نوێترین
100 كه‌سایه‌تی داوا ده‌كه‌ن كه‌یسی 16ی ئۆكتۆبه‌ر ببرێته‌ دادگا   |    سوپای عێراق چه‌ند شوێنه‌وارێكی كه‌ركوك ده‌كاته‌ شوێنی مانه‌وه‌ی سه‌ربازه‌كانی   |    حوكمی حه‌وت ساڵ زیندانی بۆ سێ كارمه‌ندی تاپۆ له‌ كه‌ركوك ده‌رده‌كرێت   |    (45) هه‌زار منداڵ له‌ژێر ركێفی داعش له‌دایكبوونه‌   |    یه‌كه‌مین وه‌زیری حكومه‌تی هه‌رێم له‌دوای 16ی ئۆكتۆبه‌ره‌وه‌ سه‌ردانی كه‌ركوكی كرد    |    به‌به‌شداری سلێمانی فێستیڤاڵی ڕاگه‌یاندنی كوردی له‌ سنه‌ به‌ڕێوه‌چوو   |    (45) هه‌زار منداڵ له‌ژێر ركێفی داعش له‌دایكبوونه‌   |    لیژنه‌ی كشتوكاڵ: رێگری له‌ هاورده‌كردنی ئه‌و به‌رهه‌مانه‌ ناكه‌ین كه‌ له‌ناوخۆ به‌رهه‌مناهێنرێن   |    په‌رله‌مان كار بۆ به‌رزكردنه‌وه‌ی مووچه‌ی كرێكاران ده‌كات   |    لیژنه‌ی خزمه‌تگوزاری داواده‌كات فۆرمی خۆراك نه‌مێنێت و هاوڵاتیان له‌جێی قه‌ره‌بوو بكرێنه‌وه‌   |   
كوردی  |   عربي
»  پەڕەموچ
فەیلەسوفەكەی فەرووخ...!!
كورتە چیرۆك - فەیسەڵ هەمەوەندی

باوكم لە گوێدرێژەكەی خۆی ڕانەمابوو، بەقەد ئەوەی هەڵوەستەی لەسەر ئەو قسەیەی مندا كرد، كە لە خوێندنەوەی ڕۆمانەكەی فەرووخی نیعمەتپوور دا ، من ئەوەم بە دەنگی خوێندبووەوە كە نووسیبوی " كەر تێڕامانێكی فەلسەفیانەی هەیە بۆ ژیان، ئەو زۆر لە هەڵوەستەكانیدا ڕادەمێنێت و قووڵ دەچێتەوە بیركردنەوە ". هەڵبەت.. ئەم هەراو زەنایەی من لە مێشكی باوكمدا نابوومەوە، زۆر لەوە دژوارتر بوو شرۆڤەیەك بۆ پاساو لە هزری باوكمدا هەبێت. ئەو بەو هەموو ڕابردووی سەرلێشێواوی خۆیەوە، بۆ جارێكیش بە مل قسەیەكی وادا نەتەقیبووەوە، كە خوداش پێی خۆش نەییە. چون ئەم قسە قۆڕەی من، كە باوكم بۆ خۆی وایلێكدابووەوە، ترسی بەر نەعرەتەی خودا دەكەوین و ماڵ و حاڵمان تەواو دەشێوێت و كوێرەوەر دەبین. بەم گوناهەی من كە رۆمانەكەی (فەرووخ)م  بە دەنگی خوێندبووەوە، گوناهێكی گەورەم كردوبوو، شەیتانم هێناوبووە نێو ئەم ماڵەی كە لە بابای باباكانمانەوە زاتی ئەوە نەكراوەو ناشبێ‌ بكرێت. گوناە هەر ئەوە نیە لە پەیڕەوی ئاینی ئیسلام  بە تۆزقاڵێكیش لادەین، یا پێنج فەرزە ڕوو لە خودا نەكەین بۆ خوا پەرستی، یاخود لە سێبەری ماڵە هەتیوبارێك" نەعوزو بیلا " تەماحمان بچێتە سەر نامووسیان. ئەوە گوناهێكی گەورەیە بە خۆمان ببینە شەیتان و جاڕی دژ بە خودا بدەین. من چاك نازانم تەواوی بیركردنەوەی باوكم ئەمە بوو، یا زۆر لەوەش قووڵتر ڕۆچووبوو. ئەم بیركردنەوە قووڵەی باوكم بە تێڕامانێكی فەلسەفیانە دەچوو، وەلێ‌ بە دێوێكی تری گوێدرێژەكەی فەرووخ بوو، منیشی حەوجەی شتێ‌ لە فەلسەفە كرد. ئەوەی هزری باوكمی لە مەڕ گوێدرێژەكەیەوە ئەو هەموو ساڵە ماتەڵ كردبوو، ئەوە بوو كە دەماو دەم بیستبووی " كەر هەر كەرە " هەر بە كەریش دەمێنێتەوە. منیش هام وەلای باوكمەوە لەو حەساوگەریە، دەنا كەر تەحەموولی هەموو ئەو بار گرانیەو دژواریەی ژیان و تێهەڵدانی نەدەگرت. دەشێ‌ باوكم لەو ڕامانە قووڵەی گشت ئەو ساڵانەی بەسەر نەكردبێتەوە؟ تا بزانێ‌ ئەم فەیلەسوفە داماوە بۆچی رۆژێ‌ لە رۆژان لێی هەڵنەگەڕاوەتەوە. بۆچی ملكەچی هەموو فەرمانەكانی بووە؟ بێ‌ ئەوەی یەك سكاڵای لە دەست كردبێ‌. چەنەی چەند ساڵە باوكم لەو دوعانەی كەرەكەی كڕ بووە. حەتمەن ئەویش نەبان نەبووە و بە بەر چاوی باوكمەوە ئەو دوعانەی نەكردووە. ئەو لە شولكە دارەكەی دەستی باوكم ترسابوو، بە قەد بڵاچەی بەرقێك بە جەستەیدا رۆ دەچوو . خۆ ئەگەر ئەو زوڵمە بە بیر باوكمدا بێتەوە، بێمەڵامەت نەبووە لە داركاری كردنی، هەڵبەت قسەی بابام دێنێتەوە ، كە رەزای خودای لەسەرە، ئەگەر دار نەبێت هیچ كەرێ ناچێتە ژێر بارەوە،  ملكەچی فەرمان نابێت و بار دەداتە دەم ئاوەوە. باوكم لە بابامەوە فێر ببوو باشترین كەرەیە گوێ‌ بە هیچ نادات، هەڵناتیزێنێ‌، تا داركاری بكرێت زۆر تر ملكەچ دەبێت. ئەو بە دوو گوێی درێژەوە هەست بۆ فەرمان رادەدێرێ‌، ئەوان گووتبوویان " كەر درەنگ دەچێتە ژێر باری فەرمان، وەلێ‌ هەر كە لەسەر ئەوە راهات ئێدی مێشكی نامێنێَت و دەبێتە كەرێكی چاك، چلۆنت بوێ‌ وای لێدەخوڕی. ئەم حیكایەتە زۆر كۆنە، وەلێ‌ باوكم وەك ئەوەی بۆ یەكەم جاری بێت، گوێی لەو بوونەوەرە فەلسەفیزانە بوو، كە هاتە زمان و ئێدی مل بۆ هیچ فەرمانێك كەچ ناكات. ئامادەش نییە جارێكی تر بەو كەرە ناوزەدی كەن، كە سوونبولی گێل و نەفام و هێڕ بێت. بە منداڵی سوێمان دەبوەوە تا سواری پشتی كەرەكە بین. ئێمەش لە باوكمانەوە فێربووین لیس لەسەر پشتی راست كەینەوە، نەك بۆ ئەوەی ملكەچمان بێت، بەڵكو وامان هەست دەكرد، بە شوێن باوكمانەوە بڕۆین. باوكمان فێری كردبووین لە دوایەوە نوێژ بكەین، لە دوایەوە دوعا بكەین، لە دوایەوە ببین بە منداڵێكی سەلار. بۆیە لە دوای باوكمەوە جڵەوی كەرەكەمان دەگرتە دەست و وەك باوكمان لیسمان لەسەر گازەرەی پشتی گیر دەكرد. وەلێ‌ كە چاوی باوكمانی لێوە  دیار نەدەبوو، هەڵی دەتیزاند و لەسەر پشتی خۆی بەری دەداینەوە، ئەو كەرایەتیەی خۆی دەنواند، چونكە باوكم داركاریەكی وای دەكرد، نەوەكانی دوای خۆیشی ئاگادار بكردایەتەوە بە هیچ شێوەیەك لە دەسەڵات هەڵنەگەڕێنەوە. ئێستا ئەو شوێنانەی سەر شان و ملی كە جێ‌ لیسی دەستی ئێمە و باوكم لووسی كردبوون، وای لێكردووم زۆر بەزەییم پیا بێتەوە. رەنگە باوكیشم ئەو بەزەییەی تیا بێ‌، بەڵام تازە ناو شان و ملی ئەو داماوە بەو ئازارانە خۆشە بووە، ئەوەی ناڕەحەتیە بۆ ئەو.. ئەو بیرەوەریانەیە كە لەبیر ناچنەوە. باوكم لەو هەڵوەستەو رۆچوونی قووڵی قسەكەی فەرۆخ سەدو هەشتا پلە گۆڕا. دەمزانی لەو رامانەی ماتەڵی چ بیركردنەوەیەكە، دەمێك كە لای لە یارۆی گوێدرێژە فەیلەسۆفەكە دەكردەوە، بیری لەو هەموو ساڵەی دان بە خۆدا گرتن و گوێرایەڵی و دەی قەیناكە لەجەبەرووتی دەسەڵات دەكردەووە، ئەو بە حەوسەڵەتربوو، ئەو عاقڵتر و دنیا دیدەتر بوو. ئەو شەوان لەو تەنیایەی بەر دەرگا  لە رق و كینەو بووغز خۆی خاڵی دەكردەوە. ئەو كە چاوەڕوان بوو رۆژێكی نوێ‌ هەر دێ‌، ئارەزووی ئەو تین و گەرمایەی نەدەكرد، كە خۆر بەسەر جەستەیدا دەیهێنا. باوكم ئەگەر چی پیاوێكی تووڕەو توند و تیژبوو، سوكایەتی بە كەس نەدەكرد، دڵیشی ناسك بوو، بە چاوی خۆم دیبووم بەسەر تەرمی دایەگەورەوە چۆن بە كوڵ دەگریا، بەڵام بیری چووبوەوە، یا هەر عادەت وابوو، ئێمە بۆ شتێك بگریین و شتێكی تر بێنینە گریان. كە لای لە منیش دەكردەوە، چاوەكانی چوون دوو گڕكانی لە ناكاو دەتەقینەوە. خۆ من بەوم نەبوو تا ئەو كەرەی لێ‌  بێنمە راپەڕین، بۆ ئەوەشم نەبوو سبەی لە مەیدانەكە بیفڕۆشێ‌، یا هەر بۆ خوا دەست بەرداری ئەو كەرە بێت و لە شوێنێكی دوورە دەست ئازادی بكات. گوناهی من تەنها ئەو رۆمانەم بە دەنگی خوێندبووەوە، كە فەرۆخ بە فەیلەسوف ناو زەدی كردبوو. رەنگە بۆ ساتێكیش باوكم مەیلی ئەوەی هەبێت دەست لە مل ئەو كەرە بكات و گەردن ئازایی لێ‌ بخوازێ‌، وەلێ‌ نە باوكم دەوەسی هەموو ئەو لیسانەی سەر پشتی ئەوی بۆ كوێر دەكرێتەوە، نەیش ئەو گشت ئەو بەرەبەیانیانەی بانگەوازێكبوون بۆ چەوسانەوە، پێی لە بیر دەچوەوە. بەڵام قەدەر گشت ئەو رووداوانەی وا رسكاندبوو، نەچینەوە لای هۆگری و دەست لە ملانێ‌ و یار خودایی. گشتمان لەتەك ئەو كەرە لە ماڵێك گەورەبووین، بە یەكەوە نشونمای رووداوەكان بووین، ئێمە بە نێرەكەری خۆمان ئەو خەسڵەتەشمان لەو دابڕیبوو. هەر كاتێ‌ خەتایەكیشمان بكردایە هەر ئەو لیسی دەخوارد، باوكم هەر لیس بەدەست بوو، ئەویش زاتی ئەوەی نەدەكرد، یا پێی خۆش نەبوو لە ئێمە بدات، ناچاربوو دوو لیسی لە سەر گازەرەی پشتی فەیلەسووف گیر دەكرد . ئێمە پەشیمان دەبووینەوە لە خەتاكانمان، بەڵێنمان دەدا دووبارەی نەكەینەوە، وەلێ‌ ئەو كە ملكەچی فەرمانەكانبوو، تەنها ئەوە خەتای ئەوبوو، نەشی دەتوانی لەو ملكەچییەی پەشیمان بێتەوە.
 ئەمێستاش باوكمی بردووەتەوە بەر تەوافی تۆبە كردن . باوكم ئێستا بیری دەكەوێتەوە ئازاری ئەو جەڵدانە بە سەر جەستەی فەیلەسووفەوە چەند بە ئێش بوونە. دەزانم ئێستا بیری باوكم چەند قووڵ رۆچووە، تەنها بە دەست لە مل نەكردنێك ناتوانێ‌ ئەو هەموو ئازارە كوێر كاتەوە. بۆ خۆم ئێستا زیاتر بەزەییم بە باوكما دێتەوە، وەك لە گوێدرێژەكە.. فەیلەسووفەكەی فەرۆخ، چونكە لیسی سەر جەستە بە ئێشتر نیە لە لیسی سەر رووح. لیسی دەستی فەیلەسووف وا بە رووحی باوكمەوە ئازارێكی كوشندەیە . باوكم بەو دڵە ناسكەوە بەرگە ناگرێ‌، دوعا دەكەم خودا دڵی ئەو كەرە نەرم كات و هەر ئەو دەستپێشخەر بێ‌ لەو ئاشتەواییە. وەنەبێ‌ باوكم دوژمنی ئەو كەرە بووبێ‌، یا وویستبێتی بیچەوسێنێتەوە، نا.. باوەڕ ناكەم ئەو هەموو رقەی تیا بووبێ‌. ئەو رۆژەی باوكم لە مەیدانەكە ئەم كەرەی كڕی، زۆرمان پێخۆشبوو، زیاتر باوكم پێی كەیفخۆشبوو، درۆم نەكردبێ‌، بەلای باوكمەوە وەك ئەوە وابوو خۆی دۆزیبێتەوە، ئەوێك هەموو رۆژ دەیفیشكاند و دەم و چاوی مۆن و گرژبوو، ئەو رۆژە تەواو بە رووی ژیاندا كرابوەوە. لە ترسی دایكم نەبوایە بەر هەیوانەكەی بۆ دەكرد بە نیشتمان. ئێمەش دڵمان پێ‌ كرابووەوە، ئێدی باوكم تووڕە نابێت و نافیشكێنێ‌. بڕێكی گەورەی ترسە لە گیانمان رەوانەوە . دایكیشم خۆشحاڵبوو بەو ئازیزە، وەلێ‌ نەمزانی بە هۆكارەكەی، دواتر زانیم دەیوویست بەشە دەسەلاتی پیاوسالارییەكەی بەسەریدا كەمتر دەبێتەوە و كەمتر لەمیش دار بەرز دەكاتەوە. دوای ئەو هەموو ساڵە باوكم لە قسەیەكی فەرۆخ هەڵوەستە لە ژیانی ئەو فەیلەسوفە دەكات، بۆ یەكەمجاریشە بیر لە فەلسەفە دەكاتەوە بە رامانێكی قووڵ، بۆ بەرەنگاربوونەوەی هەموو دەسەڵاتێك ورووژاندنی دێڕێك لە قسەكردن، بەرانبەركە دەخاتە هەڵوەستەوە. باوكم لەو تێڕامانەی بە ئاگا دێتەوە، بێ‌ دوو دڵی و راستەو راست دەچێتە حزووری فەیلەسووف و كورتانەكەی لێ‌ دەكاتەوە. دڵم پڕببوو لە گریان، دەمزانی ئەگەر باوكم دەست لە ملی بكات، منیش دەدەمە پڕمەی گریان، وەلێ‌ خۆشیەك بە رووحمدا هات، كە باوكم گوناهەكانی خۆی پاك دەكاتەوە. هەزار دەست خۆشیم لە فەرۆخ كرد، كە ئەو بارەی لە كۆڵ باوكم كردەوە، تا باوكم دەستی برد و لە هەمانەی قەد كورتانەكە ئەو ناڵەی دەر هێنا كە چەند رۆژێكبوو دەیووسیت ناڵەكانی بۆ بگۆڕێت بە ناڵی نوێ‌ .

‌ 421 جار بینراوه‌
4/6/2019 2:47:49 PM
Print Friendly and PDF
بابەتی زیاتر ...
بورهان حاجی سلێمان
شوان داودی - گۆشه‌ی له‌ژێ چاویلكه‌وه‌
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟
راپرسی
پێت وایە دۆخی ئێستای كوردستان بەچی چارەسەر ئەبێت؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved