»  راپۆرت
ئاوەڕۆی كەركوك پرۆژەی نوێی نییە
ئا / هەواڵ

ساڵانە لەگەڵ هاتنی وەرزی زستان و بارانی بەخوڕ بەشێك لە مەنهۆڵ و ئاوەڕۆكانی گەڕەكە جیاجیاكانی شاری كەركوك دەگێرێن و ئەوەش دەبێتە هۆی دروستبوونی لافاو، بە وتەی بەڕێوەبەری ئاوەڕۆی كەركوكیش وەكو ئامادەكارییەك  بۆ وەرزی باران لە زستانی داهاتوو تەواوی مەنهۆڵ و ئاوەڕۆكانی شارەكە پاككراونەتەوەو هیچ مەترسییەكیان بۆ وەرزی زستان لەسەر نییە. 
كەركوك یەكێكە لەو شارانەی كە تا ئێستا تۆڕێكی ئاوەڕۆی یەكگرتووی نییەو ساڵانەش لەگەڵ هاتنی وەرزی زستان باران بارین كێشەی جۆراوجۆر رووبەڕووی دانیشتووانی شارەكە دەبێتەوە لەو بارەیەوە، ناسیح فاتیح كەرەم، بەڕێوەبەری ئاوەڕۆی كەركوك بۆ (هەواڵ) رایگەیاند:" تیمەكانمان ساڵانە لە رۆژی 1-8 تا 1-11 بەردەوام دەبن لە پاكردنەوەی ئەو مەنهۆڵ و ئاوەڕۆیانە كە لە گەڕەكەكانی شاری كەركوك بە هۆی خۆڵ و خاشاكەوە دەگیرێن، بۆ ئەوەی لە وەرزی زستاندا نەبنە هۆكاری سەرهەڵدانی لافاو ".
بەڕێوەبەری ئاوەڕۆی كەركوك نەشیشاردەوە:" پرۆژەو پلانی باش و گەورە لە بواری ئاوەڕۆدا هەیە، بەڵام بەهۆی قەیرانی داراییەوە لە تواناماندا نییە ئەو پرۆژە گەورانە لە بواری ئاوەڕۆ بە ئەنجام بگەیەنن"، باسی لەوەشكرد:"  ئەوەی لە ئێستادا دەكرێت تەنها پاككردنەوەی مەنهۆڵ و ئاوەڕۆی ئەو شوێنانەیە كە مەترسی كۆبوونەوەی ئاویان لە وەرزی زستاندا لێدەكرێت".
بەڕێوەبەری ئاوەڕۆی كەركوك وتیشی:" كەركوك بە بەراورد بە شارەكانی تر لە ساڵانی رابردوودا لە رووی لافاوو كۆبوونەوەی ئاوی باران لە گەڕەك و شەقامە سەرەكییەكان زۆر باشتربووەو تائێستا مەترسییەكی وا گەورەی ".
 باسی لەوەشكرد:" هەندێك جار لە هەندێك گەڕەك لە دوای بارانێكی زۆر و بەخوڕ بۆ ماوەیەكی كاتی مەنهۆڵەكان پڕبوونە، ئەوەش دوای كاتژمێرێك ئاسایی بوونەتەوە یاخود تیمەكانیان بە زووترین كات چارەسەری ئەو كێشە و گرفتانەیان كردووە".
ناسیح فاتیح دڵنیاییشی دایە هاوڵاتیانی شارەكە بۆ وەرزی زستان هیچ مەترسییەك لەسەر مەنهۆڵ و ئاوەڕۆكان نییەو تیمی گەڕۆكیان هەیە بۆ هەر حاڵەتێكی لەناكاو كە بەشەوو رۆژ لە ئامادەباشیدان بە تایبەتی ئەو كاتانەی كە كەشناسی پێشبینی باران دەكات، بۆ ئەوەی هاوڵاتیانی كەركوك روبەڕووی هیچ مەترسییەك نەبنەوە".


‌ 345 جار بینراوه‌
9/16/2017 10:18:03 AM
Print Friendly and PDF
بابەتی زیاتر ...
سەرەکی  |    دەربارە  |    پەیوەندی  |    ئەرشیف
© 2015 HewalNews.com, All Rights Reserved