»  راپۆرت
پشتگوێخستن و خۆڵ و خاشاك و ئاوەڕۆ خاسە رووبەڕووی مەترسی دەكەنەوە



بەهۆی پشتگوێخستن و فڕێدانی خۆڵ و خاشاك و رژاندنی ئاوەڕۆی ماڵان تێیدا، چەمی خاسە كە بەناوەندی شاری كەركوكدا تێدەپەڕێت، رووبەرووی مەترسی لە دەستدانی سیما سروشتیەكەی بۆتەوە.

چەمی خاسە كە بە هیمایەكی سروشتی و ژینگەیی شاری كەركوك لە رابردوودا دادەنرا، ساڵانێكە سیمایی ژینگەیی خۆی لە دەستداوەو بۆتە شوێنێك بۆ كۆكردنەوەی خۆڵ و خاشاك و ئاوەڕۆی ماڵان، ئەمەش دواجار شارەكەی رووبەرووی مەترسی تەندروستی كردۆتەوە.
شەهاب حەكیم، بەڕێوەبەری سەرچاوە ئاوییەكانی كەركوك، لە لێدوانێكیدا بۆ ئەم راپۆرتەی (هەواڵ)، رایگەیاند: “هۆكاری پیسبوونی چەمی خاسە دەگەڕێتەوە بۆ فرێدانی خۆڵ و خاشاك و پیسی لەلایەن هاوڵاتیانەوە بۆ ناو چەمەكە”، روونیشیكردەوە:”بەهۆی نەبوونی بودجە، كاركردن لە نۆژەنكردنەوەی روباری خاسە وەستاوە”.
جگە لە فڕێدانی خۆڵ و خاشاك بۆ نێو خاسە، رێڕەوی ئاوەڕۆی ماڵانی نزیك چەمەكە خراوەتە نێو چەمی خاسە، ئەمەش بۆتە هۆكاری دروستبوونی زەلكاوێكی زۆر و سەوزبوونی قامیش و زەل، كە لە رووی تەندروستیەوە بە مەترسی بۆ سەر دانیشتووانی شارەكە دادەنرێت.
لەو بارەوە ناسیح فاتیح، بەڕێوەبەری فەرمانگەی ئاوەڕۆیی كەركوك، بۆ (هەواڵ)، وتی:”نەبوونی پرۆژەی پالڵاوتنی ئاوەڕۆ وایكردووە ماڵەكانی سەر چەمەكە یاخود نزیك لە چەمەكە، ئاوەڕۆكانیان بڕێژنە نێو چەمی خاسەوە”.
بە وتەی بەڕێوەبەری فەرمانگەی ئاوەڕۆیی كەركوك، بەهۆی نەبوونی شوێنێك بۆ پاڵاوتنی ئاوەڕۆ، ناتوانن هیچ رێوشوێنێكی یاسایی بەرانبەر بەو ماڵانە بگرنەبەر، چونكە شوێنێكی دیكە نیە ئاوەڕۆكانیان بڕێژننە سەری”.
هاوكات ناسیح فاتیح؛ بەرێوبەری ئاوەڕۆی كەركوك، ئاشكراشیكرد:”لە (60%)ـی ئاوەڕۆی شاری كەركوك چاكرراوەتەوە، بەڵام لە (40%)ـی تۆڕی ئاوەڕۆ و باراناوی ماوە و كاری قورس و ئاوەڕۆی گەورەی سندوقیش لەم شارەدا بوونی نییە”.
بە مەبەستی دوبارە زیندوكرنەوەی روباری خاسە، لە ساڵی (2010) دەستكرا بە دروستكردنی بەنداوێكی گەورە بە ناوی (خاسە چای) لە بەشی باكوری شارەكە و لە ساڵی (2015) كارەكانی تەواو بوو، ئەمەش تا وەك كۆگایەك ئاوی بەردەوام بۆ روبارەكە دابین بكات.
هاوكات هەر لەگەڵ دەستكردن بە كارەكانی بەنداوەكە، لە ساڵی (2012) بڕیار لەسەر نۆژەنكردنەوەی چەمی خاسە بە بڕی (29) ملیار دینار درا تا بە بەردەوامی ئاوی تێیدا بڕوات، بەڵام تائێستا ئەو پرۆژەیە تەواو نەكراوە و خاسەش جگە لە ئاسەوارێكی وشك هیچی تری تێدانییە.
رێبوار تاڵەبانی؛ سەرۆكی ئەنجومەنی پارێزگای كەركوك، لە لێدوانێكی پێشوتریدا بۆ (هەواڵ)، راگەیاندبوو:”لەبەر ئەوەی پرۆژەی نۆژەنكردنەوەی روباری خاسە كاری وەزارییە و لە دەستی بەغدادایە، وەك ئیدارەی كەركوك نازانین بۆچی راوەستاوە و تەواو ناكرێت”، ئاماژەی بەوەشدابوو:”زیاتر راوەستانی پرۆژەكە بۆ نەبوونی پارە دەگەڕێتەوە، چونكە تێكچونی دۆخی عێراق و دابەزینی نرخی نەوت كاریگەری ئابوری گەورەی دروستكردووە”.
سەبارەت بە هۆكاری فڕێدانی خۆڵ و خاشاك لە نێو روباری خاسە، بەڕێوەبەری شارەوانی كەركوك، هۆكارەكەی بۆ خاوەن دوكان و فرۆشیارانی نزیك روبارەكە دەگەڕێنێتەوە.
سەردار عەلی، بەڕێوەبەری شارەوانی كەركوك، تایبەت بەم راپۆرتەی (هەواڵ)، رایگەیاند:”ئەو خۆڵ و خاشاكەی لە روباری خاسە هەیە، لەلایەن خاوەن دوكان و فرۆشیارەكانی نزیك چەمەكە فرێدەدرێتە روبارەكەوە”.
وتیشی:”پێشتر رێگەی دابەزین بۆ ئۆتۆمبێلەكانی پاككەرەوە نەبوو، بەڵام لەئێستادا رێگایەكمان لە نزیك پردی قەڵا لەسەر روبارەكە بۆ ئۆتۆمبێلەكانی شارەوانی كردۆتەوە، تا بتوانن دابەزنە نێو چەمەكە بۆ كۆكردنەوەی خۆڵ و خاشاكەكان”.
جێی وتنە، چەمی خاسە درێژیەكەی (190)كم و بەشێكی بە كەركوكدا تێدەپەڕێ و شارەكە دەكات بە دوو بەشی بەری رۆژهەڵات و بەری رۆژئاوا، نزیكەی 16 كیلۆمەتری چەمی خاسە بە نێو سەنتەری شاری كەركوكدا تێپەر دەبێت.
‌ 271 جار بینراوه‌
7/22/2017 10:31:47 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved