»  پەڕەموچ
تەنیایی .. خۆشەویستی تاك و تەرا
ن: سعاد الجزائری


و: عەبدولڕەحیم سەرەڕۆ 
هەموومان لە زاراوەی تەنیایی دەترسین، كە بە شێوەیەكی بەكاوەخۆ بەرەو تەنیاییەكمان دەبات و بە فێیەكی كوشندەوە دەكەوینە ژێر تیغە تیژەكەی، یان دەیكەین بە زەریاچەیەكی مەنگ و بە پەنجەكانمان دەیجووڵێنینەوە كە قسە وقسەلۆك و ئاماژەكانی تووڕەییە كەڵەكەبووەكان تەواو كەنفتی كروون. یان كە بۆشایی دەبێتە كۆتوبەندو بێدەنگی گۆشە كراوەكان...
لە قووڵایی زەریاچەی تەنیاییدا ئەو نهێنیانە دەشارینەوە كە خۆشمان دەوێت و نیگەرانین بەوەی كەسێكی تر پەی پێ ببات، لەوێ‌ پیتەكانی خامۆشی بە بێدەنگی و تەنیایی مەلە دەكەن، وەك ماسییەك بەرزبێتەوە بۆ سەر رووپایی ئاوو دوبارە رۆدەچێتەوە قووڵایی بۆ دۆزینەوەی گەوهەری خود. 
بۆ لەتەنیایی دەترسین و بە خەمگینیەكی تەنكەوە باسی دەكەین، ئەوسا فرمێسك لە دیدەماندا دەبێتە مرواری و جگە لە دەنگی خۆمان لەماڵەكەمان گوێمان لە هیچ دەنگێكی تر نابێت، ئایا مرۆڤ رقی لە دەنگی خۆی.. یان لە دەنگی تەنیایی دەبێتەوە؟! ئێستا ئەو دەنگەم خۆشدەوێ و لە رووبەرە بەرفراوانەكانی نیشتەجێ دەبم، وەك پەڕێكی باڵندە لە ئاسمانەكەیدا مەلەدەكەم و نامەوێت لەسەر زەوییەكەی بنیشمەوە.. 
ستارگەی تەنیایی هێندەی هەموو گەردوون بەرفراوان دەبێتەوەو بەرەو بۆشاییەكانی ئاسمان رادەكشێت، تەنیایی جمكانەی ئازادیی خودیییە، چونكە لەگەڵیا.. دەبیت بە پاشاو سەرداری دەوروبەرەكەت، ئیتر هیچ كەسێك یاسایەكی رۆژانەت بەسەردا ناسەپێنێت. وەك ئەوەی لە كاتێكی دیاریكراودا چاو بكەیتەوە، یان گوێت لە دەنگێكی تر بێت داواكاری خۆی هەیەو لەو رۆژەدا لەگەڵ ویست و هەستی تۆ ناگونجێت، یان روو لە رۆتینێك دەكەیت و دەتەوێت لێی یاخی بیت، یان دەتەوێت بەگی سەرشێتی بپۆشیت و بەدرێژایی ئەو رۆژەت بە سەرەڕۆیی بژیت، یان دەتەوێت بە شێوەیەكی بێزاركەر كەسێكی ئاسایی بیت، وەك تاخمی جلێكی فەرمی هیچ لۆچێكی تێدا نەبێت، یان لەسەر مێزی خوانێكدا ئارەزووی شكاندنی هەموو سیستمە پرۆتۆكۆلییەكان بكەیت و دوا بڕیار بدەیت ئیتر دەم بەهیچەوە نەنێیت، ئینجا هەست بە ئۆخژنێكی سەیر دەكەیت چونكە خانەی بیماری هیچ لایەنگرێكی نییە. 
تەنیایی زاراوەیەكە خەریكە عاشقی دەبم، چونكە دۆزینەوەیەكی درەنگەساتە كە چی تینم نەماوە تا پێكهاتەكانی و پارچە كریستالییە بریسكەدارەكانی بناسمەوە، كە بەسەر پەنجەرەی ژوورەكەمدا رەنگدەداتەوەو بە پرشنگە رەنگینەكانی ژیانم رووناكدەكاتەوە كە پێشتر هەرگیز نەمبینیوە.
لە سایەی جیهانی تەنیاییداو لە سنووری خودی بە شێوەیەكی رەهاو لە جیهانی دەرەكیش بە شێوەیەكی رێژەیی، چونكە رێژە لێرەدا بەپێی رادەی تێگەیشتنت لەو تەنیاییە دەكەوێتە نێوان هەڵبەزو دابەزەكان و رێگە بە كەسێكی تر نادەیت جا هەرچییەك بێت سنووری جیهانی تەنیایی ئازاد و رەهات ببەزێنێت. 
لەسایەی ئەو ئەگەرانەدا دەتوانیت بەپێی ئەوەی ئارەزووی دەكەیت نەخشەرێی ژیانت بكێشیت نەك بەو پێیەی كە كەسێكی تر دەیەوێت یان ناچارت دەكات بە راییكردنەكانی، دواجار پۆشاكێكت بەباڵادەبڕن كە بۆت ناشێت یان سەرلەبەری جەستەت رەتی دەكاتەوە.
تەنیایی رووبەرێكی بەرفراوانە رەنگە هەر زەویەكی بەیارو وشك و برینگ بێت، بەڵام گەر بتەوێت دەتوانیت تۆوی خواست و ئارەزووەكانتی بەسەردا پەخشبكەیت و كۆمەڵە كێڵگەیەكی پڕ لە گوڵ و بەرهەمی جوانی لێ بخوڵقێنیت. تەنانەت كەسێك شك نەبەیت ئەو بەرهەمانەی بەدڵ بێت. 
رەنگە لە باسكردن و ماهییەتی ئەم زاراوەیە ناكۆك بین، بەڵام بە دڵنیاییەوە تەبا دەبین سەبارەت بە چۆنیەتی گوزەران لەو جیهانی تەنیاییەداو یەكدەگرینەوە، هەر یەك لە ئێمە لە بونیادنانی ئەو جیهانی تەنیاییە شێوازی تایبەت بە خۆی هەیەو لەگەڵ خەلكانی تر كە دەبێت ئەوانەی خۆشمان دەوێن میوانداری ئەو مەودا بەرفراوانەی بكەین بە مانا ژیانییەكەی و بەرتەسكە لە رووی زمانەوانییەوە.
رەنگە ئەوكاتەی ئەوانی تر وەئاگابن تۆ بنوویت، ئینجا ئەوان بنوون و تۆ لەسەرەتای هەستاندا بیت، ئەوە هەڵبژاردنی رەهای خۆتە بۆساتی دەسپێك و چركەساتی بێداربوونەوە، ژیانت بەتەنها بە یاسای خۆت دەست پێ دەكات وئیتر نەمەرج و نە دانەری مەرجەكان نامێنێت. 
روبەرەكانی ژیانت بە تەنها موڵكی خۆتن، تۆش لەهەموو كەسێك زیاتر دەزانیت چۆن سوود لەو مەودایە وەربگریت كە دەكەوێتە ژێر ركێفی خۆت، رەنگە بتەوێت هاوبەشێكی بۆ بدۆزیتەوە، بەڵام ئەو ویستە بەندە بە سازكارییەكی زۆری مەودای ئازادی و كەشی دەوروبەری، مەسەلەكە لە سەرەتاوە تادواجار بەسترتوە بە ئارەزووی خۆت لەوەی دەتەوێت سازشی لێ بكەیت یان بە تەنها وەك موڵكی خۆت بیهێڵیتەوە. 
تەنیایی هەرچەندە بڕێك لە ئازادی تاكی تێدایە، بەڵام لەلایەكی ترەوە لێوانلێوە لە ویستی موڵكایەتی و تاكررەوی بەو رووبەرە كە لە رابردوودا لەگەڵ كەسێكی تر تێیدا هاوبەشبووی، بەشێك لەمافەكانت لەدەستت چوون، لە موڵكداری خودیت، لەگەڵ ئەوەش و لە كۆتاییدا هەر خۆت سەرداری جیهانی تەنیایی خۆتی، گەر بتەوێت دەبیتە خاوەنی تەواوی، گەر بتەوێت لەگەڵ كەسێكی تر كە خۆت هەڵیدەبژێریت بە ئارەزووی خۆت بەشی دەكەیت، واتا تۆ بە تەنیاییە لە رەهاترین ئازادیای، لەگەڵ تەنیاییدا دەكرێ عاشق بیت بێ ئەوەی دڵبەرێكت هەبێت، چونكە تەنیایی خۆشەویستی تاكلایەنەو كەی دووەمی تێدا نییە.

‌ 330 جار بینراوه‌
2/9/2019 5:01:31 PM
Print Friendly and PDF
بابەتی زیاتر ...
شوان داودی - گۆشەی لەژێر چاویلكەوە
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟
راپرسی
پێت وایە دۆخی ئێستای كوردستان بەچی چارەسەر ئەبێت؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved