»  وتاری هەفتە
بۆچی هەر لە زۆنی سەوز؟
بورهان حاجی سلێمان




لە كاتێكدا هێشتا پرسی بۆردومانكردنی شەنگال و بناری قەندیل لەلایەن فڕۆكەكانی توركەوە، لە شەقام و لە ناوەندە جەماوەری و رۆشنبیرییەكان كارلێكی دەكردو رۆژ بە رۆژ خەڵكی توڕەترو كاردانەوەكان بەهێزترو هەڵوێستی توركیاو هاوپەیمانەكانی لاوازتر دەبوو، بەڵام لەچەند رۆژی دواییدا، چیرۆك گەلێكی سەیرو سەمەرە وروژێنران و توركیاو دۆستەكانیان لە ژێر فۆكس و فشارەكان دەرهێنران!
سەرەتا هەواڵی 11 ساڵ زیندانی ئەو پیاوەی لەبەرنەبوونی، شیرو دایبی دزی بوو، دواتر پرسی داواكردنی پارەی مانەوە لە بەشە ناوخۆییەكان و ئازاردانی خوێندكارە خۆپیشاندەرەكان و دواجاریش ئەو بۆڕیە ئاوانەی بە قودرەتی قادر لە بری ئاو نەوتی سپی دەگواستەوە بۆ چەند ماڵێك!
ئەم هەموو ئەم سەمەرەو سیناریۆ باندەرانەی تاوانە گەورەكان، لە زۆنی سەوزو ناوچەی نفوزی یەكێتی دەكرێت و لەلایەك خەڵكی پێ چەواشەو سەرقاڵ دەكرێت و پرسە گەورەكانیان پێ لە بیر دەبەنەوە، لە لایەكی دیكەشەوە یەكێتی پێ ناشرین دەكرێت، كە هەرچەندە لای زۆر كەس لەمێژا ئەوە روویداوە!
من بەرگری لە دز ناكەم جا چ بچوك بێت دایبی و شیر بدزێت، یان سروشت و نەوتەكە بە بیرەكانەوە بدزێت، بەڵام ئەگەر لەم وڵاتە نادادپەروەرەدا داد بە یەكسانی دابەش بكرایا، ئەوە ئەو حوكمە جێگەی دەستی خۆشی دەبوو، بۆیە لە غیابی ئەو داپەروەرییەدا، دەبوو ئەو حاكمە بەڕێزە رەچاوكردنی رەهەندە مرۆڤایەتییەكانی تاوانەكەو دۆخی تاوانبارەكەی بكردایا.
پرسیاری جدیش ئەوەیە: ساڵێكە ئەو شڕە دزە لە زیندانە، بۆچی لەم كاتەدا حوكم بدرێت؟ ئەی ئەگەر وەكو هەندێك لە میدیاكان بە زوڵملێكراو ناوی دەبەن، بۆچی ساڵێكە كە وەرەو بڕۆی زیندان و دادگای پێدەكرێت، بۆچی پێشتر پرسەكەیان نەوروژاندووە، ئایا كەیسی دزینی چەند دایبییەك ئەوەندە گەورەیە تا ساڵێك ئەمسەرو ئەوسەری پێبكرێت.. یان ئەوكات ئەو میدیایانە پێویستیان بەوە نەبووە بیكەنە ماددەی ئیعلامی و دەرخواردی هزری خەڵكی بدەن ؟!
بەهەمانشێوە پرسی وەرگرتنی رسومات و باج و جبایات، بۆچی هەندێ فەرمانگەو دەزگای حكومی لە زۆنی سەوز، رەچاوی باری ئابووری هاوڵاتیان ناكەن و رەحمێك بە گیرفانی هاوڵاتی هەژار ناكەن؟ ئایا ئەوەندە پەرۆشی ماڵی گشتین؟ یان ئەمەش دەچێتە خانەی ناشرینكردنی یەكێتیەوە؟!
هەواڵەكانی كەركوكیش كە بە هەمانشێوە لە چوارچێوەی قەڵەمڕەوی یەكێتیدایە، سەیرو سەمەرەترن لەوانەی سلێمانی و گەرمیان، لێرە پارەی خەیاڵی كارەباو ئاو بۆ هاوڵاتیان دێتەوە، باجی سەرسوڕهێنەر لە ئۆتۆمبێل دەسەندرێت، بەڵام میدیاكان بەوەندە دڵیان ئاوناخواتەوەو دەچن لە تۆڕی ئاوی كەركوكەوە نەوت نیشانی بینەرانیان دەدەن و بە ئارەزووی خۆیان ئاڵا بەرز ئەكەنەوەو ئاڵا دادەگرن!
ئەمانە ئەگەر بە دیوێكدا بۆ شاردنەوەی تاوانباری گەورەی وەكو توركیایە، لە هەمان كاتدا گورزێكی كوشندەیە لە یەكێتی.. ئاخر بۆچی ئەم سیناریۆیانە لە زۆنی سەوز بەم شێوەیەیەو لە زۆنی زەرد بەبێ لەش پیسكردنی حكومەت بەڕێوەدەچێت و ئەركەكە بە مەلا عەلی و كلێنس و میزی حوشتر دەسپێرن؟!.. بۆچی یەكێتی لەناوخۆیدا بۆ دوژمنە راستەقینەكانی ناگەڕێت؟!

‌ 2463 جار بینراوه‌
5/6/2017 9:56:59 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved