»  بینین
ته‌له‌فزیۆن یان وه‌زاره‌تی كاروباری كۆمه‌ڵایه‌تی
دلسۆز حه‌مه‌

ئه‌وه‌ی له‌م كۆمه‌ڵگایه‌ی ئێمه‌دا ده‌گوزه‌رێت ،زه‌حمه‌ته‌ له‌ ژیانی هنده‌ سوره‌كانی ئه‌مه‌ریكاشدا ڕوبدات ، مه‌به‌ستم هنده‌ سوره‌كانوه‌كو ئیشاره‌تێك بۆ كۆمه‌ڵگایه‌كی پریماتیڤ ، كۆمه‌ڵگایه‌ك كه‌ ئه‌مه‌ریكایان به‌ پانوپۆڕی به‌ده‌سته‌وه‌ بوو به‌ڵام هه‌ر له‌ ژیانی سروشت و هه‌لومه‌رجێكی زۆر سه‌ره‌تایی بۆ ژیان زیاتر هیچی شتێكیان نه‌بوو بۆ ژیان،چه‌ند ده‌سته‌یه‌كی موهاجیر له‌ ئینگلاند و ووڵاتانی ئه‌مبه‌ری ئاو توانیان ئه‌و وولاته‌ بكه‌ن به‌م ئه‌مه‌ریكایه‌ی ئه‌مڕۆ سه‌رداری جیهانه‌!

ڕه‌نگه‌ هیچ قسه‌یه‌كی كارل ماركس هێنده‌ی ئه‌و وته‌یه‌ گرنگ و قوڵ نیه‌ كه‌ ده‌ڵێت :مرۆڤ به‌نرخترین سه‌رمایه‌یه‌.

ئاخر دواجار مرۆڤ بۆ خۆی بكه‌ری گه‌وره‌یه‌ له‌ بیناكردنی به‌دبه‌ختی یان خۆشبه‌ختی ،وێران كردن یان ئاوه‌دانی ، هیج شتێك له‌ده‌ره‌وه‌ی مرۆڤ ناتوانێت مانادار وبه‌رهه‌مهێن بێت ، ئه‌وه‌ مرۆڤه‌ كه‌ سه‌رچاوه‌ی هه‌موو ئه‌و پێدراوانه‌یه‌ كه‌ ده‌یبه‌خشێت به‌ ژیان ده‌شێت ، به‌رهه‌مێكی ژیان به‌خش و مرۆڤ دۆستانه‌ بێت ، ده‌شێت به‌رهه‌مێكی وێرانه‌كار و پڕ زیان و نامرۆڤانه‌ بێت ، هه‌ربۆیه‌ بنیناكردنی مرۆڤ سه‌ره‌تای بیناكردنی كۆمه‌ڵگای نوێیه‌ . بیناكردنی مرۆب ڕیشه‌ی بیناكردنی قۆناغێكی تازه‌یه‌ له‌ سه‌رده‌می گۆڕانه‌ گه‌وره‌كاندا ، ناتوانین بیر له‌ بیناكردنی كۆمه‌ڵگایه‌كی نوێ بكه‌ینه‌وه‌ ئه‌گه‌ر پێش ده‌ست دانه‌ بیناكردنه‌وه‌ی وێرانه‌كانی جه‌نگ بیرنه‌كه‌ینه‌وه‌ له‌ بیناكردنه‌وه‌ی ڕۆحه‌ وێرانه‌كانی جه‌نگ ، له‌ بیناكردنه‌وه‌ی مرۆڤێكی نوێ سه‌رله‌نوێ.

كابینه‌ پێكده‌هێنرێت یان پێكنایه‌ت ، هێزه‌كان ڕێكده‌كه‌ون یان نا ، شه‌ڕهه‌ڵده‌گیرسێت یان هه‌رێمه‌كان ده‌سوتێن ، هه‌فتا وهه‌شتا ده‌بنه‌ یه‌ك یان زیاتر داده‌بڕێن ، ئه‌مانه‌ وهه‌موو ئه‌و كه‌موكورتی وناشرینیانه‌ی له‌ ژیانی گشتیدا هه‌مانه‌ په‌یوه‌ستن به‌ پێكهاته‌ی مرۆڤه‌كانمانه‌وه‌ ، په‌یوه‌ستن به‌و كه‌لتوره‌ په‌روه‌رده‌یی وكۆمه‌ڵایه‌تیه‌ دورودرێژه‌ی كه‌ ئه‌م مرۆڤه‌ كه‌لله‌ڕه‌ق و فه‌نه‌تیك و بێ ڕو‌ویا و دڵڕه‌قه‌ی به‌رهه‌م هێناوه‌ ، ئه‌م مرۆڤه‌ی كه‌ هه‌موو بونی هه‌ڵكساوه‌ له‌ گه‌مژه‌یی وتوندوتیژی و فه‌وزا ، ئه‌م مرۆڤه‌ی كه‌ هیچ گیانی پێكه‌وه‌یی و سۆلیدارێتی و په‌یوه‌ستبونی له‌ده‌ستداوه‌ ئه‌مه‌ش مه‌ترسیدارترین قۆناغی داماڵینی مرۆڤه‌ له‌ مرۆڤبونی خۆی و كاركردنی وه‌كو بونه‌وه‌رێكی كۆمه‌ڵایه‌تی خاوه‌ن ژیری وئه‌خلاق .

هیچ ئومێدێك به‌ داهاتوی سیاسی وئابوری نیه‌ ئه‌گه‌ر ئه‌م دۆخه‌ كۆمه‌ڵایه‌تیه‌ له‌م ڕۆچونه‌ ئه‌خلاقی وئینسانیه‌ی ئێستا به‌رده‌وام بێت ، به‌هه‌موو نادادوه‌ری و گه‌نده‌ڵی ودزی وفه‌رهودكاری ده‌سه‌لاتی كوردیه‌وه‌ ،هیچ قۆناغێك ئینسانی كورد هێنده‌ی ئێستا ئازاد نه‌بوه‌(به‌روارد به‌ ڕابوردوو)!كورد ئه‌م چاره‌كه‌ سه‌ده‌ی ژێرده‌سه‌لاتی كوردی لێده‌رچێت هه‌میشه‌ له‌ ژێر سسته‌م و ترس وتۆقان و ئیرهابێكی به‌رده‌وامدا ژیاوه‌ ، هه‌میشه‌ شاره‌كان زیندانێكی گه‌وره‌بون كه‌ به‌رده‌وام ترس وخوێنڕشتن وپۆستاڵی هێزه‌داگیركه‌ره‌كان به‌سه‌ر كه‌رامه‌ت وژیانه‌وه‌ ده‌هاتن ،،هیچ قۆناغێك ئینسانی كورد هێنده‌ی ئێستا دۆخی ئابوری باش نه‌بوه‌ وخاوه‌نی ده‌نگ وڕه‌نگ وگیرفان و خاك وزه‌وی خۆی نه‌بوه‌ ، به‌لام هیچ كاتێك وه‌كو ئێستا كۆمه‌ڵگای كوردی ، كۆمه‌ڵگایه‌كی ناشرین ودڵڕه‌ق وپه‌رته‌وازه‌ و

بێ پره‌نسیب نه‌بوه‌ ،هیچ كاتێك هێنده‌ی ئه‌م ساته‌وه‌خته‌ دڵڕه‌قی وتوندوتیژی وخوێنڕشت و ڕق وكینه‌ وبێ متمانه‌یی و یه‌كتر شكاندن نه‌بۆتو كارێكی ئاسایی!

 ڕۆژانه‌ هه‌واڵی فڕێدانی منداڵی ساوا ، ئازار وئه‌شكه‌نجه‌دان وتاڕاده‌ی كوشتن و سوتانی ژن ومنداڵ به‌ده‌ستی خێزان ، كوشتنی براكان له‌ ناویه‌كدا ، كوشتنی كوڕ وباوك ، كوشتنی ده‌یان كه‌س له‌سه‌ر سه‌رچۆپی وله‌سه‌ر كۆتر وله‌سه‌ر ته‌له‌فۆنێكی مۆبایل!، ئه‌وه‌ كوشتنی ژنان وپیاوان وفڕێدانی ته‌رمی نه‌ناسراو ئاسایی بۆته‌وه‌ ، هه‌واڵه‌كانی توندوتیژی خێزانی و ئه‌وه‌ی له‌م پانتاییه‌دا ده‌گوزه‌رێت ئاماژه‌یه‌كی مه‌ترسیداره‌ بۆ لێژبونه‌وه‌ی ئه‌خلاقی كۆمه‌ڵایه‌تی و نه‌خۆشكه‌وتنی جه‌سته‌ی كۆمه‌ڵگا!

هه‌ر به‌ڕاستی ئێمه‌ له‌به‌رده‌م كۆمه‌ڵگایه‌كداین كه‌ ته‌واو نه‌خۆش وبیمار وپه‌ككه‌وته‌یه‌ ، كۆمه‌ڵگایه‌كی بێ شكۆ ، نه‌زانی و جه‌هل وگه‌مژه‌یی پرزه‌ی بڕیوه‌ ، دڵڕه‌قی و خۆپه‌رستی و بێباكی وبێ ئاگایی پڕی كردوه‌ له‌ تاوان ، له‌به‌رده‌م كۆمه‌ڵگایه‌كین كه‌ خه‌ریكه‌ ناوكۆییه‌كی ئه‌خلاقی وئینسانی وكۆمه‌ڵایه‌تی به‌ته‌واوی ده‌گۆڕێت بۆ تاوان و دڵڕه‌قی و یه‌كتر شكاندان ، له‌به‌رده‌م جڤاتێكین كه‌ لێوانلێوبوه‌ له‌ تاوان و خۆشكاندن و دۆرانی ئه‌خلاقی!

نازانم وه‌زیری كاروباری كۆمه‌ڵایه‌تی ئه‌و هه‌موو ئیمتیاز وموچه‌ زۆره‌ له‌ به‌رانبه‌ر چیدا وه‌رده‌گرێت ووه‌ریگرتوه‌ له‌ كاتێدا هه‌رچی ئازار ومه‌ینه‌تی و تاوان وده‌رده‌كانمانه‌ وه‌كو جلی پیس له‌سه‌ر ته‌له‌فزیۆنه‌ كانه‌ ؟؟ ته‌له‌فزیۆنه‌كان به‌ ڕۆڵی وه‌زرانی كاروباری كۆمه‌ڵایه‌تی هه‌ڵده‌ستن به‌لام به‌به‌رچاوی دنیاوه‌ ، بێ هیچ پره‌نسیبێكی ئه‌خلاقی و میهه‌نی وئینسانی ، ئاخر كێشه‌ كۆمه‌لایه‌تیه‌كان ، هه‌ژاری و نه‌داری و توندوتیژی خێزانی وچیرۆكه‌كانی كوشتن وكێشه‌ كۆمه‌ڵایه‌تیه‌كان ،به‌ده‌یان فلته‌ری ئه‌كادیمی وسایكۆلۆژی و یاساییدا تێده‌په‌ڕێت ئینجا له‌ ته‌له‌فزیۆنه‌كانه‌وه‌ ده‌كرێت باس بكرێن وچاره‌سه‌ر بكرێن به‌لام له‌ غیابی وه‌زاره‌تی كاروباری كۆمه‌ڵایه‌تی ته‌له‌فزیۆنه‌كان ده‌چنه‌ ناو ماڵی خه‌ڵك ژێر جێگای خه‌ڵك وسه‌رسیسه‌م وژووری نوستن وكونی كونی ژوره‌وه‌ی ماڵه‌كان و كه‌رامه‌ت بۆ قوربانیه‌كان ناهێڵنه‌وه‌!

كه‌ جه‌سته‌كان نه‌خۆش بوو هه‌رجی به‌رگێك بپۆشێت هه‌رنه‌خۆشه‌! كێشه‌كانی ئێمه‌ ئه‌م هیزه‌ سیاسیانه‌ نین كه‌ هه‌ن چونكه‌ هه‌رهه‌موو هیزه‌كانی كوردستان خه‌یاڵی گۆڕینی كۆمه‌ڵگا وبیناكردنی ئینسانیان له‌ خه‌یاڵی سیاسیدا نیه‌ ، بۆیه‌ كابینه‌كان دێن وده‌چن ، هێزه‌كان یه‌كتر هه‌ڵده‌گرنه‌وه‌ وله‌ ده‌سكه‌وت وپێگه‌و ده‌سه‌لاتیان كه‌م نابێته‌وه‌ به‌ڵام ئه‌وه‌ی ڕۆژ له‌دوای ڕۆژ مه‌ترسیدارتر ده‌بێت جه‌سته‌ی كۆمه‌ڵگایه‌ كه‌ له‌ داڕوخان و په‌رته‌وازه‌بونێكی به‌رده‌وامدایه‌و چاوه‌ڕوانیش ده‌كه‌م ڕێزژه‌ی تاوان وتوندوتیژی ودڵڕه‌قی له‌داهاتودا جێكه‌وته‌ی ئابوری وسیاسی و كۆمه‌ڵایه‌تی مه‌ترسیدارتری لێبكه‌وێته‌وه‌!

‌ 254 جار بینراوه‌
1/26/2019 10:05:28 PM
Print Friendly and PDF
بابەتی زیاتر ...
123
شوان داودی - له‌ژێر چاویلكه‌وه‌
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
دلسۆز حه‌مه‌
؟؟؟؟؟؟؟؟؟؟؟؟؟؟؟؟؟؟؟؟
راپرسی
?? ?????????? ??????? ???? ?? ??? ???? ??????

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved