»  باران
ژنی كورد لە مێبوون بێ بەشە
ن: نارین ئۆجی / رۆژاڤا


"سەرەتا ئازادیم وەردەگرم و دواتر مێینە بوونی منتان لە سەركەلەوە بۆ دەردەكەوێت" 

ژنی كورد بە تەنها لە مافەكانی خۆی بێبەش نییە هاوشێوەی هاوسەرو دەستەبرایانی تری، بەڵكو تەنانەت لە مافی مێبوونیش بێ بەشكراوە..!! 
ئەم دەستەواژەیە رایگرتم و وای لێكردم بیربكەمەوەو بە قووڵایی تیروانینم هەبێت بۆ ئەوەی كە (ژنانی كورد لە مێبوونیش بێبەشن)، بیرم دەكردەوە.. ئێمەی ژنانی كورد.. بۆ وامان پێ بوترێت؟! ئەی چۆن ئەوەی پێمان بوترێت دەتوانن بە باڵامانی ببڕن.. ئەی لە چیمان كەمە؟ ئایا ئێمە لە ژنانی تری ئەم جیهانە بەدەرین و هاوشێوەیان نین؟! 
دواجار هەندێك وەڵامم دۆزییەوە سەبارەت بەو پرسیارە زۆرانەی كە لە خۆمم دەكرد دەربارەی ژنانی كورد، لە دەمەو بەیانیەكی وەرزی گەڵارێزاندابوو، بە تەنیشتی دایكێك و كچەكەیدا تێدەپەڕیم و بینیم قوڕ دەگرنەوە بۆ سواخی خانووەكەیان، كچەكە بە جەستەیەكی لاوازی نەخۆشەوە بە خاكەنازەكەی دەستی قوڕەكەی كۆدەكردەوەو لە شەرمانا روخساری خۆی لە هامشۆكەران دەشاردەوە، دایكەكەش بەدوو پێیان قوڕە خەستەكەی دەشێلا.. لێیان نزیك بوومەوە گوێم لە هەناسەبركێی ماندووییان دەبوو. 
هیچ دەرفەتێكی ئەوتۆیان بۆ نەماوە.. زستان رووی تێكردوون و ئەو ماڵە هیچ نێرینەیەكی تێدا نابینرێت، نە باوك و نە برا.. خانووەكەش پێویستی بە نۆژەنكردنەوەیەو هاوبار چونكە هەموو خانووەكانی دەوروبەری بە كۆنكرێت دروستكراون خانووەكەش جۆرێك لە شەرمنی بە رووخساریەوە دیاربوو كە تەنهاو تەنها خۆی لە قوڕ دروستكرابوو. 
ئەو دەستانەی وەك خوێن سور هەڵگەڕاون و ئەو پشتەی وەك كەوانە چەماوەتەوە، ئەو دڵەی لە چاوەڕوانی گەڕانەوەی ئازیزاندا لێوانلێوە لە خەمۆكی و ئازارو نیگەرانی.. ئایا مێبوون لێرەدا شوێنی خۆی دەگرێتەوە؟ نەخێر .. هەرگیز نا!!
ئیتر ئەو ژنانە چۆن دەتوانن مێبوونیان لێ داچۆرێتە دیدی ئەوان كە هەمیشە ئێشكچی كارو ماندووی دیداری ئازیزانن، ئەوان نەشوێنێك بۆ سۆز و نەكاتێك بۆ رۆمانسیەت نادۆزنەوە.
هەر بە تەنها سروشتی دڵرەقی زستانەی دوورودرێژ نییە كە ژنانی كورد لە مێبوون دادەبڕێت، زۆربەی ژنانی خاكەكەم چێڵ بەخێو دەكەن و ماڵداری دەكەن، هەمیشە بۆنی مەڕو ماڵاتییان لێ دێت بەو پلەیەی نووساوە بە جەستەیان و لێیان نابێتەوە، یان لە مەزراو كێڵگەكان كار دەكەن، لە هەموو كاتێكدا ژنێك دەبینی جلەكەی لە ناوقەدی ئاڵاندووەو بەسەر زەویدا دەگەڕێت و ئارەقەی ماندوویی دەرێژێت... ئینجا تا ئێرە ئاساییە. 
بەڵام ئەمڕۆ.. لە سایەی جەنگی دڕندانەی ناسنامەو مان و نەمانەوە كە رووی تێكردووین، ژنانی كورد بوونەتە شێرەژنی دڕندەو هاوشانی شێرە پیاوان دەچنە مەیدانەكانی جەنگ، ئێستا بۆنی پیرۆزترین ئارەقەیان لێدێت، ئارەقەی بەرگری لە خاك و نیشتمان، بەرگری شان بەشانی براو باوك و خۆشەویست و دایك و خوشك و هاوەڵانی تافی منداڵی.. كام جۆر مێبوونتان لە ژنانمان دەوێ گەورەم..؟! 
ئایا هەندێك لە ئێمە كە تەرمی شەهیدانمان یان پارچەیەك لەو تەرمە سوتاوانە و هەندێك جاریش تەنانەت ناویان بە بێ سەروشوێنی دێتەوەو هەڵهەڵە لێدەدەین و داتر دەیكەین بە شایی لۆغان، ئەوسا با زەوی توانای خۆی تاقی بكاتەوەو بەرگەی رشتنی تنۆكەیەك فرمێسكی مێینە بگرێت. 
بەڵی ئەوە ژنی كوردە مێبوونی خۆی لەدەستداوە، بەلام هەموو ژانەكانی ژیانی بردۆتەوە، ئەو ئازارو هاوارانەی دەیكات بە ئایكۆنێك و ئەفسانەیەك و فەنەرێك بۆ شۆڕش.
ئێستا باسی ونبوونی مێینەیی مەكەن لە كۆمەڵگەیەكی گەندەڵی و پیاوسالاری چاوبرسی و لە دۆخێكی ناهەمواری لێوانلێو لە دڵرەقی، ئەو كە جەنگێك بە هەزار جەنگ بەرێدەخات باسی مێینەبوونی لەكوێ دەكرێت؟ ژنی كورد هەمیشە دەنگ هەڵدەبرێت و خەبات لە رێگەی سەربەخۆیی دەكات.. سەرەتا ئازادیم وەردەگرم و دواتر مێینە بوونی منتان لە سەركەلەوە بۆ دەردەكەوێت. 






‌ 121 جار بینراوه‌
1/27/2019 2:20:10 PM
Print Friendly and PDF
بابەتی زیاتر ...
شوان داودی - له‌ژێر چاویلكه‌وه‌
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
دلسۆز حه‌مه‌
؟؟؟؟؟؟؟؟؟؟؟؟؟؟؟؟؟؟؟؟
راپرسی
پێت وایە دۆخی ئێستای كوردستان بەچی چارەسەر ئەبێت؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved