»  شەکری تاڵ
ناوم بخەنە لیستی جاشەكانەوە



 
دزێوەترین رەفتاری بەعسیانە وا دوای 25 ساڵ بەسەر دەسەڵاتی خۆماڵی زیندوو دەكرێتەوەو هەر نووسەرو قەڵەم بەدەست و رۆژنامەنووسێك بەمەیلی  ئەوان بیر نەكاتەوەو دەنگ هەڵببڕێت و داوای دادو وتنی راستیەكان بكات، بە خائینی نەتەوەیی و دژی خاك و ئاڵا و وڵات ناوی تۆمار دەكرێت و سایتی بۆ دەكەنەوەو لە ڕێی تۆڕە كۆمەڵایەتییەكانیشەوە هانی نەخوێندەوارەكانی دەووربەرو كۆیلە ئەڵقە لە گوێیەكانیان دەدرێت، زیان بەو كەسیاتییانە بگەیەنن و بەو هۆیەوە ژیانی سەدان نووسەرو رۆژنامەنووس و رۆشنبیری گەلەكەمان كەوتوونەتە مەترسییەوەو تەنیا لەبەر ئەوەی وەك برادەرانی ئەولا بیر ناكەنەوە .
بەڵی یەكێتی لەگەڵ ریفراندۆمە، بەڵام نەك  ئەوەی كراوەتە كراسی بەر بووك و لایەنێك دەیەوێت بە زۆر بیبڕێ بە باڵای كەسێكدا، بەڵكو ریفراندۆمێك  كە میللەت یەكبخات و ناكۆكییەكان و مەترسییەكانی ترازانی نیشتمانی بڕەوێنێتەوەو پەرلەمانێكی كاراو خاوەن بڕیارو یاسای بۆ دەربكات و كەركوك و تەواوی ناوچەكانی دەرەوەی سنووری هەرێم، دەنگی بۆ بدەن ، ئەو ناوچانەی  كە لە 2013ـەوە ئەوانەی ئێستا دەهۆڵی سەربەخۆیی دەكوتن، رازیبوون گرەویان لەسەر بكەن و بەبێ لەبەرچاوگرتنی بەڵگە مێژووییەكان كەركوك و تەواوی ناوچە (تەعریب و تەرحیل و تەبعیس) كراوەكانیان سپاردە چارەنووسی نادیار .
بەڵی ئەگەر ئەوە خیانەت بێت، كە رووناكبیرێك دەنگ هەڵبڕێ و بڵێت با پایەكانی دەوڵەت بچەقێنین و بەیانی ئێران و توركیا لە تینوان نەماخنكێنن، ئەوا بینووسن و دونیای لێ پڕبكەنەوە، بەڵی ئەوە خیانەتە، بەڵام نەك بە مێژوو و خەبات و خوێنی شەهیدان، بەڵكو بەو یارییە هەرزە دۆڕاوەی كە چارەنووسی سەد ساڵی خەبات و قووربانیدانی رۆڵەكانی كورد وەك هێلكە دەكاتە سەبەتەی بەرژەوەندییەكانی ئەردۆگان و دەیەوێت  لە جێی دەوڵەتێكی بەشكۆو كوردانە پەرژین و حەوشەیەكی قایم بۆ تەماحكارییەكانی ئەردۆگان خۆش بكات .
بەڵی تا سەربازگەی تورك لە كانی ماسی و سنووری دهۆك بێ و تا بەشێكی نیشتمان بەدەست حەشدەوە بێت و تا كلیلی نەوت بە دەستی بێگانە پەرستەكانەوە بێت و تا داهاتووی ژیان و كەرامەت و شكۆی خەڵك دابین نەكرێت ریفراندۆم بۆ بكرێت.
سەیرە ئەو برادەرانەی ئەولا دەڵێن راپرسییەكە بۆ ئەوەیە بزانین میللەتی ئێمە چی دەڵێت ؟!! بۆ ڕاگەیاندنی سەربەخۆیی نییە ! ئێ باشە كاتێك بۆ سەربەخۆیی نەبێت و كەس دانی خێری پێدا نەنێت، ئەزبەنی  بۆچێ ئەو زەحمەتە دەكێشن، خۆ ئێمە هەموومان دەزانین چیمان دەوێت و میللەتی ئێمە بە درێژایی مێژوو زانیویەتی بۆ خەبات دەكات و بۆچی خوێن دەڕێژێت، بەس ئەوە سەركردایەتییەكەی بووە نەیزانیوە چۆن كار بۆ هێنانەدی ئەو خواستانە بكات.
 
ئیمزا
نێرگز قادر

‌ 2447 جار بینراوه‌
7/8/2017 9:45:45 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved