»  پەڕەموچ
تابلۆی “منداڵە حەڵوا فڕۆشەكە”ی هونەرمەندی ئەمریكی (بۆب رۆس)
ئا/عەبدولڕەحیم سەرەڕۆ

منداڵێك لە پەنا دیوارێكی قوتابخانەیەكدا بە بەرگێكی پەرپووتەوە بە دەم گریانێكی بێ دەنگ و نووزەو هەڵكرووزانەوەوە لچكێكی جلەكەی بەدەستی راستی بەرز كردۆتەوەو فرمێسكی چاوەكانی دەسڕێتەوەو كەرەستەكانی فرۆشتن و خواردنەكەی بێ ئەوەی دڵنەوازێكی هەبێت دڵی بداتەوە، لە كاتێكدا منداڵەكانی تر زۆر بەخۆشی و ئەوپەڕی ئاسوودەیی روودەكەنە ناو قوتابخانەكەو پێكەوە بەرەوخوێندن دەڕۆن، ئەوەی لە رووبەری تابلۆكەدا زاڵە رەنگی شینە، ئەو رەنگەی تا ماوەیەكی زۆر سەرنجی بینەر بۆ ناو وردەكارییەكانی تابلۆكە رادەكێشێت، رووناكی لەو تابلۆیەدا بە شێوەیەكی زۆر سەرنجڕاكێش و جوان داڕێژراوە، خوێندكارەكان رووەو رووناكی دەڕۆن و هاوكات دابەشكردنێكی جێندەری یەكسان لە تابلۆكەدا دەبینرێت كە تیایدا رەنگی سوور دراوەتە كچەكان و لە جانتاو كڵاوەكانیاندا بەرجەستەبووە، هەموو خوێندكارەكان هاوپۆشاكن و زۆرترین رەنگ تیایدا رەنگی شینە بەوەی ئارامی بە خوێندكارو مامۆستا دەدات لەیەك كاتدا.
ستایلی هۆنینەوەی قژی كچان و چاككردنی سەری كوڕە خوێندكارەكان زۆر كلاسیكەو هاوچەشنی خشتەكانی دیواری قوتابخانەكەیە كە دەگەڕێتەوە بۆ ماوەیەكی كەمی دوای جەنگی دووەمی جیهان و نیشانەكانی نۆژەنكردنەوە یان باشتر بڵێین دەست پێهێنانەوەی پێوە دیارە.
ئەوەی لە تابلۆكەدا ماوەتەوە شێوەی منداڵەكەیە كە دەگری، ئەگەر سەرنج لە دیمەنی ئەو منداڵە بدەین دەبینین روخسارێكی خەمناكی هەیەو گوزارشت لە رەوینەوە دەكات لەو كلۆجی ژیانەی بەرۆكی گرتووە، بەڵام هیچ دەرچەیەك شك نابات بۆ دەربازبوون لەو دۆخەی كە تێ كەوتووە، ستایلی جلوبەرگەكەی زۆر هەژارانە دارێژراوە، بە تایبەت بانتۆڵەكەی پێی جۆرە شەڕواڵیكی تایبەت بە راوچیانی ماسییە كە لە ئەمریكا بە جلوبەرگی هەژارترینی چینەكانی ناو وڵاتەكە ناسراوەو ئینجا وێرای ئەوەش ئەو جلە زۆر كۆن و شەپرێوو پڕ لە پینەو دڕاوو لێك هەڵوەشاوەیە.
شوێن بە پێچەوانەی منداڵە خوێندكارەكان پەنادیوارێكی شێداری بەر سێبەرە كە جۆرێك لە سەرماو تەڕو تووشی لەخۆگرتووە، هاوبار پێلاوەكەی پێی لەبەر كۆنی بەسەریەكدا تێكرژاوەو لەبەر كۆنبوونی تەواوی رەنگی چۆتەوە، بە دەستێكی توورەگەیەكی بچكۆڵانەی هەڵگرتووە وەك نیشانەیەك بۆ توێشوویەكی كەمی مەمرەو بژی و هاوكات سندوقێكی گەورەی بە دەسكەكەیەوە لە قۆڵی داناوە وەك ئاماژەیەك بۆ فڕۆشتنی حەڵواو شیرینی .
روخساری منداڵەكە زۆر خەمگینەو گوزارشت لە ئەزموونی قووڵی دەكات لە كاتی منداڵی كە بە ناڕەحەتترین دۆخی نەداریدا تێپەڕیوە، كە بینەر لەو روخسارە خەماوییە رادەمێنێت درك دەكات زۆرجار زەمەن دڵرەقترینی شتەكانە لە بوونداو بۆی هەیە زۆر بە بێهوودەیی غەدر لە پەپوولەیەك بكات و هەڵیداتە دۆزەخەوەو هاوكات زۆر جارانیش جەلادێك دەگەیەنێتە ترۆپك و دەیكاتە هێما.
زۆرن ئەو شێوەكارانەی وێنەی منداڵی جۆراوجۆریان كێشاوەو داهێنانی گەورەیان لەو بوارەدا كردووە، هەندێكیان منداڵیان وەك خەیاڵێك لە شێوەی پەری بە باڵەوە دروستكردووەو هەندێكی تر واقعێكی تاڵی منداڵانیان لە تابلۆیەكیاندا بەرجەستەكردووە، بەڵام تا ئێستا هونەرمەندێكی ئەوتۆی جیهانی نەبووە وێنەی دۆخێكی خۆی بكێشێت لە تافی منداڵیدا.
ئەم تابلۆیەی بۆب رۆس گوزارشت لە سەردەم و ئەزموونی منداڵیی خودی شێوەكارەكە دەكات، باس لەو سەردەمە دەكات كە دوای مردنی باوكی؛ دایكی ناچاری دەكات دەست لە خوێندن هەڵبگرێت و لە پێناوی بەخێوكردنی براو خوشكەكانی كە لە خۆی بچوكترن حەڵوا لە بەردەمی ئەو قوتابخانەیەدا بفڕۆشێت كە لێی دابڕاوە، ئەم ئازارە دەروونیە ئەو منداڵەی لە دۆخێكی ناهەموارەوە گواستۆتەوە ناو ریزی ئەو كەسایەتیانەی لە مێژوودا بە نەمری دەمێننەوە. بۆب رۆس سەبارەت بەم تابلۆیەی خۆی دەڵێت:” نەداری ئەو دوژمنەیە كە خەبات لە پێناو بەزاندنی دەكەین، نەداری بوو كە منی كردە هونەرمەندێكی ناودار و بە شۆرەت، هەژاری لە زۆر شوێن و كاتدا پیاوی مەزنی خوڵقاندووە”.
* ناوی تەواوی رۆبەرت نۆمان رۆسەو لە 29ـی ئۆكتۆبەری 1942 لە فلۆریدا لە ویلایەتە یەكگرتووەكانی ئەمریكا لەدایك بووە، لە كەناڵی (BBS)ـی ئەمریكیەوە چەندین بەرنامەی لەسەر هونەری شێوەكاری و فێركردنی منداڵان پێشكەشكردووەو لە بەرنامەی “جۆی ئۆف یانتینگی” خێزانیی ناوداری ئەمریكی بەشداری كردووە. لە 4ـی یۆلیۆ 1995 لە تەمەنی (53) ساڵیدا بە مردنی لە ناكاو كۆتایی بە ژیان هاتووە.


‌ 364 جار بینراوه‌
2/11/2017 10:57:35 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved