»  راپۆرت
رۆڵی هه‌رێم و سه‌ركردایه‌تی سیاسی كورد له‌سه‌ر دۆخی كه‌ركوك
ئا/ یانه‌ی هه‌واڵ


رۆڵی حكومه‌تی هه‌رێمی كوردستان و سه‌ركردایه‌تی سیاسی كورد له‌ دوای رووداوه‌كانی 16ی ئۆكتۆبه‌ره‌وه‌ سه‌باره‌ت به‌ دۆخی كه‌ركوك چی بووه‌، له‌ كاتێكدا كه‌ركوك به‌ دۆخێكی خراپدا تێپه‌ڕده‌بێت و رۆژ له‌ دوای رۆژ هه‌ڕه‌شه‌و مه‌ترسییه‌كانی ته‌عریب له‌ شاره‌كه‌ زیاد ده‌كه‌ن، هۆكاره‌كه‌ی ئه‌وه‌یه‌ نه‌وت نه‌ماوه‌، یاخود شاره‌كه‌یان به‌ لاوه‌ گرنگ نییه‌؟!

رۆژنامه‌ی (هه‌واڵ) ئه‌م پرسیاره‌ی له‌(یانه‌ی هه‌واڵ) له‌ تۆڕی كۆمه‌ڵایه‌تی واتس ئاپ ئاراسته‌ی به‌شداربووان كردو ئه‌وانیش به‌مشێوه‌یه‌ وه‌ڵامیان دایه‌وه‌. 

ئه‌وانه‌ی له‌گه‌ڵ ئه‌نجامدانی ریفراندۆم بوون هه‌ر سورن له‌سه‌ر وێرانكردن و كاولكردنی كه‌ركوك
سمكۆ شوانی، ده‌ڵێت:"16ی ئۆكتۆبه‌ر كاره‌ساتێك بوو به‌سه‌ر سیاسه‌ت و ئه‌جنداو هه‌ژموونی ده‌سه‌ڵاتی هه‌رێم و كورد له‌شاره‌كه‌دا هات و ئه‌م كاره‌ساته‌ش هه‌ر ده‌بوو رووی بدایه‌و پێشترش ده‌سه‌ڵاتی هه‌رێم له‌ 2016ه‌وه‌ ئاگادارو رازی بووه‌ له‌سه‌ر گه‌ڕانه‌وه‌ی هێزی ئیتیحادی بۆ سنوره‌كه‌".
شوانی ده‌شڵێت:" ئه‌وه‌ی بێئاگایه‌ جه‌ماوه‌رو كادیره‌، ئه‌وه‌ی وایكردوه‌ به‌ پێچه‌وانه‌ی رێكه‌وتنه‌كانی ده‌سه‌ڵاتی هه‌رێمه‌وه‌ رووبدات و ئه‌وه‌ بێت كه‌ ده‌سه‌ڵاتی و تموحی شۆفێنیانه‌ی عه‌ره‌ب به‌ هه‌ردوو مه‌زهه‌به‌كه‌وه‌ ده‌یه‌وێت كۆمه‌ڵێ هه‌نگاوی سه‌قه‌تی سه‌ركردایه‌تی بڕیار به‌ده‌ستی هه‌رێم بوو چ له‌ ئه‌دای پێكه‌وه‌ژیان و چ له‌ دوا هه‌نگاویان كه‌ مه‌سه‌له‌ی ریفراندۆمه‌ شومه‌كه‌ی باوك و كوڕ بوو، هه‌ڵوێستی یه‌كێتیش له‌و نێوه‌نده‌دا په‌رشوبڵاوبوو كه‌ هه‌ندێك مێش میوانی نه‌بوو چی ده‌بێت و چی نابێت و هه‌ندێكی له‌ ژێر كاریگه‌ری بڕیاری باوك و كوڕ بون و هه‌ندێكشی له‌ دژی بوون و واقعی دوای ریفراندۆمیان ده‌زانی كه‌ چی به‌سه‌ر خه‌ڵكی شاره‌كه‌ دێت، به‌تایبه‌تی كوردو له‌ ناو كوردیشدا ئه‌وانه‌ی كه‌ له‌ ژیاندا به‌شیان هه‌ر ئاواره‌یی و ماڵ وێرانی بووه‌، هه‌ر بۆیه‌ زۆر هه‌وڵیاندا وا نه‌بێت و كورد به‌سه‌لامه‌تی له‌م كاره‌ساته‌ پێشبینكراوه‌ رزگاری بێت و هه‌م دیسان به‌هۆی سه‌ركێشی و مه‌غروری و كه‌لله‌ره‌قی سیاسی جه‌ماعه‌تی ریفراندۆمه‌وه‌ فریا نه‌كه‌وتن چاكی بكه‌ن و ئه‌وه‌ روویدا كه‌ روویدا".
باس له‌وه‌شده‌كات:" هه‌ڵوێسته‌كانی سه‌ركردایه‌تی سیاسی كوردیش دوای ریفرانۆم و 16ی ئۆكتۆبه‌ر وه‌ك هه‌ڵوێسته‌كانی پێش ئه‌نجامدانی ریفراندۆمه‌: ئه‌وانه‌ی له‌گه‌ڵ ئه‌نجامدانی ریفراندۆم بوون هه‌ر سورن له‌سه‌ر وێرانكردن و كاولكردنی كه‌ركوك و كوردی كه‌ركوك، وه‌ك بڵێی به‌ڵێنیانداوه‌ به‌ ناحه‌زانی كورد وابكه‌ن و سورن له‌سه‌ر به‌ڵێنه‌كه‌ی خۆیان، هه‌ڵوێستی تاقمێكی تر له‌ سه‌ركردایه‌تی سیاسی هه‌ڵوێستی ته‌مه‌ڵه‌كانی ناو ده‌سه‌ڵاته‌ كه‌ مێشیش میوانیان نیه‌و چی ئه‌بێت و چی نابێت، كێشه‌ی ئه‌وان نیه‌ و ئه‌وان هه‌ر له‌سه‌ر به‌زمی خۆیان و ده‌سیان به‌كڵاوه‌كه‌یانه‌وه‌ گرتووه‌ با نه‌یبات، كه‌ به‌داخه‌وه‌ ده‌بوو ئه‌مانیش خاوه‌ن قه‌رار بن هه‌ر هیچ نه‌بێت بۆ یه‌كلاكردنه‌وه‌ی خێرو شه‌ڕه‌كانی كورد، ئه‌مێنێ گروپی سێیه‌م كه‌ خه‌مخۆری دۆخه‌كه‌و خه‌ڵكه‌كه‌و ئاینده‌ی شاره‌كه‌ن، تاخمی یه‌كه‌م هه‌ر له‌سه‌ر ئه‌وه‌ن خۆیان به‌ری بكه‌ن و ئه‌مان ته‌خوین و كوردی نه‌گبه‌تیش بگه‌وجێنن به‌وه‌ی راستیه‌كانیان لێ بشارنه‌وه‌ و خۆیان به‌ داهێنه‌رو دامه‌زرێنه‌ری ده‌وڵه‌تی كوردی له‌قه‌ڵه‌م بده‌ن و جه‌ماعه‌تش به‌ دژه‌ سه‌ربه‌خۆیی كورد له‌ قه‌ڵه‌م بده‌ن كه‌ به‌ داخه‌وه‌ خه‌ڵكێكی زۆری كورد ئه‌وه‌نه‌ی به‌ درۆو هه‌ڵخه‌ڵه‌تاندن باوه‌ڕ ده‌كات ئه‌وه‌نه‌ به‌ هه‌قیقه‌ت باوه‌ڕ ناكات، به‌كوردیه‌كه‌ی خۆشباوه‌ڕن، به‌ڵگه‌ش بۆ هه‌ڵوێستی به‌شه‌كه‌ی خۆمان له‌ سه‌ركردایه‌تی كه‌ له‌ژێر كاریگه‌ری ئه‌ولابوون له‌ دانیشتنی یه‌كێكیان له‌گه‌ڵ وه‌فدێكی كادیرانی مه‌ڵبه‌ندی كه‌ركوك له‌ (م .س) كه‌ هه‌ر بۆ ئه‌و پرسیاره‌ی به‌ڕێزتان چووبوون به‌ راشكاوانه‌ وتبووی كێ تێكی داوه‌ با ئه‌وه‌ چاكی بكاته‌وه‌، منش ده‌پرسم ئه‌رێ به‌ راست كێ كه‌ركوكی تێكدا ؟!

ئه‌و پلانه‌ی ١٦ی ئۆكتۆبه‌ر بۆ وه‌ده‌رنانی هه‌یمه‌نه‌ی روس
د.مه‌دیحه‌ سۆفی، پێیوایه‌:" له‌ راستیدا ١٦ ی ئۆكتۆبه‌ر خۆی پلانێكی جیهانی -ئیقلیمی بوو بۆ وه‌ده‌رنانی پێگه‌ی روسیا له‌و ناوچه‌یه‌و هه‌ڵوه‌شاندنه‌وه‌ی رێكه‌وتنی نێوان پارتی و رۆزنه‌فت له‌مه‌ڕ غازو نه‌وتی كه‌ركوك، كه‌ توركیا ناوه‌ندگیری ده‌كرد، زیاتر هاتنه‌پێشه‌وه‌ی روسیا، واته‌ سه‌پاندنی هه‌یمه‌نه‌ی روس و زیاتر سنگ دابه‌ستن له‌ ده‌ڤه‌رێك كه‌ رۆژئاوا خۆی به‌ خاوه‌نی ده‌زانێ، به‌تایبه‌ت نه‌وتی كه‌ركوك، كه‌ له‌ ساڵی ١٩٢٧ وه‌ به‌ڕیتانیا خۆی به‌ له‌پێشتر ده‌زانێ و له‌ ئێستاشدا روسیا له‌ سوریادا هێزی هه‌یه‌، بۆ یه‌كێتیه‌كان باشتر وایه‌، به‌ دۆكۆمێنت له‌وه‌ حاڵی بن، كه‌ ئه‌و پلانه‌ی ١٦ ی ئۆكتۆبه‌ر بۆ وه‌ده‌رنانی هه‌یمه‌نه‌ی روس له‌مه‌ڕ كۆمپانیای نه‌وتی باكور و خستنه‌وه‌ ژێر ركێفی باغدا و به‌ڕیتانیا ( بریتیش پیترۆلیۆم ) بوو، كه‌ چه‌ند مه‌به‌ستێكی لێهاته‌ كایه‌وه‌ :
١- پێش هه‌مووی پارتی ئه‌و پرۆسه‌یه‌ی قۆسته‌وه‌ بۆ له‌كه‌داركردنی یه‌كێتی و به‌ خائین له‌قه‌ڵه‌مدانی، له‌كاتێكدا رێكه‌وتنی پێشتر هه‌بوو بۆ كشانه‌وه‌ی هێزی پێشمه‌رگه‌ (به‌ڵگه‌ش زۆرن).
 ٢- راماڵین و هه‌ڵته‌كاندنی هه‌یمه‌نه‌ی روس، كه‌ هه‌یمه‌نه‌ی ئێران و روسیای به‌دوادا ده‌هات.
 3- مانه‌وه‌ی كه‌ركوك به‌بێ یه‌كێتی، كه‌ مه‌به‌ستی پارتی بوو.
٤- چه‌كه‌ره‌كردنی ده‌سه‌ڵاتی توركیا زیاتر به‌ره‌و كه‌ركوك ( ئه‌وه‌ ئێستا ده‌یبینین) .
محه‌مه‌د نه‌ج شوانیش ده‌ڵێت " په‌رته‌وازه‌یی و ناته‌بایی نێوماڵی كوردو بێ متمانه‌یی له‌نێوان حیزب و حیزب، هه‌روه‌ها حیزب و هاوڵاتی وه‌ نه‌مانی هه‌یبه‌تی حكومه‌تی هه‌رێم ، كه‌واته‌ ئۆخه‌ی ئۆخه‌ی هه‌ركه‌س بۆ خۆی".
عه‌بدولوه‌هاب حه‌مه‌ڕسوولیش ده‌ڵێت:" ده‌سه‌ڵاتی كوردی دۆزی نیه‌ تابتوانێت له‌سه‌ر پێی خۆی بوه‌ستێ هه‌میشه‌ له‌ژێر چه‌تری داگیركه‌راندا ئه‌له‌وه‌ڕێ و گرنگیش نیه‌ به‌لایه‌وه‌ خاك ئه‌فرۆشێ رۆڵه‌ی گه‌له‌كه‌ی ئه‌سوتێ، به‌ته‌نها مانه‌وه‌ی خۆیان و بنه‌ماڵه‌كه‌یان سالم و موعزه‌زو موكه‌ڕڕه‌م بن، كه‌ركوك ئه‌و بایه‌خه‌ گرنگه‌ی پێناده‌ن به‌هه‌موو ناوچه‌ كێشه‌ له‌سه‌ره‌كان ئه‌وه‌ی پێشتر وه‌ك گورگی تێی به‌رببون له‌كانزا گرنگه‌كه‌ی و به‌تاڵانبردنی، ئه‌بێ بڵێن ئه‌وسه‌رده‌مه‌ گوزه‌شت، ئه‌وه‌ی بیزانم له‌زمانحاڵی هاوڕێكانمه‌وه‌ كه‌ئه‌ڵێن جارێكی تر هه‌ڵه‌ی واناكه‌ین برسی و ره‌ش و روت و داماو بین به‌ده‌س ئه‌و دزو جه‌رده‌و كاڵفامانه‌وه‌ به‌ده‌هۆڵ و زورناكانیانه‌وه‌ هه‌ڵمانپه‌رێنن، كورد دۆزی نیه‌ تابتوانێت له‌سه‌ر پێیه‌كانی خۆی بوه‌ستێ ئێمه‌ هه‌رێمێكی بێ ئه‌زمونین وله‌ژێر هه‌ژمونی ئه‌قلیمیداین جاچۆن بتوانین ئه‌و رێگاك ته‌ماویه‌ بدۆزینه‌وه‌ كه‌ناوچه‌كه‌مان له‌لێواری مه‌ترسیدایه‌ به‌ده‌ست شۆڕشگێڕه‌كانی سه‌رده‌می شاخی خۆیه‌وه‌ گه‌ڵێك بۆخۆی خۆی چاوترسێن بكات ئه‌بێ هه‌گبه‌كی چیتێدا بێت، به‌ته‌نها مانه‌وه‌ی خۆیان كه‌ركوك یان هه‌رشوێنێكی تر مه‌زات ئه‌كرێ ئه‌فرۆشرێ گرنگ نیه‌، چونكه‌ ئه‌گه‌ر كانزا له‌ده‌ستچوو یان بڵین له‌ده‌سیان چوو روئه‌كه‌نه‌ ده‌روازه‌یه‌كی تر بۆ به‌تاڵانبردنی خێرو به‌ره‌كه‌ته‌كه‌ی ماڵوێرانیش ئه‌هلی مه‌مله‌ته‌كه‌ی، بۆیه‌ كورد و سیاسه‌ت كوجا مه‌رحه‌با!

ته‌نها رێگه‌ چاره‌ش هه‌رێمێكی سه‌ربه‌خۆیه‌
د. شێرزاد حه‌سه‌ن ره‌زاش پێیوایه‌:" كوردو كه‌ركوك به‌ درێژایی مێژوو، دوانه‌یه‌كی روحی بوون وه‌ك خاك و ئاو، مرۆڤ وكه‌رامه‌ت، ئه‌م ده‌سته‌واژه‌یه‌ تا ساڵی 2٠٠٤ وكۆتایی ساڵی 2٠٠٥ یش راست بوو، به‌ڵام دوای ئه‌وه‌ ئیتر كه‌ركوك وه‌ك كارگه‌یه‌كی به‌رهه‌مهێنان له‌ دیدی سه‌ركردایه‌تی كورده‌وه‌ بینرا، له‌به‌رئه‌وه‌ په‌یوه‌ندی كوردو كه‌ركوك گۆڕا بۆ سه‌رمایه‌و به‌رهه‌می زیاتر، كێ كه‌ركوكی زیاتر خۆشده‌وێت ده‌بێت زیاتری لێ ده‌ستبكه‌وێت".
باس له‌وه‌شده‌كات:" له‌ دوای دروستبوونی خۆپیشاندانه‌كانی به‌هاری عه‌ره‌بیه‌وه‌، مه‌له‌فی خاك و گه‌ڕانه‌وه‌ی بۆسه‌ر حكومه‌تی هه‌رێم تا ئه‌و شوێنه‌ ده‌ڕۆیشت كه‌ پشكی ئه‌م یان ئه‌و چه‌ند ئه‌ژمار كراوه‌، به‌تایبه‌تی دوای درۆ شاخداره‌كه‌ی ئابووری سه‌ربه‌خۆ، ئیتر كه‌ركوك به‌ ته‌واوتی له‌ هزری به‌شێك له‌ ده‌ستڕۆیشتوانی كوردستانه‌ وه‌ك كانێكی دۆزراوه‌ هاته‌ ئه‌ژماركردن، كانی دۆزراوه‌ی ئاڵتونیش چه‌ته‌و دزی تری بۆ په‌یدا ده‌بێت، ئیتر پشك و هاوبه‌شه‌كان به‌ خه‌ڵكی كورد نه‌وستاوه‌ و وڵاتانی ئیقلیمی داوای زیاتریان ده‌كرد، هه‌ربۆیه‌ ریفراندۆم و 10٦ ئۆكتۆبه‌ری لێكه‌وته‌وه‌، ئیدی هه‌ڵویست و جدیه‌ت بۆ گه‌لێكی خاوه‌ن به‌رنامه‌و پلانی ستراتیجی ده‌بێت، له‌ ئێستادا ده‌ركه‌وت كه‌ گرنگی كه‌ركوك له‌ هزری سیاسه‌تی حكومه‌تی هه‌رێمدا په‌یوه‌سته‌ به‌ نه‌وت و هیچی تر".
نوسیویه‌تی:" ته‌نها رێگه‌ چاره‌ش هه‌رێمێكی سه‌ربه‌خۆیه‌ ئه‌گه‌ر نا به‌پێی ئه‌و داتایانه‌ی به‌رده‌ستن كه‌ركوك رۆژ له‌ دوایی رۆژ له‌ زیانی كوردا رۆژ به‌ڕێده‌كات.

كه‌ركوك سلعه‌یه‌كی بازرگانی و سیاسییه‌
جاسم رۆبیتانیش به‌ كورتی نوسیویه‌تی:" ( كه‌ركوك ته‌نها وه‌كو سلعه‌یه‌كی بازرگانی و سیاسی ته‌ماشا ده‌كرێت ومامه‌ڵه‌ی پێوه‌ ده‌كه‌ن و هیچی تر).

كه‌ركوك له‌به‌رژه‌وه‌ندی بترازێ‌ له‌بیری حكومه‌ت و به‌شێكی زۆر له‌سه‌ركرده‌كان نه‌بووه‌
سه‌یوان سه‌مه‌دیش ده‌ڵێت:" ده‌ستبه‌ربوونی سه‌ركردایه‌تی كورد له‌كه‌ركوك له‌سه‌روبه‌ندی نووسینه‌وه‌ی ده‌ستور و به‌ستنه‌وه‌ی چاره‌نووسی شاره‌كه‌ به‌ماده‌ی 140 وه‌ ده‌ستیپیكرد، ئینجا ململانێی حزبی و دواجار دابڕانی كه‌ركوك له‌هه‌رێم به‌هه‌ڵكه‌ندنی خه‌نده‌قێك و دواتر هه‌ڵه‌ی ریفڕاندۆم و لێكه‌وته‌كانی و 16ی ئۆكتۆبه‌ر به‌كورتی و پوختی كه‌ركوكییه‌كان و كه‌ركوك له‌به‌رژه‌وه‌ندی بترازێ‌ له‌بیری حكومه‌ت و به‌شێكی زۆر له‌سه‌ركرده‌كان نه‌بووه‌ بشبووبێت بۆ موزایه‌ده‌ بووه‌.

نه‌بوونی فشاری جه‌ماوه‌ری نیشتمانی
شێرزاد سه‌مه‌دیش بڕوای وایه‌:" نه‌بوونی سه‌ركردایه‌تیه‌كی یه‌كگرتوو به‌هێزی نیشتمانی وایكردووه‌ كۆی پرسه‌ چاره‌نوسسازه‌كانی گه‌لی كورد له‌بابه‌تی كێشه‌كانی هه‌رێم له‌ڕووی ئیداره‌دانی ناوخۆیی هه‌رێمه‌كه‌و په‌یوه‌ندیه‌ سیاسیه‌كان و ئیقلیمیه‌كان و په‌یوه‌ندی هه‌رێم وبه‌غداو په‌یوه‌ندی نێوان حیزبه‌ سیاسیه‌كان له‌گه‌ڵ پارت وپارچه‌كانی تری كوردستانیش هه‌مووی خراپ وبه‌لاڕێدابراوه‌ به‌هۆی
 ١-  به‌رژه‌وه‌ندی گروپ وتاقمه‌به‌رژه‌وه‌ندی خوازه‌كانی ناوهێزه‌سیاسیه‌كانی ریزبه‌ندی دووهه‌م وسێهه‌م ....هتد
 ٢- هه‌ژموونی سیاسی پارتی یه‌كه‌می ده‌سه‌ڵات
٣- پاشكۆیه‌تی سیاسه‌تی وڵاتانی ئیقلیمی له‌به‌رامبه‌ر ئاڵوگۆڕی بازرگانی وبه‌رژه‌وه‌ندی ئابووری
٤- به‌قاچاغ و هه‌رزانفرۆشی نه‌وت ده‌سكه‌وتی ئابووری نادیار بۆگروپ وتاقمه‌كانی ناوسه‌رجه‌م حیزبه‌كان
 ٥- نه‌بوونی فشاری جه‌ماوه‌ری نیشتمانی دوور له‌ئه‌جندای حیزبی بۆسه‌ر حیزبه‌كانی ده‌سه‌ڵات
 ٦- نه‌بوونی ئۆپۆزسیۆنی ته‌ندرووست
 ٧- بێ متمانه‌یی خه‌ڵك به‌گشتی به‌ ده‌سه‌ڵات وحیزبه‌كان به‌ئۆپۆزسیۆنیشه‌وه‌
 ٨- پێشینه‌ی ئاڵۆسكێندراوی مه‌سه‌له‌ی كه‌ركوك له‌ڕووی ده‌ستووری و ئیداردانی خراپی ماوه‌ی رابردوو وایكردووه‌ كه‌پێكهاته‌كانی كه‌ركوك لێك دووربخاته‌وه‌و نه‌گه‌نه‌ چاره‌سه‌ری ناوخۆیی.

نه‌وتی كه‌ركوك كوردستانه‌، نه‌ك خه‌ڵك و خاكه‌كه‌ی
م ئیحسان خورشیدیش زۆر به‌ كورتی ده‌ڵێت:" له‌١٦ی ئۆكتۆبه‌ره‌وه‌ ده‌ركه‌وت نه‌وتی كه‌ركوك كوردستانه‌، نه‌ك خه‌ڵك و خاكه‌كه‌ی".

هیچ كات كه‌ركوك له‌ ئه‌جێندای خه‌باتی پارتی نه‌بوه‌
دڵپاك تاهیریش نوسیویه‌تی:" به‌ رای من هیچ كات كه‌ركوك له‌ ئه‌جێندای خه‌باتی پارتی نه‌بوه‌و نابێ، بۆ یه‌كێتیش ته‌نها وه‌ك كارتی فشار به‌رامبه‌ر به‌ گۆڕان و پارتی به‌كاردێت,به‌ڵام له‌ دوای 16ی ئۆكتۆبه‌ره‌وه‌ سه‌ركردایه‌تی یه‌كێتی دابه‌شبون به‌سه‌ر دوو به‌ره‌دا گروپێك ئه‌وی تری به‌ خائین باسده‌كرد، گروپه‌كه‌ی تریش به‌ ترسه‌وه‌ له‌ پرسی كه‌ركوكی ده‌ڕوانی، له‌ ده‌ره‌نجامی ئه‌و فره‌به‌ره‌ییه‌ كه‌ركوك كه‌وته‌ په‌راوێزه‌وه‌و كه‌وته‌ به‌رده‌می گورگه‌ برسیه‌كانی عه‌ره‌ب و تورك، له‌و سیاسه‌ته‌ش پارتی یاریكه‌ری سه‌ره‌كی بوو.

یه‌كێتی نه‌یتوانی له‌ ناوچه‌ دابڕاوه‌كان بێ پارتی به‌ره‌و پێش بڕوات
عه‌بدوڵا حه‌ساریش ده‌ڵێت:" یه‌كێتی نه‌یتوانی له‌ ناوچه‌ دابڕاوه‌كان بێ پارتی به‌ره‌و پێش بڕوات، له‌ كاتێكدا پارتی مه‌به‌ستی سه‌ره‌كی حزبه‌كه‌ی ئه‌وه‌یه‌ له‌و ناوچانه‌دا یه‌كێتی شكستبێنێ و جه‌ماوه‌ری نه‌مێنێ ، عه‌ره‌ب یاخود به‌غدا هه‌موو به‌ڵێنه‌كانیان وا ده‌رنه‌چوو كه‌ به‌ یه‌كێتییان دابوو به‌ راشكاوانه‌ بیڵێم عه‌ره‌ب بێ وعده‌و هیچ هه‌ڵوێستێكیان نابێ بۆ یه‌كێتی، پارتی ده‌نگی یه‌كه‌مه‌ له‌ كوردستان و فراكسیۆنه‌ كوردییه‌كان له‌ به‌غدا بۆیه‌ مامه‌ڵه‌ی له‌گه‌ڵ ده‌كرێت، باشترین چاره‌سه‌ر بۆ ئه‌م قۆناغه‌ رێكه‌وتنه‌ له‌گه‌ڵ پارتی، كاتیخۆشی كه‌ ره‌وانشاد رێكه‌وتنی سترتیژی كرد له‌گه‌ڵ پارتی ئه‌و باش تێگه‌یشتبوو له‌ بابه‌ته‌كه‌ بۆیه‌ كردی.

ئه‌وه‌ی ده‌وترێت ته‌نها دروشم و هوتافاتی بریقه‌درای سواوه‌ 
مه‌نسوڕ حاجی عه‌لیش نوسویه‌تی:" له‌ پێش 16ی ئۆكتۆبه‌ریشه‌وه‌ سه‌ركردایه‌تی سیاسی كورد هیچ رۆڵێكی نه‌بووه‌ بۆ ئاساییكردنه‌وه‌ی و پێكه‌وه‌ژیان و خزمه‌تكردنی شاره‌كه‌، ته‌نها ململانێی حزبی نه‌بێت، به‌ڵێ ده‌ركه‌وت ئه‌مشاره‌یان بۆ كێڵگه‌ نه‌وتییه‌كان و ئیستیسماركردنی سه‌رمایه‌كانیانه‌، ئه‌وه‌یش ده‌وترێت ته‌نها دروشم و هوتافاتی بریقه‌درای سواوه‌ كه‌ ساڵانێكه‌ ژه‌نگ گرتوویه‌تی.

بازرگانی له‌م شاره‌ نه‌ما بۆ كورد
روبار زه‌نگنه‌ش به‌ دێڕێك نوسیویه‌تی " له‌ دوای شانزه‌ی ئۆكتۆبه‌ر بازرگانی له‌م شاره‌ نه‌ما بۆ كورد، بۆیه‌ چیتر خاك و خۆڵیان لا گرنگ نییه‌".

‌ 117 جار بینراوه‌
12/8/2018 11:33:48 PM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved