»  وتاری هەفتە
پێمان بڵێن مەسەلە چییە با ئێمەش هەندێك پێبكەنین!
بورهان حاجی سلێمان


هاوكات لەگەڵ هەڕەشەو گوڕەشەكانی شیعەو سوننەو بڕیارە نا لۆژیكیەكەی ئەنجومەنی نوێنەرانی عێراق كە ئاماژەی بەكارهێنانی هێزی لە بەرانبەر پرۆسەیەكی ئاشتی تێدایە، سێشەمەی رابردوو لە هەنگاوێكی درەنگوەختەدا كاك مەسعود گەیشتە كەركوك.
دیارە لە چەند رۆژی رابردوودا چ بە ئەرێنی و چ بە نەرێنی زۆر قسە لەسەر سەردانەكە كراوە، هەربۆیە من تەنها لەسەر سێ تێبینی هەڵوەستە دەكەم كە لە میانەی سەردانەكەدا لام دروست بوونە:
یەكەمیان؛ هیوادارم بەرپرسە ئیداری و حیزبییەكانی شارەكە واقعەكەیان بێ كەم و زیاد بۆی وێناكردبێت و بەرپرسیارانە ژمارەو داتاكانیان خستبێتە بەردەستی و نیگەرانییەكانی خەڵكی كەركوكییان راشكاوانە و بێ پێچ و پەنا پێیڕاگەیاندبێت، بەتایبەتی ترسی دەستبەرداربوون لێیان و بەتەنیا جێهێشتنیان لەگەڵ روودانی هەر ئەگەرێكی نەخوازراودا، هەروەها كاریگەرییەكانی قەیرانی ئابووری و پشتگوێخستنی شارەكە لە لایەن حكومەتی هەرێم و كێشەو پەیوەندییەكانی حیزبە كوردستانییەكان لەسەر شارەكە... ئەگەر ئەوەش كرابێت هیوادارم ئەویش تێگەیشتنی بۆ دۆخەكە هەبێت و لە ژێر رۆشنایی ئەو راستیانەداو سوود لە دەستپێشخەرییە نێوەدەڵەتییەكە بڕیاری دروست بدات.
دووەم؛ هەر لە چوارچێوەی سەردانەكەدا وێنەیەك بڵاوبووەتەوەكە هەریەك لە بەڕێزان مەسعود بارزانی و كۆسرەت رەسوڵ و دكتۆر نەجمەدین كەریم لەوپەڕی حاڵەتی پێكەنیندان، ئەو وێنەیەش بووەتە جێگەی سەرنجی خەڵك و ناوەندە جیاجیاكان، چونكە لە كاتێكدا تەپڵی شەڕو ئاشوبەو پیلانگێڕی لە دژی كورد بە گشتی و كوردی كەركوك بەتایبەتی بە دووری 30 كیلۆمەترێك لەو هۆڵەی تیایدا كۆبوونەتەوە لێ دەدرێت، بەڵام ئەو سێ بەڕێزە كە بەوە ناسراون زۆر كەم پێدەكەنن، وەكو ئەوەی ئارامی باڵای بەسەر تەواوی ناوچەكەدا كێشابێت لە قاقای پێكەنینێكی قووڵدان، ئەم وێنەیەش وەكو هەموو پرسەكانی دیكە، خەڵكەكەی كردووەتە دوو بەرەوە، بەرەیەك بە ئاماژەی دڵنیاكردنەوەو مزگێنی دایدەنێن و پێیانوایە ئەو بەڕێزانە نهێنییەك دەزانن كە ئێمە نایزانین، لەبەرانبەردا بەرەیەك پێیوایە لەم كاتی تەنگەژەیەدا ئەم پێكەنینە گاڵتەكردنە بە هەستی هاوڵاتیانی شارەكەو گوێنەدانە بە چارەنووسی كەركوك و سەرو ماڵی كوردی ئەو شارە، بۆیە ئەگەر گرەنتی و بەڵێنێكی نهێنییان پێدراوە با بەشێوازێكی دیكە مەسجەكەمان پێبگەیەنن، چونكە پێكەنین دوو لێكدانەوەی بۆ دەكرێت و دووبەرەكییەكەش گەورەتر دەكاتەوە.
سێیەم؛ بڕیارێكی مەسعود بارزانییە بە دەستنیشانكردنی كۆسرەت رەسوڵ وەكو بەرپرسی هێزە چەكدارەكان و پاراستنی كەركوك، هەرچەندە بوونی فەرماندەیەكی سەربازی ئازاو شارەزای وەكو كاك كۆسرەت خۆی لە خۆیدا جێگەی دڵنیاییە، بەڵام نازام بۆ لەگەڵ بیستنی ئەو هەواڵەدا راچەڵەكیم و 21 ساڵ فلاش باگی بە یادەوەرییەكانم كرد بۆ ئەو رۆژەی كە كاك كۆسرەت لە 31ی ئابدا لە شاری هەولێر لەبەرانبەر تانكەكانی بەعسدا دەجەنگا، بەڵام بەپیلانێكی هەرێمایەتی ئەو شارەیان لە ژێر دەسەڵاتی حكومەت و حیزبەكەی دەرهێنا.
ئیستا ئەو سێ بەڕێزەی لەو وێنەیەدا دەركەتوون بەرپرسن لەسەر چارەنووسی كەركوك و ناوچە دابڕاوەكانی دیكە، ئەمەش هیچ لە بەرپرسیارێتی یەكێتی كەم ناكاتەوە، بە تایبەتی سەركردە كەركوكییەكانی كە ئەركیانە كەركوك لە هەڕەشەی دوژمنان و سەركێشی دۆستان بەدوور بگرن.



‌ 2164 جار بینراوه‌
9/16/2017 10:11:13 AM
Print Friendly and PDF
بابەتی زیاتر ...
راپرسی
پێت وایە دۆخی ئێستای كوردستان بەچی چارەسەر ئەبێت؟

سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved