»  کوردستان
یەكێتی زانایان سەنتەری شێرپەنجە بە وەڵامنەدانەوەی دەستپێشخەرییەكیان تۆمەتبار دەكات
رەوان تالیب


لقی كەركوكی یەكێتی زانایانی ئیسلامی، سەنتەری كەركوك بۆ نەخۆشییەكانی شێرپەنجە، بە وەڵامنەدانەوەی پێشنیارێكیان بۆ دانانی سندوقی كۆمەك لە سەرجەم مزگەوتەكانی شارەكە تۆمەتبار دەكات و بەڕێوەبەری سەنتەرەكەش رایدەگەیەنێت:”پێشنیارەكە پێویستی بە وەرگرتنی رەزامەندی ئەنجومەن و ئیدارەی كەركوك هەیە”.
ئازاد خورشید؛ سەرۆكی لقی كەركوكی یەكێتی زانایانی ئیسلامی كوردستان، لە لێدوانێكیدا بۆ (هەواڵ) رایگەیاند:”لە كاتی كۆكردنەوەی كۆمەك بۆ سەنتەری كەركوك بۆ نەخۆشییەكانی شێرپەنجە، پێشنیارمان بۆ دانانی سندوق لە سەرجەم مزگەوتەكانی شارەكە كرد، تا كۆمەك بۆ توشبووانی نەخۆشی شێرپەنجە كۆبكرێتەوە”، روونیشیكردەوە:”تائێستا سەرپەرشتیارانی سەنتەرەكە بە دەنگی پێشنیارەكەمانەوە نەهاتوونەو هیچ وڵامێكیان نەداوەتەوە”.
بە وتەی سەرۆكی لقی كەركوكی یەكێتی زانایانی ئیسلامی كوردستان، ئەوان لای خۆیانەوە سەرجەم ئامادەكاریەكانیان كردووەو سندوقیانیش بۆ ئەو مەبەستە ئامادەكردووە، ئاماژەی بەوەشدا:”تەنها چاوەڕوانی وەڵامی سەنتەری كەركوك بۆ نەخۆشییەكانی شێرپەنجە دەكەین، تا دەست بە كۆكردنەوەی كۆمەك بكەین”.
لە وەڵامیشدا دكتۆر نیاز ئەحمەد ئەمین؛ بەڕێوەبەری سەنتەری كەركوك بۆ نەخۆشییەكانی شێرپەنجە، تایبەت بە (هەواڵ)، رایگەیاند:”ئێمە لەگەڵ پێشنیارەكەی یەكێتی زانایانی ئیسلامی بووین و بە كارێكی باشمان زانیوە، بەڵام بۆ ئەوەی پێشنیارەكە چوارچێوەی یاسایی و شەرعیەت وەربگرێت، دەبێت رەزامەندی ئەنجومەن و ئیدارەی كەركوك وەربگیرێت”، باسی لەوەشكرد:”بۆیە تائێستا وەڵامی لقی كەركوكی یەكێتی زانایانی ئیسلامی كوردستانمان نەداوەتەوە”.
هاوكات دكتۆر نیاز ئەحمەد ئەمین؛ ئاشكراشیكرد:”لەئێستادا ئیدارەی كەركوك رەزامەندی دەربڕیووەو چاوەڕوانین رەزامەندییەكە بە نوسراو بگاتە دەستمان”.
 
‌ 215 جار بینراوه‌
2/11/2017 10:12:38 AM
Print Friendly and PDF
بابەتی زیاتر ...
راپرسی
پێت وایە دۆخی ئێستای كوردستان بەچی چارەسەر ئەبێت؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved