»  پەڕەموچ
چیرۆك ... ژیان و مه‌رگی ساراتێل
ن: حسێن نوش ئازه‌ر

 و: ئه‌نوه‌ر عه‌ره‌ب

ساراتێل كاتێ له‌ دایك بوو، چلوپێنج میتری سه‌ید خه‌ندان هێشتا ساز نه‌كرابوو. شه‌مس ئاواش ده‌شتێك بوو كاكی به‌كاكی. بێهجه‌ت كه‌ ماما بوو، وه‌ك ژنه‌ سۆزانییه‌كانی ناو فیلمفارسی قینچكه‌ گۆشتێكی زیاده‌ له‌ حاندی كوڵمه‌ی راستی بوو. دایكی ساراتێلیش كه‌ نه‌ ناووناوبانگێك و نه‌ تۆوتۆره‌مه‌یه‌كی وای بوو، وه‌ك ژنه‌ نه‌جیبزاده‌یه‌كی سه‌ده‌ی شازده‌ بێ ئاخ و ئۆفێك ساراتیلی هێنا سه‌ر گۆی زه‌وی.

ئه‌م رووداوه‌ رێك له‌و ساڵه‌دا بوو وا ئایه‌توڵا وتاره‌ مێژووییه‌كی خوێندبۆوه‌. به‌یانی ئه‌و رۆژه‌ی وا ساراتێل له‌ دایك بوو، بازاری تاران قه‌پات كرابوو. تاسووعا یان عاشوورا یان جێژنی ره‌مه‌زان نه‌بوو، شه‌شی رێبه‌ندانیش نه‌بوو. رۆژی تاج له‌ سه‌رنانی شا- ش نه‌بوو.

ساراتێل نه‌گریا، نه‌یزیقاند. دوای ئه‌وه‌ی له‌ زێدانی دایكی داخزیه‌ده‌رێ، له‌ باوه‌شی ماماوه‌ خۆی خسته‌ خوارێ و وه‌رێكه‌وت. ماما له‌ ترسان بووراوه‌. گوڵدانێكیش له‌ سه‌ر دیواره‌وه‌ كه‌وته‌ خوارێ و وردوخاش بوو، پشیله‌یه‌كیش له‌ نووته‌كی شه‌ودا میاواندی ده‌نگی پشیله‌ ته‌نانه‌ت له‌ ده‌شتی شه‌مس ئاواش زایه‌ڵه‌ی داوه‌.

له‌و كاته‌وه‌ تا ئه‌مڕۆ ساراتێل هه‌روا ده‌ڕوا. ئه‌گه‌ر بوێستێ، ده‌موده‌ست، كاتیش ده‌وێستێ. ئه‌وه‌ رازێكی سه‌ربه‌مۆره‌ و كه‌س لێی ئاگادار نییه‌.

ئه‌مشه‌و له‌ پاریس به‌فر ده‌بارێ و ساراتێلیش رێك له‌م ساته‌دا خه‌ریكه‌ له‌ كۆڵانی شازده‌وه‌ به‌ره‌و لای دارستانه‌كانی بۆلۆنی ده‌ڕوا.

باوكی ساراتێل واله‌و ساڵانه‌دا كارمه‌ندی ئیداره‌ی قه‌ندوشه‌كر و لایه‌نگری سه‌رسه‌ختی ئایه‌توولا بوو، دوای له‌ دایك بوونی ساراتێل له‌ پشت قورعانه‌كه‌ نووسیبووی: له‌ دایك بوونی كچه‌ خۆشه‌ویسته‌كه‌م، ئه‌خته‌رولسادات… پاشان جه‌وهه‌ری خۆنووسه‌كه‌ی تكه‌ی كردووه‌. باوكی قورعانه‌كه‌ی پێوه‌داوه‌ و ماچێكی شیرازه‌كه‌ی كردووه‌ و خستوویه‌ته‌وه‌ سه‌ر ره‌فه‌كه‌. هه‌ڵبه‌ت تكه‌ی جه‌وهه‌ر به‌ سه‌ر لاپه‌ڕه‌ی یه‌كه‌میقورعاندا شمیخراپ بوو. تووكونزای ئه‌م كاره‌ساته‌ هه‌ر له‌و ساته‌وه‌ داوێنی ساراتێلی گرته‌وه‌. كاتێ باوكی شیرازه‌ی قورعانه‌كه‌ی ماچ كرد، دایكی هه‌ناسه‌ی سوار بوو و به‌ بێده‌نگی سه‌ری نایه‌وه‌. له‌و ساته‌وه‌ ئیتر هه‌موو شه‌وێك باوكی ده‌رۆیشته‌ كافه‌ موسیۆ ئارتێزرۆنی و عاره‌قی ده‌خوارده‌وه‌. موسیۆ ئارتێزرۆنی به‌گزاده‌یه‌كی هه‌رمه‌نی بوو، ئه‌و ساڵانه‌ هه‌موو یان به‌گزاده‌ بوون یان دێهاتی.

چاكسازی زه‌ویوزار رووداوێكی فه‌رامۆشكراو بوو، به‌و حاڵه‌شه‌وه‌ جاری وابوو ره‌عیه‌ته‌كان تای برینج و تای گوێزیان به‌ دیاری دێنا. ساراتێل نه‌یده‌توانی به‌ رێدا نه‌ڕوا. شه‌وانه‌ كه‌ ده‌خه‌وت، گوێی له‌ چركه‌چركی كاتژمێره‌كان نه‌ده‌بوو، بۆیه‌ هه‌ستی به‌ پیربوون ده‌كرد. ده‌یزانی رۆژێكیش باوكی به‌خاك ده‌سپێرێ، ئه‌گه‌ر به‌ ئه‌و بوایه‌ كارێكی ده‌كرد كاتژمێره‌كان له‌ زه‌نگ لێدان بكه‌ون. له‌و ساڵانه‌دا له‌ هه‌ر ماڵێكی ئه‌م ئێرانه‌ كه‌ پێیان ده‌كووت دوورگه‌ی هێمنی به‌ دیواری هه‌ر ماڵێكه‌وه‌ كاتژمێریكی پاندۆلدار له‌ قوتوولكه‌یه‌كی داریندا به‌ دیواره‌وه‌ هه‌ڵواسرابوو.

دینگ دینگ دینگ

دینگ دینگ دینگ

دینگ دینگ دینگ

هه‌ر له‌و ساڵه‌ بێ قرموقاڵانه‌دا بوونیوه‌شه‌وێك له‌ شه‌وانیهاوین، باوكی له‌ كافه‌ موسیۆ ئارتێزرۆنی به‌ره‌و ماڵێ نه‌گه‌ڕاوه‌. به‌هه‌شتی زه‌هرایان¹ تازه‌ ساز كردبوو، ساراتێل باوكی له‌ ناو گۆڕێك له‌و گۆره‌ تازانه‌ی به‌هه‌شتی زه‌هرادا نێشت و به‌ پێیانتا لاله‌زار چوو و له‌وێ له‌ سینه‌مایه‌كی لاله‌زار له‌ سه‌ر شانۆ ده‌ستی كرد به‌ كایه‌ كردن، ئه‌و رۆلی كچۆله‌یه‌كی ده‌گێڕا ئه‌گه‌ركوو بۆ تاوێكیش بوێستێ پاندۆلی كاتژمێره‌كانیش ده‌ستبه‌جێ له‌ جووڵه‌ ده‌كه‌ون.

ئه‌و رۆژه‌ی وا حه‌میدی ئه‌شره‌ف² له‌ نارمه‌ك سه‌رگه‌ردان بوو، ساراتێلیش كه‌م تا كورتێ له‌و ده‌ورووبه‌ره‌ خه‌ریكی شه‌وگه‌ڕی بوو. ژنه‌ بلیت فرۆشه‌كه‌ی تیاتری لاله‌زار ئه‌وی به‌ كچی خۆی قه‌بوول كردبوو، به‌و حاله‌شه‌وه‌ نه‌كرا درێژه‌ به‌ رێگه‌ی زڕدایكه‌كه‌ی بدا. شۆڕش كرا و كاتێ شۆڕشگێڕان سوپاخانه‌ی حیشمه‌تییه‌یان تاڵانكرد، ساراتێل هێنده‌ نه‌بوو له‌و رۆڵه‌ی وا هه‌میشه‌ ده‌یگێڕابوه‌وه‌، كه‌ له‌ لاله‌زاره‌وه‌ چوو به‌ره‌و شه‌قامیموعه‌لیم و له‌ شه‌قامی موعه‌لیمیشه‌وه‌ خۆی گه‌یانده‌ بنكه‌ی حیشمه‌تییه‌و به‌ تفه‌نگێكی ژێ به‌ره‌و ماڵێ گه‌ڕاوه‌. ئه‌وشه‌وه‌ تا به‌یانی خه‌وت و كاتێ له‌ خه‌و هه‌ستا، هه‌موو شتێ گۆڕدرابوو، ساراتێل ئه‌مجار گۆرانی “ئافتابكارانی جه‌نگه‌ڵی”³ له‌ به‌ر خۆیه‌وه‌ ناره‌نارده‌كرد.

ئه‌ویش چه‌كدار بوو

ئه‌ویش هه‌نێ جار له‌چكه‌ی سووری له‌سه‌ر ده‌كرد

ئه‌ویش چوو بۆ كوردستان و شه‌ڕی كرد

ئه‌ویش بریندار بوو

ئه‌ویشیان كاتێ له‌ كوردستان ده‌گه‌ڕاوه‌ له‌ سه‌ر پرده‌ دارینه‌كه‌ ده‌ستبه‌سه‌ر كرد.

ئه‌ویشیان بۆ سوپاخانه‌ی عیشره‌ت ئاواو له‌وێشه‌وه‌ بۆ ئێوین راگوێزا.

ساراتێل هه‌رچی به‌ پشكێنه‌ره‌كه‌ی ده‌وت ئه‌وه‌ تووكو نه‌زایه‌كی هه‌تاهه‌تایه‌و ئه‌و جه‌نگاوه‌رێكی تووكلێكراوه‌ ده‌بێ ئازادبێت و به‌ڕێدا بڕوا ده‌نا كاتیش له‌ رۆیشتن ده‌كه‌وێ، ته‌وفیری نه‌بوو. ئاوابوو كه‌ شه‌ش ساڵی ره‌به‌ق بۆی خه‌وت. ئه‌ختوچاریان كرد نه‌یانتوانی له‌ خه‌وی هه‌ستێنن. هه‌ر بۆیه‌ له‌ زیندان وه‌ده‌ریان نا. كاتێ ساراتێلیان له‌ ئێوین وه‌ده‌رنا، ده‌تگوت هه‌موو له‌ خه‌وێكی چه‌ند ساڵه‌ راپه‌ڕیون. ساراتێل بۆ هه‌ر كوێ ده‌چوو، به‌سه‌ر خوێندا هه‌نگاوی ده‌ناو ده‌ستی له‌ هه‌رچی ده‌دا شه‌ڵالی خوێن بوو. چوو بۆ زانكۆ به‌ڵام له‌ زانكۆش ده‌ریانكرد. ناعیلاج به‌ پێیان به‌ره‌و شاخ چوو له‌ وێشه‌وه‌ به‌ره‌و ئه‌سته‌مبول

له‌ ئه‌سته‌مبوله‌موه‌ به‌ره‌و ستۆكهۆلم

له‌ ستۆكهۆلمه‌وه‌ به‌ره‌و به‌رلین

له‌ به‌رلینه‌وه‌ به‌ره‌و كۆڵن

له‌ كۆڵنه‌وه‌ به‌ره‌و نیۆیۆرك و

له‌ نیۆیۆركه‌وه‌ به‌ره‌و لۆسانجلس.

له‌و ساڵانه‌دا له‌ كۆڵانی وێستوود خه‌ڵكی ژنێكیان ده‌دیت كه‌ له‌ تولحی به‌یانییه‌وه‌ هه‌تا تاریكان شه‌قامه‌كانی ده‌پێوی، نه‌هار و شامی له‌ پاشماوه‌ی كه‌بابییه‌كان ده‌خواردو له‌ “داون تاون”، له‌ گوزه‌ری تریكۆفرۆشییه‌كان هه‌رچی سه‌رهه‌نگ و سه‌رتیپی كاركه‌نار و هه‌رچی شۆفیرتاكسی ئێرانی بوو باشیان ده‌ناسی: ژنێك كه‌ به‌ رێدا ده‌ڕواو ئاراو ئاقارای لێبڕاوه‌و پێیوایه‌ جه‌نگاوه‌رێكی تووك لێكراوه‌. به‌ڵام ئه‌و خۆی گه‌یانده‌ نیۆیۆرك و له‌ نیۆیۆركیشه‌وه‌ به‌ره‌و پاریس. ئیسته‌ له‌ پاریس به‌م كاتی شه‌وه‌، له‌ كۆڵانی شازده‌وه‌ به‌ره‌و دارستانه‌كانی بۆلۆنی ده‌ڕوا.

ساراتێل ئاریكاری كۆمه‌ڵایه‌تی نییه‌، ژنێكی له‌ش فرۆشیش نییه‌، ته‌نیا ژنێكی له‌ پێ كه‌وتوو و تووك كراوه‌.

له‌ پاریس به‌فر ده‌بارێ.

حه‌وتی ئێواره‌یه‌ و هه‌وا پێنج پله‌ له‌ ژێر سیفره‌.

ساراتێل ده‌زانێ كه‌ تا نیوه‌شه‌و هه‌وا ده‌گاته‌ ده‌ پله‌ ژێر سیفر. ئه‌و هه‌روه‌ها ده‌زانێت كه‌ زۆری نه‌ماوه‌ بۆ نیوه‌شه‌و و ئه‌گه‌ر له‌ پێ نه‌كه‌وێ، تا نیوه‌شه‌و حه‌تمه‌ن خۆی ده‌گه‌یه‌نێته‌ دارستانه‌كانی بۆلۆنی. پاشان پاڵ به‌ دره‌ختێكه‌وه‌ ده‌دات، پێلووه‌كانی وێكده‌نێ و بۆ تاوێك سه‌یری ئاسمانی سوور ده‌كاو وه‌ك ده‌یان كارتۆن خه‌ویتر ده‌مرێ.

1 - گه‌وره‌ترین گۆڕستانی ئێرانه‌ له‌ باشوری تاراندایه‌.

2 - له‌ رێبه‌رانی چریك فیدایی خه‌لقی ئێران بوو.

3 - یه‌كێك له‌ سرووده‌كانی سه‌رده‌می شۆرش بوو كه‌ له‌ لایه‌ن سازمانی چریك فیداییه‌وه‌ بڵاو كراوه‌.

‌ 83 جار بینراوه‌
12/1/2018 12:00:55 AM
Print Friendly and PDF
بابەتی زیاتر ...
راپرسی
کێ بەرپرسە لەم دۆخەی ئێستای کوردستان؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved