»  راپۆرت
كێشه‌ی خراپی كاره‌با له‌ به‌شێك له‌ گه‌ڕه‌كه‌كانی شاری كه‌ركوك هاوڵاتیان نیگه‌ران ده‌كات
ئا / هاوار ستار

بوونی په‌ستانی سه‌ر كاره‌بای نیشتیمانی و هه‌ڵدانه‌وه‌ یاخود پچڕانی له‌دوای یه‌كی ته‌زوی كاره‌با له‌ هه‌ندێك گه‌ڕه‌كی شاری كه‌ركوك مایه‌ی نیگه‌رانی هاوڵاتیانه‌ و له‌ هه‌ندێك شوێن هاوڵاتیان وه‌كو هه‌ڵدانه‌وه‌ی جۆزه‌ی مۆلیده‌ ئه‌هلیه‌كان ده‌چن سێكتی مه‌حاویله‌كانی كاره‌بای نیشتیمانی هه‌ڵده‌ده‌نه‌وه‌ ئه‌وه‌ش به‌هۆی ئه‌وه‌ی په‌ستانێكی زۆر له‌سه‌ر مه‌حاویله‌كانه‌وه‌ و كاره‌باكه‌ی هه‌ڵیده‌داته‌وه‌

سیروان گۆران هاوڵاتیه‌كی دانیشتوی ره‌حیماوایه‌ نزیك فلكه‌ی ئیخوان و گه‌ڕه‌كه‌كه‌ی ئه‌وان به‌ده‌ست كێشه‌ی پچڕانی به‌رده‌وامی ته‌زووی كاره‌باوه‌ ده‌ناڵێنێ، ئه‌و هاوڵاتیه‌ بۆ هه‌واڵ وتی: "كۆڵانی ئێمه‌ و چه‌ندین ماڵی تر له‌سه‌ر یه‌ك محاویله‌یه‌ كه‌ پێشتر ئه‌م محاویله‌یه‌ دانراوه‌ بۆ نمونه‌ توانای پێدانی كاره‌بای هه‌بووه‌ بۆ 200 ماڵ به‌ڵام له‌ ئێستادا زیاتر له‌ 1000 ماڵی له‌سه‌ره‌وه‌ و توانای پێدانی كاره‌بای به‌و هه‌مو ماڵه‌ نییه‌".

ئه‌و هاوڵاتیه‌ رونیكرده‌وه‌: "پێشتر وه‌ك سێكتی مۆلیده‌ محاویله‌كه‌ هه‌ڵیده‌داوه‌ و ده‌بوو بچین هه‌ڵیده‌ینه‌وه‌ یانیش چاوه‌ڕێ بكه‌ین لۆد و قورسایی له‌سه‌ر نه‌مێنێ به‌ڵام له‌ ئێستادا چاره‌سه‌ری لاوه‌كی بۆ دانراوه‌ و ئه‌مه‌ش دیسانه‌وه‌ كێشه‌یه‌كی گه‌وره‌یه‌ بۆ دانیشتوانی ئه‌و كۆڵانانه‌ی له‌سه‌ر ئه‌و محه‌ویله‌ی كاره‌بایه‌ن".

هه‌روه‌ها وتی: "له‌ ئێستادا دابه‌شكردنی كاره‌بای سه‌ر ئه‌و محه‌ویله‌یه‌ كراوه‌ به‌ دوو به‌شه‌ و به‌ هه‌ندێك ماڵ كاره‌با ده‌دات و دوای بڕینی ئه‌و به‌شه‌ به‌ به‌شه‌كه‌ی تری ده‌ده‌ن ئه‌مه‌ش وایكردوه‌ به‌شه‌ كاره‌بای نیشتیمانی بۆ نیو و بگره‌ كه‌متریش كه‌م ببێته‌وه‌ و جاری وا هه‌بووه‌ كاتژمێرێك كاره‌بای نیشتیمانی نه‌بووه‌ و به‌گشتی كێشه‌كه‌ وه‌ڕسی كردوین".

سه‌باره‌ت به‌ گه‌یاندنی ده‌نگیان به‌ لایه‌نه‌ په‌یوه‌ندیداره‌كان و به‌ڕێوه‌به‌رایه‌تی كاره‌با به‌ تایبه‌ت، سیروان وتی: "ئێمه‌ چه‌ندین جار ئه‌و كێشه‌یه‌مان باس كردوه‌ و به‌رز كردوه‌ته‌وه‌، به‌ڵام به‌ گشتی كاره‌بای شاره‌كه‌ لۆدی له‌سه‌ره‌ و ده‌بێت چاره‌سه‌ر بكرێت و بۆ ئه‌و بابه‌ته‌ی ئێمه‌ش داوای ره‌زامه‌ندی له‌ به‌غدا كراوه‌ و نوسراو به‌رزكراوه‌ته‌وه‌ كه‌ ده‌بێت ئه‌و وێستگانه‌ و محاویلانه‌ی كێشه‌یان هه‌یه‌ تێربكرێن تا كاره‌با به‌باشی بده‌ن".

ئه‌و هاوڵاتیه‌ ئه‌وه‌شی خسته‌ڕوو: "له‌ هه‌ندێك گه‌ڕه‌كی كه‌ركوك ماوه‌ی 14 سه‌عات كاره‌بای نیشتیمانی هه‌یه‌ و بێ كێشه‌یه‌ و وه‌ك لایه‌نه‌په‌یوه‌ندیداره‌كانیش ده‌ڵێن ئه‌و گه‌ڕه‌كانه‌ خه‌سخه‌سه‌ی كاره‌بایان بۆ كراوه‌ و هه‌مو ئامێری پێوانه‌ی كاره‌بایان بۆ دانراوه‌، جا بۆ سه‌رجه‌م گه‌ڕه‌كه‌كان وه‌ك یه‌ك دانرێت ئه‌وا ئێمه‌ش پێمان خۆشه‌".

فوئاد ئه‌حمه‌د خاوه‌نی چه‌ند موه‌لیده‌یه‌ك له‌ شاری كه‌ركوك بۆ (هه‌وال)َ ڕونیكرده‌وه‌: "كێشه‌ی كاره‌بای نیشتیمانی له‌ گه‌ڕه‌كێكه‌وه‌ بۆ گه‌ڕه‌كێ تر جیاوازه‌ و گه‌ڕه‌ك هه‌یه‌ زیاتر له‌ 10 كاتژمێر كاره‌بای نیشتیمانی هه‌یه‌ و گه‌ڕه‌كیش هه‌یه‌ كه‌متر له‌ 5 كاتژمێر".

ئه‌و خاوه‌ن موه‌لیده‌یه‌ وتیشی: "كێشه‌ی جیاوازی پێدانی كاره‌بای گه‌ڕه‌كه‌كان و لۆدی سه‌ر كاره‌بای نیشتیمانی پچڕانی ته‌زووی كاره‌با به‌بێ به‌رنامه‌ كێشه‌ی بۆ خاوه‌ن موه‌لیده‌كانیش دروست كردوه‌ و ئێمه‌ش به‌پێی پێویست حه‌قه‌كانمان وه‌رناگرین له‌ پێدانی كاره‌با به‌ هاوڵاتیان".

هه‌روه‌ها وتی: "زۆر جار كێشه‌ی پێدانی به‌شه‌ گازمان هه‌یه‌ و له‌گه‌ڵ دیاریكردنی نرخی ئه‌مپێر هه‌ر مانگه‌ و به‌شێوه‌یه‌ك كه‌ به‌ڕاستی ئه‌وه‌ش ئه‌ركه‌ بۆ ئێمه‌ و تا توانیبێتمان كاتی بڕانی ته‌زوی نیشتیمانی كه‌موكوڕیه‌كانمان پڕ كردوه‌ته‌وه‌".

قه‌یس ره‌زوانی به‌ڕێوبه‌ری راگه‌یاندنی به‌ڕێوبه‌رایه‌تی دابه‌شكردنی كاره‌بای كه‌ركوك بۆ هه‌واڵ وتی: "زیادبوونی به‌كارهێنانی وزه‌ی كاره‌با له‌م وه‌رزه‌دا و نه‌بوونی خه‌سخه‌سه‌ی كاره‌با له‌ هه‌مو ماڵێك بێگومان كێشه‌ی كاره‌با دروست ده‌كات و ئه‌و بڕه‌ كاره‌بایه‌ی له‌ هه‌ندێ ناوچه‌ی شاره‌كه‌ هه‌یه‌ په‌ستانی زۆر زیاتری له‌سه‌ره‌ له‌و بڕه‌ی وێستگه‌كه‌ دابینی ده‌كات كه‌ ئه‌مه‌ش ده‌بێته‌ هۆی زیادبوونی بچڕانی ته‌زوی كاره‌با له‌و ناوچانه‌".

ره‌زوانی باسی له‌وه‌شكرد: "ئاگادارین چه‌ند گه‌ڕه‌كێكی شار به‌ تایبه‌تی (ره‌حیماوه‌، ئیخوان، روناكی، عروبه‌ و واستی یه‌ك) لۆدێكی زۆر زۆریان له‌سه‌ره‌ و چاره‌سه‌ری خێراش له‌م كاته‌دا ته‌نها هه‌ڵمه‌تی هۆشیار كردنه‌وه‌ی هاوڵاتیانه‌ له‌ روی به‌كارهێنانی و به‌هه‌ده‌ردانی كاره‌بای زیاده‌وه‌ چونكه‌ به‌ڕاستی هاوڵاتیش به‌شێوه‌یه‌كی به‌رچاو كاره‌با به‌كاردێنن و گوێ به‌ كوژاندنه‌وه‌ی ئامێری زیاده‌ ناده‌ن".

هه‌روه‌ها وتیشی: "له‌ ئێستادا سه‌رجه‌م كێشه‌كان به‌رز كراونه‌ته‌وه‌ و به‌غدای لێ ئاگاداركراوه‌ته‌وه‌ و چاره‌سه‌ر بۆ ئه‌وانه‌ش رێكخستنه‌وه‌ی كاره‌بای سه‌رجه‌م پارێزگای كه‌ركوكه‌ به‌ زیادكردنی كه‌یڤی وێستگه‌ سه‌ره‌كیه‌كان و دانانی ئامێری پێوانی كاره‌با و هه‌ڵگرتنی زیاده‌ڕه‌وی سه‌ر محاویله‌ و ستونه‌كان".

‌ 363 جار بینراوه‌
1/19/2019 12:44:10 AM
Print Friendly and PDF
بابەتی زیاتر ...
شوان داودی - گۆشەی لەژێر چاویلكەوە
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved