»  بینین
كه‌ركوك، خه‌نجه‌رێك له‌كه‌مه‌ردا
دلسۆز حه‌مه‌

له‌ئه‌ده‌بیاتی هێزه‌ سیاسیه‌كانی كوردستانداو به‌درێژایی مێژوی به‌ره‌نگاربونه‌وه‌ ی ئه‌م میلله‌ته‌، كه‌ركوك پێگه‌یه‌كی سه‌نتراڵ و جیاوازی هه‌یه‌، له‌شه‌ڕو سه‌ركه‌وتنه‌كاندا، له‌ئاشتی و گفتوگۆدا، له‌ڕێككه‌وتن و به‌ره‌گاربونه‌وه‌دا هه‌میشه‌ كه‌ركوك خاڵی یه‌كلاكه‌ره‌وه‌ی ئه‌و پرسانه‌ بو، كه‌ركوك برینه‌ گه‌وره‌كه‌ی سه‌ردڵی كوردبون و ئاگره‌ ئه‌به‌دیه‌كه‌ی سوتانی ده‌رونی نه‌ته‌وه‌یه‌ك، ئه‌ده‌بیاتی سیاسیمان لێوان لێوه‌ له‌ شین وشه‌پۆر وكوڕوزانه‌وه‌ بۆ كه‌ركوك وبه‌ناوی كه‌ركوكه‌وه‌، ته‌نانه‌ت یه‌كێتی وپارتی وه‌كو دوو هێز وگه‌مه‌كه‌ری سه‌ره‌كی له‌ مێژوی ئه‌م ناوچه‌یه‌ هه‌ریه‌ك پێناسه‌یه‌كی ڕه‌مزی كه‌ركوكیان كردوه‌، لای مام - یه‌كێتی كه‌ركوك قودسی كوردستانه‌ ولای بارزانی-پارتی كه‌ركوك دڵه‌كه‌ی كوردستانه‌!
ستاتۆی سیاسی كه‌ركوك پێوه‌ری سه‌ره‌كی سه‌ركه‌وتن و پاشه‌كشه‌ی ستاتۆی پرسی كورده‌ له‌سه‌ر ئاستی عێراق و ناوچه‌كه‌ش، توركیا و ئێران و ئه‌وانی تریش له‌ ئاماده‌یی كورد له‌ وێنه‌ی كه‌ركوكدا ، ئاماده‌یی كورد هه‌ڵده‌سه‌نگێنن، تۆ بزانه‌ دوای شازده‌ی ئاب، دۆخی كورد له‌كه‌ركوك و له‌ ناوچه‌كه‌ش به‌ گشتی به‌ چی سه‌ختیه‌كدا تێده‌په‌ڕێت. 
له‌سه‌ر ئاستی میللی و خه‌ڵكی ئاسایی كه‌ركوك ڕه‌مزی كۆی هه‌موو ئه‌و ئازار ومه‌ینه‌تی وسسته‌م ونادادوه‌ریانه‌یه‌ كه‌ مرۆڤی كورد به‌ درێژایی مێژوی دروستبونی عێراق دوچاری بۆته‌وه‌، كه‌ركوك كورتكراوه‌ی حیكایه‌تی داگیركاری خاك ونكوڵی كردنی زمان و تاڵان بردنی سامان و ئاواره‌كردن و هه‌ژاركردنی ئینسانی كورده‌.
 ته‌بعیس وته‌رحیل وته‌هیجیر وته‌عریب وهه‌موو ئه‌و ڕێگایانه‌ی كه‌ گیراونه‌ته‌ به‌ر بۆ مه‌حرومكردنی كورد له‌ كه‌ركوك، بۆ سڕینه‌وه‌ی ناسنامه‌ی كورد له‌ كه‌ركوكدا سسته‌مێكی كه‌موێنه‌ و حیكایه‌تێكی نه‌بڕاوه‌ی پر ئازاره‌.
ڕزگاركردنی كه‌ركوك له‌ ڕاپه‌ڕینی 1991دا بارته‌قای ئازادكردنی ته‌واوی شاروشارۆچكه‌كانی تری كوردستان بو، هیچ شادمانیه‌كی هێنده‌ی ئازادكردنی كه‌ركوك له‌ ڕوی مه‌عنه‌وی وده‌رونه‌وه‌ مرۆڤی كوردی خۆشحاڵ نه‌كرد، هۆكاره‌كه‌شی قوڵی برینی كه‌ركوك و فره‌ڕه‌هه‌ندی ئه‌و پرسه‌یه‌ كه‌ پێی ده‌ڵێن كه‌ركوك.
به‌ڵام.. ئه‌گه‌ر كه‌ركوك ڕه‌مز بێت بۆ كۆی جه‌ور وسسته‌می مێژویی سه‌ر مرۆڤی كورد له‌ خوێناویترین و نادادوه‌رترین ئاستدا، ئه‌وا مرۆڤی كورد، بزوتنه‌وه‌ سیاسی و ته‌نانه‌ت كۆمه‌ڵایه‌تیه‌كه‌شی نه‌ك هه‌ر له‌ ئاستی به‌رپرسیاری پرسێكی گه‌وره‌ی وه‌كو كه‌ركودا نیه‌ ونه‌بوه‌، به‌ڵكو خۆمان بوینه‌ته‌ به‌شێك له‌ به‌رهه‌مهێنانه‌وه‌ی شكست و شه‌رمه‌زاری.
ئه‌وه‌نده‌ی كه‌ركوك سیمبۆڵی زوڵم و چه‌وساندنه‌وه‌ی ئینسانی كورده‌، هێنده‌ش ده‌كرا سیمبۆڵێك بێت بۆ سه‌ركه‌وتن و بردنه‌ پێشی پرسی مێژویی كورد له‌ باشوری كوردستان، به‌لام ئه‌وه‌ی له‌ كه‌ركوك ده‌گوزه‌رێت شه‌رمه‌زاریه‌كی مێژویی گه‌وره‌ وشكستێكی ئه‌خلاقی گه‌وره‌ی ده‌سه‌ڵاتی سیاسیه‌ له‌ كوردستاندا كه‌ تا ئێستا هیچ لایه‌نێك خۆی ناكاته‌ به‌رپرسیار له‌و دۆران وشكسته‌ی شاری كه‌ركوك.
ئه‌م وێرانه‌ سیاسیه‌ی ئه‌وێ به‌رهه‌می شازده‌ی ئۆكتۆبه‌ر نیه‌ به‌ ته‌نها، به‌ڵكو به‌شێكی دابڕاوه‌ له‌و سیاسه‌ته‌ نادروست وكورتبین وبێ پڕۆژه‌یه‌ی كه‌ یه‌كێتی وپارتی ساڵانێكی درێژه‌ له‌ كه‌ركوكدا پیاده‌یان كردوه‌ وپیاده‌ی ده‌كه‌ن، زنجیره‌یه‌كی به‌رده‌وامه‌ له‌و خه‌مساردی وبێباكی و ته‌مبه‌ڵیه‌ سیاسیه‌ی ئینسانی كورد به‌ درێژایی مێژوو پێوه‌ی ده‌ناڵێنێت.
ئاخر ئه‌وه‌ی له‌كه‌ركوك وده‌وروبه‌ری ده‌گوزه‌رێت، له‌ده‌ستپێكردنه‌وه‌ی ته‌عریب وته‌هیجیر وترس وتۆقاندنی كورد ونیشته‌جێكردنی عه‌ره‌بی هاورده‌، به‌پشتیوانی ژێربه‌ژێری داعش و ئه‌وانی تر، شه‌رمه‌زاریه‌كی ئه‌خلاقی گه‌وره‌یه‌ به‌ نێوچه‌وانی هێزه‌ سیاسیه‌كانی كوردستان وشكستێكی مێژویی مه‌ترسیداریشه‌. له‌هه‌مووی جه‌رگبڕتر هیچ هێز وگروپ ولایه‌نێك خۆی ناكات به‌ خاوه‌نی ئه‌و دۆخه‌، ئه‌گه‌ر له‌ ئاستی مێدیا و ته‌نانه‌ت ده‌ركردنی به‌یاننامه‌یه‌كی شه‌رمه‌زارانه‌شدا بێت.
له‌ده‌ستدانی كه‌ركوك به‌و شێوه‌یه‌ ، گه‌ڕانه‌وه‌ی ناوچه‌كانی ماده‌ی 140 بۆ دۆخی سه‌رده‌می به‌عس له‌ ڕوی ڕه‌مزیه‌وه‌ شكستێكی گه‌وره‌ی ده‌سه‌لاتی كورده‌ وله‌ ڕووی مه‌عنه‌ویشه‌وه‌ بێڕێزكردنێكی گه‌وره‌یه‌ به‌ كورد خۆی وه‌كو بونه‌وه‌رێكی مێژویی، ئاخر كه‌ركوك كه‌ دڵ وقودسی بزوتنه‌وه‌یه‌كی ڕه‌وای میلله‌تێك بێت، كه‌ گرێی نه‌كراوه‌ی سه‌ر مێزی گفتوگۆ و، حه‌سره‌تی ناودڵی هه‌زاران شه‌هید بێت كه‌له‌سه‌ر كه‌ركوك له‌ هه‌یئه‌و زیندانه‌كاندا، له‌سێداره‌دران، له‌ ده‌شتی گه‌رمیان وسه‌نگه‌ردا شه‌هید بون ئه‌نفال كران، كه‌ركوك كه‌ خه‌نجه‌ری چه‌قێنراوی ناومه‌كه‌ری میلله‌تێك بێت، له‌ كاتێكدا سه‌رله‌نوێ راپێچی ته‌عریب و ته‌هجیر وداگیركاری ده‌كرێته‌وه‌ هێزه‌ سیاسیه‌كان وه‌كو ته‌ماشاچی به‌ ته‌نیشتیدا ڕو  له‌به‌غدا به‌نیازی پۆست، تێده‌په‌ڕن و ئاوڕ له‌ سوتانی ناده‌نه‌وه‌.

‌ 287 جار بینراوه‌
12/8/2018 1:17:14 AM
Print Friendly and PDF
بابەتی زیاتر ...
123
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved