»  کاتژمێر یازدە
پارێزگاری كەركوك قورئان و دەستورو یاسا پێشێل دەكات
شوان داودی - گۆشه‌ی له‌ژێ چاویلكه‌وه‌

بڕیار وابوو رۆژی یەكشەممە 11/11/2018 بینای نوێی بەڕێوەبەرایەتی رەگەزنامەو پاسپۆرتی كەركوك بە فەرمی بكرێتەوەو بخرێتە خزمەت هاوڵاتیانی شارەكەوە، ئەم بینایە یەكێكە لە كارە ناوازەكانی ئیدارەی پێشوو كە كردنەوەی دواكەوت بۆ ئێستاو قەدەری سیاسی عێراق وایكرد پارێزگاری ئێستای بە وەكالەت پەتەكەی ببڕێت.

تا ئێرە حاڵەتەكە ئاساییە، ئەوەی ئاسایی نەبوو جەنابی پارێزگاری بە وەكالەت، كە براوەی هەڵبژاردنیشە بۆ پەرلەمان واتا دەبێتە ئەندامی گەورەترین دەزگای یاسادانان، ئامادە نەبوو ئەو رۆژەی كە دیاریكرابوو پەتەكە بپچڕێت و بیناكە بە فەرمی بكاتەوە، چونكە هاوشانی زمانی عەرەبی تابلۆی سەرەكی و تابلۆكانی تری سەر ژوورەكان بە زمانی كوردیش نووسرابوون، بۆیە فەرمان دەردەكات هەموو نووسراوە كوردییەكانی سەربیناكەو سەر بەشەكان هەڵبگیرێن ئەوجا جەنابیان ئامادە دەبێت پەتەكە ببڕێت، هەر بۆیە كردنەوەی بیناكە دواخرا بۆ رۆژی دواتر كاتێك هەموو ئەو تابلۆیانەی بە كوردی نووسرابوون لابران ئەوجا پەتەكەی بڕی.

دیارە گرێی دەروونی ئەو پیاوە بەرانبەر بە زمانی كوردی، زمانی زۆرینەی ئەو شارەی كە بە ناوە ئەو پارێزگارێتی كوێری كردووە، بە شێوەیەك پێش ئەم رووداوەش بە بڕیاری راكان سەعید نووسینی كوردی لەسەر نوسراوە فەرمییەكانی پارێزگا لابران.

كارەساتەكە لەوەدایە كە لێی دەپرسی خۆی لەو بڕیارانە بێ ئاگا دەكات.. دەڵێت :" من ئاگادار نیم". بێ ئەوەی لێكۆڵینەوە بكات و ئەنجامدەرانی سزا بدات.

بۆ بەرچاو روونی جەنابیان قورئانی پیرۆز لەبارەی زمانەوە دەڵێت [ ومن اياته خلق السموات والارض و اختلاف السنتكم والوانكم ان في ذلك لايات للعالمين] (الروم 22).

لە ماددەی چواری دەستوری عێراقدا هاتووە كە زمانی كوردی و عەرەبی زمانی فەرمی عێراقین و هاوشانیان زمانەكانی توركمانی و سریانی و ئەرمەنی لەو شوێنەی كە رێژەی دانیشتوانیان هەیە، فەرمین و هەر هەرێمێك یان پارێزگایەك بۆی هەیە لەرێی راپرسییەوە بڕیار لەسەر بەكارهێنانی زمانی تر بدات.

ئەم مافە بە یاسای ژمارە(7)ـی ساڵی 2014 رێكخراوەو لە رۆژنامەی (الوقائع العراقیە) ژمارە (4311) لە 24/2/ 2014 بڵاوكراوەتەوە.

واتا جەنابی پارێزگاری بە وەكالەت لەو بڕیارانەیدا كە دژی زمانی كوردی كە زمانی زۆرینەی شارەكەیە، دەریكردووە پێشیلكاری بەرانبەر بە قورئان و دەستورو بە یاسا كردووە، جگە لە برینداركردنی هەستی زۆرینەی هاوڵاتیانی ئەو شارەی كە جەنابیان حاكمیەتی دەكەن.

یەكێ لە سامانە مرۆیی و نیشتمانییەكان كە خوای گەورە بە عێراقی بەخشیوە (زمان)ـە، دەكرێت بۆ كایەی گەشەكردنی وڵات سوودی لێ وەربگیرێت، بەڵام بەداخەوە ئەم سامانە نیشتمانییە لەلایەن بیرتەسكەوە كە تەنها بەر پێی خۆیان دەبینن بەردەوام بەر خەنجەر دەدرێن و زیانی گەورە بە دۆخی عێراق بە گشتی و كەركوك بەتایبەتی دەگەیەنن و بێئەوەی كەس لێپرسینەوەیان لەگەڵ بكات.

‌ 266 جار بینراوه‌
11/17/2018 1:02:47 AM
Print Friendly and PDF
بابەتی زیاتر ...
123
راپرسی
پێت وایە دۆخی ئێستای كوردستان بەچی چارەسەر ئەبێت؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved