»  چاوپێکەوتن
ئەمیر خوداكەرەم، قایمقامی قەزای داقوق: زیاتر لە (33) هەزار ئاوارە لە سنوری داقوق هەیە
ئا/ هەواڵ

ئەمیر خوداكەرەم، قایمقامی قەزای داقوق، لەم چاوپێكەوتنەی (هەواڵ)ـدا، ئاماژە بەوە دەدات، كە تائێستا ژیان بۆ گوندە ئازادكراوەكان نەگەڕاوەتەوە و ئەوە دەخاتەڕوو:”(33) هەزار ئاوارە لە سنوری داقوق هەیە” و ئەوەش رادەگەیەنێت:”هەر كارێكی قاچاخ و نایاسایی لە سنوری داقوق لەگەڵ ناوچەكانی ژێر دەسەڵاتی (داعش) ئاشكرا كرابێت، رووبەرووی ئیدارەی داقوق نەكراوەتەوە”.

* دۆخی ئەمنی قەزای داقوق لە چ ئاستێكدایە؟
ــ ژیان لە قەزای داقوق بە ئاسایی دەڕوات، چ لە لادێ كوردییەكان وەك گوندەكانی كاكەیی و تاڵەبانی و حەفتەغار و چ لە نێو قەزای داقوق، ئەمەش بۆ بوونی هەشت لیوای هێزی پێشمەرگە لە سنورەكانی قەزاكە دەگەڕێتەوە، كە كۆنتڕۆلی سەرجەم شوێنەكانیان كردووە، بە تایبەت ئەو شوێنانەی پێشتر دێی عەرەبی بوونە و هێزی تیرۆرستانی تێیدابووە.
لە نێو قەزای داقوقیش بە هەماهەنگی پۆلیس و ئاسایش و سەرجەم دەزگا ئەمنیەكان، لیژنەی ئەمنی قەزاكە توانیویەتی كۆنترۆڵی هەموو شوێنەكان بكات و هەماهەنگی تەواویش لەگەڵ هێزی پێشمەرگەدا دروست بكات، بۆیە هیچ كێشە و لادانێكی گەورە و ئەوتۆ نییە، كە شایانی باسكردن بێت.
* چەند گوندی سنوری قەزای داقوق لە دەستی (داعش)ـدا ماوە؟
ــ (100) گوندی لە سنوری داقوق هەیە، (70) گوندییان لەلایەن هێزەكانی پێشمەرگەوە گۆنتڕۆڵكراوە و (30) گوندیشیانلەلایەن چەكدارانی داعشەوە داگیركراوە و هێشتا ئازاد نەكراوە.
* چەند گوند لە سنوری داقوق لە (داعش) پاككراوەتەوە و چەند گوندیش تائێستا ئازاد نەكراوە؟
ــ ئەو گوندانەی ئازادكراون لەلایەن پێشمەرگەوە، هێشتا ژیانی بۆ نەگەراوەتەوە بە تەواوەتی، چونكە هەمووی بۆمبرێژكراون و بە تەواوی پاكنەكراونەتەوە و زۆر لە خانوەكانیش روخاون، بۆیە دەبێت دوای پاككردنەوەی لە مین، بەرنامە بۆ نۆژەنكردنەوە و گەراندنەوەی ژیان بۆ ئەو گوندانە دابنرێت.
* چەند ئاوارە لە سنوری قەزای داقوق بوونیان هەیە؟
ــ لەئێستادا خەڵكی (45) دێ هاتونەتە نێو قەزای داقوق و هەروەها خەڵكی تری سنوری حەویجە و دیالەش لە قەزاكە هەن، بە جۆرێك نزیكەی (15) هەزار ئاوارەی (45) گوندەكە لە سنوری ئێمەدان، كە زیاد لە هەزار خێزانن، هەروەها زیاتر لە (18) هەزار ئاوارەی حەویجە و ناوچەكانی دیكەش لە كەمپەكەدا هەن، كە ئەوانیش بە زیاتر لە دوو هەزار خێزان مەزەندە دەكرێن، بە گشتیش سەرجەم ئاوارەكانی سنوری داقوق زیاتر لە (33) هەزار كەس دەبن، ئەمەش فشاری ئابوری و ئەمنی و پەروەردەیی و تەندروستی زۆر زۆری دروستكردووە و بێگومان كێشە و گرفتیشمان بۆ دروست بووە.
* بەپێی زانیارییەكان، دیاردەی قاچاخچێتی و كاری نا یاسایی لەگەڵ ناوچەكانی ژێر دەسەڵاتی (داعش) لە سنوری داقوق زۆرە، چی كراوە بۆ بنبڕكردنی ئەو دیاردەیە؟
ــ وەك حكومەت و ئیدارە تەداخولی ئەو كارەمان نەكردووە و لە رووی ئەمنیەوە لە چوارچێوەی پاراستنی پۆلیس و ئاسایشدایە و پاشان هێزەكانی پێشمەرگە، هەر كارێكی قاچاخ و نایاسایی لەم سنورە ئاشكرا كرابێت رووبەرووی ئێمە نەكراوەتەوە، بەڵكو هێزەكان و بەشی لێكۆڵینەوەی دەزگا ئەمنیەكان خۆیان بە دوای ئەوكارەدا چوون و خەڵكیش دەستگیر كراوە.
* لە رووی خزمەتگوزارییەوە پرۆژەكانی داقوق بە كوێ گەیشتون؟
ــ چەند پرۆژەیەك بەردەوامە و دەستی پێكردوەتەوە، وەك پاركی منارەی داقوق، كە پرۆژەی ساڵی (2013)ـیە، هەموو ئەمانە بێگومان بە هاوكاری ئیدارە و پارێزگاری كەركوك، وابڕیاریش بوو پرۆژەی پاركی منارە لە یەكی شوبات بكرێتەوە، بەڵام بەهۆی بەفربارینەوە دواخرا و یەكێكە لە گەورەترین پرۆژەكانی قەزاكەیی، كە بەشێوەیەكی مۆدێرن تەواوكراوە و لەسەر (17) دۆنم زەوی دروستكراوە و ئەمەش خەڵكی قەزاكە و گەشتیاران سودی زۆری لێدەبینن، هەروەها پرۆژەكانی بینای خوێندن و تەندروستی و رێگاوبانیش لە داواكاری ئێمەیە بۆ پارێزگای كەركوك و بەهیواین لەوەش هاوكاریمان بكەن، تا خزمەتی داقوق بكەین و ئەو پرۆژانەش بخەینەوە گەڕ.
* كێشەی پارەی گەنمی جوتیارانی سنوری داقوق بە چی گەیشت؟
ــ تائێستا تەنها لە (25%) پارەی گەنمی ساڵەكانی (2014 و 2015) دراوە بە چوتیارانی سنوری داقوق و هێشتا وەك شوێنەكانی تری سێ بەشی پارەكەیان ماوە.

‌ 2887 جار بینراوه‌
2/11/2017 10:26:19 AM
Print Friendly and PDF
بابەتی زیاتر ...
راپرسی
کێ بەرپرسە لەم دۆخەی ئێستای کوردستان؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved