»  بینین
كارداشیان و جلال العظم.. نادیە و لامیاش!
دڵسۆزحەمە



یەكشەممەی رابردوو یەكێك لەهەرە بیرمەندە گەورەكانی دنیای عەرەب كۆچی دوایی كردو وەكو زۆربەی بیرمەندو نوسەرو روناكبیرو دەستەبژێرانی عەرەب لە مەنفادا سەری نایەوە، سادق جەلال، لەگەڵ محەمەد ئارگۆن و حامد ئەبوزەید فەرەج فودە گرنگترین بیرمەندەكانی ئەم سەدەیەی دنیای عەرەبن كە كتێبی زۆر گرنگ و لێكۆڵینەوەی مێژوویی گرنگیان لەسەر ئایینی ئیسلام و كۆمەڵگەی عەرەبی ئەنجام دابێت، لە دیدی مێژویی و دیدی كۆمەڵناسیەوە خوێندنەوەیان بۆ ئیسلام و تێكستە پیرۆزەكانی كردبێت و رەخنەیان لەو تێكستانە گرتبێت لە سیاقە مێژوییەكانی خۆیاندا، هەربۆیە لە جڤاتێكی دۆگماو لە سایەی دەسەڵاتە خێڵەكی و شمولی و مافیا ئاساكانی عەرەبەوە لەلایەك و لەلایەن خودی نوسەران و رۆژنامەنوسان و مێدیاكانیشەوە ئەم بیرمەندانە بەر هەڕەشەو پەلامارو ناوزڕاندن و پەڕاوێزخستنی بەمەبەست و تیرۆری رۆحی و تەنانەت تیرۆری فیزیكیش بونەوە، فەرەج فۆدە لەناو ماڵەكەی خۆیدا كەسێك تیرۆری كرد كە تەنها یەك دێڕی كتێبەكانی فەرەج فۆدەی نەخوێندبوەوە!
سادق جەلال العڤم و تێكڕای بیرمەندانی عەرەب ئەگەر هەڵوێستێكی مرۆڤانەو ئەخلاقیشیان نەبوبێت لەهەمبەر دۆزی رەوای كورد، بەڵام ئەوە لەو راستیە ناگۆڕێت كە یەكێكی وەكو جلال العڤم یەكێك لەو فیگەرو بیرمەندە رەخنەگرە گرنگانەی دنیای ئیسلام و ئیسلامگەرایە كە كتێبەكانی بۆ ئێمەی كوردیش وەكو بەشێك لە جڤاتی ئیسلام، وەكو یەكێك لەو پێكهاتانەی كەلتورو فەرهەنگی ئیسلام راستەوخۆ كاریگەری بەسەر ژیان و دنیابینی و پاشەڕۆژو شێوازی ژیانمانەوە هەیە، وەكو جڤاتێكی ئیسلام لێكۆڵینەوەكانی ئەم بیرمەندە كاریگەری دەبێت بۆ ناسینی ئیسلام و خوێندنەوەی بیری ئایینی پەیوەست بە جڤاتی ئێمەوە.
كتێبی (نقد العقل الدینی) لەسەرەتای ساڵانی هەفتادا راچەنینێكی گەورەی لە دنیای عەرەبدا بەرپاكرد، ئەم كتێبەی كە پێموایە دەستەبژێری سیاسی و رۆشنبیری كورد نیە نەیخوێندبێتەوە، دونیای عەرەبی بەرەو ڕووی شۆكێكی فیكری و مەرعریفی قوڵ كردەوە، كەدامودەزگایەك نەما بەیاننامەو قسەو هەڵوێستی خۆی بەرانبەر ئەم كتێبە دەرنەبرێت، كتێبێك كە بەدیدێكی رەخنەگرانەی شرۆڤەكارانەوە تێكستەكان و ئایینی ئیسلام دەخوێنێتەوە، ئەم كتێبەو نوسەرەكەی زۆر دڕندانە كەوتنە بەر هێرش و هەڕەشەی هێزە ئایینیەكان لەلایەك و خوێندەوارو نوسەران و ناسیۆنالیستە عەرەبەكانیش بە لایەكی تردا!
 هەردوو كتێبی (ذهنیە التحریم )و (مابعد ذهنیە التحریم) لەو كتێبە گرنگانەیە ئەگەرچی لەسەر سەلمان روشدی و پرسی فەتواكەی خومەینی نوسراوە، بەڵام دیدێكی قوڵی شرۆڤەكارانەیە بۆ چەمكی تەحریم و قەدەغەكردن وسەركوتكردنی مرۆڤ وئازادیەكانی، سنورداركردنی بیركردنەوەی مرۆڤ بە بەهانەی تێكستە پیرۆزەكان وەكو چەكێك بە دەستی هێزە كۆمەڵایەتییە سەركوتكەرو دەسەڵاتی سیاسی سەركوتكەرەوە!
دنیای عەرەب ئەمڕۆ لە وێرانەیەك زیاتر هیچی تر نییە، مردنی ئەو بیرمەندە گەورەیەو بیرمەندەكانی تریشیان وەكو تێپەڕینی شەمەندەفەرێك بە بیاباندا لە دەنهەڵبڕینی هەندێك رۆژنامەو خەمباری هەندێك زانكۆو چەند وتارێكی دۆستانەی دەستەبژێرەكان بەولاوە هیچی تری جێنەهێشت! دنیای عەرەب هێندەی سەرقاڵی فەتوای بانگخوازەكان وبەرنامە ئایینیەكانی ناو سەتەلایتەكان و بەراوركردنی فەتوای سعودیەو ئەزهەرە لەسەر حەڵاڵ و حەرام، هێندە سەرقاڵی داعش و ئیخوان و ئەنسار و جۆرە جیاوازەكانی حەشدو خوێنڕشتن و رق و وێرانەكارییە، هێندە سەرقاڵی كردنەوەی سەتەلایتی زیاترە بۆ مەلاو بانگخوازە ئیسلامییەكان هێندە ئاگای لە مەرگی بیرمەندێك نیە كە گرنگترین خوێندنەوە و شرۆڤەی زانستی بۆ دۆخی عەرەب و ئیسلام بەرهەم هێناوە!
 مەبەستی من بەراوركردنی ئەم دۆخەیە بە ئێمەی كورد كە لەم بارەدا رێك بە عەرەبەكان دەچین، هەواڵی سەفەرەكانی كارداشیان و جل و پێڵاوەكانی و نیشاندانی وێنەكانی ئەو ژنەی كە بێنرخترین سیمبۆڵی دنیای سەرمایەداری و هەڕاجكردنی كەلتوری سەرمایەداریە، ئەو ژنە كە تەنانەت ئەكتەرو هونەرمەندیش نیەو هیچ بەرهەمێكی هونەری و رۆحی نیەو ناتوانێت هەیبێت لە میدیای كوریدا هەواڵ و گرنگی زۆرترە بۆ نمونە لە هەواڵی نادیە مورادو لەمیا حاجی بەشیر كە هەر دیسان هەفتەی رابردوو لە پارلەمانی ئەوروپا پاداشتی زاخارۆفیان بە هاوبەشی لەگەڵ دوو كەسی تردا پێ بەخشرا!
دواجار لە دۆخێكداین هەرهەموو جڤاتی كوردی سەرقاڵی شكان و رسواكردنی یەكترین بە ترسناكترین شێوازو مەترسیداترین ئامڕاز كە لە ململانێی سیاسی و دیباتی هێزەكان دەرچووەو بەڵكو خۆكوژیەكی كۆمەڵایەتیە.

‌ 3175 جار بینراوه‌
12/17/2016 3:41:32 PM
Print Friendly and PDF
بابەتی زیاتر ...
123
راپرسی
پێت وایە دۆخی ئێستای كوردستان بەچی چارەسەر ئەبێت؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved