»  راپۆرت
زۆر بوونی بەنزینخانەی ئەهلی لە كەركوك مەترسی لێدەكەوێتەوە
ئا/ هاوار ستار


كردنەوەی بەنزینخانەی ئەهلی لە شاری كەركوك بە شێوەیەكی بەربڵاو رووی لە زیاد بوون كردووە، لایەنە پەیوەندیدارەكانی شارەكەش بێ ئاگای خۆیان لە دروستكردنی بەنزینحانەكان دەردەبرن و  هۆشداری لەو باریەوە ئەدەن و دیاردەكەش بە مەترسیی ئەزانن.

سەبارەت بە بەنزینخانە ئەهلیەكانی ناو شاری كەركوك و دەوەروبەری كە بەشێكیان نافەرمین و هیچ موڵەتێكی یاسایان پێنەدراوە، بەرێوەبەری شارەوانی كەركوك دەڵێت:”ئەوانەی نافەرمین بەبێ ئاگاداری لایەنە پەیوەندیدارەكان دروستكراون و بە زیادەرۆن”.
سەردار عەلی بۆ (هەواڵ) وتیشی:”بەنزینحانە ئەهلیەكان روویان لە زیاد بون كردووە و ئەوانەش دەكرێنە دووبەشەوە، بەشێكیان فەرمین و لە رێگەی پارێزگا و بەرهەمە نەوتییەكان و شارەوانییەوە رێكارەكانیان دەگیرێتەبەر، بەرێوەبەری شارەوەانی كەركوك، ئاماژەی بۆ ئەوەشكرد:”بەشێكی دی لە بەنزینحانە ئەهلیەكان نافەرمین و تەجاوزن بە زیادەرەوی و بێ ئاگاداری لایەنە فەرمییەكان دروست كراون”.
لای خۆشیانەوە لیژنەی نەوت و وزە لە ئەنجومەنی پارێزگای كەركوك، بێ ئاگایی خۆیان  لە كردنەوەی بەشێكی زۆری ئەو  بەنزینخانانە دەردەبرن، ئاماژە بۆ ئەوەشدەكەن:”ئاگاداری چۆنێتی مۆڵەت پێدانی بەشێكی زۆری ئەو بەنزینحانانە نین”.
ئەحمەد عەسكەری، سەرۆكی لیژنەی نەوت و وزە لە ئەنجومەنی پارێزگا، سەبارەت بەم راپۆرتەی (هەواڵا) رایگەیاند:”ئەو بەنزینخانانە زۆربەیان رێگەیان پێنەدراوە و خاوەنەكانیان لە خۆیانەوە دایدەمەزرێنن”. وتیشی: “لە كردنەوەی زۆربەی ئەو بەنزینخانەنە وەكو ئەنجومەن ئاگامان لێ نییە ئەو كارە لە پارێزگاوە دەكرێت و ئاگاداری چۆنییەتی مۆڵەت پێدانیان نین”.
بوونی بەنزینخانە بەهۆی ماددەی سوتەمەنی و كۆگای گەورەوە بۆ هەڵگرتنی ماددەكان لە شوێنی ئاوەدان و نیشتەجێی دانیشتووان مەترسیدارە. لەو بارەیەوە، بەڕێوەبەری پۆلیسی بەرگری شارستانی كەركوكیش، دەڵێت:”ئەو بەنزینخانە ئەهلیانە رێكارە سەرەتاییەكان پەیرەو ناكەن”.
عەمید میقداد ساڵح، وتیشی :”زۆرێك لە بەنزینخانەكان شێوەی فەرمی خۆیان جێبەجێ نەكردووە هەرچەندە هەركاتێك بەنزینخانەیەك دروستكرابێت ئێمە چوین رێنماییەكانی بەرگری شارستانیمان پێداون”.
بەوتەی بەرێوبەری بەرگری شارستانی كەركوك باسی لەوەشكرد:”بەشێك لەو بەنزینخانانە تاپۆیان نییە و نەهاتون بە یاسایی داوای مەرجەكانی كردنەوەی بەنزینخانە لەروی شارستانییەوە بكەن”.
عەمید میقداد ، ئاماژەی بۆ ئەوەشكرد:”هەرچەندە ئەوان پابەندی رێنمایەكانی ئێمە نین بەڵام لە هەر حاڵەتێكی نەخوازراو ئێمە بە ئەركی خۆمانی دەزانین بەهانایانەوە بچین تاوەكو كەمترین زیان بە خەڵكی بگات”.
بەرێوەبەری بەرگری شارستانی كەركوك، ئەوەش ناشارێتەوە:”بەشێك لە خاوەنی بەنزینخانەكان سەردانی بەرگری شارستانیان نەكردوە بۆ رێنمایی وەرگرتن، بەڵكو خۆمان وەكو تیم دەردەچین و سەردانیان دەكەین بەڵام ئەوان گوێی پێنادەن”،؟
عەمید میقداد ساڵح، باس لەوەشدەكات، مەترسیی ئەو بەنزینخانانەیان بۆ ئیدارەی شار روونكردۆتەوە بۆ ئەوەی لێكۆڵینەوە لەو بارەیەوە بكرێتەوە، هاوكات ئەوەشیخستەروو:”بەشێك لە بەنزینخانەكان كە لە شوێنی گشتی و ئاوەدانی و لەنێو ماڵەكان و دروستدەكرێن و  دەبنە هۆی مەترسی بەڵام پارێزگا داوای ئامار و ژمارەی بەنزینخانەكانی لێكردوین و ئێمەش لەوەڵامدا پێمان راگەیاندون بەنزینخانەكان زۆربەیان یاسایی نین و نەهاتوون تا بزانین چەند بەنزینخانە لەم شارە هەن”.
چالاكوانێكی بواری ژینگەش، رایدەگەیەنێت:” لە هیچ یاساییەك ریگەَپێدراو نییە دوو بەنزینخانە یان زیاتر نزیك یەك دروستبكرێن”.
شكۆفە ساڵەیی، چالاكوان لە بواری ژینگە، بۆ (هەواڵ) رایگەیاند:”بەنزینخانە لە نێو ئاوەدانیدا مەترسی ژینگەییی هەیە”، وتیشی:”لە هیچ یاساییەكیش رێپێدراو نییە دوو بەنزینخانە یان زیاتر نزیك یەك هەبن”.
بەوتەی ئەو چالاكوانەی بواری ژینگە لە كەركوك، بە ئاشكرا دەبینرێت لە رێگای هەولێر و سلێمانی كۆمەڵێك بەنزینخانەی نزیك یەك دروست كراون كە ئەمە خۆی لە خۆیدا مەترسی ژینگەیی گەورەیە، باسی لەوەشكرد:”كاتێك لە بەنزینخانە بەنزین دادەگیرێتە نێو عەمبارەكان یان بە پێچەوانەشە بەنزینی لێوە دەگوازرێتەوە دەبینی بەشێك لە ماددەكە دەرژێت بەو رژانەش كە بەنزینی ئێمە ئۆكتانی سەد لەسەد نییە بەشێك لە توخمەكانی نێوی دەردەچێت كە یەكێك لەو توخمانە ماددەی قورقۆشمی خاوە”، ئەوەشیخستەروو: “رەساس مادەیەكی ژەهرینییە و لەنێو جۆرەكانی سوتەمەنی هەیە و دەچێتە هەواوە ئەمەش مەترسییە بۆ نێو هەوای شار و دواتر بۆ هەناسەدان و هەڵمژین”.
فەرمانگەی تەندروستی كەركوكیش، دەڵێت چاوەروانی بەدواداچونێكی ژینگەیین بۆ ئەوەی بزانین مەترسی تەندروستی لەسەر بەنزینخانەكان هەیە یاخود نا.
هەر سەبارەت بەو پرسە دكتۆر بورهان عومەر، بەڕێوەبەری بەشی تەندروستی لە فەرمانگەی تەندروستی كەركوك، بۆ (هەواڵ)، رایگەیاند:”بابەتەكە سەرەتا پەیوەندی بەژینگەوە هەیە و دەبێت توێژینەوە و لێكۆڵینەوەی و ردمان لەسەری هەبێت”، روونشیكردەوە:”دوای ئەوەی توێژینەوەی ژینگەیی بۆ بەنزینخانەكان كراو ماددەكانی نێو هەواو چواردەوریان دیاری كرا، ئەوكات دەتوانین رایبگەیەنم زیانی تەندروستی لە بوونی بەنزینخانەدا هەیە یان نا”.
‌ 305 جار بینراوه‌
7/22/2017 10:35:57 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved