و بوونی كه‌سانی بیانیدا په‌كی ناكه‌وێ و ده‌توانێ به‌و زمانه‌ جیهانییه‌ بدوێ و بدوێنێ”.

ئه‌و گه‌نجه‌ رونیكرده‌وه‌ كه‌ ئه‌و خۆی خولیای بۆ زمان هه‌بووه‌ و هه‌ر له‌ قۆناغی سه‌ره‌تاییه‌وه‌ به‌ بابه‌تی ده‌ره‌كی وه‌كو فیلم و گۆرانی و هه‌روه‌ها خول و كتێب و گفتوگۆ له‌رێی تۆڕه‌ كۆمه‌ڵایه‌تییه‌كانه‌وه‌ له‌گه‌ڵ كه‌سانی بیانی خۆی گونجاندوه‌ و فێری زمانه‌كه‌ بووه‌.

ده‌شڵێت: “به‌هیوام گه‌نجانی كه‌ركوك به‌ گشت چین و پێكهاته‌كانیه‌وه‌ هه‌وڵ بده‌ن زیاتر و زیاتر ئینگلیزی بزانن چونكه‌ ئه‌م شاره‌ فره‌ نه‌ته‌وه‌ و ئاین و زمانه‌ و شوێنه‌كه‌ی ستراتیژی و جێگه‌ی ململانێكانه‌ و له‌بوونی كه‌سانی بیانی و كۆمپانیاش له‌م شاره‌ ده‌توانن زمانزانی به‌كاربێنن”.

محه‌مه‌د حه‌بیب به‌ڕێوبه‌ری به‌شی په‌روه‌رده‌ له‌ په‌یمانگه‌ی ئینگلیش زۆنی به‌ریتانی له‌ كه‌ركوك وتی: “له‌ ئێستادا جیهان به‌یه‌كه‌وه‌ گرێدراوه‌و په‌یوه‌ندیه‌كان به‌هێزبوون زمانیش به‌شێكی سه‌ره‌كی په‌یوه‌ندی گرتنه‌ له‌گه‌ڵ نه‌ته‌وه‌ی دی و سه‌ره‌كیترین زمانیش زمانی ئینگلیزیه‌ هه‌ربۆیه‌ له‌ ئێستادا گه‌نجه‌كان هه‌وڵی زمانزانی ده‌ده‌ن و پێویستیان پێیه‌تی”.

وتیشی: “ئه‌وانه‌ی له‌ كۆلێژه‌كان و ناوه‌نده‌كانی خوێندنن هه‌وڵه‌ده‌ن ئینگلیزی فێربن ئه‌وه‌ش به‌مه‌به‌ستی خوێندن و چونه‌ده‌ره‌وه‌ی وڵات بۆ به‌ده‌ستهێنانی ماسته‌ر یانیش بۆ گه‌شتوگوزار و یان بۆ دامه‌زراندن له‌ كۆمپانیا بیانییه‌كان”.

محه‌مه‌د حه‌بیب ئه‌وه‌شی ئاشكراكرد: “له‌ناوه‌نده‌كه‌ی ئه‌وان به‌رده‌وام خه‌ڵكی بۆ فێربوونی زمان رویان تێده‌كات و ئه‌وان خولی سێ مانگیان هه‌یه‌ و چوارقۆناغی وتنه‌وه‌ی زمانیان هه‌یه‌ بۆ فێرخوازه‌كان و چوار وه‌رزه‌ گه‌نج رویان تێده‌كه‌ن بۆ فێربوونی ئینگلیزی”.

ئه‌وه‌شی خسته‌ڕوو: “ناوه‌ندی (ئینگلیش زۆن) به‌واتای ناوچه‌ی ئینگلیزی دێت و له‌و ناوه‌نده‌ هه‌موان به‌ یه‌ك زمانی هاوبه‌ش له‌سه‌رجه‌م كارمه‌ند و فێرخوازه‌كان كه‌ له‌سه‌رجه‌م نه‌ته‌وه‌ و ئاینه‌كانی كه‌ركوك پێكهاتون به‌ ئینگلیزی قسه‌ ده‌كه‌ن و ئه‌وه‌ش بۆ به‌ پراكتیك كردنی زمانه‌كه‌ و تاوتوێكردنی”.

سامی سلێمان خاوه‌ن كتێبخانه‌ی رێگا له‌كه‌ركوك كه‌ زۆربه‌ی هه‌ره‌زۆری كتێبه‌كانی به‌ زمانی ئینگلیزین بۆ هه‌واڵ وتی: “زمانی ئینگلیزی له‌م شاره‌ تاكه‌ زمانه‌ هیچ كێشه‌ دروست ناكا بۆ نه‌ته‌وه‌كان و ئاینه‌كان چونكه‌ زمانێكی هاوبه‌شه‌ و ئێستاش به‌ هاوبه‌شی گه‌نجه‌كانی كه‌ركوك بۆ ئه‌وه‌ی زیاتر فێربن و به‌ر دونیابكه‌ون زیاتر په‌نا ئه‌به‌نه‌ به‌ر ئه‌و زمانه‌ ده‌توانن له‌رێگه‌ی ئه‌و زمانه‌وه‌ په‌یامێكی ئاشتی بگه‌یه‌نن به‌ گه‌لانی دونیا”.

سامی باسی له‌وه‌كرد: “له‌كتێبخانه‌كه‌دا زیاتر په‌ره‌ به‌ زمانی ئینگلیزی ده‌ده‌ین و زۆرجار هه‌ر به‌ئینگلیزیش گفتوگۆكانمان ده‌كه‌ین و ئه‌وه‌ش بۆ مانه‌وه‌ی زمانه‌كه‌ و بۆ ئه‌وه‌ش كه‌ بیسه‌لمێنین هیچ جیاوازیه‌ك نییه‌ له‌ نێوانمان و به‌وه‌ش په‌ره‌ به‌ زمانه‌كه‌ش ده‌درێت”.

ئه‌وه‌شی وت: “هۆكار بۆ فێربوونی زمانی ئینگلیزی له‌ كه‌ركوك زۆرن له‌وانه‌ بوونی كۆمپیانیای بیانی و هه‌ندێك جار كه‌سانی بیانی خاوه‌نكار پرۆژه‌یه‌ك ده‌كه‌نه‌وه‌ بۆیه‌ ده‌بێ گه‌نجه‌كانمان كه‌ ده‌چنه‌ ئه‌وێ ئینگلیزی بزانن هه‌روه‌ها هۆكاری تری وه‌كو گه‌شت كردن و هه‌ندێك جار كه‌ هه‌موان ده‌زانین گه‌نجێكی زۆر نه‌ك سه‌فه‌ری كاتی بگره‌ كۆچیان كرد و نایانه‌وێ بگه‌ڕێنه‌وه‌ بۆیه‌ په‌ره‌ به‌فێربوونی زمانه‌كه‌ ده‌ده‌ن و زۆر كه‌سیش بۆ په‌روه‌رده‌ و فێربوونێتی”.

‌ 226 جار بینراوه‌
11/10/2018 1:30:39 AM
Print Friendly and PDF
بابەتی زیاتر ...
راپرسی
کێ بەرپرسە لەم دۆخەی ئێستای کوردستان؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved