»  شەکری تاڵ
یەكێتی لە دوو سەدەی جیاوازدا




لەدایكبوونی یەكێتی لە یەكی حوزەیرانی ساڵی 1975 یەكێك بوو لە نیشانە گەورەكانی كۆتایی هاتنی دونیای دكتاتۆریەت و هاوشێوەی بومەلەرزەیەكی سیاسی بوو بە ئاخرزەمانی زۆربەی ناوەندە سیاسیە توتالیتارەكان لە ناوچەكەو بەو هۆیەشەوە هەر لە سەرەتای خەباتی چەكدارییەوە ساڵی 1976 تا ئەمڕۆ زۆربەی ناحەزانی ئازادی و كۆیلەكان دژایەتی دەكەن و باجی قورسی دەخەنە سەر بەمەبەستی لەباربردن و كۆتایی پێ هێنانی ئەم هێزە چونكە لە ناوجەرگەی چینی هەژارو زۆربەی بنكەكانی جەماوەری رەشورووتەوە هەڵقوڵاوە كە بوون بە ساختومانێكی پۆڵایین بۆ بەرگریكردن و مانەوەی و بەردەوامبوونی، ئەوەیشی كە هەرگیز حاشای لێ ناكرێت تا ئەمرۆش یەكێتی نیشتمانی كوردستان گەورەترینی مەرجەكانی مانەوەی بە بەرفراوانی زەمینەی جەماوەرەكەی بووە.
یەكێتی لە سەدەی رابردوودا تاكە هێزی ناوچەكە بوو بە پشت بەستن بە زەمینەی جەماوەر توانی سەركەوتنە مەحاڵەكان بەدەست بهێنێت، زۆربەی شەهیدانی رێگەی رزگاریخوازی كوردستان لەناو یەكێتی بووە، پشكی گەورەی ئەنفال بەر ناوچەكانی هاوسۆزی یەكێتی كەوتووە، كیماباران هەر لە ناوچەكانی چالاكی یەكێتی بووە، دەروازەی راپەڕین لەناوجەرگەی هەژموونی یەكێتیەوە سەری هەڵداوە، یەكەم هێزی چەكداری لە هەردوو بەهاری 1991 و 2003 بۆ ئازادكردنی كەركوك هەر یەكێتی دەستیپێكردووەو بۆتە فریادرەسی شارەكە، بۆیە یەكێتی بە بازووی لایەنگران و حیكمەتی سیاسی و خەباتی بێ وچانی مام جەلال چەندین هاوكێشەی فشاری وەرچەرخاندو باڵادەستی خۆی سەلماند، هەر یەكێتی نیشتمانی كوردستان لە دوای ئازادكردنی ناوچە دابڕاوەكانەوە تا ئەمڕۆ هەوڵی جدی بۆ گەڕاندنەوەیان دەدات، هەرچی لە هەگبەی نەیارانیدا بووە پێیانی فریداوەتە سەرمێز؛ بەڵام دەبێ چی بكات بۆ ئەوەی بیگێرێتەوە گیرفانی خۆی و وەك ڤیتۆیەك بەكاری بهێنێت؟!
لەدوای هاتنی سەدەی بیست و یەكەمەوەو بەتایبەت لەدوای نەخۆشكەوتنی مام جەلالەوە یەكێتی نەك ناتوانێت خەڵكی تر لە دەوری خۆی كۆبكاتەوە تەنانەت ئەمڕۆ تووشی پەتای باڵباڵێن و پەرتەوازەیی ناوماڵی خۆی هاتووە، ئەمڕۆ یەكێتی هێندە لە خەمی نەرەنجاندنی دڵی جەماوەرەكەیەتی هێندە لە خەمی كۆكردنەوەی خۆی نییە، یەكێتی ئەمڕۆ لەجیاتی ئەوەی بیر لە داهاتوو بكاتەوە رۆچۆتە ناو مێژووی پڕ لەسەروەری و نۆستالیژیاو جارای جارانی لێ بۆتە دوایین دەروازە. یەكێتی ئەو هێزە لە بن نەهاتووەی سێ دەیە لە خەبات لە هەڵبژاردنەكانی رابردوودا چی نەمابوو بەڕەكەی لەژێر پێیان دەركەن و ئەگەر كەركوك و جەماوەرە یەكێتیەكەی نەبوایە نیوەی دەنگەكانی بە هەدەر دەچوون، لە شاخدا بە یەك كۆبوونەوە دە ئامانجیان دەپێكا ئێستا لە شاردان و بە دە كۆبوونەوە هیچ ئەنجامێكی ئەوتۆیان دیار نییە!
بۆیە دەبێ ئەم حیزبە پڕ لە خەباتە هەوڵ بۆ كۆكردنەوەی ماڵی خۆی بدات و هەوڵبدات دیسانەوە بچێتەوە سەر رێچكەی جارانی و لێك نزیككردنەوەیەك لە نێوان ئیدارەدان و سیاسەتدا دروستبكات، با هێندە بە شەرمی سیاسیەوە نەئاڵۆسكێ؛ وەك دەزانین لە سیاسەتدا خاترو خاترداری نییە بەڵكو بەرژەوەندی باڵاو ئامانجی دوورو تەكنیكی كارو پلانی ستراتیژی لە بونیاتنانەوەی ئاراستەی سیاسی هەر كۆمەڵگەیەك رۆڵ دەگێرێت، بۆیە پاراستنی ئامانجەكان لە بەدەستهێنانی قورسترە.


ئیمزا
عەبدولڕەحیم سەرەڕۆ

‌ 2013 جار بینراوه‌
6/3/2017 11:31:47 AM
Print Friendly and PDF
بابەتی زیاتر ...
راپرسی
پێت وایە دۆخی ئێستای كوردستان بەچی چارەسەر ئەبێت؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved